Mwakonsha Kumvwa Biji Mu Baibolo

MU Baibolo muji bukine bwanema bingi bwafuma kwi Lesa. Baibolo witubula nkebelo ya bumi, ene mambo bantu o bayanjila, ne byo bakekala kulutwe na lwendo. Witufunjisha byo twafwainwa kwikala ba lusekelo, bya kwikala na balunda, kabiji ne byo twafwainwa kuba na makatazho. Kyakilamo kunema, witufunjisha pe Mulenga wetu, Shetu wa mwiulu Yehoba. Umvwe twayuka bino byonse, twikala bingi ba lusekelo kabiji bwikalo bwetu buwama bingi.

Baibolo waamba’mba kuyuka Lesa kujitu pamo nobe kuja kajo. Yesu waambile’mba: “Muntu kechi akamwene bumi ku shinkwa yenka ne, poso ku byambo byonse bifuma mu kanwa ka Lesa.” (Mateo 4:4; Bahebelu 5:12-14) Byonkatu kajo kawama ko tuja pa juba pa juba byo ketulengela kwikala na bumi, ne kutanga Mambo a Lesa kimye kyonse kuketulengela kwikala na bumi bwa myaka buketupa Lesa.

Tumvwa bingi bulongo kuja kajo mambo Yehoba byo byo etulengele kabiji kyo kintu kyo tukeba. Pano bino kuji kintu kikwabo kyo twafwainwa kuba umvwe tukeba kwikala ba lusekelo. Yesu waambile’mba: ‘Bata muchima ku mupashi bo batokwa.’ (Mateo 5:3, NW) Twakonsha kwikala na lusekelo mambo a kuyuka mwatala Mambo a Lesa.

Bantu bamo balanguluka’mba kyashupa bingi kumvwa biji mu Baibolo. Kya kumwenako, mwakonsha kutemwa kwimubulako binembelo byaamba pa bisho bimo byabula kuyukanyikwa, nangwa byalumbululwa mu ñambilo ya kifwanyikizho. Kabiji kuji ne bungauzhi bwanembwa mu ñambilo ya kifwanyikizho, bo twakonsha kumvwatu inge twatanga binembelo bikwabo byaamba pa buno bonka bungauzhi. (Danyela 7:1-7; Lumwekesho 13:1, 2) Nangwa kiji bino, mwakonsha kumvwa biji mu Baibolo. Pano mwakonsha kusumininwa byepi amba mwakonsha kumvwa biji mu Baibolo?

Atweba Bonse Twakonsha Kumumvwa

Baibolo ke Mambo a Lesa. Mo mwanembwa bintu byo akeba Lesa amba tube. Nanchi Lesa wakonsha kwitupa buku ye twakonsha kukankalwa kumvwa nangwa wakonshatu kumvwa bantu bafunda kufika palepa nyi? Ine, Yehoba kuba wauba kino ne. Yesu Kilishitu waambile’mba: ‘Ñanyi mukwenu uji na mwana, uba, kana mwananji wamulomba shinkwa, wamupa jibwe? Nangwa walomba jisabi, wamupa muloolo? Nangwa walomba jike, wamupa kaminye? Kabiji umvwe anweba, byo muji babi, mwayuka kupana byawama ku baana benu, nanchi aye Shenu wa mwiulu kechi emukile kupana mupashi wazhila ku bamulomba nenyi?’ (Luka 11:11-13) Yukai kuba’mba mwakonsha kumvwa biji mu Baibolo. Pa kuba’mba mube bino kana mwa mulomba Lesa mu bukishinka. Ne banyike nabo bakonsha kumvwa mafunjisho atanshi a mu Baibolo!—2 Timoti 3:15.

Kikebewa kwibikako bingi pa kubatu’mba tumvwe biji mu Baibolo, pano bino mufuma byawama. Yesu byo asangwilwe, wamwekele ku baana banji ba bwanga babiji ne kwibabula bungauzhi bwa mu Baibolo. Jishimikila ja kwa Luka jaamba’mba: “Kutatwila kwi Mosesa ne ku bangauzhi ba Lesa bonse, aye wibalumbulwijilenga mu binembelo byonse bintu bya aye mwine.” Ki ka kyafuminemo? Abwa bonka bufuku, baana ba bwanga byo bakilangulukilenga pa byo bafunjile, batendekele kwambañana bene na bene amba: “Michima yetu ke ibatemenga bulongo munda byo ajikwisambanga ne atweba pa jishinda, ne byo ajikwitulumbulwilanga binembelo nenyi?” (Luka 24:13-32) Bukine bo bafunjile bwibaletejile bingi lusekelo mambo baikele na luketekelo lwakosa mu milaye ya Lesa ne kwibapa luketekelo lwa kine lwa kimye kya kulutwe.

Mambo a Lesa kechi aji nobe kisendwa ne, umvwe twiayuka etuletela bingi lusekelo ne kwitukwasha byonkatu byo tumvwa inge tubena kuja kajo kapita mu kyaji. Mwafwainwa kuba byepi pa kuba’mba mwiayuke? Mutwe walondelapo waamba pa byo mwakonsha kwikala na lusekelo umvwe mwaikala na ‘maana a kumuyuka Lesa.’—Byambo bya Mana 2:1-5.

[PictureCaption on page 4]

Byonka biji nsemi wa butemwe, Yehoba naye witukwasha na mupashi wazhila kuba’mba tumvwe biji mu Baibolo