Kulama Bakikulumpe—Mwingilo wa Bwina Kilishitu

“Kine kufika ne ku bukote bwenu, amiwa yenka, yami i ye, kabiji yami nkemupapanga kufika ne byo mukamena mvwi.”—ISAYA 46:4.

1, 2. Ndamino ya Shetu wa mwiulu yapusana byepi na ya bansemi ba bumuntu?

BANSEMI ba butemwe bakomesha baana babo kufumatu ku bulukeke, bwanyike, kufikatu ne ku bunsongwalume ne bunsongwakazhi bwabo. Nangwatu bakyanyike byo bakoma ne kwikala na bisemi byabo, bashabo ne bainabo batwajijila kwibata muchima ne kwibakwasha.

² Nangwa kya kuba bantu baji na pa kupelela mu byo bakonsha kubila baana babo, Shetu wa mwiulu kimye kyonse uta muchima ne kukwasha bakalume banji bakishinka. Byo aambijilenga bantu banji boasajile ba mu bimye byakala, Yehoba waambile amba: “Kine kufika ne ku bukote bwenu, amiwa yenka, yami i ye, kabiji yami nkemupapanga kufika ne byo mukamena mvwi.” (Isaya 46:4) Bino byambo byo bikoseshapo bena Kilishitu bakikulumpe! Yehoba kechi ulekelela aba batwajijila kwikala bakishinka kwi aye ne. Mu kifulo kya kuba byobyo, walaya kwibajisha, kwibakwasha, kabiji ne kwibatangijila mu bwikalo bwabo bonse, ne mu kimye kya mu bukote bwabo.—Masalamo 48:14.

3. Ki ka kisakwambiwapo mu uno mutwe?

³ Twakonsha kulonda byepi Yehoba mu kuta muchima bakikulumpe? (Efisesa 5:1, 2) Twayai twisambe pa mashinda baana, bakulumpe mu kipwilo, ne bena Kilishitu pa muntu pa muntu mo bakonsha kulamina bakikulumpe baji mu bulongo bwetu bwa ntanda yonse.

Mutembo Wetu Atweba Baana

4. Ñanyi mutembo baana ba bwina Kilishitu ye baji naye ku bansemi yabo?

⁴ “Nemeka bashobe ne bainobe.” (Efisesa 6:2; Kulupuka 20:12) Na bino byambo byapelatu bino saka byanema byafuma mu Binembelo bya Kihebelu, mutumwa Paulo wavulwileko baana pa mambo a mutembo ye baji nanji ku bansemi yabo. Pano nga bino byambo bingila byepi pa kulama bakikulumpe? Kya kumwenako kya lusekelo kya mu bimye bya kala bwina Kilishitu saka bukyangye kufika, kisakwitukwasha kukumbula jino jipuzho.

5. (a) Bi ka bimwesha kuba’mba Yosefwa kechi walekele mitembo yanji ya mu kisemi ne? (b) Kunemeka bansemi yetu kulumbulula ka, kabiji Yosefwa waubilepo byepi mu luno lubaji?

⁵ Pa myaka kukila pa 20, Yosefwa kechi wamonañenepo na shanji wakikulumpe, aye mushakulu Yakoba ne. Nangwa byonkabyo, kyamweka Yosefwa kechi walekele butemwe bwanji bwa mu kisemi bwa kutemwa Yakoba ne. Kimye kyo elumbulwile ku balongo banji, wibashikishe’mba: ‘Nanchi batata bakiji bomi nyi?’ (Ntendekelo 43:7, 27; 45:3) Pa kyokya kimye mu kyalo kya Kenana mwaponene kipowe kya nzala. Byonkabyo, Yosefwa watumine mawi kwi bashanji, amba: “Mukeye ko nji, kechi mubande ne; kabiji mukekalanga mu ntanda ya Goshenyi, kwipi ne amiwa . . . Kabiji konkakwa nkemumwenanga byonse.” (Ntendekelo 45:9-11; 47:12) Ee, kunemeka bansemi bakoma kwavwangamo kwibazhikijila ne kwibamwena bintu bya ku mubiji inge baji mu kimye kya kukankalwa kwisunga abo bene. (1 Samwela 22:1-4; Yoano 19:25-27) Yosefwa watambwijile uno mutembo na lusekelo.

