KITANGO 14
Yehoba Utangijila Byepi Jibumba Janji?
1. Baibolo yaambapo’mba ka pa mambo a jibumba ja Yehoba, kabiji mambo ka o janemena kwi atweba?
NANCHI Lesa uji na jibumba nyi? Binembelo byanembeshiwa na mupashi bitubula’mba ee uji najo. Mu Byambo byanji, witumweshako pacheche lubaji lwa mwiulu lwakukumya lwa biji jino jibumba. (Ezikyo 1:1, 4-14; Danyela 7:9, 10, 13, 14) Nangwa kyakuba kechi twakonsha kwijimona jino jibumba ja mwiulu ne, bino jikwasha bingi bapopweshi bonse bakine lelo jino. (2 Bamfumu 6:15-17) Kabiji jibumba ja Yehoba jiji ne na lubaji lukwabo lumweka panopantanda. Baibolo itukwasha kwijiyuka bulongo byojiji kabiji ne Yehoba byoejitangijila.
Kuyuka Lubaji Lumweka lwa Jino Jibumba
2. Ñanyi kipwilo kipya Lesa kyoalengele?
2 Pa myaka 1,545 mukoka wa bena Isalela wajinga kipwilo kya Lesa. (Byubilo 7:38) Bino bena Isalela bakankelwe kusunga mizhilo ya Lesa kabiji bakaine ne Mwananji. Yehoba naye wakaine kyokya kipwilo ne kwikileka. Yesu wabujile Bayudea amba: “Talai! nzubo yenu imushajila ke masala.” (Mateo 23:38) Yehoba kepo alengele kipwilo kyakatataka, ne kulayañana nakyo lulayañano lupya. Kino kipwilo ke kya bantu 144,000 basalwa kwi Lesa kwikala pamo ne Mwananji mwiulu.—Lumwekesho 14:1-4.
3. Kika kyaubiwe pa Pentekosta mu 33 C.E. kyamwesheshe patoka kuba’mba Lesa pano ubena kwingijisha kipwilo kipya?
3 Batanshi kwikala mu kyokya kipwilo kipya bashingilwe na mupashi wazhila wa Yehoba pa Pentekosta mu 33 C.E. Pa mambo a kyokya kintu kya kukumya, kyamwekele, tutanga’mba: “Byo jafikile juba ja Pentekosta, ne bonse kasa bapwila pamo, ponkapo mwafumine kilulumo mwiulu nobe luvula mukatampe upupa, kyayuzhizhe nzubo yonse mo baikajile. Ne ponkapo kwibamwekejile njimi kasa yaabana, nobe mujilo; yaikajile pa bonse pa muntu pa muntu. Ne abo bonse bayujile na Mupashi Wazhila.” (Byubilo 2:1-4) Mu jino jishinda mupashi wa Lesa wamwesheshe patoka kuba’mba, pano jino jo jibumba ja bantu Lesa joakengijishanga kwingila nkebelo yanji kupichila mu lutangijilo lwa kwa Yesu Kilishitu mwiulu.
4. Bañanyi lelo jino balenga jibumba ja Yehoba jimweka?
4 Lelo jino, kujitu bashalapo bacheche ba mu ba 144,000 panopantanda. Pano bino mu kufikizhiwa kwa bungauzhi bwa mu Baibolo, “jibumba jikatampe” ja ‘mikooko ikwabo,’ yavula, jibena kwingijila pamo na bashingwa bashalapo. Yesu Kafunga Wawama, wakwatankanya ino mikooko ikwabo na bashalapo kuba’mba bekale ke kisaka kimo kibena kutangijilwa na Kafunga umo. (Lumwekesho 7:9; Yoano 10:11, 16) Bano bonse balenga kipwilo kimo kyakwatankana kya jibumba ja Yehoba jimweka.
Jibumba Jitangijilwa na Lesa
5. Ñanyi utangijila jibumba ja Lesa, kabiji mu ñanyi jishinda?
