Sukulu wa Mwingilo wa Lesa wa mu 2015 Witukwasha Kuwamishako byo Tufunjisha

¹ Nyimbi wa masalamo aye Davida wanembele’mba: “Byambo bya mu kanwa kami ne bintu byo ndanguluka mu muchima wami bimutokesha ku muchima, anweba Yehoba, Jibwe jami kabiji Mukuzhi wami.” (Sala. 19:14) Byonka byajinga Davida, tukeba byambo byetu kutokeshanga Yehoba ku muchima ne kunemeka jishuko jetu ja kwambanga bukine mu kipwilo ne mu mwingilo. Sukulu wa Mwingilo wa Lesa ke jishinda jimo Yehoba jo etufunjishishamo kwingila mwingilo. Luno lufunjisho lubiwa pa mulungu pa mulungu mu bipwilo kukila pa 111,000 mwaya ntanda yonse. Luno lufunjisho lwakwasha balongo ne banyenga ntanda yonse baji na nkomeno yapusana pusana kwikala bamwingilo ba mambo awama bafikapo, kabiji bakonsha kufunjisha na kwitabizha, kujimuka ne kuchinchika.—Byu. 19:8; Kolo. 4:6.

² Mutanchi wa sukulu wa mu 2015 mukekala mitwe ya kwisambapo “Byambo bya Kutendekelapo bya Mambo a Lesa” ne “Mutanchi wa Byambo bya mu Baibolo,” biji mu Baibolo wa Binembelo bya Ntanda Ipya. Kunungapo, bapimpula kimye kya kwamba Bishinka Bikatampe ne Jashi Na. 1. Luno lupimpu pamo na mikambizho ya kulondela pa kwamba majashi byaambiwapo mu mafuka alondelapo.

³ Bishinka Bikatampe: Balongo babena kwamba jino jashi bafwainwa kwamba mu maminiti abiji ne kwambatu kishinka kimo kikwashañana kyafuma mu Binembelo bya mu kutanga Baibolo kwa mu yewo mulungu. Kunengezha bulongo kukemulengela kwamba pa kishinka kyanema ku kipwilo mu kimye kyo bemupa. Apa bino, kipwilo kikekala na maminiti 6 akwambilamo byambo bicheche pa masekondi 30 nangwa kubwela panshi pa bishinka bya mu kutanga kwa Baibolo kwa yewo mulungu. Kikebewa kunengezha bulongo ne kutako muchima pa kuba’mba mwambe byambo byaumvwanyika bulongo mu masekondi 30, kabiji kuba bino ke lufunjisho lwanema bingi kwi atweba. Kino kikwashako bakwetu nabo kwamba byambo byo bapesele pesele.

⁴ Jashi Na. 1: Kimye kya kutangilamo Baibolo bekikepeshako ke maminiti asatu ne kubwela panshi, kabiji bakatangangatu kichika kya jipa mu kinembelo. Aba bo bapa jino jashi bafwainwa kupitulukangamo mu jino jashi na jiwi ja peulu ne kuta muchima ku ntelelo ya byambo ne kulalumuka pa kuba ‘mba milanguluko yumvwanyike. Bantu bonse ba Yehoba bafwainwa kwibikako kutanga bulongo, mambo kutanga kwanema bingi mu mpopwelo yetu. Byo twasangalalapo pa kumona kuba’mba baana betu bavula batanga bingi bulongo, kabiji twafwainwa kusanchila bansemi byo bebikako na butemwe pa kukwasha baana babo kutanganga bulongo.

⁵ Jashi Na. 2: Jino jashi ja maminiti atanu bakejambanga ku banyenga. Bafwainwa kwamba pa mutwe yenka ye be bapa. Inge jashi jafuma mu Baibolo wa Binembelo bya Ntanda Ipya, mwafwainwa kwijamba kwingijisha jishinda jimo jingila bulongo mu mwingilo ku yoyo nyaunda ya koko kwenu. Umvwe jashi jafuma mu Kyamba kya Usopa, mwana wa sukulu wafwainwa kwamba jashi kwesakana na mutwe wa jashi, kusala binembelo byafwainwa bulongo, ne kwamba pa bintu byo twafwainwa kufunjilako ku muntu wa mu Baibolo. Umvwe jashi jafuma mu Kyamba kya Usopa, mwana wa sukulu wafwainwa kwamba jashi kwesakana na mutwe wa jashi, kusala binembelo byafwainwa bulongo, ne kwamba pa bintu byo twafwainwa kufunjilako ku muntu wa mu Baibolo. Binembelo bikwabo byakwatankana na mutwe mwakonsha kwibingijisha. Kalama wa sukulu ukamusajila ye akamba nanji jino jashi.

