Nenuwa Pomuji Paboba Boatemwa Lesa Nyi?
“Awa uji na mikambizho yami ne kwiilama, ye wantemwa: ne awa wantemwa ye bakatemwa kwi Batata.”—YOANO 14:21.
1, 2. (a) Yehoba wamwesheshe byepi’mba watemwa bantu? (b) Kika Yesu kyoatatwile bufuku bwajuba ja Nisani 14, 33 C.E.?
YEHOBA watemwa bantu banji boalengele. Watemwatu bantu bonse kyakuba “wapaine Mwananji yenkawa umo amba, bonse bamwitabila kechi bonaike ne, poso amba bekale na bumi bwa myaka.” (Yoano 3:16) Kimye kya Kuvuluka lufu lwa Kilishitu byokyafwenya kala kepepi, bena Kilishitu bakine bafwainwa kulangulukishapo’mba Yehoba “ye witutemenwe atweba, ne kutuma Mwananji, amba, ekale mfuto ya mambo etu.”—1 Yoano 4:10.
2 Bufuku bwajuba ja Nisani 14, 33 C.E., bobwakonkenejilemo Yesu nebaana banji babwanga 12 munzubo yapeulu mu Yelusalema nakuja kijiilo kya Lupitailo kyakuvuluka kupokololwa kwabena Isalela mu Ijipita. (Mateo 26:17-20) Panyuma yakukonkena pamo kukino kijiilo kya Bayudea, Yesu wamupangilemo Yudasa Isakaliota nekutatula kuja kijiilo kyuba bena Kilishitu kya Kuvuluka lufu lwa Kilishitu.a Yesu wajile kino kijiilo kyakumuvulukilako kyashinkwa wabula mbizho newaini uchila kulumbulula kimpashañano kyamubiji nemashi anji, nabatumwa bashajilepo 11. Byambo byavula byaamba pabyoaubile kino kijiilo byanembelwe nabanembi ba Mambo awama abo ba Mateo, Mako, Luka apa bino nemutumwa Paulo wikitelele’mba ‘kijiilo kya Nkambo.’—1 Kolinda 11:20; Mateo 26:26-28; Mako 14:22-25; Luka 22:19, 20.
3. Muñanyi mashinda anema jishimikila janembele mutumwa Yoano mojibena kwambila pakimye kyapeleleko Yesu kyoajinga nabaana banji babwanga munzubo yapeulu, mojapusena nabyanembele bakwabo?
3 Bino, mutumwa Yoano kechi watongolapo byobaubile pakupishamo shinkwa newainine, kampe namambo akuba wanembelenga Mambo anji awama (nobe muma 98 C.E.), bena Kilishitu batanshi kasa bayukila jimo mwakwibyubila. (1 Kolinda 11:23-26) Nangwa byonkabyo, byoatangijilwe namupashi, Yoano bunketu yewitubulapo nebintu bimo byanema Yesu byoaambile nekuba saka Akyangye kutatula kuja kijiilo kya Kuvuluka lufu lwanji, nepanyuma yakuja. Bino byambo byalusekelo biji mubyapitala byavula bya Mambo awama anembele Yoano. Byalumbulula bingi bulongo bantu Lesa boatemwa. Twayai tubalaule Yoano kyapitala 13 kufika ku 17.
Funjilai Kubutemwe Boamwesheshe Yesu
4. (a) Yoano wakonkomwejile byepi pamutwe mukatampe wakupwila kwa Yesu nabaana banji babwanga kimye batatwile kuja kijiilo kya Kivuluko? (b) Ñanyi kishinka kikatampe kimo Yehoba kyoatemenwa Yesu?
