“Nanchi Kalume Wakishinka Kabiji Wa Maana Ye Ñanyi?”

“Nanchi kalume wakishinka kabiji wa maana ye ñanyi, Nkambo yanji ye atongwele kwikala mukulumpe wa bantu ba ku nzubo yanji?”—MAT. 24:45.

MWAKONSHA KUTANA MIKUMBU NYI?

Nanchi kalume wa kishinka kabiji wa maana ye ñanyi?

Nga bantu ba ku nzubo yanji bo bañanyi, kabiji ñanyi kimye Yesu kyo atongwele kalume wa kishinka kwikala mukulumpe wabo?

Ñanyi kimye Kilishitu kyo akatongola kalume wa kishinka kwikala kalama wa bintu byanji byonse, kabiji ñanyi bintu byavwangwamo?

1, 2. Ñanyi jishinda Yesu jo abena kwingijisha pa kwitujisha lelo jino, kabiji mambo ka o kyanemena kuyuka jino jishinda?

“BALONGO, kechi nakonsha kubala bimye byo ntambula mitwe ikala na bintu byo nkebesha pa kimyetu kyonka kyo nebikebelapo ne.” Bino byo aambile nyenga mu nkalata yo atumijile balongo bengijila pa ofweshi wetu mukatampe wa ntanda yonse ya kwibasanchila. Nanchi ne anweba byo mumvwa nyi? Ee, atweba bavula byo byo kikala. Abya kino kyakonsha kwitulengela kukumya nyi? Ine.

² Kajo ka ku mupashi ko tutambula pa kimye kyafwainwa kamwesha kuba’mba Yesu, Mutwe wa kipwilo ubena kufikizha mulaye wanji wa kwitujisha. Pano ñanyi jishinda jo ubena kwingijisha? Kimye kyo aambile pa kiyukilo kya kwikalapo kwanji, Yesu waambile’mba ukengijisha “kalume wakishinka kabiji wa maana” pa kupana “kajo pa kimye kyafwainwa” ku bantu ba ku nzubo yanji.a (Tangai Mateo 24:45-47.) Uno kalume wa kishinka Yesu ye ye abena kwingijisha pa kujisha baana banji ba bwanga bakine mu kino kimye kya ku mpelo. Onkao mambo, kyanema bingi kuyuka uno kalume wa kishinka. Mambo bulunda bwetu na Lesa bwaimena pa kajo ka ku mupashi ko tutambula kupichila mu uno kalume wa kishinka.—Mat. 4:4; Yoa. 17:3.

3. Mabuku etu aambilepo’mba ka pa kishimpi kya kalume wa kishinka?

³ Pano kishimpi kya kwa Yesu kyaamba pa kalume wa kishinka kilumbulula ka? Kala, mabuku etu aambile’mba: Pa Pentekosita mu 33 C.E., Yesu watongwele kalume wa kishinka kwikala mukulumpe wa bantu ba ku nzubo yanji. Uno kalume wimenako bena Kilishitu bonse bashingwa baji pano pa ntanda mu bujibumba kufumatu kyo kya kimye. Bantu ba ku nzubo yanji bemenakotu bonka bano bashingwa pa muntu pa muntu. Mu 1919, Yesu watongwele kalume wa kishinka kwikala mukulumpe wa pa “bintu byanji byonsetu” ko kuba’mba bintu byanji bya Bufumu biji pano pa ntanda. Nangwa byonkabyo, kupesa pesa bulongo ne kulanguluka langulukapo ne kulombapo kwitulengela kumona kuba’mba ñumvwino yetu ya byambo bya kwa Yesu byaamba pa kalume wa kishinka kabiji wa maana ibena kukebewa kupimpulwa. (Mana 4:18) Twayai tupese pese kino kishimpi ne kumona byo kitukunza atweba bonse, nangwa tuji na luketekelo lwa kuya mwiulu nangwa lwa kwikala pano pa ntanda.

KINO KISHIMPI KYAFIKILE ÑANYI KIMYE?

4-6. Mambo ka o twakonsha kupwishisha amba kishimpi kya kwa Yesu kya kalume wa kishinka kyatendekele kufika mu 1914?

⁴ Byambo biji mu kishimpi kya kalume wa kishinka kabiji wa maana bimwesha kuba’mba kino kishimpi kechi kyatendekele kufika pa Pentekosita mu 33 C.E. ne, bino kyatendekele kufika mu kino kimye kya ku mpelo. Twayai tumone Binembelo byo bitulengela kupwisha bino.

