BUTALA BWA MABUKU BWA PA INTANETI
Kyamba kya Usopa
BUTALA BWA PA INTANETI
Kikaonde
Pa kukebela
  • Bisopelo
  • BAIBOLO
  • MABUKU
  • KUPWILA
  • w07 9/1 pp. 18-22
  • Twakonsha Kumwenamo Byawama Umvwe Twachinchika Mu Buyanji

Vidyo ufwamo.

Yakana kushinkuka.

  • Twakonsha Kumwenamo Byawama Umvwe Twachinchika Mu Buyanji
  • Kyamba kya Usopa—2007
  • Tumitwe tucheche
  • Byambo Bipashako
  • Buyanji byo Bwatendekele
  • Yehoba ye Yenkatu uji na Lūsa lwa Kulama
  • Buyanji Bwakonsha Kuleta Mfweto
  • Lusekelo lwa Boba Baji na Luketekelo lwa Kwikala Panopantanda
  • Yehoba Ukafwetañana
  • Lutekenesho Kubabena Kumanama
    Kyamba kya Usopa—2003
  • Bukumotu Makatazho
    Bukumotu Makatazho Onse Akapwe!
  • Mambo ka Lesa o Aswishisha Buyanji?
    Nanchi Baibolo Kine Ufunjishaˈmba Ka?
  • Mambo ka Bubi ne Buyanji o Byaikelako?
    Mukekala Myaka ne Myaka!—Fundainga Baibolo
Monai Bikwabo
Kyamba kya Usopa—2007
w07 9/1 pp. 18-22

Twakonsha Kumwenamo Byawama Umvwe Twachinchika Mu Buyanji

“Twibatela namba batokwa abo [bachinchikilenga, NW].”—YAKOBA 5:11.

1, 2. Ki ka kimwesha kuba’mba Yehoba kechi wakebelenga bantu kuyandanga ne?

MUNTU ulangulukatu bulongo kechi ukeba kuyanda ne, nangwatu ye Mulenga wetu, Yehoba Lesa, kechi ukeba bantu kuyandanga ne. Twakonsha kwitaba kino umvwe twapalanguzha byaamba Byambo byanji byanembeshiwa na mupashi ne kumona byaubiwe kimye kyo alengele mwanamulume ne mwanamukazhi. Patanshi, Lesa walengele mwanamulume. ‘Yehoba Lesa wabumbile muntu na lukungu lwa panshi, kabiji wapuyile ne muya wa bumi mu myona yanji, byonkabyo ne muntu waalukile ke mumi.’ (Ntendekelo 2:7) Adama wajinga muntu walumbuluka mubiji ne milanguluko, kabiji kechi wafwainwe kubela nangwa kufwa ne.

2 Nga bwikalo bwa kwa Adama bwajinga byepi? “Yehoba Lesa wajimine bujimi bwa bichi ku musela, mu Edena, mo mo amubikile muntu ye abumbile. Kabiji mu mushiji Yehoba Lesa wameneshemo bichi byonse byawama pa kwibitala, ne byawama kujako.” (Ntendekelo 2:8, 9) Ee, Adama wajinga na muzhi wawamisha. Kechi mwajinga buyanji mu Edena ne.

3. Ñanyi mashuko akonsheshe kwikala na bamulume ne mukazhi batanshi?

3 Ntendekelo 2:18 witubula kuba’mba: “Yehoba Lesa waambile’mba: Kechi kyawama muntu kwikala bunke ne; nkamulengela nkwasho wamufwainwa.” Kepo Yehoba amulengejile Adama nkwasho walumbuluka kuba’mba bekale bwikalo bwalumbuluka. (Ntendekelo 2:21-23) Baibolo watwajijila kwitubula’mba: “Lesa wibapesheshe ne kwibambila’mba: Semainga ne kusemununa, muvule ne kukumbana ponse pa ntanda ne kwiikokesha.” (Ntendekelo 1:28) Bamulume ne mukazhi batanshi bakonsheshe kwikala na jishuko ja kubaisha Bujimi bwa Edena kufikatu ne kimye ntanda yonse po yakonsheshe kwikala ke paladisa. Kabiji inge basemenenga baana bawama, bafwainwe kubula kupita mu buyanji. Ino ntendekelo byo yawaminepo!—Ntendekelo 1:31.

