Twajijilai na “Kupanga Bipangwa Byavula”
1 Kwingijisha byambo bya bukifwanyikizho, Yesu wiesakenye mwine kwikala muñanzañanza wa kine, Shanji kwikala Njimi kabiji ne baana banji bashingwa na mupashi kwikala misampi ya muñanzañanza ipanga bipangwa. Pa kulondolola mwingilo wa bukifwanyikizho wa Njimi, Yesu waambilepo bingi pa buneme bwa kukosela ku muñanzañanza. (Yoa. 15:1-4) Lufunjisho ke lwa kuba’mba, muntu ubena kukeba kwikala na bulunda bwakosa ne Yehoba, wafwainwa kwikala nobe musampi upanga bipangwa wa “muñanzañanza wa kine,” aye Yesu Kilishitu. Twafwainwa kutwajijila kupanganga “bipangwa bya mupashi” ne bipangwa bya Bufumu byavula.—Nga. 5:22, 23; Mat. 24:14; 28:19, 20.
2 Bipangwa bya Mupashi: Kukomenako kwetu kwa ku mupashi kwakonsha kuyukanyikwa kupichila mu byo tumwesha bulongo bipangwa bya mupashi. Nanchi mwibikako kwikala na bipangwa bya mupashi wa Lesa kupichila mu kufunda ne kulanguluka langulukapo pa Mambo a Lesa kimye kyonse nyi? (Fili. 1:9-11) Kange mukankazhamenga kulomba mupashi wazhila, wakonsha kwimulengela kwikala na byubilo bipana lukumo kwi Yehoba kabiji byakonsha ne kwimulengela kukomenako ku mupashi ne.—Luka 11:13; Yoa. 13:35.
3 Kwikala na bipangwa bya mupashi kuketukwasha ne kwikala ba mwingilo bengila na mukoyo. Kya kumwenako, butemwe ne lwitabilo bitulengela kwibikako kwingilako kimye kyonse mu mwingilo. Byubilo nabiji mutende, kukoka muchima, lusa, bukimote ne kwikanya bitukwasha kuyuka mwa kubila na bantu betwimena kuntundwa. Lusekelo lwitulengela kumwingila bulongo mwingilo nangwa kya kuba bantu kebakane kumvwa.
4 Bipangwa bya Bufumu: Twafwainwa ne kupanganga bipangwa bya Bufumu. Bino bipangwa bivwangamo kupana “kitapisho kya kutota Lesa moba onse, ko kuba’mba, bipangwa bya pa bya tunwa byetu bitota jizhina ja [Yehoba].” (Hebe. 13:15) Tuba bino kupichila mu kwikala ba mukoyo kabiji bakosa kusapwila mambo awama. Nanchi mubena kwibikako kupanga bipangwa bya Bufumu kupichila mu kwingilako pakatampe mu mwingilo wenu nyi?
5 Yesu waambile’mba baana banji ba bwanga bakishinka bakapanganga bipangwa byapusana pusana. (Mat. 13:23) Onkao mambo, twafwainwa kumupanga Yehoba byawamisha byetu kechi kwiesakanya na bakwetu ne. (Nga. 6:4) Na bukishinka, kwipesapesa atwe bene kwingijisha Mambo a Lesa, kuketukwasha kutwajijila kutumbijika Yehoba kupichila mu “kupanga bipangwa byavula.”—Yoa. 15:8.