⁵ Kishimpi kya kalume wa kishinka ke lubaji lwa bungauzhi bwa kwa Yesu bwaamba pa “kiyukilo kya kwikalapo [kwanji] ne kya mpelo ya buno bwikalo.” (Mat. 24:3) Lubaji lutanshi lwa buno bungauzhi bwanembwa mu Mateo 24:4-22, luji mu bipungu bibiji, kipungu kitanshi kyafikile kutendeka mu mwaka wa 33 C.E. kufika mu 70 C.E., kabiji kya bubiji, kibena kufika mu ano moba etu. Nanchi kino kibena kulumbulula’mba byambo bya kwa Yesu byaamba pa kalume wa kishinka bikafika bimye bibiji nyi? Ine.

⁶ Kutendeka na byambo byanembwa mu Mateo 24:29, Yesu waambilenga kikatakata pa bintu bibena kumweka ano moba. (Tangai Mateo 24:30, 42, 44.) Byo aambilenga pa bintu bikamweka mu kimye kya malwa akatampe, waambile’mba bantu ‘bakamona Mwana muntu saka eya mu makumbi a mwiulu.’ Kabiji mu byambo byo aambile byakunza bantu babena kwikala mu moba apelako, wibatundaikile kwikala balaba kupichila mu kwamba’mba: “Kechi mwayuka juba Nkambo yenu jo akeshilamo ne,” kabiji “pa kimye kyo mwabula kuketekela Mwana muntu ukeya.”b Yesu byo aambile pa bintu bikamweka mu moba apelako, po po aambile kishimpi kya kalume wa kishinka. Onkao mambo, twakonsha kupwisha kuba’mba byambo byanji byaamba pa kalume wa kishinka byatendekeletu kufika aku moba apelako atendekatu mu 1914. Ino ñumvwino yayilamo. Mambo ka o twaambila byobyo?

7. Ñanyi bwipuzho bwanema bingi bwakebewenga kukumbulwa kimye kya kunowa byo kyatendekele, kabiji mambo ka?

⁷ Akilangulukai pa buno bwipuzho bwa kuba’mba: “Nanchi kalume wakishinka kabiji wa maana ye ñanyi?” Mu myaka kitota kitanshi, kechi kyakatezhe kukumbula buno bwipuzho ne. Byonka byo twafunjile mu mutwe wafumako, batumwa baubilenga bya kukumya ne kupa bakwabo bulume bwa kuba bya kukumya, kino kyamwesheshe kuba’mba Lesa wibengijishenga. (Byu. 5:12) Onkao mambo, kafwako wafwainwe kwipuzha’mba, ñanyi Kilishitu ye atongola kwikala wa kutangijila ne. Nangwa byonkabyo, mu 1914, bintu byapusene bingi. Mu uno mwaka mo mwatendekejile kimye kya kunowa. Pano kimye kyafikile kya kwabanya bincha ne wichi. (Mat. 13:36-43) Kimye kya kunowa byo kyatendekele, kwaishile bwipuzho bwanema bingi bwa kuba’mba: Byo kiji kuba’mba bantu bavula bebepekezhanga’mba bena Kilishitu nabo betelanga amba baana ba bwanga ba kwa Yesu bakine, pano nga wichi, nangwa’mba bena Kilishitu bashingwa bakonsheshe kuyukanyikwa byepi? Kishimpi kya kalume wa kishinka kyakumbwile buno bwipuzho. Baana ba bwanga bwa kwa Kilishitu bashingwa ke boba bo ajishanga bulongo ku mupashi.

NANCHI KALUME WA KISHINKA KABIJI WA MAANA YE ÑANYI?

8. Mambo ka o kyayilamo kuba’mba kalume wa kishinka wafwainwa kulengwa na bena Kilishitu bashingwa?

⁸ Kalume wa kishinka wafwainwa kulengwa na bena Kilishitu bashingwa baji pano pa ntanda. Bano batelwa’mba “ba buñanga bwa bufumu” kabiji bebapa mwingilo wa ‘kusapwila ku mapunzha onse byawamisha bya yewa wibechile byo bajinga mu mfishi amba beye mu kyeya kyanji kya kukumya.’ (1 Pe. 2:9) Kyayilamo kuba’mba baji mu bano “ba buñanga bwa bufumu” bo bengila mwingilo wa kufunjisha bakwabo ba mu lwitabilo bukine.—Mala. 2:7; Lum. 12:17.

