Bakulumpe ne Bankwasho mu Kipwilo Batongolwa na Lesa

“Iketai anwe bene, ne jitanga jonse, jo bemupejile bukulumpe kwi Mupashi Wazhila.”—BYUBILO 20:28.

1, 2. Isaya 60:22 ubena kufikizhiwa byepi?

KALA KEENE Yehoba waambijile jimo’mba, mu moba akapelako mukobiwa kintu kyakukumya. Kyaambiwe mwi ngauzhi Isaya kuba’mba: “Awa mucheche ukekala ke kisaka kyabaya, ne yewa wakepa ukekala ke mukoka wakosa; amiwa Yehoba yami nkapelawizha kwikifikizha mu kimye kyakyo.”—Isaya 60:22.

² Abya pajipo kiyukilo kya kuba’mba buno bungauzhi bubena kufikizhiwa lelo jino nyi? Ee, pokiji! Mu myaka ya mu ma 1870, kipwilo kimo kya bantu ba Yehoba kyalengelwe mu Allegheny, Pennsylvania, U.S.A. Kufuma mu kano kajibumba kacheche, bipwilo byavula byapangwa kabiji bibena kuvujilako mwaya ntanda yonse. Bataya mbila ya Bufumu bavula nangwa’mba mukoka wakosa, babena kupwañana pamo mu bipwilo 91,000 mu byalo 235 mwaya ntanda yonse. Kwakubula nangwa kuzhinaukatu ne, kino kibena kumwesha kuba’mba Yehoba ubena kupelawizha mwingilo wa kukonkanya bapopweshi bakine “malwa akatampe,” afwenya kala pepi saka akyangye kufika.—Mateo 24:21; Lumwekesho 7:9-14.

3. Kubatizwa ‘mu jizhina ja Tata ne ja mwana ne ja mupashi wazhila’ kulumbulula ka?

³ Pa nyuma ya kwipana abo bene kwi Yehoba kwesakana na mikambizho ya Yesu, bano bantu bavula babatizwe “mu jizhina ja Tata ne ja Mwana ne ja Mupashi Wazhila.” (Mateo 28:19) Kubatizwa “mu jizhina ja Tata” kulumbulula’mba bano bantu bepana, bayuka’mba Yehoba ye Shabo wa mwiulu Upana Bumi kabiji bakokela bufumu bwanji. Kubatizwa mu ‘jizhina ja Mwana’ kulumbulula’mba baitabizha’mba Yesu Kilishitu ye Mukuzhi wabo, Ntangi wabo kabiji Mfumu wabo. Kabiji bayuka ne mwingilo wa mupashi wazhila wa Lesa nangwa’mba ngovu ingila ibatangijila mu bwikalo bwabo. Kino kyo kimwesha kuba’mba babatizwa ‘mu jizhina ja mupashi wazhila.’

4. Ba mwingilo ba bwina Kilishitu batongolwa byepi?

⁴ Pa lubatizhilo lwabo, baana ba bwanga bakatataka bekala ke ba mwingilo ba Yehoba Lesa. Ñanyi wibatongola? Byambo byanembwa pa 2 Kolinda 3:5 bibalamata bya kuba’mba: “Kukonsha kwetu [atweba ba mwingilo] kufuma kwi Lesa.” Kafwako mwingilo mukwabo mukatampe ye bakonsha kukeba wakila pa wibapa Yehoba Lesa ne! Pa nyuma ya lubatizhilo lwabo, batwajijila na kukoma ku mupashi byo baji ba mwingilo wa “mambo awama” kikulutu baitabizha mupashi wa Lesa kwibatangijila ne kutwajijila kwingijisha Byambo byanji.—Mateo 24:14; Byubilo 9:31.

Batongolwa na Lesa Kechi Basalwa ku Bantu Ne

5. Nanchi bakulumpe ne bankwasho mu kipwilo bavotelwa ku bantu nyi? Lumbululai.

⁵ Bakulumpe bafikapo ne bankwasho bafwainwa kwingila na ngovu mu kipwilo bo babena kukebewa kutala pa kukajilwa kwa ku mupashi kwa basapwishi babambakana babena kuvujilako. (Filipai 1:1) Bano banabalume ba ku mupashi batongolwa byepi? Kechi batongolwa mu mashinda engijishiwa mu Kilishitendomu ne. Kya kumwenako, bakulumpe ba bwina Kilishitu kechi batongolwa ku bantu kupichila mu kwibavotela ku bavula baji mu kipwilo ne. Bano bantu batongolwa na Lesa. Nanchi kino kyatala muka?