4 Butemwe yemutwe mukatampe waambiwapo mubino byapitala muji lufunjisho lwakwibashajikapo Yesu loafunjishe baana banji babwanga. Ñambilo yakyambo kya “butemwa” imwekamo bimye byavula. Bino byapitala byobyonka bunke byaamba pe Yesu byoatemwa Shanji Yehoba, nebaana banji babwanga. Butemwe Yesu boatemwa Yehoba bwaambiwa mu Mambo awama onse ashimikizha bwikalo bwanji, bino Yoano yeyenka wanembele byambo Yesu byoashinkamikile’mba: “nebatemwa Batata.” (Yoano 14:31) Kabiji Yesu waambile kuba’mba Yehoba wamutemwa nekulumbulula kyoamutemenwa. Waambile’mba: “Monka mwantemenwa Batata, ne amiwa nemutemwa pamo: ikalainga mu butemwe bwami. Umvwe mwalama mikambizho yami, mukekala mu butemwe bwami; byonka byo nalama mikambizho ya Batata, ne kwikala naikala mu butemwe bwabo.” (Yoano 15:9, 10) Ee kine, Yehoba watemwa Mwananji mambo alukokelo lwanji lwanamuchima yense. Byolwaikalapo lufunjisho lwawama kubonse bamulondela Yesu Kilishitu!
5. Yesu wamwesheshe byepi butemwe bwanji kubaana banji babwanga?
5 Butemwe bukatampe Yesu boatemenwe baana banji babwanga bwaambiwapo bingi kuntendekelo yajishimikila jakwa Yoano jibena kwamba pakupwila kwapeleleko Yesu koapwijile nabaana banji babwanga. Yoano washimikizhe’mba: “Kabiji kijiilo kya Lupitailo byo kyaji ke pepitu kufika, Yesu byo ayukile’mba, kimye kyami kyafika kya kufuma panopantanda ne kuya kwi Batata, byo atemenwe ba kwanji baji panopantanda, aye wibatemenwe ne ku mpelo.” (Yoano 13:1) Paonka a mabanga avulukwa, wamwesheshe lufunjisho lwakumwenako lwanema bingi lwakwingijila bakwetu mubutemwe. Wibovwele kumaulu. Abo bobafwainwe kuba kino kintu kwi Yesu nekubalongo babo, pano kechi bekyubilene. Yesu waingijile uno mwingilo yebasujile nekwibambila baana banji babwanga’mba: “Inge amiwa, Nkambo yenu ne Mufunjishi wenu, nemovwa maulu enu, ne anweba nenuwa mwafwainwa kwiovwa ku maulu enu anwe bene na bene. Mambo amiwa nemushila mwa kulondela, amba ne anweba mubenga monka mo nemubila.” (Yoano 13:14, 15) Bena Kilishitu bakine nalusekelo bafwainwa kwipana abo bene nekwingijila balongo babo.—Mateo 20:26, 27, Yoano 13:17.
Londelainga Mukambizho Mupya
6, 7. (a) Ñanyi byambo byanemba Yoano pamambo abyo batatwile kuja Kivuluko? (b) Ñanyi mukambizho mupya Yesu yeapele baana banji babwanga, kabiji kika kyajingamo kipya?
6 Jishimikila jakwa Yoano jibena kwamba pabyamwekele munzubo yapeulu bufuku bwa Nisani 14, jojonka jatongola Yuda Isakaliota byoalupukile. (Yoano 13:21-30) Umvwe twakwatankanya mashimikila ashimikizhiwa mu Mambo awama kimwesha kuba’mba panyuma yakulupukamo uno wamusolwele, Yesu popoatatwile kuja kijiilo kya Kuvuluka lufu Lwanji. Wisambile bintu byavula bingi nabatumwa banji bakishinka, byakwibajimunako nemikambizho yakwibashajikapo. Byotubena kwinengezha kuya nakutanwa ku Kivuluko, twafwainwa kutesha muchima kubyambo byaambile Yesu pakyokya kimye, mambo tukeba kwikala paboba Lesa boatemwa.