Buyanji byo Bwatendekele

4. Kwesakana na mwapita bwikalo bwa bantu, ñanyi bintu byapitamo bantu?

4 Pano inge twauba amba tumone mwapita bwikalo bwa bantu, tutana kuba’mba kuji kintu kyalengejile kuba’mba bintu biye munsunya. Bubi bubena kubiwa, kabiji ne bantu babena kumanama bingi. Myaka yavula yapitapo, baana bonse ba kwa Adama ne Evwa babena kukolwa, kukota ne kufwatu. Ino ntanda ijitu kwalepesha pa kuba’mba ikale ke paladisa mwayula bantu balusekelo. Ino ntanda byo iji, yalondololwa bingi bulongo mu Loma 8:22 amba: “Bilengwa byonsetu bibenakubinza ne kumvwa misongo pamotu ne buji lelo.”

5. Nga bansemi betu batanshi baletele byepi buyanji ku bantu bonse?

5 Kechi twafwainwa kupamo Yehoba mambo pa buyanji bukatampe bwatendekele kala myaka nobe kajo ne. (2 Samwela 22:31) Lubaji lumo lwa mambo lwakonsha kupewamo bantu. “Babipisha, bauba bubi bwa malwa.” (Salamo 14:1) Bansemi betu batanshi bebapele bintu byonse byafwainwa kutendekelapo bwikalo bwawama. Kintu kyakebewengatu pa kuba’mba buno bwikalo bwawama butwajijile ke kukokela Lesa, pano bino ba Adama ne Evwa basajilepo kubula kukokela Yehoba. Onkao mambo, bansemi betu batanshi byo bamukaine Yehoba, bulumbuluke bwabo bwapwile. Bumi bwabo bwailengatu na kutaminako kufikila ne kimye kyo bafwile. Ne atweba twaswana bumbulwakoloka.—Ntendekelo 3:17-19; Loma 5:12.

6. Satana walengejile byepi kuba’mba buyanji butendeke?

6 Mukwabo walengejile’mba buyanji butendeke ke kilengwa kya mupashi kyaishile kwikala ke Satana Diabola. Kino kilengwa bekipele lūsa lwa kwifuukwila bintu. Nangwa byonkabyo, kyaingijishe kutama lūsa lwa kwifuukwila na mambo a kukebatu’mba bekipopwelenga. Pano bino, Yehoba ye yenkatu wafwainwa kutotwa, kechi bilengwa byanji ne. Satana ye wajimbaikile ba Adama ne Evwa kuba’mba baleke kulondela Yehoba, uba nobe ne kya kine bakonsheshe ‘kwikala pamo nobe Lesa mwine ne kuyuka byawama ne byatama.’—Ntendekelo 3:5.

Yehoba ye Yenkatu uji na Lūsa lwa Kulama

7. Bintu byatama byafumamo na mambo a kusatukila Yehoba bimwesha ka?

7 Bintu byatama byafumamo na mambo a kusatuka bimwesha’mba Yehoba Nkambo walengele bintu byonse, ye yenkatu uji na lūsa lwa kulama, kabiji bukalama bwanji bo bonkatu bwaoloka. Biumbi na biumbi bya myaka yapitapo bimwesha kuba’mba Satana, awo waishile kwikala ke “mfumu wa panopantanda” waleta bukalama bwabipa, bwabula koloka, bwashinta kabiji kechi bwawamapotu nangwa pachuchu ne. (Yoano 12:31) Bukalama bwa bantu bwabula mutende bwatendekele kala kene kabiji buji mu maboko a kwa Satana nabo bumwesha kuba’mba bantu bafwayo ngovu ya kulama mu bololoke. (Yelemiya 10:23) Onkao mambo, bukalama buji bonse bwaketekelamo bantu kafwako kyo bwakonsha kuba ne, kanatu bwa kwa Yehoba kwapwa. Kino kishinka kyayukanyikwa kwesakana na mwapita bwikalo bwa bantu.

