Kipwilo byo Bekinengezha ne byo Bekitangijila

MU NKALATA yanji itanshi ku bena Kolinda, mutumwa Paulo waambile bukine bwanema bingi pe Lesa. Wanembele’mba: “Lesa ye Lesa wa mutende kechi wa bimvulañanya ne.” Kabiji pa mambo a kupwila, waambile’mba: “Bintu byonse byubiwe na mushingi ne mo byalondankena.”—1 Ko. 14:33, 40.

² Ku ntendekelo ya ino nkalata, uno mutumwa wafundañeneko pa mambo a mepatulo ajinga mu kipwilo kya bena Kolinda. Paulo wasashijile bano balongo ‘kwamba na jiwi jimo’ ne ‘kukwatankana na muchima umo ne na mulanguluko umo.’ (1 Ko. 1:10, 11) Kepo ebafunjileko pa bintu bibalengejilenga kubula kukwatankana mu kipwilo. Waambile pa byalengwa mubiji wa muntu pa kulumbulula buneme bwa kukwatankana ne kwingijila pamo. Wakambizhe bonse mu kipwilo kya bena Kilishitu kwitemwa bene na bene, kechi na mambo a mingilo yo bajinga nayo mu kipwilo ne. (1 Ko. 12:12-26) Pa kuba’mba bonse mu kipwilo bengijilenga pamo, kipwilo kyafwainwe kukwatankana.

³ Pano nga kipwilo kya bena Kilishitu bafwainwe kwikinengezha byepi pa kuba’mba kikwatankane? Ñanyi wafwainwe kwikinengezha? Bafwainwe kunengezha byepi mingilo mu kipwilo? Bañanyi bo bafwainwe kutongola kwingila mingilo? Baibolo wakonsha kwitukwasha kukumbula ano mepuzho.—1 Ko. 4:6.

KIPWILO BEKINENGEZHA NA LUTANGIJILO LWA LESA

⁴ Kipwilo kya bena Kilishitu kyalengelwe pa juba ja Pentekosita mu 33 C.E. Twakonsha kufunjilako ka ku byo banengezhezhe kino kipwilo kya mu myaka kitota kitanshi? Bekinengezhezhe na lutangijilo lwa Lesa. Jishimikila ja mu Baibolo jaamba pa byamwekele mu Yelusalema myaka nobe 2,000 yapitapo, jimwesha kuba’mba kipwilo kya bena Kilishitu bashingwa kyalengelwe na lutangijilo lwa Lesa. (Byu. 2:1-47) Kino kipwilo kyajinga kishimikwa kyanji, kabiji bonse mu kipwilo bajinga ba mu nzubo yanji. (1 Ko. 3:9; Efi. 2:19) Byonka byo banengezhezhe kipwilo mu myaka kitota kitanshi, byo byo banengezha ne kipwilo kya bena Kilishitu lelo jino.

⁵ Kipwilo kya mu myaka kitota kitanshi kyatendekele na baana ba bwanga nobe 120. Mupashi wazhila patanshi bamwitulwijile pa bano bantu pa kufikizha bungauzhi buji pa Yoela 2:28, 29. (Byu. 2:16-18) Bino pa jonkaja juba, bantu bakwabo nobe 3,000 babatizhiwe mu mema ne kwikala mu kipwilo kya bashingwa na mupashi. Batambwijile mambo a Kilishitu “kabiji bantu batwajijile kufunda ku batumwa.” Kabiji “Yehoba wanungilengako kwi abo bantu bavula bo apulwishenga.”—Byu. 2:41, 42, 47.

⁶ Kipwilo kya mu Yelusalema kyakomene bingi bukiji kya kuba ne ñanga mwine mukatampe wa Bayudea wijizhañenye’mba baana ba bwanga bakumbanya Yelusalema na mafunjisho abo. Kabiji bañanga ba Bayudea bamo baikele baana ba bwanga mu kipwilo kya mu Yelusalema.—Byu. 5:27, 28; 6:7.

⁷ Yesu waambile’mba: “Mukekala bakamonyi bami mu Yelusalema, monse mu Yudea ne mu Samaliya, ne monse mwapela ntanda.” (Byu. 1:8) Kimye kyo kwabuukile lupato lukatampe mu Yelusalema Setepena saka afwa kala, baana ba bwanga bajingamo bapalañejile monse mu Yudea ne mu Samaliya. Bino konse ko bayilenga, batwajijile kusapwila mambo awama ne kukwasha bantu bakwabo kwikala baana ba bwanga, kubikapotu ne bena Samaliya bamo. (Byu. 8:1-13) Pa kupitapo kimye, batendekele kusapwila mambo awama ku bantu ba mu bisaka bikwabo babujile kuya ku mukanda. (Byu. 10:1-48) Uno mwingilo wa kusapwila walengejile baana ba bwanga kuvula ne kulenga bipwilo bya katataka bya bena Kilishitu mu mapunzha apusana pusana.—Byu. 11:19-21; 14:21-23.

⁸ Banengezhezhe byepi pa kuba’mba bipwilo byonse bya katataka bilondelenga lutangijilo lwa Lesa? Na lutangijilo lwa mupashi wa Lesa, kwajinga lunengezho lwa kwikala na bakafunga ba kulama jitanga. Mu bipwilo byo bafwakashijile kwi Paulo ne Banabasa pa lwendo lwabo lutanshi lwa bumishonale, batongwele bakulumpe mu bipwilo. (Byu. 14:23) Nembi wa Baibolo aye Luka wanembele byaambile Paulo kimye kyo asambakene na bakulumpe mu kipwilo kya mu Efisesa. Paulo waambijile bano bakulumpe amba: “Saka mwita muchima anwe bene ne jitanga jonse, mupashi wazhila jo emutongwejilepo bukalama kuba’mba mufungenga kipwilo kya Lesa kyo apotele na mashi a Mwananji.” (Byu. 20:17, 28) Bebatongwele kwikala bakulumpe mu kipwilo mambo bafikizhe bikebewa bya mu Binembelo. (1 Timo. 3:1-7) Muntu mukwabo waingijilanga pamo ne Paulo, aye Titusa bamupele luusa lwa kutongola bakulumpe mu bipwilo bya mu Keleta.—Titu. 1:5.

