‘Pangainga Bipangwa Byavula’

‘Pa kupanga bipangwa byavula anweba; byonkabyo mukekala ke baana bami ba bwanga.’—YOANO 15:8.

1. (a) Ñanyi mukambizho wakwikala baana babwanga yeatongwele Yesu kubatumwa banji? (b) Jipuzhoka jotwafwainwa kwishikisha atweba bene?

KIMYE kyabufuku saka akyangye kufwa, Yesu waikele pamo nabatumwa banji nakwibakosesha mujashi jakwibafika pamuchima. Kyaubile kyapita kala nepakachi kabilo, bino namambo akuba Yesu wibatemweshe balunda nanji bapamuchima waubile saambatu. Mumwisambo wanji wibavulwileko mukambizho mukwabo yebafwainwe kulondela pakuba’mba batwajijile kwikala baana banji babwanga. Waambile’mba: ‘Monka mu kino mo batumbijikilwa Batata, pa kupanga bipangwa byavula anweba; byonkabyo mukekala ke baana bami ba bwanga.’ (Yoano 15:8) Nanchi atweba lelo jino tulondela uno mukambizho wabyakwikala baana babwanganyi? “Kupanga bipangwa byavula” kulumbululaka? Pakuba’mba tuyuke kino, twayai tubwele kumwisambo yebesambilenga bobwa bufuku.

2. Kishimpika kyabipangwa kyoashimikizhe Yesu bufuku saka akyangye kufwa?

² Mukambizho wakupanga bipangwa watongwelwe nemukishimpi kyoashimikizhe Yesu kubatumwa banji. Waambile’mba: ‘Amiwa ne muñanzañanza wa kine, Batata bo banjimi. Misampi yonse iji mwi amiwa ibula kupanga bipangwa, beyifumyako: ne yonse misampi ipanga bipangwa nayo beyitokesha, amba ipange byavula. Pano anweba mwatoka kala na mambo a byambo byo nemwambila. Ikalainga mwi amiwa, ne amiwa mwi anweba. Musampi byonka byo abula kukonsha kwipangila, poso waikala mu muñanzañanza; ne anweba pamo, poso mwikale mwi amiwa. Amiwa ne muñanzañanza, anweba mwi misampi: . . . Monka mu kino mo batumbijikilwa Batata, pa kupanga bipangwa byavula anweba; byonkabyo mukekala ke baana bami ba bwanga. Monka mwantemenwa Batata ne amiwa ne mutemwa pamo: ikalainga mu butemwe bwami.’—Yoano 15:1-10.

3. Baana babwanga bakwa Yesu bafwainwa kubaka pakuba’mba bapange bipangwa?

³ Mukikye kishimpi Yehoba ye Njimi, Yesu ye muñanzañanza, ne batumwa Yesu boaambijilenga yomisampi. Batumwa bakonsheshe kupanga bipangwa kikulutu batwajijila ‘kwikala’ mwi Yesu. Kepo Yesu alumbulwijile batumwa byobakonsheshe kutwajijila kwikala mubuumo amba: “Umvwe mwalama mikambizho yami, mukekala mu butemwe bwami.” Palutwe, mutumwa Yoano wanembele byonkabye byambo kubena Kilishitu bakwabo’mba: “Aye ulama mikambizho [ya Kilishitu] ye waikala mwi aye, ne aye naye mwi aye.”a (1 Yoano 2:24; 3:24) Onkao mambo, mukulama mikambizho ya Kilishitu, baana banji babwanga bekala mwiaye, nekwikala mwiaye kwibalengejile kupanga bipangwa. Ñanyi mutundu wabipangwa byotwafwainwa kupanga?

Ikomeshainga

4. Kika kyotwakonsha kufunjilako kukishinka kyakuba’mba Yehoba ‘wiifumyako’ misampi yonse ibula kupanga bipangwa?

⁴ Mukishimpi kyamuñanzañanza, Yehoba ‘wiifumyako’ nangwa kwiikopolako misampi ibula kupanga bipangwa. Akye kitubulapoka? Kechi kitubulatu’mba baana babwanga bonse bafwainwa kupangatu bipangwa kwapwane, bino kitubula nekuba’mba bonse bakonsha kupanga bipangwa, nangwa kyakuba bwikalo bwabo nangwa kupelelelwa kwabo kwikale byepi nangwa byepi. Mambo inge kechi byobyone, kyakonsha kupusana namashinda abutemwe bwa Yehoba ‘kufumyako’ nangwa kuchakulapo mwana wabwanga wakwa Kilishitu namambo akukankalwa kuba kintu kyakila pabulume bwanji.—Masalamo 103:14; Kolose 3:23; 1 Yoano 5:3.