5 Byambo bya mu Binembelo bya kuba’mba: “Kipwilo kya Lesa mumi” bimwesha muntu mwine utangijila kino kipwilo. Jino jibumba jitangijilwa na Lesa. Yehoba upa bantu banji mikambizho ya kulondela kupichila mwi Yesu yeatongola kwikala Mutwe wa kipwilo ubula kumweka, kabiji ne kupichila mu Byambo Byanji byanembeshiwa na mupashi, Baibolo.—1 Timoti 3:14, 15; Efisesa 1:22, 23; 2 Timoti 3:16, 17.
6. (a) Lutangijilo lwafumine mwiulu lwa kutangijila kipwilo lwamwekele byepi mu myaka kitota kitanshi? (b) Kika kimwesha kuba’mba Yesu ye ukiji Mutwe wa kipwilo?
6 Luno lutangijilo lwamwekele pa Pentekosta. (Byubilo 2:14-18, 32, 33) Kabiji lwamwekele kimye malaika wa Yehoba kyoatangijiile kusampanya mambo awama mu Africa, kimye jiwi ja Yesu kyo japele Saulo wa ku Talasusa waalulukile, mikambizho ya byakuba, ne kimye Petelo kyoatatwile mwingilo wa kusapwila ku Bagentila. (Byubilo 8:26, 27; 9:3-7; 10:9-16, 19-22) Mu kuya kwa moba, kafwako mawi aumvwanyikilenga mwiulu ne, bamalaika kechi bamwekelengapo ne, kabiji mupashi kechi wapainengapo bya bupe byakuba byakukumya ne. Bino Yesu walaile’mba: “Talai, amiwa nji nenu moba onse, ne kufika ku juba jikapelako.” (Mateo 28:20; 1 Kolinda 13:8) Ano moba, Bakamonyi bakwa Yehoba bayuka Yesu byoebatangijila. Mambo inge ne kuyuka luno lutangijilo ne, inge kyashupa bingi kusapwila mambo a Bufumu mukachi ka balwanyi.
7. (a) Bañanyi balenga ‘kalume wa kishinka ne wa maana,’ kabiji mambo ka? (b) Ñanyi mwingilo “kalume” yeapewe?
7 Yesu saka akyangye kufwa ne, wabujile baana banji ba bwanga pa mambo a ‘kalume wa kishinka ne wa maana’ amba aye byoaji Nkambo, ukamupa mwingilo wanema. Uno “kalume” wajingapo kimye Nkambo kyoaile mwiulu kabiji ne kutwajijila kwingila na ngovu pa kubwela kwa Kilishitu kubula kumweka mu Bufumu. Ino ñambilo kechi ibena kutongolatu muntu umo ne, ibena kutongola kipwilo kya kwa Kilishitu kya bashingwa. Kino kipwilo byo ekipotele na mashi anji, Yesu wikitelele’mba “kalume” wanji. Ba mu kino kipwilo wibapele mwingilo wa kulenga baana ba bwanga ne kutwajijila kwibajisha “kajo [ka ku mupashi] pa kimye pafwainwa.”—Mateo 24:45-47; 28:19; Isaya 43:10; Luka 12:42; 1 Petelo 4:10.
8. (a) Ñanyi mingilo ibena kwingila jibumba ja kalume ano moba? (b) Mambo ka o kyanemena kwi atweba kulondela mikambizho itupa Lesa kupichila mu lunengezho loanengezha?
8 Jibumba ja kalume byo jaingijilenga mu bukishinka mwingilo wa Nkambo byoabwelele mu 1914 kwakubula kumwekana, kuji kiyukilo kya kuba’mba jino jibumba japewe ne mingilo ikwabo mu 1919. Myaka yonse yapitapo kufuma kyokya kimye, ke myaka ya kusapwila mambo a Bufumu mwaya ntanda yonse, kabiji jibumba jikatampe ja bapopweshi ba Yehoba jibena kukonkanyiwa kuba’mba jikapuluke malwa akatampe. (Mateo 24:14, 21, 22; Lumwekesho 7:9, 10) Abano nabo bakebewa kajo ka ku mupashi, kabiji jibumba ja kalume jo jibapa kano kajo. Pakuba’mba tutokeshe Yehoba pa muchima, twafwainwa kumvwina mikambizho yoapana kupichila mu luno lunengezho ne kwilulondela.
