Mamboka Okyakatezha Kulomba Lulekelo Lwamambo?
MU July 2000, Kije Kilenga Mizhilo kya California States, mu United States, kyalengele muzhilo yekyakebelenga’mba atendeke kwingila. Uno muzhilo wajinga wakubula kupamo bantu mambo umvwe bamwesha lusa kumuntu wikozha mumapuso obajimo neabo. Mamboka kino kije okyalengejile uno muzhilo? Kyatanyiwe kuba’mba inge mapuso amweka muji bekozha nangwa mwaonaika bintu, javula bantu kibakatazhanga bingi kulomba lulekelo lwamambo kuchina’mba lwakeya kwikala kishinka kyakwibafwishishamo namambo mukije amba bazhatwa. Kabiji kimo kimye aba bakeba bukiji-bukijitu ponkapo kwibalomba lulekelo lwamambo bakonsha kuzhingila kyakuba mapuso achechetu akonsha kuleta kamvundu-mvundu kamaama nafwa.
Kyakine kechi kikebewa kulomba lulekelo lwamambo pamapuso owabula kulengane. Kabiji kwikala kimye kimo kyafwainwa muntu kuyuka byoabena kwamba kuchina kwitaya mumambo kyatu. Kishimpi kyakala kyaamba’mba: “Mu kuvula kwa byambo kechi mwabula bya kupusa ne; pakuba awa ulama kanwa kanji bulongo ye wa ma[a]na.” (Byambo bya Mana 10:19; 27:12) Pano bino nangwa byonkabyo, kikebewa kumwesha mushingi kubantu nekwibakwasha.
Nanchi kechi kyakine, kuba’mba bantu bavula baleka kulomba lulekelo lwamambo, nangwatu kechi bebatwala mukije nenyi? Mukazhi munzubo wakonsha kujilañana’mba, ‘Bamwata wami kechi bandombapotu nangwa pacheche lulekelo lwamambo umvwe bauba kilubone.’ Kapitao pankito wakonsha kwijizhañanya’mba, ‘Bantu bami bontangijila mingilo kechi betaba bilubo byabone, kabiji bakankalwatu nekwamba’mba mwane bandekeleko mambo.’ Mufunjishi pasukulu wakonsha kushimuna’mba, ‘Baana kechi bafunjishiwa kwamba’mba bandekeleko mambone.’
Kintu kimo kilengela bantu kukankazhama kulomba lulekelo lwamambo, kekuchina kuba’mba kechi basakundekelako mambone. Namambo akuchina kuba’mba kechi basakundekelako mambone, kuba waamba bulongo byoabena kwiumvwane. Muntu yebakozha kumuchima wakonsha nekwamba’mba kechi mbena kukeba namumonenga nekumumona awe muntune. Kino kishupa bingi pakuba’mba bano bantu bapwañane jibiji.
Kintu kikwabo kilengela bantu kukankazhama kulomba lulekelo lwamambo kekusula bantu bakwenu mobekimwena akyo kintu kyowauba. Balanguluka’mba, ‘Nangwatu ndombe lulekelo lwamambo kafwako kisakubiwane, mambo nealenga kala.’ Kabiji bakwabo bakankazhama kwamba’mba bandekeleko mambo, namambo akuchina kwibakabisha pakyokyo kintu kyatama kyobauba. Belangulusha kuba’mba: ‘Kana basakunzhachisha namambo, nekuñambila’mba ndipile?’ Pano bino, kintu kikatampe kilengela kubula kuswa kilubo kyowauba kekwitota. Muntu ukankalwa kwamba’mba “Mwane bandekeleko mambo” kiji nobe ubena kwamba’mba, ‘Mushingi wami usakupwa inge ngitabe namba natamisha. Bantu basakundengulula.’
Muji monse mokimwekela, bantu bavula bakankalwa bingi kwamba byambo byakulomba lulekelo lwamambo. Abya nanchi kulomba lulekelo lwamambo kyafwainwanyi? Ñanyi mfweto iji mukulomba lulekelo lwamambo?
[Kipikichala pa peja 3]
“Baana kechi bafunjishiwa kwamba’mba bandekeleko mambone”
[Kipikichala pa peja 3]
“Bantu bami bontangijila mingilo kechi betaba bilubo byabone”
[Kipikichala pa peja 3]
“Bamwata wami kechi bandombapotu nangwa pacheche lulekelo lwamambone”