“Vulukainga aba Bemutangijila”

BINO byambo byaambile mutumwa Paulo, byanembwa pa Bahebelu 13:7 byakonsha ne kutuntululwa’mba: “Vulukainga boba babena kwimulama.” Kufumatu pa Pentekosita mu 33 C.E. kuya ne kulutwe, batumwa ba kishinka ba kwa Yesu Kilishitu batendekele kwingila uno mwingilo wa jibumba jitangijila japainenga lutangijilo mu kipwilo kya bena Kilishitu kyalengelwe katataka. (Byu. 6:2-4) Byo kyafikilenga nobe mu mwaka wa 49 C.E., jino jibumba jitangijila jabayile mambo javwangilemo ne banabalume babujile batumwa ba kwa Yesu. Kimye kyo bachibilenga mambo a mukanda, mu jibumba jitangijila mwajinga ‘batumwa ne bakulumpe mu kipwilo bajinga mu Yelusalema.’ (Byu. 15:1, 2) Bajinga na mwingilo wa kutala pa bena Kilishitu mu mapunzha onse. Batumanga makalata ne mikambizho yakoseshenga bipwilo, ne kukwasha baana ba bwanga kutwajijila kukwatankana mu milanguluko ne mu byubilo. Bipwilo byakookejilenga ne kulondela lutangijilo lwa jibumba jitangijila. Kino kyalengejile Yehoba kwibipesha kabiji byakoselenga mu lwitabilo.—Byu. 8:1, 14, 15; 15:22-31; 16:4, 5; Hebe. 13:17.

² Batumwa byo bafwile, bantu bavula basendukile mu lwitabilo. (2 Tesa. 2:3-12) Byonkatu Yesu byo aambijile jimo mu kishimpi kya wichi ne nseku, mu wichi (bena Kilishitu bashingwa) bakushilemo nseku (bantu bebepekezha kwikala bena Kilishitu). Pa kupitapo myaka bitota, ano mabumba akomejilenga pamo kufikatu ne kimye kya kunowa, ko kuba’mba “mpelo ya buno bwikalo.” (Mat. 13:24-30, 36-43) Mu yoya myaka yonse, Yesu watwajijile kubila bibusa bena Kilishitu bashingwa, bino kechi kwajinga jibumba jitangijila, nangwa jibumba jayukanyikilwe pano pa ntanda Yesu jo aingijishenga kutangijilamo baana banji ba bwanga ne. (Mat. 28:20) Nangwa byonkabyo, waambijile jimo amba kukekala lupimpu mu kimye kya kunowa.

³ “Nanchi kalume wa kishinka kabiji wa maana ye ñanyi?” Yesu Kilishitu waipwizhe buno bwipuzho byo ambilenga pa kishimpi kya bikamweka ku “mpelo ya buno bwikalo.” (Mat. 24:3, 42-47) Yesu walumbulwile’mba uno kalume ukapayankana kupa bantu ba Lesa kajo ka ku mupashi “pa kimye kyafwainwa.” Mu myaka kitota kitanshi, Yesu waingijishe jibumba ja banabalume kutangijila, kechi waingijishe muntu umo ne. Ne mu ano moba, Yesu ubena kwingijisha jibumba ja kalume wa kishinka, kechi muntu umo ne.

KUYUKA “KALUME WA KISHINKA KABIJI WA MAANA”

⁴ Bañanyi Yesu bo apeele mwingilo wa kujiishanga baana banji ba bwanga? Kyayilamo kuba’mba wafwainwatu kwingijisha bena Kilishitu bashingwa pano pa ntanda. Baibolo wibatela’mba “bañanga ba bufumu” bo bapa mwingilo amba “‘musapwile byawamisha mu mapunzha onse’ bya yewa wimwichile byo mwajinga mu mfishi amba mwiye mu kyeya kyanji kya kukumya.” (1 Pe. 2:9; Mala. 2:7; Lum. 12:17) Nanchi bashingwa bonse pano pa ntanda nabo baji mu jibumba ja kalume wa kishinka nyi? Ine. Yesu byo anengezhezhe kajo mu jishinda ja kukumya ku jibumba ja banabalume nobe 5,000 kwa kubula kubajilako banabakazhi ne baana ba bacheche, wikapaine ku baana ba bwanga, ne baana ba bwanga nabo bekapaine ku mabumba. (Mat. 14:19) Byonkatu byo ajiishishe bavula kwingijisha bantu bacheche, ne lelo jino, ubena kunengezha kajo ka ku mupashi kwingijisha bantu bacheche.

