Lutekenesho Mubimye Byakatazha
ANO moba masawakya abibena kubiwa kechi atekeneshapotu nangwa pachechene. Mwanamulume umo wanembele’mba: “Bintu bibena kumweka ano moba bileta bingi bulanda kyakuba javula tukankalwa nekusalapo kana twakonsha kuchinchika kumvwa kubyambo byalukelokelo pa 6 koloko nangwane.” Makondo, byubilo bilenga moyo, kumanama, bumbanzhi nemyalo mwane kine byauba newoo muntanda. Bino bintu byatama byakonsha kwitufikila konse kotuji umvwe bikyangye kwitumwekela.
Baibolo yaambijile jimo’mba bino bintu bikamweka. Yesu byoalumbulwilenga ano moba etu, waambile’mba kukekala makondo akatampe, myalo, kukepelwa kwakajo nebitentanshi. (Luka 21:10, 11) Kabiji nemutumwa Paulo naye wanembele pamambo a “bimye byakatazha,” kimye bantu kyobakekala bashinta, batemwa mali, babula kutemwa byawama. Bino bimye wibitongwele’mba ‘moba apelako.’—2 Timoti 3:1-5.
Onkao mambo, pakulumbulula bibena kubiwa muntanda, masawakya ambapo pabintu bimo bipasha mumo mumo namwaambijile jimo Baibolo amba bikamweka. Bino kulondolola kwabintu bibena kumweka muntanda kokonka kwipasha kujipo. Baibolo yaambapo mulanguluko umo ubula kwambiwapo mumasawakya abintu bibena kumweka. Kupichila mu Byambo bya Lesa byanembeshiwe namupashi, kechi tuyukatu kyalengela bubi kuvula bibyene, bino tuyukilamo nekimye kyakulutwe byokikekala.
Lesa Byoamona Bubi
Baibolo yalumbulula Lesa byoamona byubilo byamalwa bibena kumweka mumoba etu alelo. Nangwa kyakuba wiamwenejile jimo ano malwa amba akamweka, kechi wiakebane, kabiji kechi ukeaswisha kutwajijila myaka nemyakane. Mutumwa Yoano wanembele’mba: “Lesa ye butemwe.” (1 Yoano 4:8) Yehoba ulama bingi bantu kabiji washikwa bubi bonse. Onkao mambo, twafwainwa kutala kwi Lesa amba etutekeneshe, mambo aye wawama kabiji uji nalusa, ngovu, nebulume bwakukonsha kufumyapo bubi bonse panopantanda. Nyimbi wamasalamo wanembele’mba: “[Mfumu wamwiulu watongolwa na Lesa] ukamupokolola wakajilwa pa kujila, ne aye mulanda wabulwa ne wa kumukwasha. Ukebobila lusa bayanji ne bakajilwa, ne myeo ya bakajilwa ukeipulusha. Ukebakula myeo yabo ku kunyantwa ku bukapondo; ne mashi abo akekala ke anema ku meso anji.”—Masalamo 72:12-14.
Nanchi mwibobila lusa aba bayandanyi? Kampe mwibomvwina lusa. Kwiubila lusa kekyubilo Yehoba kyoabikile mwiatweba mambo twalengelwe mukipasha kyanji. (Ntendekelo 1:26, 27) Kokuba’mba twafwainwa kuketekela kuba’mba Yehoba kechi utemwa pakumona biyanda bantune. Yesu aye wayukisha Yehoba kukila bantu bonse, wafunjishe kuba’mba Yehoba witutemwa bingi kabiji uji bingi nalusa.—Mateo 10:29, 31.
Bilengwa abyo bine bimwesha’mba Yehoba ulama bingi bantu. Yesu waambile’mba Lesa “uselesha juba janji ku babi ne ku bawama pamo; ne kunokesha mvula pa baoloka ne pa babula koloka pamo.” (Mateo 5:45) Kubantu bamu muzhi wa Lisitila mutumwa Paulo waambile’mba: “[Lesa] kechi wilekele mwine kwa kubula bukamonyi ne, mambo waubilenga byawama, ne kwimutumina mvula mwiulu ne myaka ya kuba kajo kavula, kasa ekusha michima yenu na kajo ne lusekelo.”—Byubilo 14:17.
Ñanyi Uleta Bubi?
Kabiji Paulo waambile nebyambo bikwabo byawama kubantu bamu Lisitila amba: “[Lesa] walekele mikoka yonse ya bantu mu myaka ya kala’mba, bendenga mu mashinda abo bene.” Onkao mambo nanchi kokuba’mba, mikoka yabantu nangwa’mba bantu abo bene bobeletela makatazho obatanyiwamo. Lesa kechi yewakupamo mambone.—Byubilo 14:16.
Mamboka Yehoba kyoaswishisha bintu byatama kumweka? Nanchi ukobapo kimonyi? Byambo bya Lesa byobyonkatu byakonsha kukumbula ano mepuzho. Kiji bino, namambo akuba kuji muntu wabumupashi ubula kumweka, nemambo oakolomwene.
[Bipikichala pa peja 4]
Bantu byobeubila lusa, nga aye Lesa nanchi kechi wibobila lusa bantu byobayanda nenyi?
[Credit Line on page 2]
COVER: Tank: UN PHOTO 158181/J. Isaac; earthquake: San Hong R-C Picture Company
[Credit Line on page 3]
Kukipiko peulu, Croatia: UN PHOTO 159208/S. Whitehouse; mwanyike wafwa nzala: UN PHOTO 146150 BY O. MONSEN