‘Tekeneshainga Bonse Baji na Bulanda’

“Yehoba wanshinga manyi . . . kwibatekenesha bonse baji na bulanda.”—ISA. 61:1, 2.

1. Yesu waubilanga ka bajinga na bulanda, kabiji mambo ka?

YESU waambile’mba: “Kajo kami ke kuba kyaswa muchima wa yewa wantumine ne kupwisha mwingilo wanji.” (Yoa. 4:34) Byo aingijilenga mwingilo wa Lesa ye bamupele, Yesu wamweshanga byubilo bya Lesa. Wamweshanga ne kyubilo kikatampe kya Lesa, butemwe. (1 Yoa. 4:7-10) Mutumwa Paulo waambile pa jishinda jimo mumwekela butemwe bwa Lesa pa kumulumbulula’mba ye “Lesa wa lutekenesho lonse.” (2 Ko. 1:3) Yesu wamwesheshe buno butemwe kimye kyo afikizhe bungauzhi bwaawile Isaya. (Tangai Isaya 61:1, 2.) Yesu watangile buno bungauzhi mu shinagoga mu muzhi wa Nazala ne kulumbulula’mba bino byambo bibena kwamba pe aye. (Luka 4:16-21) Mu mwingilo wanji yense, Yesu watekeneshanga bantu na kifyele bajinga na bulanda, kwibatundaika ne kwibakasulula mu milanguluko.

2, 3. Mambo ka baana ba bwanga ba kwa Yesu o bafwainwa kutekenesheshanga bantu byonka byo aubanga?

² Baana ba bwanga ba kwa Yesu nabo bafwainwa kutekeneshanga baji na bulanda byonka byo aubanga. (1 Ko. 11:1) Paulo waambile’mba: “Ikoseshainga ne kwikomesha anwe bene na bene.” (1 Tesa. 5:11) Twafwainwa kutekeneshanga bakwetu mambo bantu bonse babena kupita mu “bimye byakatazha.” (2 Timo. 3:1) Bantu michima yawama mwaya ntanda babena kwibakozha ku michima na byambo byatama bya bamo bibalengela kwikala na binyenge ne bijikila.

³ Byonka byaambijile jimo Baibolo, mu ano moba a kupelako, bantu bavula baikala “ba kwitemwatu abo bene bunke, ba kutemwa mali, ba kwijantula, ba kwilundumika, ba mwenga, balengulula bansemi, babula kusanta, babula bukishinka, babula butemwe, babula kukeba kumvwañana, baluntepentepe, babula kwikanya, bashinta, babula kutemwa kyawama, boba balunda nabo byatama, babula kumvwa, ba kwitota, batemwa bya kisangajimbwe mu kifulo kya kutemwa Lesa.” Bino byubilo byasampukila ne pakatele mambo ‘bantu batama ne ba bujimbijimbi babena kuyatu na kutaminako.’—2 Timo. 3:2-4, 13.

4. Bwikalo mwaya ntanda buji byepi lelo jino?

⁴ Bino kechi twafwainwa kukumya pa kumona bino byonse ne, mambo Mambo a Lesa amba’mba: “Pano pa ntanda ponse paji mu bulume bwa kwa aye mubi.” (1 Yoa. 5:19) Byambo bya kuba’mba “pano pa ntanda ponse” byavwangamo bumulwila ntanda, bupopweshi, bya busulu bya ino ntanda ne mashinda a kwabo akongwelamo bantu. Kwakubula nangwa kuzhinaukatu ne, Satana Diabola kyayilamo kumutela’mba “mfumu wa pano pa ntanda” kabiji “lesa wa buno bwikalo.” (Yoa. 14:30; 2 Ko. 4:4) Bwikalo bubena kuyatu na kutaminako mambo Satana uji na bukaji bukatampe byo ayuka’mba Yehoba katatakatu amonaune. (Lum. 12:12) Kuyuka kuba’mba katatakatu Lesa akafumyepo Satana ne bwikalo buncha bwa mu ino ntanda, kabiji ne kupwisha mambo akatampe a bumfumu bwa kwa Yehoba akolomwene Satana, kwitutekenesha bingi!—Nte., kita. 3; Yoba, kita. 2.

