‘Balondela Mwana Mukooko’

‘Bano bo boba balondela aye Mwana mukooko konse konse ko aya.’—LUM. 14:4.

1. Baana ba bwanga ba kine baubile byepi Yesu byo ebepwizhe umvwe nabo bakeba kuleka kumulondela?

PA MYAKA ibiji ne kichika, Yesu ‘wafunjishenga [mu nshinagoga] mu Kapenama.’ ‘Baana banji ba bwanga bavula’ byo bamwene’mba byambo byanji byakatazha kwibyumvwa, “babwelele mu nyuma, ne kwenda nanji jibiji ne.” Yesu byo aipwizhe baana banji ba bwanga jikumi ne babiji umvwe nabo basakile kufumako, Shimona Petelo wakumbwile’mba: “Nkambo, tukaya kwi ñanyi? Byambo bya bumi bwa myaka muji nabyo anweba; kabiji atweba twaitabile ne kuyuka namba Anweba mwi Wazhila wa kwa Lesa.” (Yoa. 6:48, 59, 60, 66-69) Baana ba bwanga bakine ba kwa Yesu kechi balekele kumulondela ne. Panyuma ya kushingwa na mupashi wazhila, batwajijile kutangijilwa ne Yesu.—Byu. 16:7-10.

2. (a) Nanchi ñanyi ‘kalume wa kishinka [kabiji] wa maana,’ nangwa’mba “kalama wa kishinka”? (b) Nga kalume wamwesha byepi amba ubena ‘kulondela mwana Mukooko’?

² Bena Kilishitu bashingwa ba mu ano moba bebalumbulula’mba ka? Mu bungauzhi bwanji bwa “kiyukilo kya kwikalapo [kwanji] ne kya mpelo ya buno bwikalo,” Yesu waambile pa jibumba ja bena Kilishitu bashingwa na mupashi baji panopantanda amba ‘kalume wa kishinka [kabiji] wa maana,’ nangwa’mba “kalama wa kishinka.” (Mat. 24:3, 45; Luka 12:42) Jibumba ja kalume, jamwesha amba jo ‘jilondela Mwana mukooko konse konse ko aya.’ (Tangai Lumwekesho 14:4, 5.) Mu ñambilo ya ku mupashi ba mu jibumba ja kalume batwajijila kwikala bakatanda mambo kechi bebipisha na mafunjisho a bubela ne byubilo byabunya bya “Babilona Mukatampe,” bufumu bwa ntanda yonse bwa bupopweshi bwa bubela ne. (Lum. 17:5) Kabiji ‘mu kanwa kabo kechi muji bubela ne,’ abo batwajijila “kwakubula kabulema” mu ntanda ya kwa Satana. (Yoa. 15:19) Ku kimye kya kulutwe, bashingwa bashalapo panopantanda “bakalondela” mwana Mukooko mwiulu.—Yoa. 13:36.

3. Mambo ka o kyanemena kwi atweba kuketekela jibumba ja kalume?

³ Yesu wapa kalume wa kishinka kabiji wa maana bukulumpe bwa “ba ku nzubo yanji,” ko kuba’mba, bonse ba mu jibumba ja kalume, ‘amba bapanenga kajo pa kimye pafwainwa.’ Kabiji wapa kalume bukulumpe “bwa bintu byanji byonsetu.” (Mat. 24:45-47) A bino “bintu byanji byonsetu” byavwangamo “jibumba jikatampe” ja ‘mikooko ikwabo’ jibena kukomenako. (Lum. 7:9; Yoa. 10:16) Nanchi jibumba ja bashingwa ne ‘mikooko ikwabo’ kechi bafwainwa kuketekela kalume yebapa bukulumpe pe abo nenyi? Kuji bintu byavula bitulengela kuketekela jibumba ja kalume. Bya kumwenako bibiji ke bino: (1) Yehoba wa ketekela jibumba ja kalume. (2) Ne Yesu naye wa ketekela jibumba ja kalume. Twayai tubalaule bishinka bimwesha’mba Yehoba Lesa ne Yesu Kilishitu baketekela bingi kalume wa kishinka kabiji wa maana.