9. Nanchi bonse bashingwa baji pano pa ntanda bo balenga kalume wa kishinka nyi? Lumbululai.

⁹ Nanchi bonse bashingwa baji pano pa ntanda bo balenga kalume wa kishinka nyi? Ine. Kishinka ke kya kuba’mba kechi bashingwa bonse bengila mwingilo wa kupana kajo ka ku mupashi ku bakwabo ba mu lwitabilo mwaya ntanda yonse ne. Bamo ba mu jibumba ja wichi ke balongo bengila mwingilo wa bunkwasho ne bukulumpe mu bipwilo byo bajimo. Basapwila ku nzubo ku nzubo ne kufunjisha mu bipwilo byo bajimo, kabiji balondela lutangijilo lufuma ku ofweshi mukatampe. Pano bino kechi bengilako mwingilo wa kupana kajo ka ku mupashi ku balongo baji mwaya ntanda ne. Kabiji mu bano bashingwa muji ne banyenga, babula kwingilako mwingilo wa kufunjisha mu kipwilo.—1 Ko. 11:3; 14:34.

10. Nanchi kalume wa kishinka kabiji wa maana ye ñanyi?

¹⁰ Pano nanchi kalume wa kishinka kabiji wa maana ye ñanyi? Kulondela jishinda Yesu jo aingijishe ja kwingijisha bantu bacheche pa kujisha bavula, uno kalume walengwa na kajibumba ka balongo bashingwa baji na mwingilo wa kunengezha ne kupana kajo ka ku mupashi mu kimye kya kwikalapo kwa Kilishitu. Kufumatu kimye kyatendekele moba apelako, balongo bashingwa balenga kalume wa kishinka bengijila pamo pa ofweshi mukatampe. Mu myaka ya kulutwe kuno, twayukile kuba’mba uno kalume jo Jibumba Jitangijila ja Bakamonyi ba kwa Yehoba. Nangwa byonkabyo, yukai kuba’mba kyambo kya “kalume” kiji mu kishimpi kya kwa Yesu ke kalume umo, kibena kumwesha kuba’mba ke kalume umo walengwa na bantu bapusana pusana kechi muntu umo ne. Onkao mambo, pa kufukula bintu, baji mu Jibumba Jitangijila bekala pamo.

NGA BANTU BA KU NZUBO YANJI BO BAÑANYI?

11, 12. (a) Kalume wa kishinka kabiji wa maana bamutongola kwikala mukulumpe pa ñanyi bintu bibiji? (b) Ñanyi kimye Yesu kyo atongwele kalume wa kishinka kwikala mukulumpe wa bantu ba ku nzubo yanji, kabiji bañanyi bo asajile?

¹¹ Kintu kyanema kiji mu kishimpi kya kwa Yesu ke kya kuba’mba kalume wa kishinka kabiji wa maana bamutongola kwikala mukulumpe pa bintu bibiji byapusana. Kitanshi, ke kumutongola kwikala mukulumpe wa pa bantu ba ku nzubo yanji; kya bubiji ke kwikala kalama wa bintu bya nkambo yanji byonse. Na mambo a kuba’mba kino kishimpi kibena kufika mu kino kimye kya ku mpelo, kibena kumwesha kuba’mba kutongolwa konse kubiji kwatendekele kimye Yesu kyo aikele pa bufumu mu 1914.

¹² Ñanyi kimye Yesu kyo atongwele kalume wa kishinka kwikala mukulumpe wa pa bantu ba ku nzubo yanji? Pa kuba’mba tukumbule buno bwipuzho, twafwainwa kubwela kunyuma mu 1914, kimye kyatendekele kimye kya kunowa. Byonka byo twafunda kala, pa kyokya kimye kwajinga mabumba avula a betelanga’mba bena Kilishitu. Pano mu ñanyi jibumba Yesu mo afwainwe kusala kalume wa kishinka? Buno bwipuzho bwakumbwilwe kimye Yesu ne Bashanji kyo baishile na kupikita nzubo ya Lesa nangwa’mba lunengezho lwa ku mupashi lwa mpopwelo yanji kufuma mu 1914 kufika ku ntendekelo ya mwaka wa 1919.c (Mala. 3:1) Baumvwine bingi bulongo pa kutana kajibumba kacheche ka Bafunda Baibolo bakishinka bamwesheshe’mba batemwa Yehoba ne Mambo anji. Pano bino, bakebewenga kwibatokesha, kabiji bepelwile ne kumvwina mu kyo kya kimye kya kwibeseka ne kwibawamisha. (Mala. 3:2-4) Bano Bafunda Baibolo bakishinka bo bajinga bena Kilishitu bakine nangwa’mba wichi. Mu 1919, kimye kyatendekele bupopweshi bwa kine jikwabo, Yesu wasajile mu balongo bashingwa banabalume bafikilamo kwikala kalume wa kishinka kabiji wa maana ne kwibapa bukulumpe bwa pa bantu ba ku nzubo yanji.

