Endelainga Pamo na Jibumba ja Yehoba

“Aye Lesa wa mutende . . . emulumbulule mu bintu byonse byawama, mube kyaswa muchima wanji.”—BAHEBELU 13:20, 21.

1. Bantu bonse baji banga pano pa ntanda, kabiji banga babalwa mu bupopweshi bwapusana-pusana?

MU MWAKA wa 1999, kibelengelo kya bantu bonse pano pa ntanda kyafikile ku 6 bilyonyi! Buku wa The World Almanac umwesha’mba pa kino kibelengelo, bantu 1,165,000,000 ba Mozelemu; 1,030,000,000 ba Katolika; 762,000,000 ba Hindu; 354,000,000 ba Budda; 316,000,000 ba Polotesitanti; ne bantu 214,000,000 ba bupopweshi bwa Orthodox.

2. Kika kyakonsha kwambiwa pa byubilo bibena kubiwa mu bupopweshi lelo jino?

² Abya bano bonse babena kuba bintu mwaswila muchima wa Lesa, na mepatulo ne bimvulañanya byavula bibye mu bupopweshi lelo jino nyi? Ine, “mambo Lesa kechi ye Lesa wa kiwowo ne, ye wa mutende.” (1 Kolinda 14:33) Lubaji lukwabo, ibyepi pa mambo a bulongo bwa ntanda yonse bwa bakalume ba Yehoba? (1 Petelo 2:17) Kukeba-keba bulongo kumwesha kuba’mba ‘Lesa wa mutende wibalumbulula mu bintu byonse byawama, kuba kyaswa muchima wanji.’—Bahebelu 13:20, 21.

3. Kika kyamwekele mu Yelusalema pa Pentekosta wa 33 C.E., kabiji mambo ka?

³ Nangwatu kuvula kwa bantu bapwañana na Bakamonyi ba kwa Yehoba kechi kyo kipimo kya kuyukilako amba bo baji na bibusa bya Lesa ne, kuvwangakotu ne bibelengelo bibena kuvujilako, nabyo kechi byo bitokesha Lesa pa muchima ne. Lesa kechi wasalulwile bena Isalela “na mambo a kuvula” kukila ba mu mikoka ikwabo ne. Bajinga “mukoka wakepeshatu” kukila ba mu mikoka yonse. (Mpitulukilo ya mu mizhilo 7:7) Yehoba waangachile bena Isalela bibusa byanji mambo a kubula bukishinka, ne kwibipana ku kipwilo kya bwina Kilishitu kipya kya baana ba bwanga ba kwa Yesu pa Pentekosta wa 33 C.E. Bashingilwe na mupashi wazhila wa Yehoba kabiji babambakene na kusapwila bukine bwa Lesa ne Kilishitu ku bakwabo.—Byubilo 2:41, 42.

Kutwajijila na Kununguluka

4. Mambo ka o mwakonsha kwambila’mba kipwilo kitanshi kya bwina Kilishitu kyatwajijile kununguluka?

⁴ Mu kitota-myaka kitanshi, kipwilo kya bwina Kilishitu kyanungulukilenga, batendekele kusapwila mu manyaunda apya o babulanga kusapwilamo, kulenga baana ba bwanga, ne kukebesha kumvwisha kyaswa muchima wa Lesa ne nkebelo yanji. Bena Kilishitu batanshi baendejilenga pamo na kyeya kyasaminenga kyapanyiwenga kupichila mu binembelo byanembeshiwa kwi Lesa. Batundaikilwenga bingi mu mwingilo wabo byo bebafwakashijilenga ku batumwa ne bakwabo. Abye byonse byanembwa mu Binembelo bya bwina Kilishitu bya Kingiliki.—Byubilo 10:21, 22; 13:46, 47; 2 Timoti. 1:13; 4:5; Bahebelu. 6:1-3; 2 Petelo. 3:17, 18.