Yehoba wa Ketekela Kalume

4. Mambo ka o twafwainwa kwikela na luketekelo mu kajo kapana kalume wa kishinka ne wa maana?

⁴ Akilangulukai kilengela kalume wa kishinka ne wa maana kwitupa kajo ka ku mupashi pa kimye pafwainwa. Yehoba waamba’mba: “Amiwa nkakubula ne kukufunjisha jishinda jo ukayamo.” Kabiji wanungapo’mba: ‘Nkakubulanga maana ne jiso jami saka jikutala.’ (Sala. 32:8) Ee, Yehoba utangijila kalume. Onkao mambo twafwainwa kwikala na luketekelo lwakosa lwa mu Binembelo, ne kumvwisha mikambizho ijimo yo tutambwila kwi kalume.

5. Bi ka byamwesha amba mupashi wa kwa Lesa ubena kukwasha jibumba ja kalume?

⁵ Yehoba wapesha jibumba ja kalume na mupashi wanji wazhila. Nangwa kya kuba mupashi wa kwa Yehoba kechi umweka ne, mingilo yanji imwekela mu bo engijisha. Akilangulukai kalume wa kishinka kabiji wa maana byo abena kusapwila mwaya ntanda pe Lesa, Mwananji, ne Bufumu. Bapopweshi ba Yehoba ba bena kusapwila mambo awama a Bufumu na mukoyo mu byalo kukila pa 230 ne ku bantu bekala pa makuji. Nanchi kino kechi kyamweshatu patoka’mba mupashi wa Lesa ubena kukwasha kalume nenyi? (Tangai Byubilo bya Batumwa 1:8.) Jibumba ja kalume jifuukula bintu byavula byanema pa kunengezha kajo ka ku mupashi mu kimye kyafwainwa ka bantu ba kwa Yehoba mwaya ntanda. Pa kufuukula bino bintu ne kwibingijisha, kalume umwesha butemwe, bukimote, ne bipangwa bya mupashi bikwabo.—Nga. 5:22, 23.

6, 7. Yehoba wa ketekela kalume wa kishinka kufika pa ñanyi kipimo?

⁶ Pa kuba’mba tumvwishe Yehoba byo aketekela kalume wa kishinka, twafwainwa kulanguluka byo alaya jibumba janji. Paulo wanembele’mba: “Ntolompita ikavuma, ne bafu bakasangulwa ke babula kuyuka kubola, ne atweba tukalulwa. Mambo uno ubola wafwainwa kuvwala ubula kubola, ne uno wa lufu wafwainwa kuvwala ubula kufwa.” (1 Ko. 15:52, 53) Baana ba bwanga bashingwa ba kwa Kilishitu, bengijila Lesa mu bukishinka kabiji byo bafwa basangulwa ne kwikala na bumi bwa myaka ne myaka bwakila bilengwa bya mupashi. Bebapa bumbulwa kufwa. Kabiji kunungapo, batambwila mibiji ibula kubola itwajijila ine na kwiwamisha. Lumwekesho 4:4 walumbulula bano basangulwa sa baikala pa bipona ne pa mitwe yabo paji minchinya ya ngolode. Bena Kilishitu bashingwa bakanemekwa pa bukishinka bwabo. Bino byavula bingi bimwesha amba Lesa waketekela bashingwa.

⁷ Lumwekesho 19:7, 8 waamba’mba: ‘Kusongola kwa Mwana mukooko kwafika ne mukazhanji winengezha kala. Kabiji kya mupelwe’mba, avwale kisapi kya linenyi kyalamba, kyatokesha ne kuwama mambo kisapi kya linenyi kyalamba byo byubilo byaoloka bya bazhijikwa.’ Yehoba wasala bena Kilishitu bashingwa kwikala musongwa wa mwananji ku kimye kya kulutwe. Bano bebapa bupe bukatampe nabiji ‘kusongolwa [ku] Mwana mukooko,’ kubula kubola, kubula kufwa ne kwikala bamfumu. Kino kibena kumwesha Lesa byo a ketekela bashingwa, ‘balondela aye Mwana mukooko konse konse ko aya.’

