Batokwa ke Boba Bapa Lesa Lukumo

‘Ba kemupopwela anweba Nkambo; kabiji bakejitumbijika jizhina jenu.’—Masalamo 86:9.

1. Mambo ka o twakonshesha kupela Lesa lukumo kukila byakonsha kuba bilengwa bibula kupema?

YEHOBA wafwainwa kutotwa ku bilengwa byanji byonse. Bilengwa byanji bibula kwamba byo bimupa lukumo kishinshi, atweba bantu tuji na bulume bwa kulanguluka, kukwatakanya bintu, kumwesha lusanchilo, ne ku mupopwela. Onkao mambo nyimbi wa masalamo waambila atweba, amba: “Ubai kiwowo kya lusekelo kwi Lesa, ntanda yonse: Imbai ya kutota lukumo lwa jizhina janji. Tumbijikai kutotwa kwanji.”—Masalamo 66:1, 2.

2. Bañanyi baumvwina mukambizho wa kupa lukumo jizhina ja Lesa, kabiji mambo ka?

² Bantu bavula bakana kusanchila Lesa nangwa kumupa lukumo. Nangwa byonkabyo, mu byalo 235, Bakamonyi ba kwa Yehoba kukilaila pa 6 milyonyi, bamwesha kuba’mba bamona ‘byubilo bya Lesa bibula kumweka’ kupichila mu bintu byoalenga ne kuba’mba ‘baumvwa’ lushimuno lwa kishinshi lwa bilengwa. (Loma 1:20; Masalamo 19:2, 3) Kabiji kupichila mu kufunda Baibolo, bafika pa kumuyuka Yehoba ne kumutemwa. Masalamo 86:9, 10 aambijile jimo amba: “Mikoka yonse yo mwalengele ikeya na kwimupopwela, anweba Nkambo; kabiji bakejitumbijika jizhina jenu. Mambo anweba mwi mukatampe ne kuba muba byakukumya: Anweba mwi Lesa bunke bwenu.”

3. “Jibumba jikatampe” ‘jingila byepi mute ne bufuku’?

³ Lumwekesho 7:9, 15 mu jishinda jimotu walumbulula “jibumba jikatampe” ja bapopweshi kuba’mba “bamwingijila [Lesa] mute ne bufuku monka mu nzubo yanji yazhila.” Kino kechi kyatala mu kuba’mba Lesa ukebatu’mba bakalume banji bobengatu monka bamutotaikilatu kwa kubula kukokoloka ne, bino bakalume banji ke jibumba ja ntanda yonse. Ko kuba’mba inge bwaila mu byalo bimo, bakalume ba Lesa ku lubaji lukwabo lwa panopantanda bapayankana na kusapwila. Onkao mambo nanchi kyakonsha kwambiwa’mba juba kechi jizhika ku boba bapa Yehoba lukumo ne. Bukumotu “bintu byonse bipema” bikasansule mawi abyo mu kutota Yehoba. (Masalamo 150:6) Nangwa byonkabyo, nga pa kino kimye, twakonsha kuba byepi bunke bwetu, kuba’mba tupe Lesa lukumo? Lukatazho ka lo twakonsha kutalañana nalo? Kabiji, mfweto ka ibena kupembelela boba bapa Lesa lukumo? Pa kuba’mba tukumbule ano mepuzho, twayai twisambe pa jishimikila ja mu Baibolo jibena kwamba pa kisaka kya bena Gadi mu bena Isalela.

Lukatazho Lwajingako Kala

4. Lukatazho ka lo batalañene nalo bena Gadi?

⁴ Sabakyangye kutwela mu Ntanda ya Mulaye, kisaka kya bena Gadi ba mu bena Isalela balombele kuba’mba bebetabizhe kuya na kwikala mu mpunzha ya munyemvu ku musela wa Yodano. (Kubala 32:1-5) Kwikala mu yoya mpunzha kwalumbulwile kuyuka mwakubila na makatazho. Bisaka byaikejile ku muzhika wa Yodano byafwainwe kuzhikijilwa na Kinkunenke kya Yodano, ko kuba’mba kino kyajinga luvimba walengelwetu mwine wa kwibazhikijila ku mazhita. (Yoshua 3:13-17) Pano bino, pa mambo a mushiji wajinga ku musela wa Yodano, Buku wanembelwe na George Adam Samith wa The Historical Geography of the Holy Land waamba’mba: “Pa mutunta mukatampe wa Arabia, mushiji yense wajinga waselebalatu kwakubula luvimba. Na mambo a kino, kimye kyonse pa uno mutunta pakinsankenanga bakapitemo ba nzala, biombe bikatampe bya mu bano bakapitemo byayanga pa uno mutunta pa mwaka pa mwaka na kujishishapo banyama babo.”