5. Mambo ka jibumba ja Yehoba kyo jibena kunungulukila mu ano moba, kabiji mambo ka o twafwainwa kwendelanga najo pamo?

⁵ Byonka byo kyajinga ku bena Kilishitu batanshi, Bakamonyi ba kwa Yehoba ba ano moba pa kutendeka bajingatu bacheche. (Zekaliya 4:8-10) Aku kitota-myaka kya bu 19 kipwatu, kyamwekeshatu patoka kuba’mba mupashi wa Lesa uji pa jibumba janji. Na mambo a kuketekela mupashi wazhila kwitutangijila kechi ku ngovu ya muntu ne, twatwajijila na kununguluka mu kumvwisha Binembelo ne mu kuba kyaswa muchima wa Lesa. (Zekaliya 4:6) Pano byotuji mu ‘moba apelako,’ twafwainwa kwendelanga pamo na jibumba ja Yehoba jibena kununguluka. (2 Timoti 3:1-5) Mambo kuba kino kwitulengela kukwachijisha luketekelo lwetu ne kusapwila mambo a Bufumu bwa Lesa bwaikajikwa mpelo ya buno bwikalo saka ikyangye kufika.—Mateo 24:3-14.

6, 7. Ñanyi mashinda asatu anungulukilamo jibumba ja Yehoba o tusakwisambapo?

⁶ Mukachi ketu muji batendekele kupwañana na jibumba ja Yehoba mu ma 1920, 1930, ne mu ma 1940. Mu yo ya myaka itanshi, ñanyi mwi atweba wafwanyikizhe bikabaya jibumba ne kununguluka kwajo byonka byo jafika lelo jino? Akilangulukai pa byubilo bikatampe bya ubiwa mu mpito ya ano moba etu! Kibena kusangajika bingi ku mupashi pa kulanguluka byaingila Yehoba kupichila mu bantu banji bakwatankana mu bukalama bwanji.

⁷ Davida wasekejile bingi byo alangulukile-langulukilenga pa mingilo ya kukumya ya Yehoba. Waambile’mba: “Umvwe nasaka kwiimwesha ne kwiyamba, yakila mu kuvula kechi yakonsheka kubalwa ne.” (Masalamo 40:5) Byonka byo twamona kala, ne atweba kechi twakonsha kwiimwesha ne kwiibala ne. Tukankalwatu ne kushimikizha mingilo yavula yawama yaingila Yehoba mu ano moba etu a lelo. Nangwa kiji byonkabyo, twayai twisambe pa mbaji isatu mwanungulukila jibumba ja Yehoba: (1) kyeya kya ku mupashi kibena kunungulukilako, (2) mwingilo wawama kabiji wabailako, ne (3) lupimpu lwa pa kimye kyafwainwa mu mashinda anungulukilamo jibumba.

Kusanta na Mambo a Kyeya kya ku Mupashi

8. Kwesakana na Byambo bya Mana 4:18, kyeya kya ku mupashi kitukwasha kuyuka ka pa mambo a Bufumu?

⁸ Pa mambo a kyeya kya ku mupashi, kibena kununguluka, Byambo bya Mana 4:18 byaamba kine’mba: “Jishinda ja baoloka jauba nobe kyeya kya kumakya, kyenda kisama ne kusamisha, kufika ne pa kushinkimana juba.” Byo twasantapo pa mambo a kyeya kya ku mupashi kitusamina kibena kunungulukilako! Pa kupwila kukatampe kwajingako mu Cedar Point, Ohio, mu 1919, Bufumu bwa Lesa bwatumbijikilwe. Buno Bufumu bo boengijisha Yehoba mu kutumbijika jizhina janji ne kubingisha bumfumu bwanji. Kya kine, kyeya kya ku mupashi kitukwasha kumona’mba kufumatu ku Ntendekelo shoo ne ku Lumwekesho, Baibolo ishimuna’mba Yehoba kyo akeba ke kutumbijika jizhina janji kupichila mu Bufumu bubena kulamwa na Mwananji. Bonse batemwa bololoke bakinka manungo mu buno Bufumu.—Mateo 12:18, 21.

9, 10. Mu myaka ya mu ma 1920, kika kyafunjilwe pa mambo a Bufumu ne mabumba abiji abena kwilwisha, kabiji kino kitukwasha byepi?