13. Bañanyi baji mu bantu ba ku nzubo yanji, kabiji mambo ka?

¹³ Pano nga bantu ba ku nzubo yanji bo bañanyi? Bano ke boba bo bajisha. Ku ntendekelo ya moba akupelako, ba ku nzubo yanji bonse bajinga bashingwa. Mu kuya kwa kimye, mu bano ba ku nzubo yanji mwavwangilwe ne jibumba jikatampe ja mikooko ikwabo. Mu ano moba, mikooko ikwabo yo yavulamo mu “jitanga jimo” jitangijilwa na Kilishitu. (Yoa. 10:16) Ano mabumba onse abiji amwenamo mu kajo kamotu ka ku mupashi ka pa kimye kyafwainwa kapana kalume wa kishinka. Pano nga ba mu Jibumba Jitangijila balenga kalume wa kishinka kabiji wa maana lelo jino kiji byepi? Bano balongo nabo bakebewa kwibajisha kajo ka ku mupashi. Onkao mambo, bepelula ne kuyuka kuba’mba nabo pa muntu pa muntu ke bantu ba ku nzubo yanji byonka biji baana ba bwanga bakishinka ba kwa Yesu bonse.

14. (a) Kalume wa kishinka bamupa ñanyi mwingilo mukatampe, kabiji uno mwingilo wavwangamo kuba ka? (b) Ñanyi lujimuno Yesu lo apele kalume wa kishinka kabiji wa maana? (Monai kakitenguluzha ka kuba’mba, “Bino Umvwe awa Kalume Watama . . . ”)

¹⁴ Yesu wapele kalume wa kishinka kabiji wa maana mwingilo wabaya bingi. Mu moba anembejilwemo Baibolo, kalume nangwa’mba kalama ye baketekela ye watalanga pa byonse bya mu nzubo ya nkambo yanji. (Luka 12:42) Onkao mambo, kalume wa kishinka kabiji wa maana bamupa mwingilo mukatampe wa kutala pa bantu ba mu nzubo ya lwitabilo. Uno mwingilo wavwangamo kutala pa mali, bipe, mwingilo wa kusapwila, mitanchi ya kubuñana ne kushonkena, ne kunemba mabuku alumbulula Baibolo a kwingijisha mu mwingilo wa mu bujimi ne pa lufunjisho lwa bunke ne a kufundamo ku kipwilo. Bantu ba ku nzubo yanji baketekelatu mu kajo ka ku mupashi kapana kalume walengwa na bantu bapusana pusana.

ÑANYI KIMYE KYO BAKAMUTONGOLA KWIKALA KALAMA WA BINTU BYA NKAMBO YANJI?

15, 16. Ñanyi kimye Yesu kyo akatongola kalume wa kishinka kwikala kalama wa bintu byanji byonse?

¹⁵ Ñanyi kimye Yesu kyo akamutongola ja bubiji kwikala kalama wa “bintu byanji byonse”? Yesu waambile’mba: “Watokwa awa kalume umvwe pa kwiya Nkambo yanji wamutana na kuba bino. Kine nemwambila namba: Ukamutongola kwikala kalama wa bintu byanji byonse.” (Mat. 24:46, 47) Yukai kuba’mba Yesu ukamutongola jibiji inge waiya ne kutana uno kalume “na kuba bino,” ko kuba’mba kupana kajo ka ku mupashi mu bukishinka. Onkao mambo, kino kyamwesheshenga kuba’mba pakapita kimye pa kuba’mba bakamutongole ja bubiji. Pa kuba’mba tuyuke Yesu byo akoba bino ne kimye kyo akatongola kalume kwikala kalama wa bintu byanji byonse, twafwainwa kuyuka bintu bibiji: kimye kyo akeya ne byavwangwa mu bintu byanji byonse.