5. (a) Kishimpi kyakwa Yesu kimwesha byepi kuba’mba twakonsha kukomenako mukupanga bipangwa? (b) Ñanyi mutundu wabipangwa bibiji byotusakwisambapo?

⁵ Kishimpi kyakwa Yesu kyamuñanzañanza kimwesha nekuba’mba monka mukupelelelwa kwetu, twafwainwa kumonangapo mashinda akukomenangako mumingilo yetu yamwana wabwanga. Monai Yesu byoaamba: ‘Misampi yonse iji mwi amiwa ibula kupanga bipangwa, beyifumyako: ne yonse misampi ipanga bipangwa, nayo beyitokesha, amba ipange byavula.’ (Yoano 15:2) Mubyambo byanji byakupezhako mukishimpi, Yesu wakambizha baana banji babwanga kupanga ‘bipangwa byavula.’ (Vesi 8) Bino byambo byatala muka? Byatala mukuba’mba byotuji baana babwanga kechi twafwainwa kutondwatu nabyotwauba twabwela twalubako nekulubakone. (Lumwekesho 3:14, 15, 19) Twafwainwa kumonangapo mashinda akukomenangako mukupanga bipangwa. Ñanyi mutundu wabipangwa yetwafwainwa kwibikako kupanga byavula? Kuji mitundu ibiji (1) “bipangwa bya Mupashi” ne (2) bipangwa bya Bufumu.—Ngalatiya 5:22, 23; Mateo 24:14.

Bipangwa Byabyubilo Byabwina Kilishitu

6. Yesu Kilishitu waambishepo byepi namukoyo pabuneme bwakipangwa kyamupashi kitanshi kyatongolwa?

⁶ Kintu kitanshi kyatongolwa pa “bipangwa bya mupashi” kebutemwe. Mupashi wa Lesa yeuleta butemwe mubena Kilishitu, mambo bakokela mukambizho yeakambizhe Yesu saka kwashalatu pacheche amba atendeke kushimikizha kishimpi kyamuñanzañanza upanga bipangwa. Wabujile batumwa banji’mba: “Mukambizho mupya nemupa anweba, namba mwitemwe anwe bene na bene.” (Yoano 13:34) Mumwisambo wanji yense yeesambilenga nabo mubobwa bufuku bwapeleleko bwabwikalo bwanji panopantanda, Yesu wabwezhezhe-bwezhezhengapotu kuvulula batumwa banji kwiubila butemwe.—Yoano 14:15, 21, 23, 24; 15:12, 13, 17.

7. Mutumwa Petelo wamwesheshe byepi kuba’mba kupanga bipangwa kulengela kumwesha byubilo bya Kilishitu?

⁷ Petelo wajingapo pabobwa bufuku wayukile kuba’mba butemwe bwakwa Kilishitu nebyubilo bikwabo byafwainwa kumweka mubaana babwanga bakine bakwa Kilishitu. Pakupitapo myaka, Petelo watundaikile bena Kilishitu kwikala nabino byubilo nabiji kwikanya nebutemwe bwakutemwa balongo. Waambile nekuba’mba kwikala nabino bintu kwitukwasha kubula ‘kwikalatu, nangwa kubula kupanga bipangwa.’ (2 Petelo 1:5-8) Nangwa kyakuba bwikalo bwetu buji byepi nangwa byepi, kumwesha bipangwa byamupashi kechi kintu kyotwakonsha kukankalwane. Onkao mambo, twayai twibikengako kumwesha butemwe, lusa, bukimote nebyubilo bikwabotu byakwa Kilishitu mambo “ku bino bya byonkabyo kechi kuji muzhilo ne.” (Ngalatiya 5:23) Kine, twayai tupangenga ‘bipangwa byavula.’

Kupanga Bipangwa bya Bufumu

8. (a) Ñanyi kukwatankana kuji pakachi kabipangwa byamupashi nebipangwa bya Bufumu? (b) Jipuzhoka jotwafwainwa kulangulukapo?