⁶ Jashi Na. 3: Jino jashi ja maminiti atanu bakejambanga ku banyenga nangwa balongo. Umvwe nyenga ye ubena kwamba jino jashi, wafwainwa kwijamba nobe Jashi Na. 2. Umvwe mulongo ye ubena kwamba jino jashi, jafuma mu Kyamba kya Usopa wafwainwa kwijamba nobe jashi ku luonde lonse mu Nzubo ya Bufumu. Mwana wa sukulu wafwainwa kwamba kwesakana na mutwe ye bamupa, kusala binembelo byafwainwa ne kwamba pa byo twafwainwa kufunjilako ku muntu wa mu Baibolo.

⁷ Lubaji lwa Katataka lwa Jashi Na. 3 ja Balongo: Umvwe jino jashi jafuma mu Binembelo bya Ntanda Ipya, wafwainwa kwijamba nobe uji pa lufunjisho lwa kisemi nangwa mu mwingilo. Kalama wa sukulu ukamusajila ye akamba nanji jino jashi ne jishinda ja kwambilamo. Wa kwamba nanji jashi wafwainwa kwikala wa mu kisemi nangwa mulongo mukwabo mu kipwilo. Mwakonsha ne kwingijisha binembelo bikwabo byakwatankana na mutwe wa jashi. Inge papita kimye, jino jashi bakejamba ku mukulumpe mu kipwilo. Bakulumpe mu kipwilo bakonsha kwisajila bene wa kwamba nanji ne jishinda ja kwambilamo. Kwa kubula nangwa kuzhinaukatu ne, kikatundaika kipwilo kumona bakulumpe byo babena kwingijisha busendwe bwa kufunjisha pa kwamba jashi na wa mu kisemi nangwa na mulongo mukwabo.

⁸ Kufundañana: Kalama wa sukulu wafwainwa kwingijisha maminiti abiji kutakaikilamo bana ba sukulu inge bapwisha kwamba jashi, ne kwamba pa ene mambo o aambila’mba wauba bulongo kwesakana na byaamba buku wa Mwenaimo mu Sukulu wa Lufunjisho lwa Mwingilo wa Lesa. Kalama wa sukulu inge waita mwana wa sukulu kechi wafwainwa kwamba lufunjisho lubena kwamba pa ñambilo yo abena kwingijilapo ne. Panyuma ya kuba mwana wa sukulu waamba jashi ne kumusanchila, kalama wa sukulu wafwainwa kwamba lufunjisho lo abena kwingijilapo ne kwamba mo aji kuba bulongo nangwa kwambako pacheche mo akonsha kuwamishako inge mwana wa sukulu watwajijila kulondela kino kishinka.

⁹ Kwimuvululakotu, pepala wa kufunjilwapo mwana wa sukulu mwakonsha kumutaana pa mapa 79 kufika ku 81 mu buku wanji wa Sukulu wa Mwingilo. Umvwe mwana wa sukulu waamba jashi janji, kalama wa sukulu ukakyonga mu buku wa mwana sukulu ne kumushikisha kumbaji inge waubile mwingilo wa kuba uji ku mpelo ya mafunde o mwamupele kulondela. Mwakonsha kumutundaika mwana sukulu ne kumukwashako mu mbaji ikwabo panyuma ya kupwila nangwa kimye kikwabo. Kuta muchima mwana wa sukulu yense wanembesha mu sukulu kwakonsha kumulengela kuyilako palutwe ku mupashi.—1 Timo. 4:15.

¹⁰ Inge mwana wa sukulu waja kimye, kalama wa sukulu nangwa nkwasho wanji wafwainwa kumulabula, nabiji kujizha ngengele nangwa kulengapo ka kyongo ka kumumwesha’mba kimye kyapwa mu jishinda jafwainwa. Mwana wa sukulu wafwainwa kulondela byo bamulabula ne kupwishatu mukuku ye abena kwamba ne kufumapo pa mutuntamo.—Monai buku wa Sukulu wa Mwingilo, jipa 282, jifu. 4.

¹¹ Bonse bafikizha bikebewa batundaikwa kunembesha mu Sukulu wa Mwingilo wa Lesa. (Monai buku wa Sukulu wa Mwingilo, jipa 282, jifu. 6.) Bifunda bantu mu uno sukulu bikwasha bantu ba Yehoba kwamba ne kufunjisha mambo awama saka basumininwa, kuchinchika ne na butemwe. Kwa kubula nangwa kuzhinaukatu ne, Yehoba kimutokesha ku muchima pa kumutakaika ku bo ba babena kumwenamo bingi mu uno sukulu wa Lesa.—Sala. 148:12, 13; Isa. 50:4.