9, 10. (a) Mu myaka kitota kitanshi, lunengezho ka lwanengezhewe kukumbwilamo mepuzho pa mambo a mafunjisho ne kupana mikambizho ya bya kusapwila mambo awama? (b) Lunengezho ka lujiko ano moba lwa kutangijila mwingilo wa bantu ba Yehoba?
9 Kimo kimye kwikala mepuzho a pa mambo a mafunjisho ne ñiñijilo ya mwakubila bintu. Kyakonsha kubiwa byepi? Byubilo kyapitala 15 bitubula byachibiwe mambo abukile na mambo a Bagentila baalulukile. Ano mambo beatwajile ku batumwa ne ku banabalume bakulumpe mu Yelusalema bajinga jibumba jitangijila. Abano banabalume nabo bajinga bambulwakoloka, bino Lesa wibengijishanga. Batangile binembelo byaambilenga pa oa mambo ne kuyuka kiyukilo kya mupashi wazhila wa Lesa byoashinkwile jishinda ja kusapwila Bagentila. Kepo bachibile oa mambo. Yehoba wilupesheshe bingi alwa lunengezho. (Byubilo 15:1-29; 16:4, 5) Kufuma ku jibumba jitangijila, bantu batuminwe kuya na kutwala palutwe busapwishi bwa kusapwila mambo a Bufumu.
10 Mu ano moba etu alelo, Jibumba Jitangijila ja Yehoba jimweka jalengwa na balongo bashingwa na mupashi bafuma mu byalo byapusana pusana kabiji jiji ku ofweshi mukatampe wa ntanda yonse wa Bakamonyi bakwa Yehoba. Kupichila mu lutangijilo lwa kwa Yesu Kilishitu, jino Jibumba Jitangijila jibena kutwala palutwe mpopwelo yakine mu byalo byonse, sajitangijila mwingilo wa kusapwila wa Bakamonyi bakwa Yehoba mu bipwilo byabo byavula. Aba baji mu Jibumba Jitangijila baji na mulanguluko wajingapo na mutumwa Paulo wanembejile bena Kilishitu bakwabo amba: “Kechi mambo a kuba’mba, tuji na bunkambo bwa pa lwitabilo lwenu ne, twi bankwasho [ba mwingilo bakwenu, NW] ba lusekelo lwenu: mambo mu lwitabilo mwakoselamo.”—2 Kolinda 1:24.
11. (a) Bakulumpe ne bankwasho mu kipwilo batongolwa byepi? (b) Mambo ka otwafwainwa kwingijila pamo na bano batongolwa?
11 Bakamonyi bakwa Yehoba mwaya ntanda yonse baketekela Jibumba Jitangijila kutongola balongo bafikapo bulongo bakuba’mba nabo batongolenga bakulumpe ne bankwasho ba kutangijilanga bipwilo. Mizhilo ya kulondela aba batongolwa yanembwa mu Baibolo kabiji yukai kuba’mba bano bantu bambulwakoloka kabiji nabo boba bilubo. Bakulumpe mu kipwilo betabizha kabiji ne boba batongola baji na mutembo wanema bingi kwi Lesa. (1 Timoti 3:1-10, 12, 13; Titusa 1:5-9) Onkao mambo, balomba Lesa amba ebakwashe na mupashi wanji ne kutangijilwa na Byambo byanembeshiwa na mupashi. (Byubilo 6:2-4, 6; 14:23) Twayai tusanchilenga bano “byabupetu ku bantu [banabalume, NW],” betukwasha atweba bonse kwikala ‘balumbuluka pamo mu lwitabilo.’—Efisesa 4:8, 11-16.
12. Yehoba wingijisha byepi banabakazhi mu lunengezho lwa teokalasi?
12 Binembelo byakambizha kuba’mba banabalume bobafwainwa kutangijila mu kipwilo. Pano bino kino kechi kilumbulula’mba banabakazhi basuulwa ne, mambo bamo ba mwiabo ke banswanyi ba mu Bufumu bwa mwiulu, kabiji bengila bingi mwingilo wa kusapwila. (Masalamo 68:11) Kabiji banabakazhi byo batwajijila kuba byobafwainwa kuba mu bisemi byabo, balengela jizhina ja kipwilo kuwaminako. (Titusa 2:3-5) Bino kufunjisha mu kipwilo kubiwatu na banabalume batongolwa kufunjisha.—1 Timoti 2:12, 13.