⁸ Bipangwa byawama bimweka bulongo byobilengela kichi kumweka buuya. Pano bino buneme bwabine bipangwa bwanema kukila nebuuya bwakichi. Bipangwa byanema mambo bivuzha kyokyo kichi kupichila munchacha yabyo. Byonkabyo, nebipangwa byamupashi kechi biwamishatu bumuntu bwetu bwabwina Kilishitu kwapwane. Byubilo nabiji butemwe nelwitabilo nabyo bitutundaika kusampanya mambo a Bufumu aji nobe nkunwa iji mu Byambo bya Lesa. Monai mutumwa Paulo byoaambishe namukoyo pakuno kukwatankana kwanema kujipo. Waambile’mba: “Ne atweba netuwa twaitabila [kipangwa kyapabipangwa byamupashi], ko kwamba ko twamba.” (2 Kolinda 4:13) Mujonka jino jishinda, Paulo waambile nekwamba’mba, “tuletenga kitapisho kya kutota Lesa moba onse, ko kuba’mba, bipangwa bya pa bya tunwa,”—kipangwa kyabubiji kyotwafwainwa kumwesha. (Bahebelu 13:15) Nanchi twakonsha kupanga “bipangwa byavula” mubwikalo bwetu byotuji bataya mbila ya Bufumu bwa Lesa nyi?

9. Nanchi kupanga bipangwa kulumbulula’mba kokulenga baana babwanganyi? Londololai.

⁹ Pakuba’mba tukumbule jino jipuzho bulongo, twafwainwa patanshi tukiyuke biji mukupanga bipangwa bya Bufumu. Abya kijitu bulongo kulanguluka’mba kupanga bipangwa kulumbulula kulenga baana babwanga? (Mateo 28:19) Nanchi bipangwa byotwakonsha kupanga bilumbulula kikatakata bantu botukwasha kwikala bapopweshi ba Yehoba babatizwanyi? Ine. Mambo umvwe kyakuba byokyajinga, kyakonsha kufichisha bingi kumuchima aba Bakamonyi banemekwa basapwila mambo a Bufumu pamyaka yavula mumanyaunda muji bantu bachechetu bakeba kumvwa mambo. Kyakine, inge kyakuba’mba bipangwa bya Bufumu byotupanga bimenwakotu nabaana babwanga babukumo, bano Bakamonyi bengila nangovu yauno mutundu bakonsha kwikala nobe yoya misampi ibula kupanga bipangwa mukishimpi kyakwa Yesu. Bino kechi byobyo kijine. Pano nanchi bipangwaka bine bya Bufumu byamwingilo wetu?

Kupanga Bipangwa Mukusampanya Nkunwa ya Bufumu

10. Kishimpi kyakwa Yesu kyanjimi nemitundu yamushiji wapusana-pusana kilumbulula byepi mwayila bipangwa bya Bufumu nemobyabula kuyila?

¹⁰ Kishimpi kyakwa Yesu kyanjimi nemushiji wapusana-pusana kyokikumbula mukumbu ukoseshañana kuboba basapwila mumanyaunda muji bantu bachechetu bakeba kumvwa mambo. Yesu waambile’mba nkunwa o mambo a Bufumu aji mu Byambo bya Lesa, nemushiji wimenako muchima wakifwanyikizho wamuntu. Nkunwa imo “yaponene mu mushiji wawama, ne pa kukoma yasemene.” (Luka 8:8) Yasemene bipangwaka? Umvwe mupondoshi wawichi wamena nekukoma, upanga bipangwa kechi tumipondoshi tucheche twawichine, upanga nkunwa ipya. Byonkabyo nemwina Kilishitu wapanga bipangwa, kechi’mba kanatu baana babwangatu bakatataka bonkane, bino wapanga nkunwa ya Bufumu yakatataka.

11. Bipangwa bya Bufumu byakonsha kulumbululwa byepi?

¹¹ Onkao mambo, bipangwa mujino jishinda kechi baana babwanga bakatataka nangwa byubilo byawama byabwina Kilishitu ne. Nkunwa yabyalwa byoaji mambo a Bufumu, bipangwa byafwainwa kwikala nkunwa yakilamo kuvula yamutundutu umo wayonkaya kunwa intu imo. Mujino jishinda kupanga bipangwa kubena kulumbulula kusapwila mambo a Bufumu. (Mateo 24:14) Nanchi kupanga bipangwa bya Bufumu, akyo kyalumbulula kutaya mbila yamambo awama a Bufumu kwakonsheka nangwa kyakuba bwikalo bwetu buji byepi nangwa byepinyi? Ee, twakonsha! Mukyonka kishimpi kintu kimo Yesu walumbulula kine kintu.

