Mikambizho ya Kupwila kwa Bwikalo ne Mwingilo Wetu wa Bwina Kilishitu

Bijimo

• Byambo bya Kushinkwila 2

• Bya Buneme Biji mu Mambo a Lesa 3-5

  • Jashi 3

  • Bishinka Bikwabo Byanema 4

  • Kutanga Baibolo 5

• Taiko Muchima ku Mwingilo wa Kusapwila 6-14

  • Bya Kutendeka Mwisambo 7

  • Pa Kubwelako 8

  • Kufunjisha Bantu Kwikala Baana ba Bwanga 9

  • Kulumbulula byo Mwaitabilamo 10

  • Jashi 11

  • Bya Kwamba 12

  • Bya Kunengezha 13

  • Bya Kwingijisha Mavidyo ne Mabuku 14

• Byafwainwa Kwikala Bena Kilishitu 15-16

  • Lufunjisho lwa Baibolo lwa Kipwilo 16

• Byambo bya Kupezhako 17

• Kusanchila ne Kufundañanako 18

• Kimye 19

• Kufwakasha kwa Kalama wa Mwanzo 20

• Mulungu wa Kubuñana Nangwa wa Kushonkena 21

• Mulungu wa Kivuluko 22

• Kalama wa Kupwila kwa Bwikalo ne Mwingilo 23

• Wakumupando wa Kupwila kwa Bwikalo ne Mwingilo 24

• Wakufundañanako wa Kibiji 25

• Kibamba Kikwabo 26

• Mavidyo 27

1. Mikambizho iji mu uno pepala ya kukwasha bonse baji na lubaji mu Kupwila kwa Bwikalo ne Mwingilo. Bonse baji na majashi bafwainwa kulondelanga mikambizho iji mu Mutanchi wa Kupwila kwa Bwikalo ne Mwingilo ne iji mu uno pepala pa kunengezha majashi o bebapa. Basapwishi bonse bafwainwa kwambanga majashi a baana ba sukulu. Kabiji bonse babula basapwishi bapwila kimye kyonse, nabo bafwainwa kunembesha mu sukulu kikulutu balondela byaamba Baibolo kabiji baji na byubilo byafwainwa bena Kilishitu. Kalama wa Kupwila kwa Bwikalo ne Mwingilo wafwainwa kwisamba na babula kubabatizhiwa babena kukeba kunembesha mu sukulu pa bikebewa ne kwibabuula umvwe bafikilamo nangwa ne. Uno kalama wafwainwa kwisamba nanji ne umufunjisha Baibolo saka ajipo (nangwa bansemi yanji inge babatizhiwa). Bikebewa ku babena kukeba kunembesha mu sukulu byo bimotu na byafwainwa kufikizha bakeba kwikala basapwishi babula kubatizhiwa.—od kita. 8 jifu. 8.

BYAMBO BYA KUSHINKWILA

2. Miniti umo. Inge mwapwisha kwimba lwimbo ne lulombelo lwa kushinkwila kupwila kwa mukachi ka mulungu, wakumupando wa Kupwila kwa Bwikalo ne Mwingilo wafwainwa kwambapo byambo byafwainwa kuzakula bantu muchima. Kabiji wafwainwa kwamba bishinka byanema bisakukwasha kipwilo.

BYA BUNEME BIJI MU MAMBO A LESA

3. Jashi: Maminiti 10. Ajino jashi jikala na kishina ne bishinka bibiji nangwa bisatu biji mu Mutanchi wa Kupwila kwa Bwikalo ne Mwingilo. Mukulumpe mu kipwilo nangwa nkwasho wayuka kufunjisha bulongo ye wafwainwa kwamba jino jashi. Inge mubena kutendeka kufunda mu buku wa katataka wa mu Baibolo, mwafwainwa kutambisha vidyo walumbulula biji mu yewo buku. Onkao mambo, ñambi wafwainwa kwamba pa bishinka biji mu vidyo ne byo byakwatankana na kishina. Nangwa byonkabyo, wafwainwa kulumbulula bishinka byonse biji mu mutanchi wa kupwila. Inge kimye ko kiji, wafwainwa ne kulumbulula bulongo bipikichala byo byakwatankana na bishinka biji mu jashi. Wakonsha ne kwambapo pa bishinka bikwabo kikulutu byakwatankana na jashi.