5. Yakoba wakoseshe kisaka kya bena Gadi kubapo byepi umvwe bebalukuka?

⁵ Pano bena Gadi baubilengapo byepi pa luno lukatazho? Myaka yavula yapichilepo, mushakulu wabo aye Yakoba byoajinga pepi na kufwa, waambijile jimo’mba: “Gadi bakamutula mazhita, pakuba aye ukebatula nzhita panyuma yabo.” (Ntendekelo 49:19) Pa kwibyumvwatu, abyo byambo byakonsha kulengela kubula kwikala na luketekelo. Pano bino, abino byambo byalumbulwile kukambizha bena Gadi kushinkanya. Yakoba wibabujishetu mu bukishinka kuba’mba umvwe bauba byonkabyo, balwanyi babo bakabwelamo sa balengeshiwa bumvu na mambo kwibapupila panyuma ku bena Gadi.

Makatazho a ku Mpopwelo Yetu Lelo Jino

6, 7. Bwikalo bwa bena Kilishitu lelo jino bwipasha byepi na bobwa bwajingamo kisaka kya bena Gadi?

⁶ Byonka byajinga kisaka kya bena Gadi, bena Kilishitu lelo jino nabo babena kupita mu makatazho ne bisendwa bya mu bwikalo bwa kwa Satana; kafwako bukikizhi bwa kukumya bwitwamuna ku buno bulwi bo tulwa nabo ne. (Yoba 1:10-12) Atweba bavula tukeba kuyuka mwakubila na makatazho a ku sukulu, kukeba mwakwikela, ne mwa kukomeshesha baana. Kuji ne makatazho apa mwine muntu. Bamo bafwainwa kuchinchika ku “mwiba mu mubiji” uji mu mutundu wa bulema nangwa kikola kibula kupwa. (2 Kolinda 12:7-10) Bakwabo nabo bamanyikwa na milanguluko ya kwiumvwa babula kunema. “Moba atama” a bukote akonsha kulengela bena Kilishitu bakikulumpe kubula kwingijila Yehoba na bulume bobajinga nabo kala.—Musapwishi 12:1.

⁷ Kabiji mutumwa Paulo wituvululako amba ‘tuji pa bulwi bwa . . . kulwa na bapashi babipa ba mwiulu.’ (Efisesa 6:12) Kimye kyonse tutalañana na “mupashi wa panopantanda,” mupashi wa bunsatuki ne wa byubilo byatama Satana ne bademona banji byo batundaika. (1 Kolinda 2:12; Efisesa 2:2, 3) Byonka byajinga Lota waakamwanga Lesa, ne atweba lelo jino twakonsha kwikala na bulanda na mambo a bintu bya bunya byo bamba ne kuba bantu betuzhokoloka. (2 Petelo 2:7) Kabiji tulukukwa na Satana luntunanwa. Satana ubena kulwa na bashalapo ba mu bashingwa “balama mikambizho ya Lesa, ne kukwachisha bukamonyi bwa Yesu.” (Lumwekesho 12:17) ‘Mikooko ikwabo’ ya kwa Yesu nayo ibena kulukukwa kwi Satana kupichila mu kwiikanya mwingilo wayo ne kwiiyanjisha.—Yoano 10:16.

Kutalapotu nyi, Inyi Kulwa Nabo?

8. Twafwainwa kubapo byepi pa byo etulukuka Satana, kabiji mambo ka?

⁸ Twafwainwa kubapo byepi pa bitulukuka Satana? Byonka byajinga kisaka kya bena Gadi bakala, twafwainwa kwikala bakosa ku mupashi ne kulwa monka mwayila mikambizho ya Lesa. Kya bulandatu ke kya kuba’mba bamo batatula kukokela ku makatazho a mu bwikalo, ne kulekelela mingilo yabo ya ku mupashi. (Mateo 13:20-22) Kamonyi umo waambilepo kyalengejilenga kibelengelo kya bantu mu kipwilo kyo ajimo kubwela panyuma amba: “Balongo babena kukoka. Baji na bijikila.” Kwambatu kine, lelo jino bantu baji na bintu byavula bibalengela kukoka. Onkao mambo kyapela bingi kumona kupopwela Lesa nobe lukatazho lukwabo, kisendwa kyabaya bingi. Nanchi ino ndangulukilo yawama nyi?