¹⁶ Yesu ukeya ñanyi kimye? Mukumbu utanwa mu byambo byo aambile. Vulukai kuba’mba byepelo bitanshi byaamba pa ‘kwiya’ kwa kwa Yesu, bibena kwamba pa kimye kyo akeya na kuchiba mambo ne kukambula bantu ku mpelo ya buno bwikalo.d (Mat. 24:30, 42, 44) Onkao mambo, ‘kwiya’ kwatongolwa mu kishimpi kya kalume wa kishinka kukobiwa mu kimye kya malwa akatampe.

17. Ñanyi bintu byavwangwa mu ‘bintu bya kwa Yesu byonse’?

¹⁷ Ñanyi bintu byavwangwa mu ‘bintu bya kwa Yesu byonse’? Yesu byo aambile’mba “byonse,” kechi waambilengatu pa bintu bya pano pa ntanda byonka ne. Yesu uji luusa lukatampe mwiulu. Waambile’mba: “Lesa wampa lūsa lwa kulama bintu byonse bya mwiulu ne bya pano pa ntanda.” (Mat. 28:18; Efi. 1:20-23) Mu bintu byanji mwavwangwa ne Bufumu bwa Bumesiasa bo bamupele kutendeka mu 1914 bo akalaminanga pamo na baana banji ba bwanga bashingwa.—Lum. 11:15.

18. Mambo ka Yesu o akomvwina bulongo pa kutongola kalume kwikala kalama wa bintu byanji byonse?

¹⁸ Kwesakana na byo twaambapo kala, twakonsha kupwisha’mba ka? Yesu byo akeya na kuchibila bantu mambo mu kimye kya malwa akatampe, ukatana kalume wa kishinka ubena kupana kajo ka ku mupashi pa kimye kyafwainwa ku bantu ba ku nzubo yanji. Kepo Yesu akomvwa bulongo kutongola kalume ja bubiji kwikala kalama wa bintu byanji byonse. Aba balenga kalume wa kishinka bakatambula uno mwingilo kimye kyo bakatambula mfweto yabo mwiulu ne kutendeka kulama pamo ne Kilishitu.

19. Nanchi kalume wa kishinka ukatambula mfweto ikatampe mwiulu kukila bashingwa bonse nyi? Lumbululai.

¹⁹ Nanchi kalume wa kishinka ukatambula mfweto ikatampe mwiulu kukila bashingwa bakwabo bonse nyi? Ine. Mfweto yo balaya kajibumba kacheche, yo ikatambula ne bakwabo bonse. Kya kumwenako, akilangulukai pa byambo Yesu byo aambijile batumwa banji bakishinka 11 bufuku bwapeleleko saka akyangye kufwa. (Tangai Luka 22:28-30.) Yesu walayile kajibumba kacheche ka bano banabalume kuba’mba ukebapa mfweto yawama umvwe batwajijila kwikala bakishinka. Ukalamanga nabo mu bufumu bwanji. Pano bino, kulutwe, wamwesheshe kuba’mba bonse ba 144,000 bakekala pa matanda na kulama nanji. (Lum. 1:1; 3:21) Kyo kimotu, kwesakana na byaamba Mateo 24:47, Yesu walayile kajibumba kacheche ka banabalume, ko kuba’mba balongo bashingwa balenga kalume wa kishinka, kuba’mba bakatongolwa kwikala kalama wa bintu byanji byonse. Pano bino, bonse ba 144,000 bakalamanga pamo ne aye mwiulu.—Lum. 20:4, 6.

20. Mambo ka Yesu o atongwela kalume wa kishinka, kabiji mwafuukulapo kuba ka?

²⁰ Kupichila mu kalume wa kishinka kabiji wa maana, Yesu ubena kulondela byo aubile mu myaka kitota kitanshi, ko kuba’mba kwingijisha bantu bacheche pa kujisha bavula. Yesu watongwele uno kalume wa kishinka kuba’mba baana banji ba bwanga bakishinka, bashingwa nangwa mikooko ikwabo, bakatambulenga kajo ka ku mupashi pa kimye kyafwainwa mu moba onse a ku mpelo. Twayai tutwajijile kumwesha lusanchilo kupichila mu kutundaika mu bukishinka balongo bashingwa balenga kalume wa kishinka kabiji wa maana.—Hebe. 13:7, 17.