Mambo Awama a Bufumu Abena Kusapwilwa Ntanda Yonse

5. Bungauzhi bwaamba pa mwingilo wa kusapwila bubena kufika byepi mu ano moba apelako?

⁵ Mu ano moba akatazha, bungauzhi bwa kwa Yesu bubena kufika bwa kuba’mba: “Ano mambo awama a Bufumu akasapwilwa pano pa ntanda ponse kuba amba ba mu bisaka byonse bya bantu bakeomvwe, apa bino mpelo ikafike.” (Mat. 24:14) Mwingilo wa ntanda yonse wa kusapwila Bufumu bwa Lesa ubena kununguluka bingi. Lelo jino, Bakamonyi ba kwa Yehoba bakila pa 7,500,000 baji mu bipwilo kukila pa 107,000 babena kusapwila Bufumu bwa Lesa mwaya ntanda yonse kwesakana na kishina paimenejile busapwishi ne mafunjisho a kwa Yesu. (Mat. 4:17) Na mambo a mwingilo wa kusapwila, bantu bavula baji na bulanda babena kutambwila lutekenesho. Mambo pa myaka ibiji yapitapo bantu 570,601 babatizhiwe ne kwikala Bakamonyi ba kwa Yehoba.

6. Mulangulukapo’mba ka pa kununguluka kwa mwingilo wa kusapwila?

⁶ Mwingilo wa kusapwila ubena kwenda bingi bulongo mambo Bakamonyi ba kwa Yehoba babena kutuntulula mabuku alumbulula Baibolo mu milaka kukila pa 500 ne kwiasampanya mwaya ntanda. Kintu kya uno mutundu kikyangye kumwekapo pano pa ntanda. Kununguluka kwa mwingilo ne lubaji lwa jibumba ja Yehoba ja pano pa ntanda ke bya kukumya bingi. Kwakubula bukwasho bwa mupashi wazhila wa Lesa, kino kechi kyakonsha kubiwa nangwa pacheche mu ino ntanda mwaangela Satana ne. Mambo awama byo abena kusapwilwa pano pa ntanda ponse, balongo betu ba mu lwitabilo kechi bo bonkatu babena kutambwila lutekenesho lwa mu Binembelo ne, bino ne bantu baji na bulanda baswa mambo a Bufumu.

Kutekenesha Bakwetu ba mu Lwitabilo

7. (a) Mambo ka o twakonsha kubula kuketekela Yehoba kufumyapo byonse bileta bulanda pa kino kimye? (b) Twayuka byepi kuba’mba twakonsha kuchinchika lumanamo ne bya malwa?

⁷ Twayukishatu bulongo kuba’mba tupitanga mu bintu bileta bulanda mu ino ntanda bubi ne buyanji mo bwauba ne woo. Kechi twakonsha kuketekela Lesa kufumyapo bileta bulanda byonse saka akyangye kuzhiisha buno bwikalo buncha ne. Mu ano moba byo tubena kupita mu lumanamo lwaambijilwe jimo, kulama bulumbuluke bwetu kwi Yehoba kwakatazha bingi byo tutundaika bumfumu bwanji. (2 Timo. 3:12) Nangwa byonkabyo, Shetu wa mwiulu witutekenesha ne kwitukwasha, kabiji twakonsha kwikala byonka byajinga bena Kilishitu bashingwa ba mu Tesalonika bachinchikile lumanamo ne bya malwa byavula na lwitabilo.—Tangai 2 Tesalonika 1:3-5.

8. Kishinka ka kya mu Binembelo kimwesha’mba Yehoba utekenesha bakalume banji?

⁸ Kya kine, Yehoba utekenesha ne kupa bakalume banji byo bakeba. Kyakumwenako, ngauzhi Elaija byo bakebelenga kumwipaya ku Mfumu mubi wa mukazhi aye Yezebeli, waumvwine moyo ne kunyema, kya kuba kalanguluke ne kuba’mba kyawamatu ne kufwa. Mu kifulo kya kumukalukila Elaija, Yehoba wamutekeneshe ne kumukosesha kwingila mwingilo ye amupele wa bungauzhi. (1 Mfu.19:1-21) Kishinka kya kuba’mba Yehoba utekenesha bantu banji kimwekela ne mu byo aubile na bintu byapitangamo bena Kilishitu batanshi. Tutanga’mba, “kipwilo kyonse mu Yudea, Ngalilea ne Samaliya kyaikele mu mutende saka kikoma.” Kunungapo, “bavujilenga mambo baakaminwenga Yehoba ne kwikela monka mwayijile bulume bo batambwile kupichila mu mupashi wazhila.” (Byu. 9:31) Twibalusekelo bingi kuba’mba ne atweba tuji na ‘bulume bwa mupashi wazhila’!

9. Mambo ka kufunda pe Yesu o kwitutekeneshesha?

⁹ Byo tuji bena Kilishitu, kufunda pe Yesu Kilishitu ne kulondela mu ngayo yanji kwitutekenesha bingi. Yesu waambile’mba: “Iyai konji, anweba bonse basulwila ne kunemenwa, ne amiwa nkemulengela kukokoloka. Sendai kikonkoji kyami ne kufunda kwi amiwa, mambo ne kimote kabiji nakoka muchima, ne michima yenu ikakokoloka. Mambo kikonkoji kyami kyapela ne byo nemwambila kusenda kechi byakatazha ne.” (Mat. 11: 28-30) Kufunda jishinda Yesu jo atekenesheshangamo bantu ne kulondela kyakumwenako kyanji kyawama, kyo kintu kyanema bingi kitukwasha kukepeshako bijikila byetu.