⁹ Pa kupwila kwajingako mu Cedar Point mu 1922, ñambi aye J. F. Rutherford wasashijile bantu ba Lesa amba: “tayai mbila, tayai mbila, tayai mbila ya Mfumu ne bufumu bwanji.” Mutwe uji mu Kyamba kya Usopa kya Kizungu kya March 1, 1925, wakuba’mba “Birth of the Nation,” (Kusemwa kwa Mukoka) watongwele maana a ku mupashi pa mambo a bungauzhi bwatongwele kimye kya kulutwe kikekajikilwamo Bufumu bwa Lesa mu 1914. Kabiji mu ma 1920 kyayukanyikilwe kuba’mba kuji mabumba abiji apusana abena kwilwisha, jibumba ja Yehoba ne ja Satana. Bulwi bwa ano mabumba abiji po bukiji, onkao mambo, umvwe ketwendele pamo na jibumba ja Yehoba twakonsha kwikala na lubaji lwa jibumba jibena kushinda.

¹⁰ Nanchi kino kyeya kya ku mupashi kitukwasha byepi? Kitukwasha mu kuba’mba Bufumu bwa Lesa ne Mfumu Yesu Kilishitu byo babula ba pano pa ntanda, ne atweba kechi twafwainwa kwikala mu bya pano pa ntanda ne. Byo twabula kwikala ba pano pa ntanda, tumwesha kuba’mba tuji ku lubaji lwa bukine. (Yoano 17:16; 18:37) Byo tumona makatazho a maama nanfwa aji mu buno bwikalo bwabipa, tusanta bingi pa kubula kwikala ku lubaji lwa jibumba ja Satana! Kabiji byo twaubilwapo bibusa pa kuvimbilwa ku mupashi mu jibumba ja Yehoba!

11. Ñanyi jizhina ja mu Binembelo jasajile bantu ba Lesa mu 1931?

¹¹ Pa kupwila kukatampe kwajinga mu Columbus, Ohio, mu 1931, kinembelo kya Isaya 43:10-12 po po bekilumbulwile bulongo. Bafunda Baibolo basajile jizhina japusanako na akwabo ja kuba’mba Bakamonyi ba kwa Yehoba. Byo jijipo jishuko jikatampe ja kusapwila jizhina ja Lesa kuba’mba bakwetu nabo bejitenga bakapuluke!—Masalamo 83:18; Loma 10:13

12. Ñanyi kyeya kya ku mupashi kyapainwe pa mambo a jibumba jikatampe mu 1935?

¹² Mwaka wa 1930 saka akyangye kufika, bantu ba Lesa bavula, bazhinaukilenga pa mambo a luketekelo lwa bwikalo bwabo bwa kimye kya kulutwe. Bamo balangulukanga kuya mwiulu, basangajikilwe bingi pa kumvwa mafunjisho a Baibolo a ntanda ya paladisa. Pa kupwila kukatampe kwajinga mu Washington, D.C., mu 1935 kyasangajikile bingi pa kufunda’mba jibumba jikatampe ja mu Lumwekesho kyapitala 7 ke jibumba jiji na luketekelo lwa kwikala pano pa ntanda. Kufumatu kyokya kimye, kukonkanyiwa kwa ba jibumba jikatampe kwanunguluka bingi lubilo . Nanchi kechi twasanta pa kumona’mba jibumba jikatampe kechi kintu kyafyamika kotuji nenyi? Bukine bwa bantu babena kukonkanyiwa mu bibelengelo bikatampe kufuma mu mikoka, bisaka, ne mu njimi yonse bwitukosesha kwingila na ngovu byo tubena kwendela pamo na jibumba ja Yehoba.

13. Ñanyi mambo akatampe akonkomwenwepo mu 1941 pa kupwila kukatampe kwajingako mu St. Louis?

¹³ Mambo akatampe alamata bantu bonse akonkomwenwepo mu 1941 pa kupwila kukatampe kwajinga mu St. Louis, Missouri. Ano ajinga mambo a bukalama nangwa’mba a bumfumu bwa kulengwa konse. O mambo afwainwa kuchibiwa bukiji-bukiji, kabiji ne juba jikatampe jilenga moyo ja kuchibilamo ano mambo jafwenya kala ke pepi! Kikwabo kyakonkomwenwepo mu 1941 kyajinga mambo alamata ku bulumbuluke, abo bwitulengela kumwesha lubaji lotwaimenapo atweba bonse pa muntu pa muntu pa mambo a bufumu bwa Lesa.