⁵ Onkao mambo, “kalume wa kishinka kabiji wa maana,” ke jibumba jicheche ja balongo bashingwa banengezha ne kusampanya kajo ka ku mupashi mu kino kimye kya kwikalapo kwa kwa Kilishitu. (Luka 12:42) Mu ano moba a kupelako, bano balongo bashingwa ye “kalume wa kishinka kabiji wa maana.” Abano bonka jo Jibumba Jitangijila ja Bakamonyi ba kwa Yehoba, kabiji bengijila pamo pa ofweshi mukatampe wa ntanda yonse.

⁶ Kilishitu wingijisha jino jibumba kunemba byambo byaamba pa kufika kwa bungauzhi bwa mu Baibolo ne kupana lutangijilo pa kimye kyafwainwa lwaamba pa bya kwingijisha mafunde a mu Baibolo mu bwikalo bwetu. Kano kajo ka ku mupashi bekasampanya mu bipwilo bya Bakamonyi ba kwa Yehoba. (Isa. 43:10; Nga. 6:16) Mu kimye kya kala, kalume nangwa’mba kalama ye baketekejile, ye watalanga pa nzubo. Byonkabyo, ne kalume wa kishinka kabiji wa maana bamupa mwingilo wa kutala pa ba mu nzubo baji na lwitabilo. Onkao mambo, kalume wa kishinka utala ne pa bipe, mwingilo wa kusapwila, mitanchi ya kubuñana ne kushonkena, kutongola bakalama ba kwingila mingilo yapusana pusana mu jibumba, ne kunengezha mabuku alumbulula Baibolo. Abino byonse bikwasha “ba mu nzubo.”—Mat. 24: 45.

⁷ Nga “ba mu nzubo” bo bañanyi? Ke boba bo bajiisha. Patanshi, ba mu nzubo bonse bajinga bashingwa. Mu kuya kwa moba, mu bano ba mu nzubo mwavwangilwe ne jibumba jikatampe ja “mikooko ikwabo.” (Yoa. 10:16) Ano onse mabumba abiji aja kajo kanengezha kalume wa kishinka.

⁸ Kimye kya malwa akatampe, Yesu byo akeya na kuzhachisha ne konauna buno bwikalo bwatama, ukatongola kalume wa kishinka “kutalanga pa bintu byanji byonse.” (Mat. 24:46, 47) Aba baji mu jibumba ja kalume wa kishinka bakatambula mfweto yabo ya mwiulu, pamo na bonse ba 144,000, bakalama pamo ne Kilishitu mwiulu. Nangwa kya kuba pano pa ntanda kechi pakekala kalume wa kishinka kabiji wa maana ne, Yehoba ne Yesu bakatangijilanga bangikazhi ba Bufumu bwa Bumesiasa pano pa ntanda kwingijisha boba bo batongola kwikala “ba bitumbafumu.”—Sala. 45:16.

MAMBO KA A ‘KUVULUKILANGA ABA BATANGIJILA’?

⁹ Kuji bishinka byavula bingi bitulengela ‘kuvuluka aba babena kwitutangijila’ ne kumwesha’mba twibaketekela. Ñanyi bintu byawama byo tumwenamo mu kuba bino? Mutumwa Paulo waambile’mba: “Babena kwimulama anweba kabiji baketotolwela pa mambo a kino, pa kuba’mba bengilenga na lusekelo kechi na bulanda ne, mambo kyakonsha kwimulengela kubula kumwenamo byawama.” (Hebe. 13:17) Kyanema bingi kuba’mba tukookelenga ne kunekenena boba babena kwitutangijila mambo babena kwituzhikijila ku bintu byakonsha konauna bulunda bwetu ne Lesa ne bwikalo bwetu.

¹⁰ Byonka byo kyanembwa pa 1 Kolinda 16:14, Paulo waambile’mba: “Bintu byonse byo muba mwibyubenga na butemwe.” Bintu byonse byo bafuukwilako bantu ba Lesa, bimena pa kino kyubilo kya butemwe. Pa mambo a butemwe, 1 Kolinda 13:4-8 waamba’mba: “Butemwe butekanya ne kuba lusa. Butemwe kechi buba kichima ne. Kechi bwitota ne, kechi bwilundumika ne, kechi buba bya bumvu ne, kechi bukeba bintu bibuwamina abo bwine ne, kechi buzhingila ne. Kechi buvuluka kintu kyatama ne. Kechi busekela pa bintu byabula koloka ne, bino busekela na bya bukine. Buvweta pa bintu byonse, bwitabila bintu byonse, buketekela bintu byonse, buchinchika bintu byonse. Butemwe kechi bupwa ne.” Na mambo a kuba bintu byonse byo bafuukula pa kuba’mba bakalume ba Yehoba bamwenemo byaimena pa butemwe, tuji na bishinka bya kwitulengela kuyuka’mba babena kwituzhikijila. Kabiji kino kimwesha butemwe bwa Yehoba.