Kalume ba mu Ketekela Kwi Yesu

8. Yesu umwesha byepi kuba’mba uji na luketekelo mu baana banji ba bwanga bashingwa na mupashi?

⁸ Yesu umwesha byepi amba waketekela baana banji ba bwanga bashingwa na mupashi? Bufuku bwapeleleko bwa bumi bwanji panopantanda, Yesu walayile baana banji ba bwanga11 bakishinka. “Anweba mwi boba bakelwa ne amiwa mu lweseko lwami, kabiji nemutongwela bufumu, byonka byo bantongwejile Batata, namba muje ne kutoma ku tebulu wami mu bufumu bwami; kabiji mukekala pa matanda na kuchiba mambo a mikoka jikumi na ibiji ya bena Isalela.” (Luka 22:28-30) Lulayañano Yesu loalayañene na baana banji ba bwanga 11 lo lo balaya ne bena Kilishitu bashingwa ba 144,000. (Luka 12:32; Lum. 5:9, 10; 14:1) Nanchi Yesu wakonsha kulaya kulama nabo pamo mu Bufumu bwanji umvwe kechi wibaketekela nenyi?

9. Bintu ka byavwangwa mu “bintu byanji [Kilishitu] byonsetu”?

⁹ Kabiji kunungapo, Yesu wapa kalume wa kishinka kabiji wa maana bukulumpe “bwa bintu byanji byonsetu,” ko kuba’mba bintu byonse bya Bufumu bwanji panopantanda. (Mat. 24:47) Bino byavwangamo maofweshi akatampe aba Kamonyi ba kwa Yehoba, maofweshi a misampi mu mapuzha apusana pusana, Mazubo a kupwilamo kukatampe ne Mazubo a Bufumu mwaya ntanda kabiji ne mwingilo wa kusapwila Bufumu ne kulenga baana ba bwanga. Nanchi muntu wakonsha kutongola ye abula kuketekela kulama ne kwingijisha bya bunonshi byanji nyi?

10. Ki ka kimwesha’mba Yesu uji na baana banji ba bwanga bashingwa?

¹⁰ Byo kwashajiletu pacheche kuya kwiulu, Yesu wasangwilwe wamwekele ku baana banji ba bwanga bakishinka ne kwibalaya’mba: ‘Talai! Amiwa nji nenu moba onse ne kufika ku juba jikapelako.’ (Mat. 28:20) Nanchi uno mulaye wafika nyi? Pa myaka 15 yapitapo, kibelengelo kya bipwilo bya ba Kamonyi ba kwa Yehoba mwaya ntanda kyayilako palutwe kufuma pa 70,000 kufika ku 100,000. Kabiji kwanungwa baana ba bwanga banga? Baana ba bwanga pepi nobe 4,500,000 babatizwe pa myaka 15 yapitapo, ko kuba’mba kukilaila 800 pa juba. Kuno kubayilako kwa kibelengelo kubena kumwesha amba Kilishitu ubena kutangijila baana banji ba bwanga bashingwa pa kupwila kwabo kabiji wibatundaika mu mwingilo wabo wa kulenga baana ba bwanga.

Kalume Waikala wa Kishinka Kabiji wa Maana

11, 12. Jibumba ja kalume jimwesha byepi’mba ja kishinka kabiji ja maana?

¹¹ Byo kiji kuba’mba Yehoba Lesa ne Yesu Kilishitu baketekela kalume wa kishinka kabiji wa maana, nanchi ne atweba kechi twafwainwa kuba kintutu kimo nenyi? Kalume mwine wamwesha kwikala wa kishinka mu mwingilo ye bamupa. Kya kumwenako, Kyamba kya Usopa kikinembwa pano ke myaka 130. Kupwila kwa kipwilo, kupwila kukatampe, ne kupwila kwa nkambi kwa ba Kamonyi ba kwa Yehoba kukosesha lwitabilo lwetu.