6. Nanchi teokalasi wa kine ye muka? (b) Mambo ka kutongolwa kwa bakulumpe ne bankwasho mu kipwilo kyo kwaikela kwa teokalasi?

⁶ Kwambatu kine, teokalasi wakine bo bukalama bwa Lesa. Bakamonyi ba kwa Yehoba bepana bene kukokela bukalama bwa Lesa, kabiji bakwatankana pamo mu kuba kyaswa muchima wanji. (Masalamo 143:10; Mateo 6:9, 10) Kutongolwa kwa bakulumpe ne bankwasho ba bwina Kilishitu mu kipwilo kubiwa na Lesa mambo akuba jishinda jingijishiwa pa kutongola bano banabalume jubiwa kwesakana na lunengezho lwa Lesa luji mu Binembelo Byazhila. Kabiji byo aji “peulu ya byonse,” aye mwine Yehoba ye uji na lūsa lwa kumona bibena kwingila jibumba janji jimweka na meso.—1 Byambo bya Moba 29:11; Masalamo 97:9.

7. Bakamonyi ba kwa Yehoba bakwatankana byepi?

⁷ Kupusanako na bupopweshi bwavula bwa mu Kilishitendomu, Bakamonyi ba kwa Yehoba kechi befuukwila bene byafwainwa kwikala buntangi mu bupopweshi bo bajimo ne. Bano bena Kilishitu bakine bomvwina mafunde a Yehoba. Bakulumpe mu kipwilo bo baji nabo kechi babikwa pa bukulumpe ku ba mu kipwilo nangwa na bantangi ba bupopweshi ne. Umvwe bantu ba ku kyalo ke bakebe kutwelelela mu kuno kutongola, bantu ba Yehoba bakana kukokela. Mu bukishinka, boba byonka byaubile batumwa mu kitota-myaka kitanshi baambile’mba “Twafwainwa kukokela Lesa kukila bantu.” (Byubilo 5:29) Mu jino jishinda Bakamonyi bakokela Lesa mu bintu byonse. (Bahebelu 12:9; Yakoba 4:7) Kulondela mashinda a Lesa kulengela kwitabizhiwa kwi aye.

8. Mashinda engijishiwa mu kusalwa ku bantu ne ja kutongolwa na Lesa apusana byepi?

⁸ Byo tuji bakalume ba Yehoba Kalama Mukatampe, tuba bulongo kulabijila lupusano luji pakachi ka jishinda ja kusalwa ku bantu ne ja kutongolwa na Lesa. Mashinda a kusalwa ku bantu pekala bipanyi bibiji ne kumona ñanyi ye basakusala ku bavula kwikala pa kifulo. Mashinda a uno mutundu kechi oengijishiwa pa kutongolwa kwi Lesa ne. Kuno kutongolwa kechi kufuma ku bantu; nangwa ku bije byaswishiwa na muzhilo ne. Pa kwamba pa mambo a kutongolwa kwanji koatongwelwe kwi Yesu ne kwi Yehoba kwikala ‘mutumwa wa Bagentila,’ Paulo wabujile bena Ngalatiya’mba kechi watongwelwe “ku bantu ne, nangwa kutongolwa ku muntu ne, poso kwi Yesu Kilishitu, ne kwi Lesa Tata, wamusangwile mu bafu.”—Loma 11:13; Ngalatiya 1:1.

Kutongolwa na Mupashi Wazhila

9. Byubilo 20:28 byambapo’mba ka pa mambo a kutongolwa kwa bakulumpe ba bwina Kilishitu mu kipwilo?

⁹ Paulo wavulwile bakulumpe mu kipwilo mu Efisesa kuba’mba batongwelwe na Lesa kupichila mu mupashi wazhila. Waambile’mba: ‘Iketai anwe bene, ne jitanga jonse, jo bemupejile bukulumpe kwi Mupashi Wazhila, amba mujishe kipwilo kya Lesa, kyo apotele na mashi a [Mwananji, NW] mwine.’ (Byubilo 20:28) Aba bakulumpe byo baingijilenga mwingilo wabo wa kulama jitanga ja Lesa batangijilwenga na mupashi wazhila. Umvwe mwanamulume wasajilwe kwikala mukulumpe mu kipwilo keazhilulule mizhilo ya Lesa, mukupita kwa kimye mupashi wazhila wafumishengapo muntu wa yewo mutundu pa kifulo kya bukulumpe.

