Mepuzho Kufuma Kubatanga
Nanchi mwina Kilishitu wafwainwa kwamba jashi jakijilo kyamuntu wiipaya mwinenyi?
Mwina Kilishitu mwine wafwainwa kufuukula najiwi janji jamuchima jatokato kumeso a Lesa nekumona umvwe wakonsha kwamba jashi jakijilo kyamuntu wamweka nobe wiipayatu aye mwine. Kimye kyoabena kulangulukapo byakwamba jashi, wafwainwa kwishikisha ano mepuzho: Yehoba umona byepi kwiipaya? Awe muntu wafwa nanchi kyakine wiipayatu mwinenyi? Abya milanguluko nangwa binyenge byobyamulengela kwiipayanyi? Kwiipaya bekumona byepi bantu kuno kumpunzha kotwikela?
Atweba bena Kilishitu tukeba kuyuka Yehoba byoamona kwiipaya. Kwi Yehoba bumi bwamuntu bwanema kabiji bwazhila bingi. (Ntendekelo 9:5; Masalamo 36:9) Muntu umvwe wasakatu mwine kwiipaya, Lesa kechi kimutokela kumuchimane. (Kulupuka 20:13; 1 Yoano 3:15) Nanchi kino kishinka kechi kichakulapo mulanguluko wakwamba jashi jakijilo kyamuntu wiipaya mwine nenyi?
Vulukai kyamwekejile Mfumu wabena Isalela aye Saulo. Byoayukile’mba kechi usakupuluka munkondo yanji yapeleleko yoalwilenga nabena Filishitiya ne, mukifulo kyakuleka balwanyi banji’mba beye bamube mwenga, “Saulo washikwile mpoko yanji ne kuponenako.” Bena Filishitiya byobatulukile mubiji wanji, bamupopele kunsakwa yamuzhi wa Bete-shana. Bena Yabeshi-gileada byobaumvwine byaubile bena Filishitiya, bakamwangachilepo mubiji nekumusoka bamusokele. Kabiji bikupa byanji bebisendele nekukebizhika. Bazhikijilwe nanzala moba atanu naabiji, monka mwayijile kisho kyabena Isalela pakujila lufu. (1 Samwela 31:4, 8-13; Ntendekelo 50:10) Aye Davida mushingwa wa Yehoba byoaumvwine byaubile bena Yabeshi-gileada, wibatumijile mawi akuba’mba: “Yehoba emubile bibusa byo mwamubijile lusa aye nkambo yenu, Saulo, byo mwamuzhikile. Kabiji pano Yehoba amweshe lusa ne bukine kwi anweba.” (2 Samwela 2:5, 6) Baibolo kechi ishimunapo’mba bena Yabeshi-gileada bebapelemo mambo pakujila Mfumu Saulo ne. Kabiji esakanyai kino nalufu lwaboba babujilwe kuzhikwa namambo abubi bwabo. (Yelemiya 25:32, 33) Mwina Kilishitu wafwainwa kulanguluka jishimikila jakwa Saulo kimye abena kufuukula’mba kana wakonsha kwamba jashi jakijilo kyamuntu wiipaya mwine nangwane.
Kabiji mwina Kilishitu wafwainwa nekulanguluka nkebelo yajashi jakijilo. Kupusanako naboba baitabila mubumbulwakufwa bwamweo, Bakamonyi bakwa Yehoba kechi bamba jashi jakijilo namulanguluko walubankana wakwamba’mba muntu inge wafwa uya kuntanda ingine. Mukifulo kyakwambila yewa wafwa, nkebelo yajashi jakijilo keyakutekenesha boba bafwisha yewo muntu, nekusapwila bantu bakonkana pamambo abikala muntu umvwe wafwa. (Musapwishi 9:5, 10; 2 Kolinda 1:3-5) Kishinka kikwabo kikelako jashi jakijilo kekukwasha bantu bajipo kuba’mba balangulukenga bumi bwetu byobwaipipa. (Musapwishi 7:2) Nanchi bino bishinka bikengila umvwe mwaamba jashi jakijilo kyamuntu wiipaya aye mwinenyi?
Kyakine, bamo bakonsha kulanguluka’mba awe muntu wiipayatu mwine, saka ayukishatu’mba walengelenga mambo kwi Yehoba. Abya kwikalapo jishinda jakuyukilamo’mba uno mulanguluko wakinenyi? Inyi ako kwiipaya kwajinga kwakupulumukatu namambo abukaji? Bantu bamo bakeba kwiipaya babwela balubuluka muchima jibiji nekwikileka kwiipaya. Muntu kuba walapila pakyoauba umvwe wafwa kalane.
Kishinka kikwabo kilengela bantu kwiipaya kekukatazhiwa mumilanguluko, nekumvwa bumvu pakyoaubile. Muntu umvwe wiipaya namambo abino, kyakine awo muntu kokuba’mba wiipayatu mwine. Kwesakana nabishinka bimo byatanyiwa, bantu bavula beipaya bene namambo akukatazhiwa namilanguluko, kumvwa bumvu nangwa pajipo kintu kyobaubanga kyobepizhizhe. Nanchi Yehoba wakonsha kwibalekelako mambo bantu beipayatu bene namambotu akukatazhiwa mumilanguluko mujino jishinda? Kechi tuji nangovu yakuyuka’mba kana awo muntu wafwa walengele mambo akabula kulekelwa kumeso a Yehoba nangwane. Mwina Kilishitu ubena kukeba kwamba jashi jakijilo kyamuntu wiipaya mwine, wafwainwa kutalatala bulongo nekuyuka kyalengela yewo muntu kwiipaya, wafwainwa kuyuka butuntulu bwanji bwamubiji byobwajinga.
Kuji nekikwabo kyoafwainwa kuyuka: Bantu bamukimasamasa bamona byepi muntu wiipaya mwine, nelufutu lwamuntu? Kikatakata bakulumpe mukipwilo bafwainwa kuyukisha kino, mambo bobaji namutembo wakulama kipwilo kyobajimo kya Bakamonyi bakwa Yehoba kwikala kyabula kaneneno. Kwesakana namumwena bantu bakoko kwenu lufu lwakwiipaya kwayewo mutundu, bakulumpe mukipwilo bakonsha kufuukula kuba’mba jashi kechi jafwainwa kwambiwa kumvula-bantune, nangwa kwijambila Munzubo ya Bufumu ne.
Pano bino, umvwe kyakuba’mba mwina Kilishitu bamulomba kubangi kwamba jashi jakijilo, akyo kiji koaji mwine kuya nakwamba nangwane, kechi ubena kwimenako kipwilone. Umvwe kyakuba wafuukula’mba aye nakwamba, wafwainwa kujimuka nekumona’mba kechi waambapotu nangwa pacheche byambo byakuba’mba awo muntu ukasangulwa nangwa kechi ukasangulwane. Luketekelo lwalusanguko lwabafu luji mumaboko a Yehoba, kabiji kafwako nangwa umo wakonsha kwamba’mba muntu wafwa ukasangulwa nangwa kechi ukasangulwane. Awo mwina Kilishitu wafwainwa kwamba pabukine bwamu Baibolo pamambo alufu nekutekenesha bafwisha yewo muntu.