8. Yehoba uji na ñanyi nkebelo kutazha ku bukalama bonse bwa bantu, kabiji ukafikizha byepi ino nkebelo yanji?

8 Yehoba byo aswisha bantu kuba’mba beseke kwilama abo bene pa myaka yavula kwakubula ku mulondela aye, kyamwekeshatu patoka kuba’mba ukafumyapo bukalama bwa uno mutundu panopantanda ne kwibupingizhapo na kafulumende wanji aye mwine. Bungauzhi bwaamba kutazha ku bino byambo bwatendeka bino amba: “Mu moba a boba bamfumu [bukalama bwa bantu] aye Lesa wa mwiulu ukaleta bufumu [kafulumende wanji wa mwiulu uji mu maboko a kwa Kilishitu] bo bakabula konauna. . . . Kabiji bukalalaula buno bufumu bonse ne kwibupwishatu shata! Pakuba abo bukekala myaka ne myaka.” (Danyela 2:44) Bukalama bwa Bandemona ne bwa bantu bukapwa, pakuba Bufumu bwa mwiulu bwa Lesa bo bonkatu bukekalako ne kulama ino ntanda. Kilishitu ye ukekala Mfumu, kabiji ukalamanga pamo na ba 144,000 bantu bakishinka bo bakuula kufuma panopantanda.—Lumwekesho 14:1.

Buyanji Bwakonsha Kuleta Mfweto

9, 10. Nga Yesu wamwenejilemo byepi mu buyanji bo apichilemo?

9 Kyanema bingi kubalaulabalaula bikebewa ku boba bakalama mu Bufumu bwa mwiulu. Patanshi, Yesu mwine wamwesheshe byo afikizhe bikebewa pa mwingilo wanji wa kwikala Mfumu. Waikele na Yehoba pa myaka ya kukankalwa kubala nakubatu kyaswa muchima wa Shanji, saka aji pamo nobe “sendwe mwine.” (Byambo bya Mana 8:22-31) Kimye Yehoba kyo amunengezhejile kuba’mba eye panopantanda, Yesu waswile. Byo ajinga panopantanda wateletu maana kusapwila bantu pa Bukata bwa Yehoba ne pa Bufumu bwanji. Yesu washile kya kumwenako kyawama bingi kwi atweba bonse kupichila mu kukokela bobwa bumfumu.—Mateo 4:17; 6:9.

10 Yesu wapichile bingi mu lumanamo, kabiji kyapeleleko ba mwipayile. Kimye kya mwingilo wanji, wamwene kuba’mba bwikalo bwa bantu bonse bwatamine bingi. Abya kwajingapo mfweto iji yonse pa bintu byo amwene ne buyanji bo apichilemo aye mwine nyi? Ee. Bahebelu 5:8 baamba’mba: “Byonkabyo nangwa waji Mwana [Lesa], wafunjile lukokelo ku byonkabya bintu byo amanamine.” Bintu byapichilemo Yesu kimye kyo akijinga panopantanda bya mulengejile kumvwina bantu lusa. Yesu mwine wimwenejile bwikalo bwa bantu byo buji. Wakonsha ne kumvwina lusa boba babena kuyanda kabiji bakonsha ne kumusanchila pa mwingilo wanji wa kwiya na kwibapulusha. Akimonai bishinka byaambilepo mutumwa Paulo mu buku wa Bahebelu amba: “Kyamufwainwe aye apashañane ne balongo banji mu byonse, akekale ke ñanga mukatampe wa lusa ne wa kishinka mu bintu bya kwa Lesa, akafuchile mambo a bantu. Mambo byo amanamine mwine pa kwesekwa, aye wakonsha kwibakwasha baesekwa.” “Tuji na ñanga mukatampe wabula kukonsha kumvwa kunekena kwetu ne; kana umo waesekelwe monse monse pamo ne atweba, byonkabyo wabujilwe bundengamambo. Onkao mambo nanchi tufwenye kwipi kasa tuchinchika konka ku jitanda ja bupe, tutambule lusa, ne kumona bupe bwa kwitukwasha mu kimye kyakupelelwa kwetu.”—Bahebelu 2:17, 18; 4:14-16; Mateo 9:36; 11:28-30.

11. Aba bakekala bamfumu ne bañanga kulutwe na lwendo byo baikelepo panopantanda kikebalengela kwikala bakalama ba mutundu ka?