BYAMBO BIKWABO: (Byafwainwa kutangwa byonka bitangwa tubyambo twa munshi monka mu mafuka mo biji.)

[Tubyambo twa mushi]

[Kitenguluzha pa peja 22]

Nanchi Mwakumvwisha Nyi?

“Kalume wa kishinka kabiji wa maana”: Ke kajibumba kacheche ka balongo bashingwa banengezha ne kupana kajo ka ku mupashi mu kimye kya kwikalapo kwa Kilishitu. Lelo jino, bano balongo bashingwa bo balenga Jibumba Jitangijila

“Ba ku nzubo yanji”: Bonse bo bajisha, bashingwa nangwa mikooko ikwabo

“Ye atongwele kwikala mukulumpe wa bantu ba ku nzubo yanji”: Mu 1919, Yesu wasajile balongo bashingwa bafikilamo kwikala kalume wanji wa kishinka kabiji wa maana

“Ukamutongola kwikala kalama wa bintu byanji byonse”: Aba balenga kalume bakebatongola kwikala bino kimye kyo bakatambula mfweto yabo mwiulu. Pamo na 144,000, bonse bakekala na lubaji mu luusa lukatampe lwa kwa Kilishitu mwiulu.

[Kipikichala pa peja 22, 23]

Nangwa tuji na luketekelo lwa kuya mwiulu nangwa lwa kwikala pano pa ntanda, bonse twi bantu ba ku nzubo yanji kabiji tukebewa kuja kajo kantutu kamo ka ku mupashi ka pa kimye kyafwainwa

[Kitenguluzha pa peja 24]

“Bino Umvwe Awa Kalume Watama . . . ”

Yesu wapa kalume wa kishinka kabiji wa maana mwingilo mukatampe, uno mwingilo ke wa kutangijila bantu ba ku nzubo yanji ne kupana kajo ka ku mupashi pa kimye kyafwainwa. Yesu wayukile kuba’mba aba bo apa mingilo ikatampe bakatotolola. (Luka 12:48) Onkao mambo, pa kupwisha kwamba kishimpi kyanji kya kalume wa kishinka kabiji wa maana wapezhezheko lujimuno.

Yesu wapaine lujimuno pa mambo a kalume watama ulanguluka mu muchima wanji amba nkambo yanji wabanda, kabiji watendeka kupuma bakalume bakwabo. Yesu waambile’mba nkambo yanji pa kwiya, “ukamukabisha bingi” uno kalume watama.—Tangai Mateo 24:48-51.

Nanchi Yesu waambijilenga jimo kuba’mba kukekala jibumba ja kalume watama mu moba akapelako nyi? Ine. Ibyo kuba’mba bantu bamo bamwesha muchima wipasha na wa kalume watama waambilepo Yesu. Bano bantu twakonsha kwibatela’mba bansatuki, nangwa bajinga mu bashingwa nangwa mu “jibumba jikatampe.” (Lum. 7:9) Pano bino, bantu ba uno mutundu kechi balenga jibumba ja kalume watama ne. Yesu kechi waambile’mba ukatongola kalume watama ne. Byambo byanji byajinga bya kujimuna kalume wa kishinka kabiji wa maana.

Monai kuba’mba Yesu watendekele kwamba luno lujimuno kupichila mu kwamba’mba “bino umvwe.” Shayuka umo waambile’mba byambo bya Kingiliki biji mu kino kyepelo bimwesha kuba’mba “waambilenga amba inge kyaikala bino.” Kino kibena kumwesha kuba’mba Yesu waambilenga’mba: Inge ‘kalume wa kishinka kabiji wa maana keayanjishe bakalume bakwabo, bino byo byo akamuba nkambo yanji inge waiya.’ (Monai ne Luka 12:45.) Nangwa byonkabyo, bonse baji mu kalume wa kishinka batwajijila kulaba ne kukenkenta ne kunengezha kajo kawama ka ku mupashi.

Balongo bashingwa bengijila pamo mwingilo wa kalume wa kishinka bayuka kuba’mba baketotolwela kwi Nkambo yabo pa jishinda jo balaminamo bantu ba ku nzubo yanji. Bano balongo bashingwa kyo bakebesha ke kwingila mwingilo wabo mu bukishinka pa kuba’mba Nkambo yabo pa kwiya akebambile’mba, “wauba bulongo.”

[Kipikichala pa peja 25]

Bonse ba 144,000 bakalamanga pamo ne Yesu mwiulu

(Monai jifuka 19)