13. (a) Baibolo yakambizha bakulumpe mu kipwilo kuyuka ka pa mambo a kifulo kyabo? (b) Atweba bonse tuji na mwingilo ka?
13 Mu ino ntanda, muntu uji pa kifulo kya peulu umonwa’mba wanema bingi, bino mukambizho uji mu jibumba ja Lesa ke wakuba’mba: “Awa wipa bwanyike mwi anweba bonse, awa ye mukulumpe.” (Luka 9:46-48; 22:24-26) Binembelo byajimuna bakulumpe mu kipwilo amba bafwainwa kujimuka kuchina bakoba bunkambo pa bantu bo ebapa Lesa kulama. Abo bafwainwa kwikala bakumwenako jitanga. (1 Petelo 5:2, 3) Kechi bantu bachechetu basalululwa bo bafwainwa kusapwilatu ne, bino Bakamonyi bakwa Yehoba bonse, banabalume ne banabakazhi, baji na mwingilo wa kwimenako Nkambo walengele bintu byonse, sabepelula kwambila mu jizhina janji ne kubula bantu konse konse pa mambo a Bufumu bwanji.
14. Tangai binembelo byamweshiwa, mwisambepo pa mepuzho aipuzhiwa ku mpelo ya palagalafu.
14 Twafwainwa kwiipuzha atwe bene’mba: ‘Abya nanchi nsanchila Yehoba byo abena kutangijila jibumba janji jimweka nyi? Nanchi byubilo, ne ñambilo yami bimwesha kino nyi?’ Kulanguluka pa bino bishinka byalondelapo kwakonsha kwitukwasha atweba bonse umo umo kumona byo tubena kuba.
Umvwe kine nkokela Kilishitu amba ye Mutwe wa kipwilo, ngubenga ka kwesakana na byaambiwapo mu bino binembelo? (Mateo 24:14; 28:19, 20; Yoano 13:34, 35)
Umvwe natambwila na lusanchilo lunengezho ne bya bupe bya ku mupashi biya kupichila mu jibumba ja kalume ne Jibumba jajo Jitangijila, kokuba’mba ñanyi yembena kunemeka? (Luka 10:16)
Bonse mu kipwilo, kikatakata bakulumpe mu kipwilo bafwainwa kubanga byepi na bakwabo? (Loma 12:10)
15. (a) Kupichila mu byubilo byotuba ku jibumba ja Yehoba jimweka, tumwesha ka? (b) Ñanyi jishuko jijipo jo twafwainwa kumwesheshamo amba Diabola wa bubela ne kusangajika Yehoba?
15 Ano moba Yehoba witutangijila kupichila mu jibumba janji jimweka jitangijilwa na Kilishitu. Byubilo byotuba ku jino jibumba bimwesha byotulanguluka pa mambo a mambo a bumfumu. (Bahebelu 13:17) Satana wauminapotu popolo na kwamba’mba atweba kyotukeba ke kwitemwa atwe bene. Pano inge ke twingile mu jishinda jafwainwa ne kuchinuzhuka bintu bimwesha kwitemwa atwe bene, tumushinawina Diabola amba wa bubela. Umvwe twatemwa ne kunemeka boba betutangijila ne kukana ‘kwamba bya kwibalambisha bantu amba tujilemo,’ tusangajika Yehoba. (Yuda 16; Bahebelu 13:7) Kupichila mu kwikala bakishinka ku jibumba ja Yehoba, tumwesha kuba’mba Yehoba ye Lesa wetu ne kuba’mba twakwatankana mu mpopwelo.—1 Kolinda 15:58.
Mepuzho Akupitulukamo
• Jibumba ja Yehoba jimweka ano moba jo jika? Jingila mwingilo ka?
• Ñanyi watongolwa kwikala Mutwe wa kipwilo, kabiji witutangijila kupichila mu lunengezho ka lumweka?
• Byubilo ka byawama byotwafwainwa kwikala nabyo ku boba baji mu jibumba ja Yehoba?
[Bipikichala pa peja 133]
Yehoba witutangijila kupichila mu jibumba janji jimweka jitangijilwa na Kilishitu