10. Mambo ka o kyaikela kuba’amba mupashi wazhila uji na mwingilo mukatampe mu kutongolwa na Lesa?

¹⁰ Mambo ka o kyaikela kuba’mba mupashi wazhila uji na mwingilo mukatampe mu kuno kutongola? Patanshi, binembelo byamba pa bipimo bikebewa ku mukulumpe wa ku mupashi byanembeshiwe na mupashi wazhila. Mu makalata anji o anembejile Timoti ne Titusa, Paulo watongwele bipimo bikebewa ku bakulumpe ne bankwasho mu kipwilo. Watongwelepo bipimo bimo byafwainwa 16. Kya kumwenako, bakulumpe mu kipwilo bafwainwe kwikala babula kaneneno, belama bulongo, baji na bwikalo bwalumbuluka, batemwa kutambwila benyi, baji na maana a kufunjisha kabiji byakumwenako byawama inge mitwe ya bisemi. Kechi bafwainwe kwikala ba kutoma-toma maalwa nangwa kwikala batemwa mali ne, bafwainwe kwikala bekanya. Bipimo bya yenka uno mutundu byo byaimikwe ne ku banabalume bakanamijilenga kwikala bankwasho mu kipwilo.—1 Timoti 3:1-10, 12, 13; Titusa 1:5-9.

11. Ñanyi bipimo bimo bikebewa ku banabalume babena kukanamina mwingilo wa kipwilo?

¹¹ Kupituluka mu bino bipimo kumwesha kuba’mba abo batangijila mu kupopwela Yehoba bafwainwa kwikala bya kumwenako byawama mu bwikalo bwa bwina Kilishitu. Banabalume bakanamina kwikala ba mwingilo mu kipwilo bafwainwa kumwesha kuba’mba mupashi wazhila uji pe abo. (2 Timoti 1:14) Kyafwainwa kumweka kuba’mba mupashi wa Lesa ubena kupanga mu bano banabalume bipangwa bya ‘butemwe, lusekelo, mutende, kukoka muchima, lusa, buwame, bukishinka, bukimote ne kwikanya.’ (Ngalatiya 5:22, 23) Bafwainwa kumwesha bipangwa bya uno mutundu pa kwingila na bakwabo baitabila ne babula kwitabila. Kya kine, bamo bakonsha kumwesha bipangwa bya ku mupashi byafwainwa bukulumpe bukiji-bukiji bakwabo nabo pachepache. Onkao mambo, mu bwikalo bwabo bonse aba bakeba kutongolwa kwikala bakulumpe nangwa bankwasho mu kipwilo bafwainwa kumwesha kuba’mba banabalume ba bumupashi, bafika pa bipimo biji mu Byambo bya Lesa.

12. Bañanyi bafwainwa kwambiwa’mba batongolwa na mupashi wazhila?

¹² Paulo byo akambizhe bakwabo kwikala ba kumulonda aye, waambile kino saka ekiyuka bulongo mambo aye mwine walondelanga Yesu Kilishitu witushijile ‘mwa kulondela monka mu ngayo yanji.’ (1 Petelo 2:21; 1 Kolinda 11:1) O ene mambo o kyambiwa’mba abo bafika pa bipimo bikebewa bya mu Binembelo pa kimye kya kwibatongola kwikala bakulumpe nangwa bankwasho mu kipwilo batongolwa na mupashi wazhila.

13. Mupashi wazhila ukwasha byepi babena kwitabizha banabalume ba kwingila mu kipwilo?

¹³ Paji kishinka kikwabo kimwesha mupashi wazhila byo engila pa kwitabizha ne pa kutongola bakulumpe mu kipwilo. Yesu waambile’mba ‘Shenu wa mwiulu upana mupashi wazhila ku bamulomba.’ (Luka 11:13) Onkao mambo, kimye kipwila pamo bakulumpe mu kipwilo kuba’mba betabizhe banabalume ba kwingila mwingilo mu kipwilo kyo bajimo, patanshi bakilomba mupashi wa Lesa kwibatangijila. Kwitabizha kwabo kwimana pa byatongolwa mu Byambo byanembeshiwa kwi Lesa, kabiji mupashi wazhila wibakwasha kuyuka kana muntu ye babena kwisambapo wafikapo pa bikebewa bya mu Binembelo nangwa ne. Abo babena kwitabizha bano bantu kechi bafwainwa kutalatu pa mwekanyikilo ya muntu, nfunjilo yanji nangwa bulume bwanji ne. Kyanema kyo bafwainwa kumona ke kya kuba’mba uno muntu kya kine muntu wa bumupashi, ye bakonsha kusolomoka ba mu kipwilo kwakubula kukankazhama kuba’mba ebabuleko maana a ku mupashi.