7 Mukambizho mutanshi Yesu yeapele baana banji babwanga panyuma yakutatula kuja kijiilo kya Kuvuluka lufu lwanji wajinga mupya. Waambile’mba: ‘Mukambizho mupya nemupa anweba, namba mwitemwe anwe bene na bene; byonka byo nemutemwa amiwa, ne anweba mwitemwe anweba bene na bene. Pa kyo kino po po bakayukila bonse amba anweba mwi baana bami ba bwanga, inge mwitemwa anwe bene na bene.’ (Yoano 13:34, 35) Kika kyajinga kipya muuno mukambizho? Panyuma kacheche paoa mabanga Yesu wikilumbulwile amba: “Uno ye mukambizho wami, namba mwitemwe anwe bene na bene, byonka byo nemutemwa amiwa. Ka paji muntu uji na butemwe bwakila bo buno ne, amba muntu elele balunda nanji mweo wanji.” (Yoano 15:12, 13) Mu Mizhilo ya Mosesa bena Isalela bakambizhiwe ‘kutemwa bakwabo pamo byonka byo betemwa abo bene.’ (Bena Levi 19:18) Bino mukambizho wakwa Yesu aye wakila nepa uno. Bena Kilishitu bafwainwa kwitemwa bene nabene byonka bibatemwa Kilishitu, nekwipana abo bene kufwila balongo babo.
8. (a) Butemwe bwakwipana bulumbululaka? (b) Lelo jino Bakamonyi bakwa Yehoba bwamwesha byepi butemwe bwabo bwakwipana?
8 Kimye kya Kivuluko kyokimye kyawama kwisalaula atweba bene pamuntu pamuntu nekipwilo kyonse, kwimona umvwe kyakine tuji nakino kiyukilo kyabwina Kilishitu bwakine—butemwe bwa Kilishitu. Butemwe bwakwipana bwauno mutundu bwakonsha kulumbulula’mba, mwina Kilishitu wafwainwa nekubika bumi bwanji mukizumba kukila kusolola balongo banji. Mambo akuba’mba javula kwikala kwipana atwe bene kuba’mba twingijile balongo betu nekukwasha bantu. Mutumwa Paulo wajinga wakumwenako wawama bingi mukino. (2 Kolinda 12:15; Filipai 2:17) Muchima wakwipana uji na Bakamonyi bakwa Yehoba wayukanyikwa bingi kuzhokoloka ntanda yonse, byobakwasha balongo babo nebakwabo mukinkalankulo nekufunjishako bantu bakwabo bukine bwamu Baibolo.b—Ngalatiya 6:10.
Bulunda Bwafwainwa Kukinjikwa
9. Pakuba’mba tulame bulunda bwetu na Lesa ne Mwananji kika kyotwafwainwa kuba nalusekelo?
9 Kafwako nangwa kimo kyanema kwiatweba kyakila kwitutemwa kwi Yehoba ne Mwananji, Yesu Kilishitu ne. Pano pakuba’mba betutemwe neatweba twayuka’mba betutemwa, twafwainwa kubapo kimo. Pabonkabwa bufuku bwapeleleko kumonañana nabaana banji babwanga, Yesu waambile’mba: “Awa uji na mikambizho yami ne kwiilama, ye wantemwa: ne awa wantemwa ye bakatemwa kwi Batata, ne amiwa nkamutemwa, ne kwimwesha ami mwine kwi aye.” (Yoano 14:21) Namambo akuba twanemeka bulunda bwetu na Lesa ne Mwananji, nalusekelo tukokela mikambizho yabo. Kino kyavwangamo nemukambizho mupya wakumwesha butemwe bwakwipana nekulondela mukambizho wakambizhe Kilishitu panyuma yalusanguko lwanji’mba “mukebasapwile bantu, ne kunshimuna” nekwibikako ‘kwibalula ke baana babwanga’ aba batambwila mambo awama.—Byubilo 10:42; Mateo 28:19, 20.