14. Pa kupwila kukatampe kwa mikoka kwajingako mu 1950, kika kyafunjiwepo pa mambo a babinemanga batongolwa pa Isaya 32: 1, 2?

¹⁴ Pa kupwila kukatampe kwa mikoka kwajingako mu New York City mu 1950, babinemanga banembwa mu Isaya 32:1, 2 bayukanyikilwe. Kyajinga kimye kya lusekelo bingi Mulongo Frederick Franz byo aambilepo pa uno mutwe, ne kulumbulula’mba baji mukachi ketu bakekala babinemanga ne mu ntanda ipya. Pa kokwa kupwila kukatampe ne kupwila kukwabo kwalondejilengapo, kyeya kya ku mupashi kyatwajijile na kusama. (Masalamo 97:11) Byo twasantapo kuba’mba jishinda jetu “jauba nobe kyeya kya kumakya, kyenda kisama ne kusamisha”!

Kununguluka mu Mwingilo Wetu

15, 16. (a) Twanungulukile byepi mu mwingilo wetu mu ma 1920, ne mu ma 1930? (b) Mabuku ka aingijishiwa pa kutundaika mwingilo wa bwina Kilishitu mu ino myaka?

¹⁵ Jishinda ja bubiji janungulukilamo jibumba ja Yehoba ke jalamata ku mwingilo wetu mukatampe wa kusapwila Bufumu ne kulenga baana ba bwanga. (Mateo 28:19, 20; Mako 13:10) Pa kuba’mba twingile uno mwingilo, jibumba jitubujisha buneme bwa kunungulula mwingilo wetu. Mu 1922 bena Kilishitu bonse bakambizhiwe kwingila mwingilo wa kusapwila. Kyajinga ku mwine muntu kumwesha kyeya kyanji kupichila mu kushimuna bya bukine. (Mateo 5:14-16) Mu 1927, juba ja pa Mulungu janengezhiwe kwikala juba ja mwingilo wa mu bujimi. Kutendeka mu February 1940, Bakamonyi basapwijilenga konse konse, mu mikwakwa ya mu makambi a busulu saka batambika Kyamba kya Usopa ne Consolation (pa kino kimye ubena kutelwa’mba Loleni!).

¹⁶ Mu 1937, kabuku ka Model Study kalupwilwe kabiji kakonkomwejile pa kubwelako jibiji ku bantu ne kwibafunjisha bukine bwa mu Baibolo. Mu myaka yalondejilepo, mwingilo wa mafunjisho a Baibolo wa konkomwejilwepo bingi. Uno mwingilo waingijiwenga na buku wa “Lekeni Lesa Abe Uwacine” mu 1946 kepo mu 1968 buku mukwabo wa kuba’mba Icine Icitungulula ku Mweo wa Muyayaya waingijishiwenga. Pa kino kimye tubena kwingijisha buku wa Kuyuka Kutangijila ku Bumi Bwa Myaka. Kufunjisha mu ano mabuku kwaala kitendekesho kyakosa kya mu Binembelo pa kulenga baana ba bwanga.

Kunungulukila Pamo na Lupimpu lwa Ubiwa mu Jibumba

17. Kwendela pamo na Isaya 60:17, jibumba ja Yehoba janunguluka byepi?

¹⁷ Jishinda ja busatu mwanungulukila jibumba ja Yehoba ke ja kutokesha jibumba. Kwesakana na Isaya 60:17, Yehoba walaile’mba: “Pajinga lubemba nkapingakenyapo ngolode, kabiji pajinga kyela kya kapotwe nkapingakenyapo siliva, kabiji pajinga bichi nkapingakenyapo lubemba, kabiji pajinga mabwe nkapingakenyapo kyela kya kapotwe. Amiwa nkalula mutende ke kapitao wobe, ne bololoke ke mukulumpe wobe.” Kwendela pamo na buno bungauzhi, bukalama bwa kutala pa mwingilo wa kusapwila Bufumu ne wa kulama jitanga bwakomenako.

18, 19. Ñanyi kutokesha kwa jibumba kubaubiwenga pa iye myaka yonse?