4. Bishinka Bikwabo Byanema: Maminiti 10. Jino ke jashi ja mepuzho ne mikumbu. Kechi mwafwainwa kwambapo byambo pa kutendeka ne pa kupwisha ne. Mukulumpe mu kipwilo nangwa nkwasho wayuka kufunjisha bulongo ye wafwainwa kwamba jino jashi. Ñambi wafwainwa kwipuzha mepuzho onse. Kabiji wakonsha kufuukulapo mwine inge binembelo byonse biji kuntatwilo ya mepuzho wafwainwa kwibitanga nangwa ne. Babena kukumbula bafwainwa kwambapo mu masekondi 30 ne kubwela panshi.

5. Kutanga Baibolo: Maminiti 4. Mulongo ye wafwainwa kutanga. Mwana wa sukulu wafwainwa kutangatu byonka byo bamupa kwa kubula kwambapo byambo pa kutendeka nangwa pa kupezhako. Wakumupando wa kupwila wafwainwa kukwasha baana ba sukulu kutanga byambo saka byumvwanyika, kutanga bulongo, kushinkamika byambo bulongo, kwalaula alaula jiwi kwesakana na mwayila byambo, kutulumanako ne kutanga na jiwi ja kisemwa. Na mambo a kuba’mba byepelo bimo bivula bikwabo bikepa, Kalama wa Bwikalo ne Mwingilo wafwainwa kulanguluka pa bulume buji na yewo mwana wa sukulu kimye kyo abena kunengezha ba kwamba majashi.

TAIKO MUCHIMA KU MWINGILO WA KUSAPWILA

6. Maminiti 15. Akino kipungu bekinengezha kukwasha balongo ne banyenga kupituluka mu bya kwamba mu mwingilo, kwibakwasha kuyuka bya kwisamba bulongo na bantu, bya kusapwila ne bya kuwamishako busendwe bwabo bwa kufunjisha. Inge kibena kukebewa, bakulumpe mu kipwilo nabo bafwainwa kwambangako ano majashi. Baana basukulu bafwainwa kulondela lufunjisho lo babena kwingijilapo mu buloshuwa wa Kutanga ne Kufunjisha nangwa wa Temwai Bantu. Kimye kimo, kukekalanga jashi ja kwisamba na luonde. Mukulumpe nangwa nkwasho wayuka kufunjisha ye wafwainwa kwamba jino jashi.—Monai jifuka 15 pa kuba’mba muyuke byo mwafwainwa kuba mu luno lubaji.

7. Bya Kutendeka Mwisambo: Mulongo nangwa nyenga wafwainwa kwamba jino jashi. Wakumukwashako wafwainwa kwikala mulongo mukwabo nangwa nyenga mukwabo nangwa wa mu kisemi. Mwana wa sukulu ne ye abena kwamba nanji bakonsha kwikala nangwa kwimana.—Monai jifuka 12 13 pa kuba’mba muyukilepo bikwabo pa bya kwamba majashi a mu bumwisambo.

8. Pa Kubwelako: Luno lubaji lwafwainwa kwamba mulongo nangwa nyenga. Wakumukwashako wafwainwa kwikala mulongo mukwabo nangwa nyenga mukwabo. (km 5/97 ji. 2) Mwana wa sukulu ne ye abena kwamba nanji bakonsha kwikala nangwa kwimana. Ukambanga jino jashi wafwainwa kumwesha bya kwamba pa kubwela ku bantu bo twisambilepo nabo.—Pa kuba’mba muyuke byo mwafwainwa kunengezha luno lubaji, monai mafuka 12 ne 13.

9. Kufunjisha Bantu Kwikala Baana ba Bwanga: Mulongo nangwa nyenga wafwainwa kwamba jino jashi. Wakumukwashako wafwainwa kwikala mulongo mukwabo nangwa nyenga mukwabo. (km 5/97 ji. 2) Baji mu jashi bakonsha kwikala nangwa kwimana. Musapwishi wafwainwa kumwesha bya kufunjisha muntu Baibolo. Kechi mwafwainwa kwamba byambo bya kutendekelapo nangwa bya kupezhako ne, kanatu inge byo byaamba lufunjisho lo mubena kwingijilapo. Kechi mwafwainwa kutanga byambo byonse mwafuma jashi kimye kyo mubena kwamba ne, bino pa bimye bimo mwakonsha kuba bino.

