Sekelai mu Mingilo Yenu Yonse
1. Ki ka kyakonsha kulengela kizaku kyetu kya mu mwingilo kupwa?
1 Muntu bamulengele “kusekela mu mingilo yanji.” (Sapwi. 2:24) Nangwa byonkabyo, umvwe twakankalwa kutanamo byawama mu mwingilo wa mu bujimi, kitulefula ne kukankalwa kwikala na kizaku mu mwingilo. Kika kyakonsha kwitukwasha pa kuba’mba tutwajijile kwikala na kizaku?
2. Bintu ka byo twafwainwa kuketekela mu mwingilo wetu?
2 Bintu byo Mwafwainwa Kuketekela: Nangwa kya kuba bantutu bacheche bobatambwijile mambo awama asapwijilenga Yesu, kwakubula nangwa kuzhinaukatu ne mwafumine byawama. (Yoa. 17:4) Mu kishimpi kya kwa Yesu kya njimi, waambile amba kechi bantu bonse bakatambwila mambo awama a Bufumu ne. (Mat. 13:3-8, 18-22) Nangwa byonkabyo, kwingila kwetu nangovu mufuma byawama.
3. Twakonsha “kupanga bipangwa” byepi nangwa kya kuba bantu bakana kwibasapwila?
3 Byo Twakonsha Kuba pa Kupanga Bipangwa Byavula: Kwesakana na jishimikila ja kwa Yesu aba batambwila mambo awama bafwainwa ‘kupanga bipangwa.’ (Mat. 13:23) Umvwe wichi wamena ne kukoma, upanga bipangwa ne nkunwa kechi bichi bya wichi ne. Onkao mambo, bipangwa byo bapanga bena Kilishitu kechi baana ba bwanga bakatatakatu ne, bino ke kutwajijila kubyala nkunwa kupichila mu kusapwila pa bufumu. Kino kimwekela mu bintu ‘byawama’ bifumamo kikale bantu baswa nangwa kukana kutambwila mambo awama. Tubena kuzhijika jizhina ja Yehoba. (Isa. 43:10-12; Mat. 6:9) Tumvwa bulongo pa kwikala bamwingilo umo ne Lesa. (1 Ko. 3:9) Kabiji “kwingijisha byatunwa byetu” kusangajika Yehoba.—Hebe. 13:15, 16.
4. Bintu ka byakonsha kufuma mu mwingilo wetu kwakubula ne kuyukatu ne?
4 Kunungapo, mu kwingila mwakonsha kufuma bintu byawama byo tubula ne kumona ne. Kimye kya mwingilo wa kwa Yesu kechi bonse baikele batumwa ne, baishile kwikala panyuma ya kupwisha mwingilo wanji pano pa ntanda. Popamotu, ne nkunwa ya Bufumu yo tubyala nayo kechi ifikenatu ponkapotu yamena mu muchima wa muntu ne, iya na kumena panyuma, waikala ne kamonyi kwakubula ne kuyuka atweba. Kwakubula nangwa kuzhinaukatu ne, mu mwingilo wetu mufuma byawama bingi. Onkao mambo, twajijilai “kupanga bipangwa” ne kumwesha kuba’mba twi baana ba bwanga ba kwa Yesu.—Yoa. 15:8