FWENYAI KWIPI NE LESA
Witupa Byavula ‘Bilengela Michima Yetu Kusangalala’
Nanchi Yehoba kya kine wituta muchima nyi, nangwa kechi wata muchima ku makatazho abena kupitamo bantu pano pa ntanda ne nyi? Mukumbu wa mu Baibolo ku buno bwipuzho busangajika bingi. Lesa wata muchima ku bantu kabiji ukeba’mba bekalenga bwikalo bwa lusekelo. Pa juba pa juba, ubila bantu babula kusanta kuba’mba bamwenemo mu buwame bwanji. Akilangulukai pa byambo bya mutumwa Paulo.—Tangai Byubilo 14:16, 17.
Kimye kyo aambilenga ku bantu mu muzhi wa Lisitila babulanga kupopwela Lesa, Paulo waambile’mba: “Mu moba a kala, Lesa waswishishe bisaka bikwabo kuya mu mashinda abyo, nangwa kya kuba kechi waikeletu kwa kubula kwiyukisha aye mwine kwi anweba ne, waubile byawama kupichila mu kwimupa mvula ne kimye kya kupilamo kajo saka emupa kajo kavula ne kulengela michima yenu kusangalala.” Nanchi bino byambo byatajile mwepi ku batelekelenga Paulo?
Bantu mu Lisitila baumvwine mwatajile byambo bya bukine byaambilenga Paulo. Mo baikalanga mwajinga banjimi kabiji mushiji wajingamo wafukile bingi ne mema. Byonka bibabujile Paulo, Lesa ye Nsulo ya mvula kabiji ye Ulengela kwikala na bya kuja byavula. Onkao mambo, inge banowa kajo kavula ne kwiyowa kajo kawama, bamwenangamo mu buwame bwa Lesa.
Byambo bya kwa Paulo byo aambile ku bantu ba mu Lisitila bifunjisha mafunjisho anema pe Yehoba Lesa.
Yehoba witupa bwanabwabene bwa kwisajila bintu. Monai kuba’mba Yehoba waswishishe bisaka byonse bya bantu “kuya mu mashinda abyo.” Buku umo wingijisha bantuntuluzhi ba Baibolo bamo waamba pa bino byambo kuba’mba byakonsha ne kulumbulula “kuya monka mobakebela” nangwa “kuba monka mo balangulukila abo bene.” Yehoba kechi ukanjikizha muntu uji yense kumupopwela ne. Witupa bwanabwabene bwa kwisajila byo tukeba ko kuba’mba bwikalo bo tukeba kwikala.—Mpitulukilo ya mu mizhilo 30:19.
Yehoba ukeba amba tumuyuke. Paulo waambile’mba “kechi waikeletu kwa kubula kwiyukisha aye mwine kwi anweba ne.” Buku watongolwapo waamba pa bino byambo kuba’mba byakonsha ne kutuntululwa amba “Lesa wimwesha ku bantu byo aji.” Byalenga Lesa bishimuna ‘Byubilo bya Lesa bibula kumweka,’ kumvwangakotu ne buwame, mana, bulume ne butemwe. (Loma 1:20) Yehoba wasolola ne bikwabo pe aye mu Baibolo. (2 Timoti 3:16, 17) Nanchi kino kechi kimwesha amba Yehoba ukeba amba tumuyuke ne nyi?
Yehoba ukeba amba twikale na lusekelo. Paulo waambile’mba ‘witupa kajo kavula kalengela michima yetu kusangalala.’ Nangwatu ndengamambo wabula kuyuka Yehoba wakonsha kuja kajo byonka bikeba muchima wanji ne kusangalala mu bwikalo. Pano bino, Lesa ukeba atweba kwikala na lusekelo lwa kine kabiji lwa myaka ne myaka. Kino kyakonsheka kanatu twafunda bukine pe aye ne kwibulondela mu bwikalo bwetu.—Salamo 144:15; Mateo 5:3.
Pa juba pa juba atweba bonse tumwenamo mu buwame bwa Yehoba. Nanchi kechi mwakonsha kufunda byavula pa byo mwakonsha kumwesha kuba’mba musanta kwi Lesa ‘wimupa kajo kavula kalengela michima yenu kusangalala’ ne nyi?
Kutanga Baibolo mu July
[Mabulañano pa peja 11]
Pa juba pa juba Lesa uswisha bantu kumvwangakotu ne boba byatama kumwenamo mu buwame bwanji