10. Kulumbulula byo Mwaitabilamo: Inge jashi, ko kuba’mba mulongo ye wafwainwa kwamba jino jashi. Inge kimwesho, mulongo nangwa nyenga wakonsha kwingijila pa luno lubaji. Wakumukwashako wafwainwa kwikala mukwabo wamulume nangwa mukwabo wamukazhi, nangwa wa mu kisemi. Mwana wa sukulu wafwainwa kukumbula bulongo bwipuzho paimena kimwesho kwingijisha byambo biji mu buku yebabikapo. Pa kwamba jashi, mwana wa sukulu wakonsha kutongola mwafuma byambo nangwa ne.

11. Jashi: Mulongo ye wafwainwa kwamba jino jashi ja baana ba sukulu mu kipwilo. Inge jino jashi jafuma mu bya kulumbulula 1 mu buloshuwa wa Temwai Bantu, mwana wa sukulu wafwainwa kulumbulula byo twakonsha kwingijisha kyokyo kyepelo nangwa byobyo byepelo mu mwingilo wa kusapwila. Wafwainwa kulumbulula kimye kyo twakonsha kwingijisha kyokyo kinembelo, mwatala kyokyo kinembelo ne byo twakonsha kulumbulwila muntu ye tubena kwisamba nanji. Inge jashi jafuma mu kishinka kiji mu lufunjisho mu buloshuwa wa Temwai Bantu, mwana wa sukulu wafwainwa kuta muchima pa kulumbulula byo twakonsha kwingijisha kyokyo kishinka mu mwingilo. Wakonsha kwamba pa biji mu kishinka 1 mu lolo lufunjisho nangwa kwamba pa binembelo bikwabo inge muji bishinka byakwatankana na kishina kya jashi.

12. Bya Kwamba: Jino jifuka ne jalondelapo muji mikambizho ya bya kwamba pa lubaji lwa “Bya Kutendeka Mwisambo” ne “ Pa Kubwelako.” Kanatu inge banembapo mikambizho ikwabo, mwana wa sukulu wafwainwa kuta muchima pa kusapwila yeo muntu bukine bwa mu Baibolo bwapeela bwakwatankana na byatemwa yeo muntu ne kwala kitendekesho pa kukatendekela mwisambo kimye kikwabo. Mwana wa sukulu wafwainwa kusala mutwe wafwainwa kutako muchima bantu koko kwenu pa kyokyo kimye. Mwana wa sukulu wakonsha kufuukulapo kwingijisha biji mu byo twingijisha pa kufunjisha bantu, nabiji kumushila buku nangwa kumumwesha vidyo. Mu bimwesho kechi bafwainwa kwambangatu byambo byo balabijilatu ne, bafwainwa kuta muchima pa kuwamishako busendwe bwabo bwa kwisamba na bantu, pa bya kumwesha byo bata bantu muchima ne pa bya kwamba saka bakasuluka byonka byo baamba.

13. Bya Kunengezha: Mwana wa sukulu pa kunengezha jashi wafwainwa kulondela byo bamupa kwingijilapo bino kwesakana na byo kikala koko kwenu. Nabiji:

1. (1) Ku Nzubo ku Nzubo: Luno lubaji lwakumwesha bya kusapwila ku nzubo ku nzubo—mwakonsha kumwesha mwayako ku nzubo yabo, pa foni, nangwa kwibanembela nkalata—nangwa kumwesha bya kubwela ku muntu ye mwisambile nanji mu mwingilo wa kusapwila ku nzubo ku nzubo.

2. (2) Busapwishi bwa Kushukilwa: Luno lubaji lwa kumwesha bya kushukilwa tubimye twa kusapwila. Mwakonsha kwisamba na muntu pa kinembelo ku nkito, ku sukulu, nangwa muntu ye mwatana mu kimasamasa mo mwikala, mu sakya, nangwa ku mpunzha ikwabotu.

3. (3) Busapwishi bwa pa Mvula Bantu: Luno lubaji lwakonsha kwikala lwa kumwesha bya kusapwila kwingijisha tubipabi twakutanchikapo mabuku, kusapwila bantu ku mapunzha ko bengijila, busapwishi bwa mu mukwakwa, kusapwila bantu mu mapunzha mo bakokolokela nangwa ku mapunzha akwabotu kutanwa bantu.