Kupana Byawamisha Mukutumbijika Lesa

12. Nanchi bena Kilishitu bonse bakonsha kupanga bipangwa bya Bufumu nyi? Londololai.

¹² “Awa wakushiwa nkunwa ya mu mushiji wawama,” Yesu waambile’mba, “umo upanga kitota, umo upanga makumi atanu na jimo, umo upanga makumi asatu.” (Mateo 13:23) Nkunwa yakushiwa mubujimi yakonsha kupusana mumpangilo namambo apoyamenena. Byonkabyo, nebyotwakonsha kuba mubusapwishi bwamambo awama byakonsha kupusana kwesakana nabwikalo bwetu, ne Yesu wamwesheshe kuba’mba kino kine. Bamo bakonsha kwikala nakimye kyawama kyakwingijilamo; bakwabo nabo bakonsha kwikala nabutuntulu bwamubiji bwawama nengovu. Mujino jishinda, byotwakonsha kuba byakonsha kuvula nangwa kukepa kukila byuba bakwetu, pano bino inge byotwaingila popapelela ngovu yetu, Yehoba usekela bingi. (Ngalatiya 6:4) Nangwa kyakuba bukote nangwa kubelabela bitulengela kwingilatu pacheche mumwingilo wabusapwishi, Shetu wabutemwe aye Yehoba, kwakubula nangwa kuzhinaukatune witubajila pamo amba twiboba babena “kupanga bipangwa byavula.” Mamboka? Mambo tumupa ‘byonse byo tuji nabyo,’ kumwingijila namweo wetu yense.b—Mako 12:43, 44; Luka 10:27.

13. (a) Ñanyi kintu kine kitulengela ‘kuyanga’ nakupanga bipangwa bya Bufumu? (b) Kika kiketukwasha kupanganga bipangwa mumanyaunda muji bantu bacheche bakeba kumvwa mambo? (Monai kabokoshi kaji papeja 29)

¹³ Ponse potwakonsha kupelela kupanga bipangwa bya Bufumu, ‘tukayanga na kupanga bipangwa’ umvwe satuvuluka kine kintu kyotubila byobyo. (Yoano 15:16) Yesu watongwele kine kintu kyotubila kino amba: “Monka mu kino mo batumbijikilwa Batata, pa kupanga bipangwa byavula anweba.” (Yoano 15:8) Ee, mwingilo wetu wabusapwishi uzhijika jizhina ja Yehoba kubantu bonse. (Masalamo 109:30) Honor, Kamonyi wakishinka uji namyaka yakusemwa pepi na 75, waambile’mba: “Nangwatu mumanyaunda mujitu bantu bacheche bakeba kumvwa mambo, kejishuko janema bingi kwimenako Mwine Wakila.” Claudio, waikala Kamonyi wabambakana kufuma mu 1974, byobamushikishe kintu kyamulengela kutwajijila nakusapwila nangwa kyakuba bantutu bacheche mu nyaunda yanji bobakeba kumvwa mambo awama, watongwele Yoano 4:34, motutanga byambo byakwa Yesu amba: “Kajo kami ko kuba kyaswa muchima wa aye wantuma, ne kupwisha mwingilo wanji.” Claudio wabwelele waamba’mba: “Byonka byajinga Yesu, neamiwa kechi nkebatu kutatula mwingilone, bino nkeba nekumupwisha byonji utaya mbila ya Bufumu.” (Yoano 17:4) Bakamonyi bakwa Yehoba mwaya ntanda yonse nabo byobyo balanguluka.—Monai kabokoshi “Bya ‘Kupanga Bipangwa Saka Mwatekanya [mwachinchika, NW]’,” papeja 29.

Kusapwila Nekufunjisha

14. (a) Ñanyi mingilo ibiji yoaingijile Yoano Mubatishi ne Yesu? (b) Mwakonsha kumulumbulula’mba uji byepi mwingilo wabwina Kilishitu muano moba etu?

¹⁴ Utaya mbila ya Bufumu mutanshi watongolwa mumabuku a Mambo awama ke Yoano Mubatishi. (Mateo 3:1, 2; Luka 3:18) Mwingilo wanji mukatampe wajinga wa “kushimuna,” kabiji washimwine nalwitabilo lwakosa nekuketekela “amba bonse betabishiwe.” (Yoano 1:6, 7) Kyakine, bantu bamo Yoano boasapwijile baikele kebaana babwanga bakwa Kilishitu. (Yoano 1:35-37) Onkao mambo, Yoano wajinga musapwishi kabiji nekulenga baana babwanga. Yesu naye wajinga musapwishi kabiji mufunjishi. (Mateo 4:23; 11:1) Yesu kyokyo akambizhizhe baana banji babwanga kubula kwikalatu bantu basapwilatu Mambo a Bufumu onkane, bino nekwikala bantu bakwasha bantu batambwila mambo awama kwikala baana banji babwanga. (Mateo 28:19, 20) Mwingilo wetu netuwa ano moba kemwingilo wakusapwila nekufunjisha.