¹² Kalume wa kishinka waikala wa maana mambo kechi uba kintu kyabula kufuukula Yehoba nangwa kubula kulondela mizhilo yanji ne. Kya kumwenako, nangwa kya kuba bantangi ba bupopweshi baleka bantu na kuba byubilo byatama mu kyalo, kalume upana lujimuno pa mambo a bintu bileta makatazho mu buno bwikalo bwa kwa Satana. Ubena kupana lujimuno lwawama lwa pa kimye kyafwainwa mambo Yehoba Lesa ne Yesu Kilishitu babena kumupesha. Onkao mambo twafwainwa kunemeka kalume. Twakonsha kumwesha byepi’mba twanemeka kalume wa kishinka ne wa maana?

“Tuyenga” na Bashingwa byo Balondela Mwana Mukooko

13. Kwesakana na bungauzhi bwa kwa Zekaliya, twakonsha kumwesha byepi luketekelo mwi kalume wa kishinka kabiji wa maana?

¹³ Buku wa mu Baibolo wa kwa Zakaliya waamba pa “bantu jikumi” basolomoka “Muyudea” ne kumwambila’mba “Tuyenga nenu.” (Tangai Zekaliya 8:23.) “Muyudea” ye baambila’mba “tuyenga nenu” wimenako jibumba ja bantu. Mu moba etu, wimenako bena Kilishitu bashingwa na mupashi bashalapo, ko kuba’mba lubaji lwa “bena Isalela ba Lesa.” (Nga. 6:16) “Bantu jikumi ba mu mikoka yamba milaka yapusana-pusana” bemenako jibumba jikatampe ja mikooko ikwabo. Byonka bena Kilishitu bashingwa byo balondela Yesu konse konse ko aya, ‘jibumba jikatampe jiya,’ nangwa’mba jilondela, kalume wa kishinka kabiji wa maana. Jibumba jikatampe kechi jafwainwa kumvwa bumvu kwiyukanyikisha kuba’mba bengila mwingilo umo na “ba kutambulako pamo ku lwito lwa mwiulu” ne. (Hebe. 3:1) Yesu kechi umvwa bumvu kwibatela bashingwa’mba “balongo bami ne.”—Hebe. 2:11.

14. Tukwasha byepi balongo ba kwa Yesu mu bukishinka?

¹⁴ Yesu Kilishitu umona lutundaiko lo tupana ku balongo banji mu bukishinka nobe tubena kupana kwi aye. (Tangai Mateo 25:40.) Mu ñanyi jishinda, aba baji na luketekelo lwa kwikala panopantanda mo batundaikila bena Kilishitu bashingwa na mupashi? Bebatundaika kupichila mu mwingilo wa kusapwila Bufumu. (Mat. 24:14; Yoa. 14:12) Pa myaka yavula yapitapo kibelengelo kya bashingwa panopantanda kyakepelako, bino kya mikooko ikwabo kyailako palutwe. Bantu baketekela kwikala panopantanda bakwasha bena Kilishitu bashingwa na mupashi kufikizha mwingilo wa kulenga baana ba bwanga byo bengilako mwingilo wa kusapwila, nangwatu kwingilako mwingilo wa kimye kyonse. (Mat. 28:19, 20) Twafwainwa kulabijila kuba’mba kupana bupe bwa mali bimye bimo kukwasha uno mwingilo mu mashinda avula bingi.

15. Mwina Kilishitu yense wafwainwa kumona byepi kajo ka ku mupashi ka pa kimye kyafwainwa kafuma kwi kalume kabiji ne bifuukula kalume?

¹⁵ Mwina Kilishitu yense, wafwainwa kumona byepi kajo ka ku mupashi kabena kusampanya kalume wa kishinka pa kimye kyafwainwa kupichila mu mabuku alumbulula Baibolo ne kupwila kwa bwina Kilishitu? Nanchi twikatambwila na maboko abiji ne kwingijisha byo tufundamo nyi? Twakonsha kubapo byepi pa bintu byafuukula jibumba ja kalume? Umvwe twakokela mikambizho yo betupa tumwesha lwitabilo mwi Yehoba.—Yako. 3:17.