14. Bya Kwingijisha Mavidyo ne Mabuku: Kwesakanatu na bintu byo biji, mwana wa sukulu wakonsha kwingijisha vidyo nangwa mabuku. Inge jashi jo bapa mwana wa sukulu muji vidyo nangwa inge mwine wafuukulapo kwingijisha vidyo wafwainwa kwisambatu nanji bintu biji mu yeo vidyo, bino kechi kumutambisha ne.

BYAFWAINWA KWIKALA BENA KILISHITU

15. Inge mwaimba lwimbo, mu maminiti 15 alondelapo mukekalanga jashi jimo nangwa abiji aimena pa kukwasha balongo ne banyenga bya kwingijisha bintu byo bafunda mu Mambo a Lesa. Kanatu inge paji mikambizho yapusanako, ano majashi mwafwainwa kupa bakulumpe mu kipwilo nangwa bankwasho bayuka kufunjisha bulongo. Inge ja bumwisambo ubena kutangijila wakonsha kwipuzha ne mepuzho akwabo kununga pa o banengezhezha jimo. Wafwainwa kwambatu byambo bya kushinkwila bichechetu pa kuba’mba asheko kimye kya kwisamba pa bishinka bijimo ne kya kukumbulapo balongo ne banyenga. Inge muji mwisambo wa mepuzho, inge kyakonsheka ye babena kwipuzha wafwainwa kuya pa mutuntamo kechi kukumbwilanga mepuzho mu luonde ne.

16. Lufunjisho lwa Baibolo lwa Kipwilo: Maminiti 30. Mukulumpe mu kipwilo wafikilamo ye wafwainwa kutangijila luno lufunjisho. (Mu bipwilo mwakepa bakulumpe, mwakonsha kwingijisha ne bankwasho bayuka kufunjisha bulongo.) Jibumba ja bakulumpe jafwainwa kusala bankwasho bayuka kufunjisha kutangijilanga Lufunjisho lwa Baibolo lwa Kipwilo. Kabiji bo mwasala, bafwainwa kutangijilanga bulongo pa kuba’mba lufunjisho lupwenga pa kimye, kutanga binembelo byo bamwesha ne kukwasha bonse kumwenamo mu lufunjisho lwa Baibolo. Pa kuba’mba bayuke bya kutangijila bulongo bafwainwa kupituluka mu mikambizho yaamba pa bya kutangijila majashi a mepuzho ne mikumbu. (w23.04 ji. 24, kakitenguluzha). Inge kya kuba bishinka byonse biji mu lufunjisho lwa Baibolo lwa Kipwilo byapwa, nangwa kya kuba kimye ko kikiji kechi mwafwainwa kutwajijila ne. Inge kyakonsheka, tanchikai balongo bapusana pusana ba kutanga ne ba kutangijila lufunjisho lwa Baibolo. Inge wakumupando wa Kupwila kwa Bwikalo ne Mwingilo wimubuula’mba muchibawizhe lufunjisho lwa Baibolo, ubena kutangijila wafwainwa kuchibawizha. Mafuka amo mwakonshatu kwipuzha mepuzho kwa kubula kwiatanga.

BYAMBO BYA KUPEZHAKO

17. Maminiti 3. Wakumupando wa Kupwila kwa Bwikalo ne Mwingilo ukapituluka mu bishinka byanema byo mwafunda. Wafwainwa ne kwambapo pa bishinka byo mukafunda mulungu walondelapo. Inge kimye kokiji, wakonsha ne kutongola mazhina a baana ba sukulu bakamba majashi mulungu walondelapo. Kanatu inge paji mikambizho yapusanako, inge kuji bya kubijika byanema nangwa inge kuji makalata abena kukebewa kutanga ku kipwilo, wakumupando wakonsha kubijika bino byonse mu kimye kyonka kyo bapana kwambilamo byambo bya kupezhako. Kechi mwafwainwa kubijika pa mutuntamo mutanchi wa kuya mu mwingilo ne mutanchi wa bakupyanga mu Nzubo ya Bufumu ne. Bya kubijika bya uno mutundu, mwafwainwa kwibibika pa kipabi kya mabulañano. Inge kya kuba kechi kyakonsheka kubijika nangwa kutanga makalata mu kimye kya kwambilamo byambo bya kupezhako ne, wakumupando wafwainwa kwambila balongo baji na majashi mu kipungu kya kupwila kwa Byafwainwa Kwikala Bena Kilishitu kwipipishako majashi abo. (Monai mafuka 16 ne 19.) Kupwila kwafwainwa kupwa na lwimbo ne lulombelo.