14. Mu Byubilo 6:1-3 tufundamo ka?

¹⁴ Nangwa kya kuba’mba mabumba a bakulumpe mu bipwilo bekala pamo na bapaina benda pa kwitabizha balongo kwikala bakulumpe nangwa bankwasho mu kipwilo, kutongolwa kwine kubiwa kwesakana na byo kyaubiwanga mu kitota-myaka kitanshi. Kwajinga kimye kimo kya kebewenga banabalume bafikapo ku mupashi ba kwingila mwingilo wanema. Jibumba jatangijilenga pa kyo kya kimye japaine uno mukambizho: ‘Monaimo mwi anweba banabalume batanu ne babiji, batelwa bulongo ku bonse, bayula na Mupashi ne maana, twibatongwele uno mwingilo.’ (Byubilo 6:1-3) Nangwa kya kuba’mba bano banabalume bobakambizhe, baitabizhe bano bantu, kutongolwa kwine kwaubiwe na banabalume batalanga pa uno mwingilo mu Yelusalema. Jishinda ja yenkao mutundu jo jibena kwingijishiwa ne lelo jino.

15. Jibumba Jitangijila javwangwa byepi mu bya kutongola banabalume?

¹⁵ Jibumba Jitangijila ja Bakamonyi ba kwa Yehoba jo jitongola bonse baji mu Makometi a Misampi. Pa kutongola wakonsha kupewa uno mwingilo mukatampe, Jibumba Jitangijila jilanguluka pa mawi a kwa Yesu a kuba’mba: “Awa wapewa byavula, kwi aye bakasaka byavula: kabiji kwi yewa ye bafikizhizha byavula, naye bakamwipuzha byavula byakila.” (Luka 12:48) Kunungapo pa kutongola ba mu Kometi ya Musampi, Jibumba Jitangijila jitongola ne bakulumpe bakwabo pa Betele ne bapaina benda. Nangwa kikala byonkabyo, jibula balongo baketekelwa kwijimenako mu kutongola bakwabo. Kuno nako ke kutongolwa kwa mu Binembelo.

‘Tongola Monka mo Nakulayijile’

16. Ñanyi mambo Paulo o ashijile Titusa mu Keleta, kabiji kino kimwesha ka pa mambo a kutongolwa na Lesa lelo?

¹⁶ Paulo wabujile mukwabo wa mwingilo Titusa’mba: “Na onka ano mambo o nakushijile mu Keleta, namba unengezhe bintu byashajilepo, ne kutongola bakulumpe mu mizhi yonse, monka mo nakulayijile.” (Titusa 1:5) Kepo Paulo alumbulwijile Titusa byo afwainwe kukeba mu banabalume bafikile pa kutongolwa kwikala bakulumpe ne bankwasho mu kipwilo. Ne lelo jino, Jibumba Jitangijila jitongola balongo bafikapo ku mupashi pa maofweshi a misampi kwijimenako kutongola bakulumpe ne bankwasho mu bipwilo. Babena kwimenako Jibumba Jitangijila bengila bingi na ngovu ne kumona kuba’mba baumvwisha ne kulondela mikambizho ya mu Binembelo pa kutongolwa kwa uno mutundu. Onkao mambo banabalume bafika pa bipimo bikebewa batongolwa na lutangijilo lwa Jibumba Jitangijila kwingila mu bipwilo bya Bakamonyi ba kwa Yehoba mwaya ntanda yonse.

17. Kwitabizha kwa kutongola bakulumpe ne bankwasho mu kipwilo kwingijiwapo byepi na ofweshi ya musampi?

¹⁷ Umvwe kwitabizhiwa kwa kutongola bakulumpe ne bankwasho mu kipwilo kwatumwa ku ofweshi ya musampi wa Watch Tower Society, banabalume bayukisha baketekela mupashi wa Lesa kuba’mba ebatangijile pa kutongola bano bantu. Bano banabalume bayuka kuba’mba baketotolwela kabiji bavuluka’mba kechi bafwainwa kupelawizha kutenteka maboko pa muntu nangwa umo ne, kuchiina’mba bakefwisha mu mambo anji.—1 Timoti 5:22.

18, 19. (a) Kutongolwa kumo kutumwa byepi ku kipwilo? (b) Jishinda jonse ja kwitabizhizhamo ne kutongwelamo bakulumpe ne bankwasho mu kipwilo jitangijilwa na ka?

¹⁸ Kutongolwa kumo kwa bakulumpe ne bankwasho mu kipwilo kwakonsha kutumwa ku kipwilo kupichila mu nkalata yafuma ku kije kyaswishiwa na muzhilo yobaimbapo nshimbi. Ino nkalata paimbwa nshimbi kimo kimye panembwa mazhina a balongo kukila nangwa pa umo, batongolwa mu kipwilo.