10. Bulundaka buji nabashingwa ne ba ‘mikooko ikwabo’?
10 Palutwe kacheche bonkabwa bufuku, pakukumbula jipuzho jaipwizhe mutumwa wakishinka Yudasa (Tadeusa), Yesu waambile’mba: “Inge muntu wantemwa, ukalama mambo ami: ne Batata bakamutemwa, ne atweba tukeya ko aji, ne kumona mwa kwikala monka mwanji.” (Yoano 14:22, 23) Bena Kilishitu bashingwa baitwa kwikala mubukalama pamo ne Kilishitu mwiulu, nangwatu kimye kyobaji panopantanda balunda bakine kine na Yehoba nena Mwananji. (Yoano 15:15; 16:27; 17:22; Bahebelu 3:1; 1 Yoano 3:2, 24) Ba ‘mikooko ikwabo’ baji naluketekelo lwakwikala panopantanda, nabo balunda bakine na “kafunga umo” Yesu Kilishitu, ne Lesa wabo Yehoba kikulutu batwajijila kwikala balukokelo.—Yoano 10:16; Masalamo 15:1-5; 25:14.
“Kechi ba Panopantanda Ne”
11. Lujimunoka lwakosa Yesu loajimwine baana banji babwanga?
11 Pakimye kyapeleleko kumonañana nabaana banji babwanga bakishinka saka akyangye kufwa, Yesu wibajimwine lujimuno lwakosa’mba: Inge muntu bamutemwa kwi Lesa, bapanopantanda bakamushikwa. Waambile’mba: “Inge kabiji ba panopantanda bemushikwa, mwayuka’mba, babangijile kunshikwa amiwa. Inge mwaji ba panopantanda inge ba panopantanda bemutemwa, mambo batemwa babo bene: pakuba anweba byo mwabula ba panopantanda, ne amiwa nemusalulula mu ba panopantanda, ba panopantanda bemushikwa. Vulukai byo nemwambile namba, muzha kechi wakila nkambo yanji ne. Inge bampachile amiwa, kabiji bakemupata anweba; inge balamine mambo ami, bakalama ne enu.”—Yoano 15:18-20.
12. (a) Mamboka Yesu kyoajimwijileko baana banji babwanga kuba’mba bapanopantanda bakebashikwa? (b) Kintuka kyawama bonse kyobafwainwa kuvulukanga Kivuluko byokibena kufwenya pepi?
12 Yesu wibajimwine luno lujimuno kuba’mba aba batumwa 11 nebena Kilishitu bakine bonse bakeya panyuma yabo bakabule kulefulwa nekuleka mwingilo wabo namambo akwibashikwa kuba panopantanda. Kabiji waambile’mba: “Bino bintu nemwambila namba, mwakeya kwituntula. Bakemupanga mu mashinagoga: kine, ne juba jibenakwiya jo bakalanguluka bonse bemwipaya amba tubenakwingijila Lesa. Ne bino bintu bakebyuba, mambo kechi bayuka Batata ne, nangwa amiwa ne.” (Yoano 16:1-3) Dikishonale wa Baibolo umo walumbulula’mba kino kyambo kyatuntululwa’mba “kwituntula” kilumbulula “kulengela muntu kuleka kuketekela muntu yeafwainwa kukinkamo manungo nekumukokela; walefulwa nekuleka mwingilo wanji.” Kimye kya Kivuluko byokibena kufwenya pepi, kyawama bingi atweba bonse kuvuluka mingilo yawama yabantu bakishinka bajingako kala nebajipo lelo jino, kabiji nekukosa byonka byobakosa mubimye byamalwa. Kange muleke bantu bemulengulula nangwa lumanamo kwimufumya kwi Yehoba ne Yesu ne, mukifulo kyakino pwishai namuchima wenu yense kwibaketekela nekwibakokela.