¹⁸ Mu 1919, mukulumpe wakutangijila mwingilo wasajilwe mu bipwilo byonse, mwingilo wanji wajinga wa kunengezha mwingilo wa mu bujimi. Luno lunengezho lwatundaikile mwingilo wa mu bujimi. Kuvotela bakulumpe ne badikoni mu bipwilo kwapwile mu 1932. Pano po papwijile mashinda a kwisajila bantangi. Lupimpu lukwabo lukatampe lukabula kuzhiya lwaubiwe mu 1938 kimye kyatendekele kutongolwa bakulumpe bonse mu bipwilo kwesakana na mwayila lunengezho lwa teokalasi lwaubiwenga mu kipwilo kitanshi kya bwina Kilishitu. (Byubilo 14:23; 1 Timoti 4:14) Mu 1972 bakulumpe ne bankwasho bakwingila mu bipwilo basajilwe byonka byaingilanga bajinga mu bena Kilishitu batanshi. Mu kifulo kya kwikalatu na mukulumpe umo mu kipwilo, Filipai 1:1 ne binembelo bikwabo bimwesha kuba’mba abo bafika pa bikebewa bya mu Binembelo bya kwikala bakulumpe, bo bapanga jibumba ja bakulumpe mu kipwilo.—Byubilo 20:28; Efisesa 4:11, 12.

¹⁹ Mu 1975, Jibumba Jitangijila jatendekele kutala pa mwingilo wa Bakamonyi ba kwa Yehoba mwaya ntanda yonse. Makometi a Misampi asajilwe kuba’mba atalenga pa mwingilo wa mu byalo moaji. Kufumatu pa kyo kya kimye, mwingilo pa Ofweshi ikatampe ne pa misampi ya Watch Tower Society wapelako pa kuba’mba ‘tube bintu byawamisha.’ (Fili. 1:9, 10) Mwingilo uji na bakafunga ba kwa Kilishitu wavwangamo kutangijila mwingilo wa busapwishi, kufunjisha mu kipwilo, ne kulama bulongo jitanga ja Lesa. —1 Timoti 4:16; Bahebelu 13:7, 17; 1 Petelo 5:2, 3.

Buntangi bwa Yesu

20. Kwendela pamo na jibumba ja Yehoba kukebewa atweba kuyuka ka pa mambo a mwingilo wa Yesu?

²⁰ Kwendela pamo na jibumba jibena kununguluka ja Yehoba kukebewa kuba’mba tuyuke mwingilo wa Yesu Kilishitu aye “mutwe wa kipwilo” ye apewa na Lesa. (Efisesa 5:22, 23) Kabiji kikwabo kyalusekelo, Isaya 55:4 witubula kuba’mba: “Umvwai, amiwa [Yehoba] namutongwele namba ekale kamonyi ku mitundu ya bantu ke ntangi wabo ne mukulumpe wabo.” Kya kine, Yesu Kilishitu wayuka bya kulama. Kabiji wayuka mikooko yanji ne byubilo byayo. Byo apikichilenga bipwilo bitanu na bibiji mu Asia Minor, waambilepo bintu bimo jitanu amba “Nayuka mingilo yobe.” (Lumwekesho 2:2, 19; 3:1, 8, 15) Kabiji Yesu wayuka byo tukajilwa, byonka byo ebiyuka Shanji, aye Yehoba. Yesu saka akyangye kufunjisha Lulombelo lwa Kumwenako waambile’mba: “Shenu wayukila jimo byo mwakajilwa, po mukyangye kumulomba.”—Mateo. 6:8-13.