KUSANCHILA NE KUFUNDAÑANAKO

18. Inge mwana wa sukulu wapwisha kwamba jashi, wakumupando wa Kupwila kwa Bwikalo ne Mwingilo wafwainwa kumusanchila ne kumufundako mu miniti umo kwingijisha kishinka kyo bamupa kwingijilapo. Inge wakumupando watongola jashi jibena kwamba mwana wa sukulu, kechi wafwainwa kwamba lufunjisho lo abena kwingijilapo ne. Pano bino, inge mwana wa sukulu wapwisha kwamba jashi, wakumupando wafwainwa kumusanchila, apa bino watongola lufunjisho lo abena kwingijilapo ne kwamba mo aji kuba bulongo nangwa kwambako pacheche mo akonsha kuwamishako ne kumulumbulwila buneme bwa kuteshako muchima kulondela bishinka biji mu lolo lufunjisho ne byo akonsha kuba bino. Kabiji wakumupando wakonsha kwambapo ne pa mbaji ikwabo ya kimwesho yo amona’mba yakonsha kukwasha mwana wa sukulu nangwa baji mu luonde. Wakumupando wakonsha kumufundako ku mbaji aku mupwishatu kupwila nangwa pa kimyetu kikwabo kwamba pa lufunjisho lo bamupeele nangwa lukwabotu kwingijisha buloshuwa wa Temwai Bantu, wa Kutanga ne Kufunjisha nangwa buku wa Sukulu wa Mwingilo. Wakonsha kumufundako kwingijisha kishinka kyo a kwingijilangapo nangwa kikwabotu.—Pa kuba’mba muyuke mwingilo wingila wakumupando wa Kupwila kwa Bwikalo ne Mwingilo ne wakufundañanako wa kibiji, monai mafuka 19, 24, ne 25.

KIMYE

19. Kafwako jashi jafwainwa kukila pa kimye kyo bapaana ne. Kabiji wakumupando wa Kupwila kwa Bwikalo ne Mwingilo kechi wafwainwa kuvuzha bya kwamba ne. Nangwa kya kuba Mutanchi wa Kupwila kwa Bwikalo ne Mwingilo wamwesha kimye, bino kechi mwafwainwa kutwajijila kwamba inge kya kuba bishinka byapwa bino kimye saka kiji konka ne. Inge kimye kyapwa, mwafwainwa kuchibikizha mwana wa sukulu mu jishinda jawama. Inge balongo babena kwamba majashi akwabo baja kimye, Kalama wa Kupwila kwa Bwikalo ne Mwingilo nangwa wakufundañanako wa kibiji wafwainwa kwibafundako ku mbaji. (Monai jifuka 24 ne 25.) Kupwila konse, kuvwangakotu ne nyimbo ne milombelo, kwafwainwa kupwa mu jiola jimo ne maminiti 45.

KUFWAKASHA KWA KALAMA WA MWANZO

20. Inge kalama wa mwanzo wafwakesha kipwilo, kupwila kwafwainwa kwikala byonkatu byo bamwesha mu Mutanchi wa Kupwila kwa Bwikalo ne Mwingilo. Lufunjisho lwa Baibolo lwa Kipwilo luji pa kipungu kya kuba’mba Byafwainwa Kwikala Bena Kilishitu kechi lukekalako ne. Pano bino, pakapingakena jashi ja mwingilo ja maminiti 30 jikamba Kalama wa mwanzo. Jashi ja mwingilo saka jikyangye kutendeka, wakumupando wa Kupwila kwa Bwikalo ne Mwingilo wafwainwa kupituluka mu byo mwafunda mu yewo mulungu ne kubijika bya kubijika inge kobiji ne kutanga makalata anema inge po aji, apa bino waita kalama wa mwanzo. Inge jashi ja mwingilo japwa, kalama wa mwanzo mwine ukasala lwimbo wa kwimba pa kupezhako ne kwita mulongo wa kulomba lulombelo lwa kupezhako. Mulungu wafwakeshamo kalama wa mwanzo kechi kwafwainwa kwikala baana ba sukulu mu kibamba kikwabo ne. Jibumba jamba mulaka mukwabo jafwainwa kwiikela na kupwila nangwa kya kuba kalama wa mwanzo wafwakashila kipwilo mo baji. Nangwa byonkabyo, jino jibumba jafwainwa kubwela mu nzubo ya Bufumu kimye kalama wa mwanzo kyo akambanga jashi ja mwingilo.