6. Yosefwa wamwesheshe byepi butemwe bwa kine kwi bashanji, kabiji twakonsha kulonda byepi byo aubile?

⁶ Na bukwasho bwa Yehoba, Yosefwa waikele ke umo wa mu banonshi ba mu Ijipita kabiji wajinga ne na lūsa lukatampe. (Ntendekelo 41:40) Bino kechi wimwene kunema ne kupayankana kya kuba wakankalwa kunemeka shanji wa myaka 130 ne. Byo aumvwine’mba Yakoba (nangwa amba Isalela) ubena kunangijila kwipi, “ponkapo Yosefwa wawamishishe jimo kalaki wanji, wakamutundaijile shanji Isalela ku Goshenyi, kabiji wimwesheshe mwine kwi shanji; ne kumuponena wamuponejile peshingo ne kujila wajijilenga ponka peshingo yanji kakimye.” (Ntendekelo 46:28, 29) Ino ntambwilo yakijile mushingi wa pa kanwatu. Yosefwa watemenwe shanji kya kine kine kabiji kechi waumvwine bumvu pa kumwesha butemwe bwanji ne. Umvwe tuji na bansemi yetu bakoma, nanchi tubena kwibamwesha butemwe bwa byonkabye nyi?

7. Mambo ka Yakoba kyo akebejile kuzhikwa mu Kenana?

⁷ Butemwe bwa Yakoba bwa kutemwa Yehoba bwatwajijile kufikatu ne ku lufu lwanji. (Bahebelu 11:21) Na mambo a lwitabilo lwanji mu milaye ya Lesa, Yakoba walombele’mba mubiji wanji akazhikwe mu Kenana. Yosefwa wanemekele bashanji kupichila mu kuba monka mo bamulayijile nangwa kya kuba pataiwe mali ne kuvula kwa bintu byavwangiwemo.—Ntendekelo 47:29-31; 50:7-14.

8. (a) Ñanyi kintu kine kitulengela kulama bansemi bakikulumpe? (b) Kalume umo wa mwingilo wa kimye kyonse waubilepo byepi pa kuba’mba alame bansemi yanji bakikulumpe? (Monai kabokoshi pa peja 17.)

⁸ Ki ka kyalengejile Yosefwa kulama bashanji? Nangwa kya kuba kumwesha butemwe ne lusanchilo ku wamuletele panopantanda ne kumukomesha byo byajinga bintu bikatampe, Yosefwa kwa kubula nangwa kuzhinaukatu ne wakebeshe kutokesha Yehoba pa muchima. Ne atweba byobyo twafwainwa kwikala. Paulo wanembele’mba: ‘Umvwe mwanamukazhi wafwilwa uji na baana banji nangwa bankana, babangijile kufunda kumwesha kunemeka Lesa kwabo ku ba mu kisaka kyabo bene, ne kwibabwezhezha byawama bebasema: mambo kino kyo kyaitabilwa ku meso a Lesa.’ (1 Timoti 5:4) Kya kine, kutemwa Yehoba ne moyo wa mushingi wa kumwakamwa kuketulengela kulama bansemi yetu bakoma, nangwa kya kuba mu kuba kino mwavwangwa makatazho.a

Bakulumpe mu Kipwilo byo Bamwesha Kuta Muchima

9. Yehoba watongola bañanyi bakulama jitanga, kubikako ne bena Kilishitu bakikulumpe?

⁹ Ku mpelo ya bumi bwanji, Yakoba watongwele Yehoba amba ‘ye Lesa wandaminenga moba onse a mweo wami kufika ne kuja lelo.’ (Ntendekelo 48:15) Lelo jino Yehoba ulama bakalume banji ba panopantanda kupichila mu bakulumpe mu kipwilo ba bwina Kilishitu, babena kutangijilwa na mwananji, Yesu Kilishitu, “aye kafunga mwine mukatampe.” (1 Petelo 5:2-4) Nga bakulumpe mu kipwilo bakonsha kulonda byepi Yehoba pa kulama bakikulumpe baji mu jitanga?

10. Ki ka kyaubiwa mu kunengezhezha bena Kilishitu bakikulumpe bukwasho bwa bintu bya ku mubiji? (Monai kabokoshi pa peja 19.)