13. Kintuka Yesu kyoalombejileko baana banji babwanga kwi Shanji?
13 Mululombelo lwanji lwakupezhako saka bakyangye kufuma muyoya nzubo yapeulu mu Yelusalema, Yesu waambile kwi Shanji amba: “Amiwa nebapele mambo enu; ne ba panopantanda bebashikwa, mambo abo kechi bo ba panopantanda ne, byonka byo nji amiwa kechi ne wa panopantanda ne. Kechi nalomba namba mwibafumye panopantanda ne, poso namba mwibalame kwi yewa mubi. Abo kechi ba panopantanda ne, byonka byo nji amiwa kechi ne wa panopantanda ne.” (Yoano 17:14-16) Twafwainwa kuketekela kuba’mba Yehoba usopa boba boatemwa, nekwibakosesha byobefumya kubya panopantanda.—Isaya 40:29-31.
Ikalai mu Butemwe bwa Mwana Nebwa Shanji
14, 15. (a) Yesu wipashañenye kukika, mukwipusanyako na ‘muñanzañanza muncha’? (b) “Misampi” ya “muñanzañanza wa kine” bobañanyi?
14 Mumwisambo yeesambile nabaana banji babwanga bakishinka bufuku bwa Nisani 14, Yesu wipashañenye ku “muñanzañanza wa kine,” kupusanako na ‘muñanzañanza muncha’ wa bena Isalela babujile bukishinka. Waambile’mba: “Amiwa ne muñanzañanza wa kine, Batata bo banjimi.” (Yoano 15:1) Kala kunyuma, ngauzhi Yelemiya wanembele bino byambo Yehoba byoaambile kubantu banji baalukile ke banchatu: “Amiwa byo nakujimbile wajinga muñanzañanza wawama, . . . nanchi pano wialula byepi ke munchatu, wa mungye?” (Yelemiya 2:21) Ngauzhi Hoseya naye wanembele’mba: “Bena Isalela bauba nobe muñanzañanza watenkuma bulongo, upanga bipangwa byavula; . . . Baji na michima ibiji.”—Hoseya 10:1, 2.
15 Mukifulo kyakupanga bipangwa bya bupopweshi bwakine, bena Isalela basendukile mulwitabilo nekupanga bipangwa byamingilo yabo. Byokwashajile moba asatu saka akyangye kupwila pamo nabaana banji bakishinka, Yesu wabujile bantangi bakamfutumfutu ba Bayudea amba: “Nemwambila namba, Bufumu bwa Lesa bakemwangatabo, bakebupana ku mukoka ukapanga bipangwa byabo.” (Mateo 21:43) Auno mukoka mupya ke “bena Isalela ba Lesa,” bena Kilishitu bashingwa ba 144,000 bapashañanyiwa ku “misampi” ya “muñanzañanza wa kine,” aye Yesu Kilishitu.—Ngalatiya 6:16; Yoano 15:5; Lumwekesho 14:1, 3.
16. Yesu wakambizhe batumwa bakishinka 11 kubaka, kabiji twafwainwa kwambapo’mbaka pa bashingwa bakishinka mukino kimye kyakumpelo?
16 Yesu wabujile batumwa banji 11 boajinga nabo munzubo yapeulu’mba: “Misampi yonse iji mwi amiwa ibula kupanga bipangwa, beyifumyako: ne yonse misampi ipanga bipangwa, nayo beyitokesha, amba ipange byavula. Ikalainga mwi amiwa, ne amiwa mwi anweba. Musampi byonka byo abula kukonsha kwipangila, poso waikala mu muñanzañanza; ne anweba pamo, poso mwikale mwi amiwa.” (Yoano 15:2, 4) Mpito yamumoba etu alelo ya bantu ba Yehoba yamweshatu patoka kuba’mba bena Kilishitu bakishinka bashingwa bakwatankana na Mutwe wabo aye Yesu Kilishitu. (Efisesa 5:23) Bebatokesha nekwibawamisha. (Malakai 3:2,3) Kutatulatu mu 1919, bapanga bipangwa bya Bufumu byavula bingi, kutendeka nabena Kilishitu bakwabo bashingwa, kepo ne “jibumba jikatampe” jibena kuya nakuvujilakotu kikupu kutatula mu 1935.—Lumwekesho 7:9; Isaya 60:4, 8-11.