9. Nga kutambula kikonkoji kya kwa Yesu kukokolosha byepi?

⁹ Akilangulukai byambo Yesu byoaambijile mabumba a mu moba anji akokeletu zubulu na makatazho a mu bwikalo amba: “Iyai ko nji, anweba bonse basulwila na mingilo ne kunemenwa, ne amiwa nkemukokolosha.” Nanchi byambo bya kwa Yesu byatajile mu kuba’mba kukokoloka kwafwainwa kwiya kupichila mu kuleka mwingilo wa Lesa nyi? Kupusanako, Yesu waambile amba: “Tambulai kikonkoji kyami ne kufunda kwi amiwa; mambo amiwa ne kimote ne kukoka muchima: ne anweba mukamona kukokoloka kwa michima yenu.” Kikonkoji ke mutembo wa kichi nangwa kyela kikwashako muntu nangwa nyama kusenda kipe kyanema. Pano mambo ka muntu o afwainwa kukebela kutambula kikonkoji kya yewo mutundu? Nanchi kechi ‘twanemenwa kala’ ne nyi? Ee ibyo, pano bino kinembelo kya Kingiliki kyakonsha ne kutangiwa kuba’mba: “Ikalai mu kikonkoji kyami pamo ne amiwa.” Akilangulukaipotu: Yesu kwipana kuba’mba etukwashe kudonsa kipe kyetu! Kechi twikyuba mu bulume bwetu atwe bene ne.—Mateo 9:36; 11:28, 29, tubyambo twa panshi, mu NW; 2 Kolinda 4:7.

10. Bi ka bifumamo mu kwibikako kwetu kwa kupa Lesa lukumo?

¹⁰ Umvwe twatambula kikonkoji kya kwikala mwana wa bwanga, ko kuba’mba tubena kumulwisha Satana. Yakoba 4:7 walaya’mba, ‘Diabola, mukanai, ne aye ukemunyema.’ Kino kechi kibena kulumbulula’mba kyapela kumukana Diabola ne. Kwingijila Lesa kukebewa kwibikako kya kine kine. (Luka 13:24) Bino Baibolo walaya bino byambo bitanwa mu Masalamo 126:5 amba: “Aba bakusa nkunwa na mipolo bakanowa na lusekelo.” Ee, kechi twingijila Lesa wabula lusanchilo ne. Aye “ye ufweta boba bamukebesha,” kabiji upesha boba bamupa lukumo.—Bahebelu 11:6.

Kutumbijika Lesa byo Tuji Basapwishi ba Bufumu

11. Mwingilo wa mu bujimi wingila byepi nobe luvimba ku bya kwitulukuka bya kwa Satana?

¹¹ Yesu wakambizhe amba: “Onkao mambo yainga na kwibasambisha ba mu mikoka yonse ya bantu.” Mwingilo wa kusapwila jo jishinda jikatampe ja kupainamo “kitapisho kya kutota” Lesa. (Mateo 28:19; Bahebelu 13:15) Kuvwala ku maulu etu “makwabilo a kutengelela jimo kwa mambo awama a mutende” ke kintu kyanema kya lubaji lwetu lwa “byonse bya nkondo,” ko kuba’mba luvimba wa kwituvimbila ku bya kwitulukuka bya kwa Satana. (Efisesa 6:11-15) Kutota Lesa mu mwingilo wa mu bujimi ke jishinda jawamisha ja kukoseshamo lwitabilo lwetu. (2 Kolinda 4:13) Jitukwasha kubula kwikala na milanguluko ya kubula luketekelo. (Filipai 4:8) Kuya mu mwingilo wa mu bujimi kwitupa kimye kya kupwañena pamo kwa kwikosesha na bapopweshi bakwetu.

12, 13. Nga kuya mu mwingilo wa mu bujimi kimye kyonse kwakonsha kufweta byepi bisemi? Lumbululai.