¹⁰ Aku kipwilo kya bwina Kilishitu kitatulatu, batumwa batongwele ‘banabalume batanu ne babiji, . . . bayula na mupashi ne maana’ bakutala pa “mwingilo wa bukwasho pa juba pa juba” wa kajo mukachi ka banabakazhi bafwilwa bakajilwa. (Byubilo 6:1-6) Palutwe kacheche, Paulo wakambizhe mukulumpe mu kipwilo Timoti kunemba banabakazhi bafwilwa bakikulumpe baji na bya kumwenako byawama pa mutanchi wa boba bafwanyijilwe kutambula bukwasho bwa bintu bya ku mubiji. (1 Timoti 5:3, 9, 10) Mu jishinda jimotu, bakulumpe mu kipwilo lelo jino bepana kunengezha bukwasho bwa kukwasha bena Kilishitu bakikulumpe umvwe kibena kukebewa. Pano bino, kuji byavula byavwangiwamo mu kulama bakikulumpe bakishinka.

11. Yesu waambilepo’mba ka pa mwanamukazhi wafwilwa mulanda wapaine bupe buchechetu?

¹¹ Kwipi na ku mpelo ya mwingilo wanji panopantanda, Yesu waikajile ku nzubo ya Lesa ne ‘kutala jibumba byo jatayilengamo ndalama mu kilambwilo.’ Ponkapo watajishishe bingi pa muntu umo. Jishimikila jaamba’mba: “Kwaishile umo mwanamukazhi wafwilwa mulanda, watayilemo tundalama tucheche tubiji, ke kangwee kamo.” Yesu waichile baana banji ba bwanga ko aji ne kwibambila’mba: “Kine nemwambila namba, Uno mwanamukazhi wafwilwa mulanda watayamo yavula kukila bonse babenakutayamo mu kilambwilo: mambo abo bonse batayamo ya mu bunonshi bwabo; pakuba aye watayamo ya bulanda bwanji yonse yo aji nayo, ke byonse byo aikajilamo.” (Mako 12:41-44) Mwayilatu kupana mali, bupe bwa uno mwanamukazhi wafwilwa bwakepele bingi, bino Yesu wayukile Shanji wa mwiulu byo anemeka byubilo bya kwipana na muchima yense. Nangwa kya kuba mwanamukazhi wafwilwa mulanda wajinga mukote, Yesu kechi walengulwile byoaubile ne.

12. Bakulumpe mu kipwilo bakonsha kumwesha byepi lusanchilo ku bibena kuba bena Kilishitu bakikulumpe?

¹² Byonka byajinga Yesu, Bakulumpe mu kipwilo bena Kilishitu kechi balengulula byuba bakikulumpe bya kutumbijika bupopweshi bwa kine ne. Bakulumpe mu kipwilo bafwainwa kutakaika bakikulumpe na mambo a kuya mu mwingilo, kwikalamo na lubaji pa kupwila, kukwashañana mu kipwilo, ne na mambo a kuchinchika kwabo. Byambo bya kukoseshañana byakonsha kukwasha bakikulumpe kutana ‘mwa kwitotela’ mu mwingilo wabo wazhila, kabiji kino kibalengela kubula kulefulwa umvwe ke beesakanye ku bibena kuba bakwabo bena Kilishitu nangwa ku byo baingilanga kala.—Ngalatiya 6:4.

13. Mu ñanyi mashinda bakulumpe mu kipwilo mo bakonsha kusanchila busendwe bwa bakikulumpe ne byo bapitamo?

¹³ Bakulumpe mu kipwilo bakonsha kusanchila bukwasho bwanema buba bakikulumpe bena Kilishitu kupichila mu kwingijisha busendwe bwabo ne byo bapitamo. Bakikulumpe baji na byubilo byawama bakonsha kwingijishiwa mu bimwesho nangwa mu misambo ya mepuzho pa kimye ne pa kimye. Mukulumpe mu kipwilo umo waambile’mba, “luonde lwikalatu nzoo sa luteleka umvwe kengipuzhe mulongo nangwa nyenga wakikulumpe wakomesha baana banji mu bukine.” Bakulumpe mu kipwilo kikwabo baambile’mba, nyenga umo painiya wa myaka ya kusemwa 71 wakwashishe bingi basapwishi ba Bufumu kuyanga jonse mu mwingilo wa mu bujimi. Kabiji wibakoseshe kubanga “bintu byanema” nabiji kutanganga Baibolo ne kinembelo kya juba kabiji ne kulanguluka langulukapo pa byo batanga.