17, 18. (a) Ñanyi byambo byakwa Yesu bikwasha bashingwa neba mikooko ikwabo kwikajijila mubutemwe bwa Yehoba? (b) Kutanwa ku Kivuluko kuketukwasha byepi kukosesha mfuukwilo yetu yakwikajijila mubutemwe bwa Lesa?
17 Byambo byakwa Yesu bikwabo byoaambile byalamatatu bonse, bena Kilishitu bashingwa nebalunda nabo byakuba’mba: ‘Monka mu kino mo batumbijikilwa Batata, pa kupanga bipangwa byavula anweba; byonkabyo mukekala ke baana bami babwanga. Monka mwantemenwa Batata, ne amiwa nemutemwa pamo: ikalainga mu butemwa bwami. Umvwe mwalama mikambizho yami, mukekala mu butemwe bwami; byonka byo nalama mikambizho ya Batata, ne kwikala naikala mu butemwe bwabo.’—Yoano 15:8-10.
18 Atweba bonse tukeba kwikala mubutemwe bwa Lesa, kabiji kino kitutundaika kwikala bena Kilishitu bapanga bipangwa. Tuba kino byotwingijisha tubimye twetu tonse totushukilwa mukusapwila “mambo awama a bufumu.” (Mateo 24:14) Kabiji twibikako kumwesha “bipangwa bya mupashi” mubwikalo bwetu atweba bene. (Ngalatiya 5:22, 23) Kutanwa ku Kivuluko kya lufu lwa Kilishitu kuketukosesha bingi mukino, mambo kiketuvululako butemwe bwabaya bwitutemwa Lesa ne Kilishitu.—2 Kolinda 5:14, 15.
19. Bukwashoka bukwabo botukafunda mumutwe walondelapo?
19 Panyuma yakuja Kijiilo, Yesu walaile’mba Shanji ukebatumina baana banji babwanga bakishinka “Nkwasho, ye Mupashi Wazhila.” (Yoano 14:26) Mu mutwe walondelapo momotukafunda uno mupashi byoakwasha bashingwa neba mikooko ikwabo kwikajijila mubutemwe bwa Yehoba.
[Tubyambo twa mushi]
a Kwesakana nakubala kwa mu Baibolo, Nisani 14 ikatatula pakuzhika kwa juba ja Pakina, March 28, 2002. Mabanga ajino juba, Bakamonyi bakwa Yehoba kuzhokoloka ntanda yonse bakapwila nakuvuluka lufu lwa Nkambo, Yesu Kilishitu.
b Monai mubuku wa Jehovah’s Witnesses—Proclaimers of God’s Kingdom, wanembwa na Bakamonyi bakwa Yehoba, kyapitala 19 ne 32.
Mepuzho Akupitulukamo
• Lufunjishoka lwabutemwe Yesu loafunjishe baana banji babwanga?
• Mamboka kimye kya Kivuluko okyaikela kimye kyawama kwisalaula atwe bene?
• Mamboka otwafwainwa kubula kutuntwishiwa nalujimuno lwaambile Yesu pamambo akupatwa nekumanyikwa naba panopantanda?
• “Muñanzañanza wa kine” ye ñanyi? Nga “misampi” bobañanyi, kabiji kika kikebewa kwiabo?
[Kipikichala pa peja 23]
Yesu wafunjishe batumwa banji lufunjisho lwabutemwe lukabula kulubiwako
[Bipikichala pa peja 24, 25]
Baana babwanga bakwa Kilishitu bakokela mukambizho wanji wakumwesha butemwe bwakwipana