¹¹ Byonkatu byo kyajinga mu myaka kitota kitanshi, banabalume bo abena kwingijisha Yehoba kutangijila bantu banji kechi balumbuluka ne. Nangwa byonkabyo, kala Yehoba waingijishe bantu bambulwa kulumbuluka kuba kyaswa muchima wanji. Nowa wafiikile bwato ne kusapwila lonaiko lwaishilenga mu moba anji. (Nte. 6:13, 14, 22; 2 Pe. 2:5) Mosesa bamutongwele kutangijila bantu ba Yehoba kufuma mu Ijipita. (Lupu. 3:10) Bantu bambulwa kulumbuluka bebatangijile ku mupashi wazhila kunemba Baibolo. (2 Timo. 3:16; 2 Pe. 1:21) Yehoba byo abena kwingijisha banabalume bambulwa kulumbuluka lelo jino kutangijila mwingilo wa kusapwila ne kukwasha bantu kwikala baana ba bwanga, kechi kitulengela kuleka kuketekela jibumba ja Lesa ne. Nangwa byonkabyo, kitukosesha mambo twayuka’mba kwa kubula lutangijilo lwa Yehoba, jino jibumba kechi jakonsha kwingila mingilo yonse yo jibena kwingila ne. Bintu byauba kalume wa kishinka mu makatazho onse apitamo jibumba ja Lesa pa myaka yapitapo bimwesha’mba ubena kutangijilwa na mupashi wa Lesa. Yehoba ubena kupesha jibumba janji lelo jino. Onkao mambo, twafwainwa kwijitundaika na muchima yense ne kwijiketekela.

BYO TUMWESHA LUKETEKELO LWETU

¹² Aba bo batongola kwikala ba kalama mu kipwilo bamwesha luketekelo lwabo inge batambwila uno mwingilo na lusekelo ne kumwingila mu bukishinka. (Byu. 20:28) Byo tuji basapwishi ba mambo awama a Bufumu, twingila na mukoyo mwingilo wa ku nzubo ku nzubo, kubwelako, ne kufunjisha bantu Baibolo pa nzubo. (Mat. 24:14; 28:19, 20) Pa kuba’mba tumwenemo pakatampe mu kajo ka ku mupashi kanengezha kalume wa kishinka, twafwainwa kunengezhanga bulongo ne kutanwa ku kupwila kwa bena Kilishitu, kuvwangakotu ne kubuñana ne kushonkena. Tumwenamo bingi mu kwikosesha atwe bene na bene umvwe twapwanañena pamo na balongo betu pa kuno kupwila kwa bena Kilishitu.—Hebe. 10:24, 25.

¹³ Umvwe twakwasha jibumba ja Lesa na bupe bo tupana, tumwesha’mba twijiketekela. (Maana 3:9, 10) Inge twamona’mba balongo betu bakajilwa ku mubiji, twibakwasha bukiji bukiji. (Nga. 6:10; 1 Timo. 6:18) Tuba bino na mambo a kutemwa balongo. Kabiji kimye kyonse tukebapo mashinda mo tumweshesha’mba tumusanchila bingi Yehoba ne jibumba janji pa bintu byawama byo betubila.—Yoa. 13:35.

¹⁴ Kabiji tumwesha’mba twaketekela jino jibumba inge saka tulondela bintu byo jifuukula. Kino kyavwangamo kulondela lutangijilo lwa bakalama ba myanzo ne bakulumpe mu kipwilo. Bano balongo baji pa ‘boba babena kutangijila,’ bo twafwainwa kukookela ne kunekenena. (Hebe. 13:7, 17) Nangwa kya kuba kechi twayuka ene mambo o bafuukwila bintu bimo ne, twayuka’mba kwibilondela kuketulengela kumwenamo byawama kikupu. Kino kilengela Yehoba kwitupesha na mambo a kukookela Mambo anji ne jibumba janji. Onkao mambo, tumwesha’mba tubena kunekenena Nkambo, aye Yesu Kilishitu.

¹⁵ Kwambatu kine, tuji na bishinka byavula bitulengela kuketekela kalume wa kishinka kabiji wa maana. Satana, aye lesa wa buno bwikalo ubena kwibikishako bingi kutamisha jizhina ja Yehoba ne jibumba janji. (2 Ko. 4:4) Kange mujimbaikwe na bya bujimuku byanji ne! (2 Ko. 2:11) Wayuka’mba washalatu na kakimye kacheche kumutaya mu kalengwa kabula kupela, kabiji ubena kwesekesha kujimbaika bantu ba Yehoba bavula ne kwibafumya kwi Lesa. (Lum. 12:12) Satana byo abena kwibikishako, twayai tufwenyeshe kwipi ne Yehoba. Twayai tuketekele mwi Yehoba ne mu jibumba jo abena kwingijisha kutangijila bantu banji lelo jino. Inge twauba bino, tukakwatankana na balongo betu.