14. Nga jibumba jimo ja bakulumpe mu kipwilo janemekele byepi mukulumpe mu kipwilo mukwabo wakikulumpe?

¹⁴ Kabiji bakulumpe mu kipwilo banemeka mingilo yanema ingila bakwabo bakulumpe. José uji mu myaka ya kusemwa 70, waingila pa bukulumpe mu kipwilo myaka yavula, pa kimye kya kunyuma kwe, bamubile opaleshonyi ikatampe. Byo papichile kimye kyabaya pa kuba’mba akose, walangulukile kuleka jishuko janji ja kwingila mwingilo wa bukulumpe bwa kutangijila mu kipwilo. José waambile’mba, “bintu byaubile bakwetu byankumishe bingi. Mukifulo kyakwitabizha mulanguluko wami, bangipwizhe’mba ñambe bukwasho bo nakebewenga pa kuba’mba ntwajijile kwingila mingilo yami ya bukulumpe.” Na bukwasho bwa mukulumpe mu kipwilo wakyanyike, José watwajijile kwingila na lusekelo bukulumpe bwa kutangijila mu kipwilo kabiji kino kyakwasha bingi kipwilo. Mukulumpe mukwabo mu kipwilo waambile’mba: “Kipwilo kyanemeka bingi mingilo ya kwa José ya kwikala mukulumpe mu kipwilo. Bamutemwa kabiji ne kumunemeka bingi na mambo a byo apitamo ne lwitabilo lwanji lwa kumwenako. Ukwasha bingi kipwilo kyetu.”

Kwilama Atwe Bene na Bene

15. Mambo ka bena Kilishitu bonse o bafwainwa kutela muchima ku buwame bwa bakikulumpe baji mukachi kabo?

¹⁵ Kechi baana bonka baji na bansemi yabo bakoma ne bakalume batongolwa bo bakonshatu kuta muchima bakikulumpe ne. Byo aesakenyenga mubiji wa muntu ku kipwilo kya bwina Kilishitu, Paulo wanembele’mba: ‘Lesa wanungakenye ne kwesakanya bulongo mubiji, ne kupana buneme bwakila ku abya byabujilwepo; amba mu mubiji kechi mwikale kwiabanya ne; poso amba, bya mubiji byonse bilame bine na bine pamo.’ (1 Kolinda 12:24, 25) Pa kuba’mba kipwilo kya bwina Kilishitu kingilenga bulongo mu kukwatankana, kinungwa kyonse kyafwainwa kuta muchima ku buwame bwa bakwabo ba mu lwitabilo kubikapotu ne bakikulumpe.—Ngalatiya 6:2.

16. Twakonsha kumwesha byepi lusekelo mu wakikulumpe kimye kyo tuji pa kupwila kwa bwina Kilishitu?

¹⁶ Kupwila kwa bwina Kilishitu kwitupa kimye kyawama kya kumwesheshamo lusekelo mu bakikulumpe. (Filipai 2:4; Bahebelu 10:24, 25) Nanchi twikalako na kimye kya kwisamba na bakikulumpe pa bimye bya uno mutundu nyi? Nangwa kya kuba kyakonsha kuwama kukeba kuyuka butuntulu bwabo, nanchi twakonsha ‘kupana kya bupe kya bumupashi,’ nabiji kwambañana nabo byamwekelepo bimo bikomeshañana nangwa milanguluko ya mu Binembelo nyi? Bakikulumpe bamo byo bakankalwa kwendaenda, kyafwainwa kuwama bingi kwibasolomoka kukila kupembelela’mba abo beye ko tuji. Inge kya kuba’mba kechi bomvwisha ne, twakonsha kwamba pachepache kabiji ne kwamba byambo bulongo sabyumvwanyika. Kabiji pa kuba’mba pekale ‘kwikwasha atwe bene na bene’ kwa kine, twafwainwa kutelekesha ku bibena kwamba wakikulumpe.—Loma 1:11, 12.