10, 11. Bañanyi bafwainwa kutekeneshanga bakwabo mu kipwilo?

¹⁰ Balongo betu bena Kilishitu nabo bakonsha kwitutekenesha. Kyakumwenako, akilangulukai bakulumpe mu kipwilo byo bakwasha baji mu bya bulanda. Mwana wa bwanga Yakoba wanembele’mba: “Nanchi mwi anweba muji wakolwa nyi? Ete bakulumpe mu kipwilo, ne abo bamulombelele.” Ki ka kyakonsha kumweka? “Lulombelo lwa lwitabilo lukalengela muntu wakolwa kukosa, ne Yehoba ukamubuka. Kabiji umvwe walengele mambo, Lesa ukamulekelako.” (Yako. 5:14, 15) Ne bakwabo ba mu kipwilo nabo bakonsha kumutekenesha.

¹¹ Banabakazhi bakasuluka kubulako bakwabo babakazhi makatazho amo. Kikatakata banyenga bakikulumpe bakonsha kufundako banyenga bakyanyike. Banyenga bakikulumpe bena Kilishitu kampepo nabo bapichilepo kala mu bintu bibena kukatazha banyenga bakyanyike. Bakonsha kwibakwasha bingi inge ke bobe bino na lusa ne na kifyele. (Tangai Titusa 2:3-5.) Pano bino bakulumpe mu kipwilo ne bonsetu nabo bafwainwa ‘kutekenesha bantu bapopomenwa.’ (1 Tesa. 5:14, 15) Kyawama kuvulukanga kuba’mba Lesa “witutekenesha mu bya malwa byetu byonse kuba amba ne atweba tutekeneshe bakwetu mu bya malwa bya misango ne misango.”—2 Ko. 1:4.

12. Mambo ka o kyanemena kutanwa ku kupwila kwa bwina Kilishitu?

¹² Jishinda jawama kutambwilamo lutekenesho ke kupichila mu kutanwa kimye kyonse ku kupwila ako kwikala misambo ya mu Baibolo itundaikañana bingi. Tutanga kuba’mba Yudasa ne Silasa “batundaikilenga balongo na byambo byavula ne kwibakosesha.” (Byu. 15:32) Saka tukyangye kutendeka kupwila ne panyuma ya kupwila twisamba na bakwetu ba mu kipwilo misambo itundaikañana. Onkao mambo, nangwa tubena kupita mu bintu bileta bulanda kechi twafwainwa kwipatula ku bakwetu ne, mambo kuba bino kechi kuketukwasha ne. (Mana 18:1) Twafwainwa kulondela lujimuno lwanembele Paulo na lutangijilo lwa mupashi lwa kuba’mba: “Saka twita muchima atwe bene na bene kuba amba twitundaikenga kumwesha butemwe ne kuba mingilo yawama. Kange tuleke kupwila pamo byonka byuba bantu bamo ne, poso kwitundaika atwe bene na bene ne kwibikishakotu byo tubena kumona aja juba saka jifwenya pepi.”—Hebe. 10:24, 25.

Itekeneshainga na Mambo a Lesa

13, 14. Lumbululai Binembelo byo byakonsha kwitutekenesha.

¹³ Nangwa twi bena Kilishitu babatizhiwa nangwa popo twatendekatu kufunda pe Lesa ne pa nkebelo yanji, Mambo a Lesa akonsha kwitutekenesha bingi. Paulo wanembele’mba: “Bintu byonse byanembelwe kala byanembejilwe kufundwa kwetu, kuba amba kupichila mu kuchinchika ne mu lutekenesho lwa mu Binembelo twikale na luketekelo.” (Loma 15:4) Binembelo Byazhila byakonsha kwitutekenesha ne kwitulengela kwikala “wafikilamo, winengezha bulongo kwingila mingilo yawama.” (2 Timo. 3:16, 17) Kuyuka bukine pa nkebelo ya Lesa ne kwikala na luketekelo lwa kine lwa kulutwe kwitutekenesha bingi. Onkao mambo, twayai twingijishenga byo tutanga mu Mambo a Lesa ne mu mabuku alumbulula Baibolo byakonsha kwitutekenesha ne kwitukwasha mu mashinda avula.