MULUNGU WA KUBUÑANA NANGWA WA KUSHONKENA

21. Mu mulungu wa kubuñana nangwa wa kushonkena, kechi mwafwainwa kwikala na kupwila ne. Kipwilo bafwainwa kwikivululamo kuba’mba majashi a kupwila mu yewo mulungu, mwafwainwa kupitulukamo pa bunke bwenu nangwa na kisemi.

MULUNGU WA KIVULUKO

22. Inge Kivuluko kikekalako mukachi ka mulungu, kechi kukekala Kupwila kwa Bwikalo ne Mwingilo ne.

KALAMA WA KUPWILA KWA BWIKALO NE MWINGILO

23. Mukulumpe mu kipwilo ye basala ku jibumba ja bakulumpe ye ukekala kalama wa Kupwila kwa Bwikalo ne Mwingilo. Mwingilo wanji ke wakumona’mba kuno kupwila kwaenda bulongo kabiji bonse balondela ino mikambizho. Wafwainwa kwisambanga kimye kyonse na wakufundañanako wa kibiji. Aku mutambwilatu Mutanchi wa Kupwila kwa Bwikalo ne Mwingilo, kalama wa Kupwila kwa Bwikalo ne Mwingilo ukatanchikila jimo majashi a baana ba sukulu pa bañondo babiji. Ukatanchika ne majashi onse, bakumupando bo basala ku jibumba ja bakulumpe, ne majashi a baana ba sukulu. (Monai mafuka 3-16 ne 24 Pa kupa baana ba sukulu majashi, wafwainwa kulanguluka pa jifumbi, busendwe ne kwiipuzha’mba nanchi ukasuluka kwamba pa uno mutwe nyi? Kalama wa Kupwila kwa Bwikalo ne Mwingilo wafwainwa kulanguluka pa bino bintu ne pa kupaana majashi akwabo. Majashi onse mwafwainwa kwiapana saka kwashala milungu isatu juba ja kwamba jashi saka jikyangye kufika kwingijisha Kapepala ka Jashi ja mu Kupwila kwa Bwikalo ne Mwingilo Wetu wa Bwina Kilishitu. (S-89) Kalama wa Kupwila kwa Bwikalo ne Mwingilo wafwainwa kumona kuba’mba mutanchi wa kupwila konse bamubika pa kipabi kya mabulañano. Jibumba ja bakulumpe jakonsha kusala mukulumpe mukwabo nangwa nkwasho wakumukwashako. Bino bakulumpe mu kipwilo bo bafwainwatu kupanga balongo majashi abula a baana ba sukulu.