17. Twakonsha kumwesha byepi amba twata muchima bena Kilishitu bakikulumpe bekalatu pa mazubo?

¹⁷ Ibyepi inge bakikulumpe bamo kechi babena kukonsha kutanwa ku kupwila kwa bwina Kilishitu ne? Yakoba 1:27 waamba’mba ke mwingilo wetu wa “kupempula banabanshiwa ne banabakazhi bafwilwa mu malwa abo.” Byo basantapo bakikulumpe umvwe twibapempula! Kimye kyo bamubikile mu kaleya nobe mu 65 C.E., Paulo “mukote” wataine kuba’mba bunke bukola. Wakebeshe bingi kumonañana na Timoti mukwabo wa mu mwingilo ne kunemba’mba: “Uteshe muchima upelawizhe kwiya kuno ko nji.” (Filemonyi 9; 2 Timoti 1:3, 4; 4:9) Nangwa kya kuba’mba kechi bakaili ne, bakikulumpe bamo bekalatu pa mazubo abo na mambo a makatazho a butuntulu bwa mubiji. Ko kuba’mba babena kwamba’mba, ‘Nasasapo, ubai papelela bulume bwenu kumpempula bukiji bukiji.’ Nanchi tubena kuya ku luno lusashijilo nyi?

18. Mfweto ka yakonsha kufuma mu kupempula bakikulumpe?

¹⁸ Kange mulengulule buneme bwa bifuma mu kupempula mulongo nangwa nyenga wa ku mupashi wakikulumpe ne. Mwina Kilishitu wa jizhina ja Onesifolusa byo ajinga mu Loma, wamukebeshe bingi Paulo, kabiji wamutaine ne ku mutana, ne panyuma ya byobyo ‘wamwikizhe muchima.’ (2 Timoti 1:16, 17) Nyenga umo wakikulumpe waambile’mba, “Ntemwa bingi kwikalako na banyike. Kyo natemwako ke kya kuba’mba bammona nobe ne wa mukisemi kyabo. Kino kinkosesha kya kine kine.” Nyenga mukwabo wakikulumpe mwina Kilishitu washimuna’mba: “Nnsanta bingi inge muntu umo wantuminapo kikachi, wantumina lamya ne kwisamba nanji pa ka kimyetu kacheche, nangwa kumpempulatu pa ka kimye kacheche. Kiji nobe kupema mwela watalala bulongo.”

Yehoba Ufweta Boba Balama

19. Mfweto ka ifuma mu kulama bakikulumpe?

¹⁹ Kulama bakikulumpe mufuma mfweto yavula bingi. Kupwañena pamo na bakikulumpe ne kwingijisha maana abo ne byo bapitamo, ke jishuko jikatampe bingi. Bantu balama bakwabo bamona lusekelo lukatampe lufuma mu kupana, kabiji ne kwiumvwa baingila ne bakasuluka na mambo a kufikizha mutembo wabo wa mu Binembelo. (Byubilo 20:35) Kabiji aba balama bakikulumpe kechi bafwainwa kwakamwa’mba bakebalubako mu bimye bya mu bukulumpe bwabo ne. Byambo bya Lesa bitulaya kuba’mba: “Uji na muchima wa bupanyi ukanonka byavula, awa upapo mema bakwabo ne aye naye bakamupapo.”—Byambo bya Mana 11:25.

20, 21. Yehoba umona byepi aba balama bakikulumpe, kabiji ki ka kyo twafwainwa kukebesha kuba?

²⁰ Yehoba ufweta baana bamwakamwa, bakulumpe mu kipwilo, ne bena Kilishitu balama bakwabo, na mambo a kukwasha bakikulumpe ba mu lwitabilo. Muchima wa uno mutundu uji pamo na mwayila kino kishimpi kyaamba’mba: “Awa wamubila lusa muyanji wamukongwesha Yehoba, kabiji aye ukamulubwila akya kyanji kyawama kyo aubile.” (Byambo bya Mana 19:17) Umvwe butemwe bwitulengela kumwesha lusa ku balanda ne bayanji, Lesa umona bumpanyi bwa uno mutundu nobe nkongole yo alubula na mfweto. Kabiji witulubwila na mambo a kulama bapopweshi bakwetu bakikulumpe, bavula mwi abo ‘bayanji ba panopantanda bino banonshi mu lwitabilo.’—Yakoba 2:5.