¹² Kabiji mwingilo wa kusapwila wakonsha ne kwikala mwingilo wawama ku kisemi. Kya kine, bakyanyike bakebewa kwesakanya bya kukaya. Nangwa byonkabyo kimye kyaingijisha kisemi mu mwingilo wa mu bujimi kechi kyafwainwa kwikala kileta mukose ne. Bansemi bakonsha kulenga kino kimye kwikala kya lusekelo kupichila mu kufunjisha baana babo bya kwamba bulongo mu mwingilo. Nanchi banyike kechi bomvwa bulongo na bintu byo bengila bulongo nenyi? Bansemi bakonsha kukwasha baana babo kutana lusekelo mu mwingilo kupichila mu kwesakanya bintu, kubula kwibakebela bintu byavula byobakonsha kubula kuba.—Ntendekelo 33:13, 14.

¹³ Kunungapo, kisemi kitotela Lesa pamo kikala kyakwatankana. Akilangulukai pa nyenga umo ye bakaine ku mwata wanji wabula kwitabila ne kumusha na baana batanu. Kino kyamulengejile kukeba nkito kuba’mba amwenenga baana banji bintu bya ku mubiji. Nanchi wakokelenga kya kuba kalubeko ne bintu bya ku mupashi bya baana banji nyi? Wavuluka amba: “Natanganga Baibolo ne mabuku alumbulula Baibolo na mukoyo ne kwesekesha kwingijisha byonatanganga. Nasendanga baana bami ku kupwila ne mu mwingilo wa ku nzubo ne nzubo kimye kyonse. Bi ka byafuminemo? Baana bami bonse batanu babatizwa.” Kwingilako mwingilo pakatampe kwakonsha kwimukwasha ne anweba kukomesha baana benu ‘sa mwibafunjisha ne kwibajimuna monka mwaswila aye Nkambo.’—Efisesa 6:4.

14. (a) Bakyanyike bakonsha kupa byepi Lesa lukumo pa sukulu? (b) Ki ka kyakonsha kukwasha bakyanyike kubula ‘kwiobila bumvu mambo awama’?

¹⁴ Anweba bakyanyike, umvwe mwikala mu kyalo mo baswisha kusapwila, nanchi mupa Lesa lukumo kupichila mu kusapwila pa sukulu nyi, inyi muleka moyo wa kuchina bantu kwimubwezha munyuma? (Byambo bya Mana 29:25) Kamonyi umo wa myaka ya kusemwa 13 mu Puerto Rico wanembele’mba: “Kechi nakyumvwapo kala bumvu kusapwila pa sukulu ne, mambo nayuka kuba namba buno bo bukine. Kimye kyonse mukalasi nsuntula kuboko kwami ne kwamba byo nafunda mu Baibolo. Inge twalupuka pangye, ngya mu laibulale ya sukulu na kutanga buku wa Ifipusho Abacaice Bepusha.”a Nanchi Yehoba wamupesha pa kwingila na ngovu nyi? Washimuna’mba: “Kimye kimo bakwetu bonfunda nabo banshikisha mepuzho kabiji ne ku ndomba buku.” Umvwe mwabwela panyuma mu luno lubaji, kampe mwafwainwa kuyuka ‘kyaswa muchima wa Lesa, akya kyawama, ne kyaitabilwa, ne kyalumbuluka’ kupichila mu kufunda na mukoyo lufunjisho lwa pa bunke. (Loma 12:2) Umvwe mwashiinwa’mba kyo mwafunda kyokya kine, kechi ‘mu keobila bumvu mambo awama ne.’—Loma 1:16.

‘Kibelo kya Mwingilo Kyashinkuka’

15, 16. Ñanyi “kibelo kikatampe ne kya kwingijilamo mingilo” bena Kilishitu bamo kyo batwelamo, kabiji mfweto ka yafumamo?

¹⁵ Mutumwa Paulo wanembele’mba “kibelo kikatampe ne kya kwingijilamo mingilo” kyanshinkukila. (1 Kolinda 16:9) Nanchi bwikalo bwenu bwakonsha kwimwitabizha kutwela pa kibelo kya kwingijilamo mwingilo nyi? Kya kumwenako, kwingila mwingilo wa bupainiya bwa kimye kyonse nangwa bwa kukwasha, kukebewa kwingila maawala 70 nangwa 50 pa ñondo mu mwingilo wa kusapwila. Kwambatu kine, bapainiya banemekwa bingi ku bakwabo bena Kilishitu na mambo a mwingilo wabo wa bukishinka. Pano bino, nangwa bengila maawala avula mu mwingilo kechi kibalengela kwiumvwa kwikala bakila balongo ne banyenga yabo ne. Mu kifulo kya kuba byobyo, bakomesha mulanguluko watundaikile Yesu wa kuba’mba: “Twi bakalume batu; twauba kyonkakya kyo twafwainwa kuba.”—Luka 17:10.