WAKUMUPANDO WA KUPWILA KWA BWIKALO NE MWINGILO

24. Mulungu ne mulungu, mukulumpe mu kipwilo umo ukekalanga wakumupando wa Kupwila kwa Bwikalo ne Mwingilo. (Inge bakulumpe mu kipwilo bakepa, mwakonsha kusala bankwasho bayuka kufunjisha kwikala bakumupando.) Wakumupando wa Kupwila kwa Bwikalo ne Mwingilo wafwainwa kunengezha byambo bya kushinkwila ne bya kupezhako. Kabiji uketanga bonse baji na majashi pa kupwila. Inge pa kipwilo paji bakulumpe bacheche, wakumupando naye wakonsha kwambako majashi amo kikatakata majashi a kutambisha vidyo mwabula bya kwisambapo. Wakumupando kechi wafwainwa kwambanga byambo byavula pa kusanchila waamba jashi ne. Jibumba ja bakulumpe mu kipwilo jikasala bakulumpe bayuka kufunjisha kwikala bakumupando. Bakulumpe mu kipwilo bayuka kufunjisha bo bakekalanga bakumupando mulungu ne mulungu. Kwesakana na bintu byo biji mu kipwilo kyenu, kalama wa Kupwila kwa Bwikalo ne Mwingilo ye wakonsha kwikala wakumupando pa bimye byavula kukila bakulumpe bakwabo. Inge mukulumpe mu kipwilo wafwainwa kutangijila Lufunjisho lwa Baibolo lwa Kipwilo, ko kuba’mba wafikilamo kwikala wakumupando pa kupwila. Pano bino, yukai’mba wakumupando wafwainwa kusanchila ne kufundako baana ba sukulu mu jishinda jawama inge kibena kukebewa. Wakumupando ye uji na mwingilo wakumona kuba’mba kupwila kwapwa pa kimye kyafwainwa. (Monai jifuka 17 ne 19.) Inge wakumupando ukeba, kabiji paji mpunzha pa mutuntamo, bafwainwa kumubikila maikolofoni pa mutuntamo ya kwambilamo saka aimana, pa kuba’mba akonshenga kwita mulongo uji na jashi saka aimana kala ku kya kwambilamo kikwabo. Kimye kimo wakumupando wakonsha kwikala ku tebulu kimye mwana wa sukulu kyo abena kutanga Baibolo ne kimye kya kwisamba pa kipungu kya kuba’mba Taiko Muchima ku Mwingilo wa Kusapwila. Kuba bino kukwasha kubula kuja kimye.

WAKUFUNDAÑANAKO WA KIBIJI

25. Inge kyakonsheka, kyawama kwingijisha mukulumpe mu kipwilo wayuka kwamba majashi bulongo kwikala wakufundañanako wa kibiji. Mwingilo wanji ke kufundako bakulumpe mu kipwilo ne bankwasho kwa bunke pa majashi onse o bamba kuvwangakotu ne a mu Kupwila kwa Bwikalo ne Mwingilo, majashi a mvula bantu, kutangijila, kutanga Kyamba kya Usopa nangwa Lufunjisho lwa Baibolo lwa Kipwilo. (Monai ifuka 19.) Inge kya kuba mu kipwilo muji bakulumpe bavula bayuka kwamba bulongo majashi ne kufunjisha, ko kuba’mba mwafwainwa kupimpulanga wakufundañanako wa kibiji pa mwaka pa mwaka. Kechi kyafwainwa kimye kyonse wakufundañanako wa kibiji kufundako balongo pa majashi onse o bamba ne.

KIBAMBA KIKWABO

26. Inge baana ba sukulu bavula, mwakonsha kunengezha kuba’mba bamo bambilenga majashi mu kibamba kikwabo. Mu kibamba kikwabo mwafwainwa kwikala na wakufundañanako wa kibiji wayuka bulongo kufunjisha kikatakata mukulumpe mu kipwilo. Inge kibena kukebewa, mwakonsha kwingijisha nkwasho wayuka kufunjisha bulongo. Jibumba ja bakulumpe mu kipwilo jo jafwainwa kusala bafwainwa kwingila uno mwingilo. Kabiji bafwainwa ne kumona inge bakulumpe mu kipwilo bakwabo bafwainwa kwingilako uno mwingilo nangwa ne. Wakufundañanako wafwainwa kulondela mikambizho iji mu jifuka 18. Inge kwaikala kibamba kikwabo, mwafwainwa kubuula baana ba sukulu kuya mu kibamba kikwabo inge mwapwisha kipungu kya kuba’mba Bishinka Bikwabo Byanema mu kupwila kwa Bya Buneme Biji mu Mambo a Lesa. Bafwainwa kubwela jikwabo muji bonse inge bapwisha majashi a baana ba sukulu.

MAVIDYO

27. Jibumba ja Lesa jinengezhezha jimo mavidyo a kwingijisha pa kuno kupwila. Mavidyo a kwingijisha pa kupwila kwa mukachi ka mulungu mwafwainwa kwiataana pa JW Library® kabiji mwakonsha kwingijisha foni, tabuleti ne kompyuta kukopolola ano mavidyo.

© 2023 Watch Tower Bible and Tract Society of Pennsylvania

S-38-KD 11/23