²¹ Bintu byoalubula Lesa byo byavulapo! Byavwangamo ne bumi bwa myaka ne myaka. Ku bakalume ba Yehoba bavula, kino kikalumbulula bumi bwa myaka ne myaka mu paladisa panopantanda, mukabula misongo ifuma mu bundengamambo kabiji bakikulumpe bakishinka mo bakabwezhiwa ku bulume bwa ku bwanyike bwabo. (Lumwekesho 21:3-5) Byo tubena kupembelela kyokyo kimye kya bintu byawama, twayai tutwajijile na kufikizha mutembo wetu wa bwina Kilishitu wa kulama bakikulumpe.

[Tubyambo twa mushi]

Musakukumbula’mba Ka?

• Baana bakonsha kunemeka byepi bansemi bakikulumpe?

• Bakulumpe mu kipwilo bamwesha byepi kusanchila bakikulumpe baji mu jitanga?

• Nga mwina Kilishitu bunke bwanji wakonsha kuba byepi pa kuba’mba amweshe lusekelo lwa kine mu bakikulumpe?

• Mfweto ka ifuma mu kulama bena Kilishitu bakikulumpe?

[Kitenguluzha pa peja 16]

Kimye Bansemi Yanji Kyo Bakebewenga Bukwasho

Philip waingilanga mwingilo wa kwitemenwa wa buntungi mu Liberia mu 1999 kimye kyo atambwijile mawi a kuba’mba bashanji babela bingi. Byo ayukile’mba bainanji kuba ke bayandetu bunke kwakubula wakwibakwashako ne, wafuukwilepo kuya ku muzhi na kukebela bashanji muchi.

Philip, waambile’mba, “kechi kyapelele kubwela ku muzhi ne. Bino nalangulukile kuba namba mutembo wami mutanshi ke wakulama bansemi yami.” Pa myaka isatu yalondejilepo, wavilwijile bansemi yanji ku mpunzha yafwainwa, kabiji na bukwasho bwa bena Kilishitu bakwabo ba konkakwa ko ebavilwijile, wapijijilwe bwikalo mwa kulamina bashanji.

Pa kino kimye bainanji Philip babayuke mwakubila na bulwazhi bwa bashanji bwaswezha. Katatakatu papo, Philip waswile kuya na kwingila mwingilo wa kwitemenwa pa musampi wa Bakamonyi ba kwa Yehoba mu Macedonia.

[Kitenguluzha pa peja 17]

Kechi Bamusula Ne

Ada mwina Kilishitu wa myaka ya kusemwa 85 mu kyalo ka Australia, byoatatwile kwikalatu pa nzubo na mambo a kubelabela, bakulumpe mu kipwilo banengezhezhe ku mukwasha. Basajile jibumba ja be Kilishitu bakwabo ba ku mukwashako. Abano balongo ne banyenga bajinga bingi na lusekelo lwa kwingila mingilo nabiji ya kuwamisha, kuchapa, kuteka, ne kumutwajilako makalata.

Abwe bukwasho bwatatwile pepi na myaka jikumi yapitapo. Kufikatu ne luno, Bakamonyi ba kwa Yehova kukila pa 30 bamukwasha bingi Ada. Batwajijila na kumupempula, kumutangila mabuku alumbulula Baibolo, kumubulako kununguluka kwa ku mupashi kwa baji mu kipwilo, ne kulombela nanji pamo kimye kyonse.

Mukulumpe wa bwina Kilishitu mu kyonkakye kipwilo waambilepo amba: ”Aba balama Ada bekimona kwikala kya lusekelo bingi ku mukwasha. Bavula batundaikwa bingi na mambo a mwingilo wanji wa bukishinka wa pa myaka yavula, kabiji kechi bakeba ku musula ne.”

[Kipikichala pa peja 14]

Nanchi twikala bakasuluka mu byo tumwesha butemwe ku bansemi bakikulumpe nyi?

[Bipikichala pa peja 16]

Bonse mu kipwilo bakonsha kumwesha butemwe bwabo ku bakikulumpe ba mu lwitabilo