¹⁴ Yesu witushijile kyakumwenako kya bya kwingijisha Binembelo pa kufunjisha ne kutekenesha bantu. Saka asangulwa kala, Yesu wamwekele ku baana banji ba bwanga babiji ne ‘kwibalumbulwila Binembelo.’ Byo esambilenga nabo, byambo byo aambile bibafikile bingi pa muchima. (Luka 24:32) Byo alondelanga kyakumwenako kya kwa Yesu kyawama, Paulo ‘waambañenenga na bantu mu Binembelo.’ Mu Beliya bamutelekelenga “batambwijile mambo a Lesa na muchima yense ne kubalaula bulongo Binembelo moba onse.” (Byu. 17:2, 10, 11) Byo kyawamapo kutanga pa juba pa juba Baibolo ne mabuku a bwina Kilishitu etutekenesha ne kwitulengela kwikala na luketekelo mu bino bimye byakatazha!

Mashinda Akwabo Akutekenesheshamo Bakwetu

15, 16. Ñanyi bintu byo twafwainwa kuba pa kuba’mba tutekeneshe bakwetu ba mu lwitabilo?

¹⁵ Twakonsha kukwasha ne kutekenesha bakwetu bena Kilishitu mu mashinda avula. Nabiji kuya na kupotela bakikulumpe bya kupotapota nangwa bakwetu ba mu lwitabilo bakolwa. Twakonsha ne kumwesha’mba twata muchima bakwetu kupichila mu kwibakwashako mingilo ya pa nzubo. (Fili. 2:4) Kabiji twakonsha ne kwibatakaika pa byubilo byabo byawama, nabiji butemwe, byo bachinchika, ne lwitabilo lwabo.

¹⁶ Pa kutekenesha bakikulumpe twakonsha kwibafwakesha ne kuteleka kimye kyo babena kushimikizha byo bapitamo ne byawama byo beyowa mu mwingilo wa Yehoba. Kuba bino kwakonsha kwitutekenesha ne kwitutundaika. Twakonsha kutanga nabo Baibolo ne mabuku alumbulula Baibolo. Kampe twakonsha kwisamba nabo byambo bya mu Lufunjisho lwa Kyamba kya Usopa nangwa bya mu Lufunjisho lwa Baibolo lwa Kipwilo kwa mu yeo mulungu. Twakonsha ne kutambila pamo DVD waimena pa Binembelo. Kabiji twakonsha ne kwibashimikizha nangwa kwibatangila byamwekele byanembwa mu mabuku etu byakonsha kwibatundaika.

17, 18. Byo tuji bakalume bakishinka ba Yehoba, mambo ka o twafwainwa kuketekela kuba’mba Yehoba usakwitukwashanga ne kwitutekenesha?

¹⁷ Inge twamona mukwetu mupopweshi wa Yehoba ubena kupita mu bya malwa, twakonsha kumubika mu milombelo yetu ya pa bunke. (Loma 15:30; Kolo. 4:12) Umvwe twachinchika makatazho o tubena kupitamo ne kwibikako kutekenesha bakwetu twakonsha kwikala na lwitabilo ne kushiinwa byonka byashiinwe nyimbi wa masalamo waimbile’mba: “Utwike Yehoba kisendwa kyobe, ne aye ukakukosesha: Kechi ukamuleka mololoke amba atenkene nangwa jimotu ne.” (Sala. 55:22) Byo tuji bakalume banji bakishinka, Yehoba uketutekeneshanga ne kwitukwasha kimye kyonse.

¹⁸ Lesa waambijile bapopweshi banji ba kala’mba: “Amiwa yami yenka nemutekenesha.” (Isa. 51:12) Ne atweba Yehoba witutekenesha kabiji usakutwajijila kwitupesha pa byawama byo tuba pa kutekenesha baji na bulanda. Nangwa tuji na lwitabilo lwa kuya na kwikala mwiulu nangwa lwa kwikala pano pa ntanda, atweba bonse bitutekenesha byambo Paulo byo anembejile bena Kilishitu bakwabo bashingwa bya kuba’mba: “Nkambo yetu Yesu Kilishitu aye mwine ne Lesa Tata wetu, witutemwa kabiji witutekenesha kikupu ne kwitupa luketekelo lwawama, emutekeneshenga ne kwimukosesha mu mingilo yonse yawama ne mu byambo byonse byawama.”—2 Tesa. 2:16, 17.

Mukivuluka Nyi?

• Bantu bavula babena kumwenamo byepi mu mwingilo wetu wa kutekenesha baji na bulanda?

• Twakonsha kuba byepi pa kutekenesha bakwetu?

• Ñanyi bishinka bya mu Binembelo bimwesha’mba Yehoba utekenesha bantu banji?

[Cifwanikiso icili apeeji 28]

Nanchi ne anweba mutekenesha baji na bulanda nyi?

[Cifwanikiso icili apeeji 30]

Banyike ne bakulumpe bonse bakonsha kutundaikañana