16. Mambo ka bena Kilishitu bonse kyo bafwainwa kumvwina balongo ba kwa Kilishitu?

¹⁶ Yesu waambile’mba: ‘Mikooko yami yumvwa jiwi jami, ne amiwa neiyuka, ne ayo indondela.’ (Yoa. 10:27) Bena Kilishitu bashingwa nabo byobyo boba. Nga aba ‘baya’ nabo boba byepi? Abano nabo bafwainwa kumvwina Yesu. Bafwainwa ne kumvwina balongo banji. Mambo bebapa mutembo wa kutangijila ne kutesha muchima bantu ba kwa Lesa ku mupashi. Kumvwina jiwi ja balongo ba kwa Kilishitu kwavwangamo ka?

17. Kumvwina jibumba ja kalume kwavwangamo ka?

¹⁷ Lelo jino Jibumba Jitangijila jimenako kalume wa kishinka kabiji wa maana jibena kutangijila mwingilo wa kusapwila kuzhokoloka ntanda yonse. Ba mu Jibumba Jitangijila ke bakulumpe bafikapo, bashingwa na mupashi. Abano bafwainwa kutelwa’mba “bakulumpe” betu babena kwitutangijila. (Hebe. 13:7) Bano bakalama bashingwa babena “kwingijisha mwingilo wa Nkambo,” kupichila mu kulama basapwishi ba bufumu pepi na 7,000,000 mwaya ntanda yonse kukila pa bipwilo 100,000. (1 Ko. 15:58) Kumvwina jibumba ja kalume kilumbulula kwingijila pamo na Jibumba Jitangijila.

Batokwa aba Bomvwina Kalume

18, 19. (a) Aba bomvwina kalume wa kishinka ne wa maana batokwa byepi? (b) Ki ka kyo twafwainwa kuba?

¹⁸ Kufumatu kimye kyo bamutongwele, kalume wa kishinka kabiji wa maana watwajijila ‘kwalulwila bakwabo bavula ku bololoke.’ (Da. 12:3) Abano bavwangamo boba baji na luketekelo lwa kupuluka lonaiko lwa buno bwikalo bubi. Byo kyaikalapo jishuko kwikala na bulunda bwawama ne Lesa!

¹⁹ Mu kimye kya kulutwe, umvwe ‘muzhi wazhila, Yelusalema mupya, [muji ba 144,000] waikila mwiulu kufuma kwi Lesa, wanengezhiwa jimo nobe musongwa wavwajila bulongo mwata wanji,’ ki ka kikamwekela boba baumvwijile jiwi ja kalume? Baibolo waamba’mba: “Lesa mwine ukekala nabo, kabiji aye ukashimuna mipolo yonse ku meso abo, ne lufu kechi lukekalako jibiji ne, nangwa mabingo, nangwa kujila, nangwa misongo, kechi bikekalako jibiji ne. Bintu bitanshi byapichijila.” (Lum. 21:2-4) Twayai twesekenga na ngovu yetu yonse kumvwina Kilishitu ne balongo banji bakishinka bashingwa na mupashi.

Bi ka byo Mwafundamo?

• Ñanyi kishinka kimwesha’mba Yehoba waketekela kalume wa kishinka kabiji maana?

• Ki ka kimwesha’mba Yesu Kilishitu wa ketekela jibumba ja kalume?

• Mambo ka o twafwainwa kuketekela kalama wa kishinka?

• Tumwesha byepi kuba’mba twaketekela kalume?

[Kipikichala pa peja 25]

Mwamuyuka Yehoba ye asala kwikala musongwa wa mwananji mu kimye kya kulutwe nyi?

[Kipikichala pa peja 26]

Yesu Kilishitu wapa kalume wa kishinka kabiji wa maana bukulumpe bwapa “bintu byanji”

[Kipikichala pa peja 27]

Kimye kyo twingilako mwingilo wa kusapwila, tutundaika bashingwa na mupashi