¹⁹ Ntongwelo ya teokalasi ifuma kwi Yehoba kupichila mu Mwananji ne jishinda ja Lesa ja pano pa ntanda jimweka na meso, ja “kalume wa kishinka ne wa mana” ne Jibumba ja jo Jitangijila. (Mateo 24:45-47) Jishinda jonse ja kwitabizhizhamo ne kutongwelamo bakulumpe ne bankwasho mu kipwilo jitangijilwa na mupashi wazhila. Kikala bino mambo a kuba’mba bipimo bikebewa pa kuba’mba muntu atongolwe kwikala mukulumpe nangwa nkwasho mu kipwilo biji mu Byambo bya Lesa byanembeshiwe na mupashi wazhila. Kabiji muntu watongolwa wafwainwa saka amwesha bipangwa bya mupashi. Onkao mambo kutongolwa kwa bano bantu kwafwainwa kumonwa’mba mupashi wazhila ye wibatongola. Byonkatu Lesa byo atongolanga bakulumpe ne bankwasho mu kipwilo mu kitota-myaka kitanshi, byo byo oba ne lelo jino.

Kusanchila Buntangi bwa Yehoba

20. Mambo ka otwambila byambo byaambilepo Davida pa Masalamo 133:1?

²⁰ Pa kino kimye kyo tubena kununguluka ku mupashi ne mu mwingilo wa Lesa wa kusapwila Bufumu, tusanta bingi pa kumona kuba’mba Yehoba yeutongola bakulumpe ne bankwasho mu bipwilo. Luno lunengezho lwa mu Binembelo lwitukwasha kubila bintu mwayila bipimo bya Lesa byaoloka, byo tuji Bakamonyi banji. Kikwabo, mupashi wa bwina Kilishitu ne kwibikako kwa bano bakulumpe ne bankwasho mu kipwilo kwitukwasha kwikala mutende mu buumo byo tuji bakalume ba Yehoba. Onkao mambo, twamba byonka byaambile Davida kuba’mba: “Talai byo kyawama ne byo kitutokela ku muchima kana balongo ne balongo baikala pamo na muchima umotu!”—Masalamo 133:1.

21. Isaya 60:17 ubena kufikizhiwa byepi?

²¹ Byo tusantapo pa buntangi bwa Yehoba kupichila mu Buku wanji ne mupashi wanji wazhila! Kabiji byambo byanembwa pa Isaya 60:17 bya kuba’mba: “Pajinga lubemba nkapingakenyapo ngolode, kabiji pajinga kyela kya kapotwe nkapingakenyapo siliva, kabiji pajinga bichi nkapingakenyapo lubemba, kabiji pajinga mabwe nkapingakenyapo kyela kya kapotwe. Amiwa nkalula mutende ke kapitao wobe ne bololoke ke mukulumpe wobe,” byanema bingi. Mashinda a teokalasi byo abena kufikizhiwa pache-pache mu Bakamonyi ba kwa Yehoba, twamona kuno kutongolwa kwapeshiwa mu jibumba jonse ja Lesa ja pano pa ntanda.

22. Tubena kusanchila ka, kabiji tubena kusakisha kuba ka?

²² Tubena kusanta bingi pa lunengezho lwa teokalasi lubena kwingila pakachi ketu. Kabiji tubena kusanchila bingi mwingilo wakosa bino uleta lusekelo ubena kwingila bakulumpe ne bankwasho batongolwa na Lesa mu bipwilo. Tubena kutakaika Shetu wa mwiulu ubena kwitukomesha ku mupashi ne kwitupesha pakatampe na muchima yense. (Byambo bya Mana 10:22) Onkao mambo twayai twendelenga pamo na jibumba ja Yehoba. Kya kila pa byonse twayai tutwajijile na kwingijila pamo pa kuba’mba tunemeke, tutote, ne kutumbijika jizhina jikatampe jazhila ja Yehoba.

Musakukumbula’mba Ka?

• Mambo ka o twakonsha kwambila’mba bakulumpe ne bankwasho mu kipwilo batongolwa na Lesa kechi basalwa ku bantu ne?

• Banabalume ba bwina Kilishitu bengila mwingilo batongolwa byepi na mupashi wazhila?

• Ñanyi mwingilo wingila Jibumba Jitangijila pa kutongola bakulumpe ne bankwasho mu kipwilo?

• Pa mambo a kutongolwa na Lesa, mambo ka o twafwainwa kusanchila Yehoba?

[Bipikichala pa peja 9]

Bakulumpe ne bankwasho mu kipwilo bengila uno mwingilo mambo batongolwa na Lesa