15. Mwingilo wabusapwishi waingijiwanga mukitota-myaka kitanshi C.E. waesakana byepi na ubena kwingijiwa ano moba?

¹⁵ Paboba bamukitota-myaka kitanshi C.E. baumvwine Paulo saka asapwila nekufunjisha, “bamo baitabile abya bintu byo aambile, kabiji bamo kechi baitabilebyo ne.” (Byubilo 28:24) Nelelo jino byobyo kikala. Kya bulandatu kekyakuba’mba nkunwa ya Bufumu yavula iponena pamushiji ubula kupanga bipangwa. Nangwatu byonkabyo, nkunwa imo iponena pamushiji wawama, ikizha mizhazhi, nekumena byonka byaambijile jimo Yesu. Mulungu nemulungu mumwaka, bantu kukila pa 5,000 mwaya ntanda baluka kebaana babwanga bakwa Kilishitu bakine. Bano baana babwanga bakatataka ‘betabila abya bintu byo aambile,’ nangwa kyakuba bavula bakwabo kechi bebitabila ne. Kika kibakwasha kwikala namuchima wakukeba kumvwa mambo a Bufumu? Javula kutapo muchima koboba Bakamonyi kokulengela—kutekezha nkunwa yakushiwa katataka kwalula bintu. (1 Kolinda 3:6) Pabyakumwenako byavula akilangulukaipotu pabino bibiji.

Kutapo Muchima Kwalula Bintu

16, 17. Mamboka okyanemena kumwesha butemwe kubantu botutana mumwingilo wetu?

¹⁶ Karolien Kamonyi wakyanyike mu Belgium wafwakashishepo inetu umo wakikulumpe wabulanga kukeba mambo a Bufumu. Namambo akuba kuboko kwa yewa inetu kwapombelwe mu bandeji, Karolien nensongwakazhi mukwabo bakebele kumukwashako, bino inetu wakaine. Byopapichile moba abiji bano Bakamonyi babiji bayileko jibiji kunzubo yayewa inetu nekumushikisha byoaumvwinengako mubiji. Karolien waamba’mba: “Kino kyalengele bintu kwaluka. Wakuminye bingi pakumona’mba kine twamutemenwe aye mwine. Kokyakayanga, witutwezhezhe munzubo yanji nelufunjisho lwa Baibolo lwatatwile.”

¹⁷ Sandi, Kamonyi mu United States naye wibamwesha butemwe bantu boasapwila. Umonamo masawakya abantu basema baana mupepala wabyambo mukyalo moaji, kepo afwakashisha bansemi bena bobo baana nabuku wa Icitabo Candi ica Malyashi ya mu Baibolo.c Mwisambo wakwisamba na inetu wapaapa katataka utendeka namambo akuba kechi ufuma panzubone, wikalatu nalusekelo lwakumwesha mwananji kubantu bamufwakashisha. Sandi walumbulula’mba: “Nesamba nabansemi pabuneme bwakwikala pamo namwana wasemwa katataka kupichila mukutanga. Kepo nesamba nenabo pamakatazho aji mukukomesha mwana mubwikalo bwaano moba.” Katatakatu papo, kufuma payenkawa mwisambo inetu umo nebaana banji batanu naumo batatula kwingijila Yehoba. Kuya kubantu nekwibamwesha butemwe kwakonsha kuleta lusekelo mumwingilo wetu.

18. (a) Mamboka mukambizho wa ‘kupanga bipangwa byavula’ kyotwakonshesha kumulondela atweba bonse? (b) Ñanyi mikambizho isatu yabyakwikala mwana wabwanga yatongolwa mu Mambo awama akwa Yoano yomukeba kulondela?