⁹ Bipwilo byavula byo byalengelwe, batumwa ne bakulumpe mu Yelusalema batwajijile kutangijila bipwilo bya bena Kilishitu byonse byakumbene mu byalo byavula mu myaka kitota kitanshi. Bo bajinga jibumba jitangijila ja kipwilo kya bena Kilishitu.

¹⁰ Byo anembejilenga kipwilo kya mu Efisesa, mutumwa Paulo wibabujile’mba, inge kebalondele lutangijilo lwa mupashi wa Lesa ne kukookela Yesu Kilishitu aye mutwe wa kipwilo, kipwilo kya bena Kilishitu kikwatankana. Mutumwa Paulo wakambizhe bano bena Kilishitu kwipelula ne kulama “buumo bwa mupashi” ne kupwanañena pamo mu mutende na bonse mu kipwilo. (Efi. 4:1-6) Kepo aambile byambo biji pa Salamo 68:18 byaamba pe Yehoba byo anengezha banabalume bafikilamo kutangijila kipwilo nabiji batumwa, bangauzhi, basapwishi, bakafunga, ne bafunjishi. Bano banabalume byo bajinga bya bupe kufuma kwi Yehoba, bakoseshe kipwilo kyonse mu lwitabilo. Kabiji kino kyatokeshe Lesa ku muchima.—Efi. 4:7-16.

MU BIPWILO LELO JINO BALONDELA BYAUBANGA BATUMWA

¹¹ Lelo jino, mu bipwilo byonse bya Bakamonyi ba kwa Yehoba babena kulondela lutangijilo luntutu lumo. Abino bipwilo byonse byakwatankana kabiji bebitangijila ku jibumba ja bashingwa na mupashi. (Zeka. 8:23) Yesu Kilishitu ye walengela’mba kikale bino. Monka mo alayijile, watwajijila mu bukishinka kwikala na baana banji ba bwanga bashingwa “moba onse kukafikatu ne ku mpelo ya buno bwikalo.” Bantu beya mu kipwilo, batambwila mambo awama, kwipana na muchima yense kwi Yehoba ne kubatizhiwa kwikala baana ba bwanga ba kwa Yesu. (Mat. 28:19, 20; Mako 1:14; Byu. 2:41) Beya kuyuka ‘kafunga wawama,’ aye Yesu Kilishitu amba ye Mutwe wa jitanga jonse jalengwa na bena Kilishitu bashingwa kuvwangakotu ne “mikooko ikwabo.” (Yoa. 10:14, 16; Efi. 1:22, 23) Jino “jitanga jimo” jitwajijila kukwatankana byo jikookela lutangijilo lwa Kilishitu mu bukishinka ne kunekenena jibumba ja “kalume wa kishinka kabiji wa maana” Kilishitu jo atongola. Twayai tutwajijile kuketekela jino jibumba.—Mat. 24:45.

MWINGILO WA BIJE BYA BUPOPWESHI

¹² Pa kuba’mba banengezhe kajo ka ku mupashi pa kimye kyafwainwa ne kusapwila mambo awama a Bufumu mpelo saka ikyangye kufika, balengapo bije bimo. Abino bije byo baswisha mwayila mizhilo, byayukanyikwa na mizhilo ya mu byalo byapusana pusana kabiji bingijila pamo. Abino bije bikwasha mwingilo wa kusapwila mambo awama ntanda yonse.

BYO BANENGEZHA KUTANGIJILA MUSAMPI

¹³ Umvwe balenga ofweshi wa musampi, batongola bakulumpe basatu nangwa bavula ba kwikala mu Kavoto ka Musampi. Bano bakulumpe batala pa mingilo ya mu kyalo nangwa mu byalo byo batangijila ku yewo musampi. Umo wa mu kavoto wikala ukwatankanya mingilo ya Kavoto ka Musampi.

¹⁴ Bipwilo byo batangijila ku musampi umo umo bebyabanya mu myanzo. Myanzo imo yabaya kwesakana na mpunzha byo iji, milaka ijimo ne bipwilo biji mu yewo musampi. Batongola kalama wa mwanzo kwingijila bipwilo biji mu mwanzo umo. Ofweshi wa musampi ubuula kalama wa mwanzo mikambizho ya kulondela pa kwingila mwingilo wanji.

¹⁵ Bipwilo bilondela byanengezha jibumba ja Lesa pa kuba’mba bonse bamwenemo. Bakookela bakulumpe mu kipwilo bo batongola kutala pa mwingilo wa mu misampi, mu myanzo ne mu bipwilo. Baketekela kalume wa kishinka kabiji wa maana kunengezha kajo ka ku mupashi pa kimye kyafwainwa. Kalume wa kishinka lelo jino, naye ukookela buntangi bwa Kilishitu, kumvwina mafunde a mu Baibolo, ne kulondela lutangijilo lwa mupashi wazhila. Umvwe bonse ke twingijile pamo, mufuma byawama bingi byonka byo kyajinga ku bena Kilishitu ba mu myaka kitota kitanshi: “Bipwilo byakoselenga mu lwitabilo ne bantu baitabijile bavujijilengako pa juba pa juba.”—Byu. 16:5.