21. Buntangi bwa Yesu bubena kumweshiwa byepi mu kipwilo kya bwina Kilishitu?

²¹ Nanchi buntangi bwa Yesu bumweshiwa byepi? Jishinda jimo jo bumweshiwamo ke ja kupichila mu bakulumpe mu kipwilo, abo baikala ‘bya bupetu mu bantu.’ (Efisesa 4:8) Lumwekesho 1:16 umwesha kuba’mba abe bakulumpe baji mu kuboko kwa kilujo kwa Kilishitu, ubena kwibatangijila bya kuba. Lelo jino, Yesu utangijila bano bakulumpe, kikale baji na luketekelo lwa kuya mwiulu nangwa baji na lwa kwikala pano pa ntanda. Byonka byo kyalumbululwa mu mutwe wapita, batongolwa na mupashi wazhila kwesakana na bikebewa bya mu Binembelo. (1 Timoti 3:1-7; Titusa 1:5-9) Mu kitota-myaka kitanshi, jibumba ja bakulumpe mu Yelusalema jalengele jibumba jitangijila jajinga na mwingilo wa kumona pa bipwilo ne wa kumona pa mwingilo yense wa kusapwila Bufumu. Jonka jino jishinda jo jibena kulondela jibumba ja Yehoba lelo jino.

Endelainga Najo Pamo!

22. Ñanyi bukwasho bupana Jibumba Jitangijila?

²² Mingilo ya bufumu pano pa ntanda yapanyiwa mu maboko a “kalume wa kishinka ne wa mana,” ubena kwimenwako na Jibumba Jitangijila ja Bakamonyi ba kwa Yehoba. (Mat. 24:45-47) Jibumba Jitangijila jatesha muchima pa kupana mikambizho ne buntangi bwa kutangijila kipwilo kya bwina Kilishitu. (Byubilo 6:1-6) Onkao mambo umvwe balongo bafikilwa na bya malwa, Jibumba Jitangijila jibula kije kyaswishiwa na muzhilo kimo nangwa byavula kupana bukwasho bwa kajo ne kulungisha nangwa kushimukulula mazubo ne Mazubo a Bufumu aonaika. Umvwe bakwetu bena Kilishitu bamo bebekazha bufinda nangwa bebamanyika, pobiwa bintu bimo bya kwibakosesheshamo ku mupashi. Nangwatu mu bimye ‘byakatazha,’ kweseka-eseka kwikalapo kwa kutundaika mwingilo wa kusapwila.—2 Timoti 4:1, 2.

23, 24. Nangwa pa mweke bintu bya byepi nangwa bya byepi pa bantu banji, Yehoba utwajijila na kupana ka, kabiji twafwainwa kutwajijila kuba ka?

²³ Nangwa pamweka bintu bya byepi nangwa bya byepi pa bantu banji, Yehoba utwajijila kupana kajo ka ku mupashi ne mikambizho yafwainwa. Kabiji Lesa upa balongo bakonsha kwingila, milangwe ne maana a kunungulwilamo ne kutokesheshamo jibumba ja teokalasi. (Mpitulukilo ya mu mizhilo 34:9; Efisesa 1:16, 17) Kwakubula nangwa kuzhinaukatu ne, Yehoba witupa byo tukeba pa kuba’mba twingile mwingilo wetu wa kulenga baana ba bwanga ne kwingila mwingilo wetu mwaya ntanda yonse.— 2 Timoti 4:5.

²⁴ Twaketekela na muchima yense kuba’mba Yehoba kechi ukalekelela bantu banji bakishinka nangwa pachechetu ne. Ukebapokolola ku “malwa akatampe” abena kwiya. (Lumwekesho 7:9-14; Masalamo 94:14; 2 Petelo 2:9) Tuji na mambo awama a kutwajijila kwikala na luketekelo lwetu kasa twakoselamo ne kumpelo. (Bahebelu 3:14) Onkao mambo twayai tutwajijile kwendela pamo na jibumba ja Yehoba.

Musakukumbula’mba Ka?

• Mambo ka o twakonsha kwambila’mba jibumba ja Yehoba jibena kutwajijila na kununguluka?

• Ñanyi kimweno kijipo kya kuba’mba bantu ba Lesa babena kwiyowa kyeya kya ku mupashi kibena kununguluka?

• Mwingilo wa mu bujimi wakomenako byepi?

• Ñanyi lupimpu lwaubiwa pa kimye kyafwainwa ku bakalume ba Yehoba mu mashinda anungulukilamo jibumba?

[Kipikichala pa peja 11]

Byonka byajinga Davida, ne atweba tukankalwa kushimikizha mingilo yavula yawama yaingila Yehoba

[Kipikichala pa peja 12]

Jitanga ja Lesa jamwenamo mu lupimpu lwa pa kimye kyafwainwa mu mashinda anungulukilamo jibumba