¹⁶ Bupainiya bukebewa kwikinjika, kwinengezha bulongo obe mwine, ne kukeba kwipana. Nangwa byonkabyo, mfweto ifumamo yabaya bingi. Nyenga umo painiya wakyanyike wa jizhina ja Tamika waambile’mba, “kuyuka bya kwamba bulongo Mambo a Lesa a bukine ke mfweto ikatampe bingi. Kabiji umvwe ubena kwingila bupainiya, wingijisha bingi Baibolo javula. Inge naya ku nzubo ne nzubo ndanguluka pa binembelo byafwainwa mwina nzubo uji yense.” (2 Timoti 2:15) Kabiji mukwabo nyenga painiya wa jizhina ja Mica waamba’mba: “Kumona bukine byo bupimpula bwikalo bwa bantu ke mfweto ikwabo ya kukumya bingi.” Wakyanyike mukwabo wa jizhina ja Matthew naye waambilepo byambo bimotu bya lusekelo lwikalapo “umvwe wamona muntu waiya mu bukine. Kafwako lusekelo lukwabo lwakonsha kupingizhiwapo pa lo luno ne.”

17. Mwina Kilishitu umo washinjile byepi ndangulukilo ya kumwena bintu mungi pa mambo a mwingilo wa bupainiya?

¹⁷ Nanchi mwakonsha kutwela mu mwingilo wa bupainiya nyi? Kampe mukeba kuba byobyo, pano mwiumvwa nobe kuba mwaingila ne. Nyenga wakyanyike wa jizhina ja Kenyatte waambile’mba, “Najinga na ndangulukilo ya kumwena bintu mungi pa mambo a mwingilo wa bupainiya, nalangulukanga namba kuba namwingila ne. Kechi nayukile bya kunengezha ntatwilo nangwa bya kwisamba mu Binembelo ne.” Pano bino bakulumpe mu kipwilo bamupele nyenga painiya wafikapo wa kwingila nanji. Kenyatte uvuluka’mba: “Kyawamine bingi kwingila nanji. Akino kyandengejile kukeba kwingila bupainiya.” Kampe ne anweba mwakonsha kukeba kwingila bupainiya umvwe bemutundaika ne kwimufunjisha.

18. Ñanyi mfweto yakonsha kwikala na boba batwela mu mwingilo wa bumishonale?

¹⁸ Bupainiya bwakonsha kushinkula kibelo kya mashuko akwabo a mwingilo. Kya kumwenako, bamulume ne mukazhi bamo bakonsha kuya na kufunda lufunjisho lwa bumishonale ne kwibatuma na kusapwila mu kyalo kingi. Bamishonale bafwainwa kupijilwa biji mu kyalo kyo bayako, kampe kufunda mulaka ungi, bisho bingi, ne kuja kajo kangi. Bino mfweto ijimo ilengela alwe lukatazho lonse kukepa. Mildred wabanda mu bumishonale wikala mu Mexico, waamba’mba: “Kechi ndangulukapo namba natayiletu kimye kyami pa kufukuulapo kwikala mishonale ne. Ke kintu kyo nalangulukangapo kimye kyo najingatu kashimbi.” Mfweto ka yo amwenamo? Waamba’mba: “Mu kyalo kyetu, pa kubatu’mba utane muntu wa kufunjisha Baibolo kyakatezhe bingi. Pano muno mu Mexico, pa kimyetu kitanshi kyonaile mu mwingilo wa mu bujimi nataine bantu bana ba kufunjisha mafunjisho a Baibolo!

19, 20. Mwingilo wa pa Betele, mwingilo wa kwingijila mu byalo bingi, ne Sukulu ya Lufunjisho lwa Mwingilo byaleta byepi mfweto ku bavula?

¹⁹ Kabiji mfweto ikatampe iya ne ku boba baji mu mwingilo wa pa Betele pa maofweshi a misampi a Bakamonyi ba kwa Yehoba. Sven mulongo wakyanyike ubena kwingijila mu Germany, waamba pa mwingilo wanji wa pa Betele amba: “Neumvwa kuba’mba mbena kwingila kintu kya buneme bwa myaka ne myaka. Nafwanyijilwe kwingijisha busendwe bwami ku kyalo. Pano bino inge kyajingatu nobe kubika mali mu banki iji pepi na kupona.” Kya kine kwingila mu kwitemenwa kwakubula malipilo kukebewa kwipana. Bino Sven waamba’mba: “Umvwe wakotoka ku mingilo, uyuka’mba byonse byo waingila jojo juba bya kwa Yehoba. Kabiji kino kikulengela kwikala na milanguluko ‘yakijishamo kuwama.’”