¹⁸ Byokitukoseshapo kuyuka kuba’mba twakonsha kulondela mukambizho wa ‘kupanga bipangwa byavula’! Kikale twibanyike nangwa bakulumpe, kana tuji nabutuntulu bwamubiji bwawama nangwane, kana tusapwila mumanyaunda muji bantu bakeba kumvwa mambo awama nangwa ne, atweba bonse twakonsha kupanga bipangwa byavula. Muñanyi jishinda? Mukumwesha bipangwa byamupashi kwesakana napotwakonsha kupelela nemukusampanya mambo a Bufumu bwa Lesa nabulume bwetu bonse. Pakimye kimotu, twibikako ‘kukelwa monka mumambo akwa Yesu’ ne ‘kwitemwa atwe bene na bene.’ Ee, umvwe ketulondele ino mikambizho isatu yanema yabyakwikala mwana wabwanga byatongolwa mu Mambo awama akwa Yoano, tumwesha patoka kuba’mba ‘kine twi baana ba bwanga [bakwa Kilishitu].’—Yoano 8:31; 13:35.

[Tubyambo twa mushi]

Mepuzho Akupitulukamo

• Bipangwaka byotwafwainwa kupanga byavula?

• Mamboka otwakonshesha kubula kukankelwa kikonkwanyi kya “kupanga bipangwa byavula”?

• Ñanyi mikambizho isatu yabyakwikala mwana wabwanga yatongolwa mu Mambo awama akwa Yoano yotwisambapo?

[Kitenguluzha/Kipikichala pa peja 29]

BYA ‘KUPANGA BIPANGWA SAKA MWATEKANYA [MWACHINCHIKA, NW]’

KIKA kimukwasha kutwajijila mubukishinka kusapwila mambo a Bufumu mumanyaunda mutanyiwa bantu babula kukeba kwibasapwila? Aye mikumbu yalondelapo yakumbula jino jipuzho.

“Byotwayuka’mba Yesu witukwasha, kitutundaika kwikala naluketekelo nekuchinchika byubilo biji byonse bitumwekela munyaunda,” byobyaambile Harry, wamyaka yakusemwa 72; wabatizwe mu 1946.

Claudio wamyaka yakusemwa 43; wabatizwe mu 1974 waambile’mba: “Kinembelo kya 2 Kolinda 2:17 kintundaika bingi. Kyaamba’mba byotuya mumwingilo ‘twambila mwi Kilishitu konka ku meso a Lesa.’ Umvwe nji mumwingilo, ntemwa bingi kwingijila pamo nabalunda nami bapamuchima.”

Gerard, wamyaka yakusemwa 79; wabatizwe mu 1955 waambile’mba: “Kine, mwingilo wabusapwishi unkatazha bingi. Bino nangwa byonkabyo, mmona bukine bwabyambo bitanwa mu Masalamo 18:29 byaamba amba: ‘Na mambo a Lesa wami ko kukila nakila nsakwa.’”

Eleanor, wamyaka yakusemwa 26; wabatizwe mu 1989 waambile’mba: “Umvwe natangatu nangwa kinembelo kimotu mumwingilo, kinsangajika bingi namba muchima wamuntu bamupalanguzha ku Baibolo.”

“Jonse ngeseka kwingijisha mashinda apusana-pusana akutendekelamo mwisambo. Kuji mashinda avula bingi akutendekelamo misambo kyakuba’mba kechi nkakonshe kwiengijisha onse mumyaka yabumi bwami yashalakone,” byobyashimuna Paul wamyaka yakusemwa 79; wabatizwe mu 1940.

Daniel wamyaka yakusemwa 75; wabatizwe mu 1946 waambile’mba: “Kechi mfichishiwa kumuchima namambo abantu bakanane. Ngeseka kwikala wakokelela pakwibasolomoka, sanesamba nabo nekuteleka milanguluko yabo.”

“Namonañene nababatizwa katataka bambujile’mba mwingilo wami wabusapwishi wibakwasha kwikala Bakamonyi. Muntu mukwabo yenabula kuyuka watendekele kwibafunjisha Baibolo nekwibakwasha kuya palutwe. Kino kimpa bingi lusekelo pakuyuka kuba’mba mwingilo wetu kemwingilo wakwingijila pamo,” byobyaambile Joan wamyaka yakusemwa 66; wabatizwe mu 1954.

Kika kimukwasha ‘kupanga bipangwa saka mwachinchika’?—Luka 8:15.

[Bipikichala pa peja 28]

Tupanga bipangwa byavula byotumwesha bipangwa byamupashi nekutaya mbila ya mambo a Bufumu

[Kipikichala pa peja 31]

Yesu walumbulwileka byoabujile batumwa banji’mba: ‘Pangainga bipangwa byavula’?