²⁰ Balongo bamo bengijila mu byalo bingi, kwingila buntungi bwa kutunga misampi mu byalo bingi. Bamulume ne mukazhi bamo baingijila mu byalo bitanu ne bisatu banembele’mba: “Balongo kuno bawama bingi. Kyaletele bingi bulanda pa kuya—mambo kino kyajinga kimye kya butanu na busatu michima yetu ‘po yaubile bulanda.’ Byo bwajingapo bwikalo bwawama bo twaikele!” Kabiji kuji ne Sukulu ya Lufunjisho lwa Mwingilo. Ipana lufunjisho lwa ku mupashi ku balongo bakatanda. Umo wapichilemo mu uno sukulu wanembele’mba: “Byambo bya kwamba kuba’mba nsanchile uno sukulu wawama byonkabye mfwabyo. Ñanyi jibumba jikwabo jakonsha kwingila bibye kupana lufunjisho?”

21. Ñanyi lukatazho lupitamo bena Kilishitu bonse mu mwingilo wabo kwi Lesa?

²¹ Kya kine bibelo byavula bya mwingilo byashikunka. Kwambatu kine, atweba bavula kechi twakonsha kwingijila pa Betele nangwa kwingijila mu byalo bingi ne. Yesu aye mwine wayukile’mba bena Kilishitu bakapanganga “bipangwa” mu bibelengelo byapusana pusana na mambo a kupusana kwa bwikalo. (Mateo 13:23) Byo tuji bena Kilishitu lukatazho lwetu ke lwa kwingijisha bulongo bwikalo bwetu—kwingila pakatampe mu mwingilo wa Yehoba kwesakana na bwikalo bwetu byo buji. Umvwe twauba byobyo, ko kuba’mba tubena kupa Yehoba lukumo, kabiji twafwainwa kuketekela kuba’mba kimutokela bingi ku muchima. Akilangulukai pe Ethel, nyenga wakikulumpe wajinga mu nzubo mo balamina bakote ne bilema. Wasapwilanga kimye kyonse ku boajinga nabo mu nzubo yanji ne kusapwilako pa lamya. Nangwa kya kuba uji mu misongo, wingila na muchima yense mu mwingilo wanji.—Mateo 22:37.

22. (a) Mu ñanyi mashinda akwabo mo twakonsha kupela Lesa lukumo?(b) Ñanyi kimye kyawamisha kibena kwitupembelela?

²² Vulukai kuba’mba, kusapwila ke jishinda jimotu mo tupela Yehoba lukumo. Umvwe ke twikale na byubilo byawama ne mwekanyikilo yawama kimye kyo tuji pa nkito, pa sukulu, ne pa nzubo, tulengela muchima wa Yehoba kusangalala. (Byambo bya Mana 27:11) Byambo bya Mana 28:20 byalaya kuba’mba: “Muntu wa kishinka ukamona bibusa byavula.” Onkao mambo, twafwainwa ‘kukusa nkunwa yavula’ mu mwingilo wetu kwi Lesa, sa tuyuka kuba’mba tukanowa bibusa byavula. (2 Kolinda 9:6) Kuba byobyo, kikekala jishuko jetu ja kwikala bomi pa kyokya kimye kyawamisha “bintu byonse bipema” po bikapanga Yehoba lukumo lwa mufwainwa!—Masalamo 150:6.

[Tubyambo twa mushi]

Mukivuluka Nyi?

• Bantu ba Lesa bengijila byepi Yehoba “mute ne bufuku”?

• Lukatazho ka ba mu kisaka kya bena Gadi lo batalañene nalo, kabiji kino kifunjishapo ka bena Kilishitu ba lelo jino?

• Nga mwingilo wa mu bujimi wingila byepi nobe luvimba ku bya kulukuka bya kwa Satana?

• Ñanyi ‘kibelo kyashinkuka’ bamo kyo batwelamo, kabiji mfweto ka yo bamwenamo?

[Bipikichala pa peja 31]

Bupainiya bwakonsha kushinkula kibelo kya mashuko akwabo a mwingilo, kuvwangako:

1. Mwingilo wa kwingijila mu byalo bingi

2. Mwingilo wa pa Betele

3. Mwingilo wa bumishonale