11 Kintutu kimo kyakonsha ne kwambiwa ku ba 144,000 “bakujilwe” panopantanda kuba’mba ba kalame ne Yesu Kilishitu mu Bufumu bwa mwiulu. (Lumwekesho 14:4) Bonse bajinga bantu basemekejilwe panopantanda, ne kukoma bakomejile pano ponka pa ntanda paji buyanji, kabiji ne abo bapichilemo mu buyanji. Bavula bebamanyikilenga, kabiji bakwabo bebepayiletu na mambo a kulama bukishinka bwabo ne Yehoba kabiji ne kukeba kulondela mwapichile Yesu. Bino kechi ‘bekubijile bumvu kushimuna ko bashimwine Nkambo yetu ne, bino bamanamine mu mambo awama.’ (2 Timoti 1:8) Byo baikelepo panopantanda kibalengela kwikala bafwainwa kuchibila bantu mambo abo. Bafunda bya kubila bantu lusa kabiji baji ne na kizaku kya kukeba kwibakwasha.—Lumwekesho 5:10; 14:2-5; 20:6.

Lusekelo lwa Boba Baji na Luketekelo lwa Kwikala Panopantanda

12, 13. Aba baji na luketekelo lwa kwikala panopantanda bakonsha kumwenamo byepi mu lumanamo?

12 Nanchi buyanji bo tubena kupitamo lelo jino bwakonsha kuleta mfweto iji yonse ku boba baji na luketekelo lwa kwikala myaka ne myaka mu paladisa panopantanda mukabula bikola, bulanda ne lufu nyi? Bulanda ne misongo iya na mambo a buyanji kechi ke bintu bikebewa ne. Pano bino umvwe twachinchika buyanji bwa uno mutundu, byubilo byetu byawama byakonsha kuwaminako kabiji ne butemwe bwakonsha buvujilako.

13 Akimonai Byambo bya Lesa byanembeshiwa na mupashi byo byaamba’mba: “Nangwa mumaname na mambo a bololoke, mwatokwa.” “Umvwe bemunena bya mwenga na mambo a jizhina ja Kilishitu, mwatokwa.” (1 Petelo 3:14; 4:14) “Kabiji anweba mwi batokwa umvwe bantu bemwambila mwenga, ne kwimupata, ne kwimubepela mu misango yonse ya bubi, na mambo a amiwa. Sekelai, ne kusangalala: mambo mfweto yenu ikatampe mwiulu.” (Mateo 5:11, 12) “Watokwa awa muntu watekanya [wachinchika] mu lweseko; mambo pa kulumbuluka ne kwitabilwa, ukatambula munchinya wa bumi.”—Yakoba 1:12.

14. Mu ñanyi jishinda buyanji mo bwakonsha kulengela bapopweshi ba Yehoba kwikala balusekelo?

14 Buyanji bo tubena kupitamo kechi bo bwakonsha kwitulengela kwikala ba lusekelo ne. Bino lusekelo ne kwikushiwa biya kupichila mu kuyuka kuba’mba tubena kumanama na mambo a kuba kyaswa muchima wa Yehoba ne kulondela kya kumwenako kitushijile Yesu. Kya kumwenako, mu myaka kitota kitanshi, batumwa bamo bebatayile pa kazhima ne kwibaleta ku meso a kije kikatampe kya Bayudea ne kwibanena bibi na mambo a kusapwila pe Yesu Kilishitu. Kabiji bebapumine ne kwibalekako. Pano baubilepo byepi? Jishimikila ja mu Baibolo jatwajijila’mba “bafumine mu kije sa basekela mambo a kutongolwa’mba, bo bafwainwa kwijimwena bumvu aja Jizhina.” (Byubilo 5:17-41) Kechi basekejilemo pa byo bebapumine ne kukola kwa bipumo ne. Bino kusekela kwabo kwaishile na mambo a kuyuka’mba kino kyaubiwe mambo basungile bukishinka bwabo kwi Yehoba ne kulonda mu ngayo ya kwa Yesu.—Byubilo 16:25; 2 Kolinda 12:10; 1 Petelo 4:13.

15. Umvwe twachinchika mu lumanamo luji lonse lelo jino tumwenamo ka kulutwe na lwendo?

15 Umvwe twachinchika mu bya malwa na muchima wawama, twikala bakosa. Kabiji kino kitukwasha ne kuchinchika ku makatazho o twakonsha kupitamo kulutwe na lwendo. Tutanga kuba’mba: “Balongo bami, byo muponena mu bya lweseko bya misango ne misango, kasa mulanguluka’mba, byonse byo bya lusekelo; byo mwayuka’mba kwesekwa kwa lwitabilo lwenu ko kulenga [kuchinchika, NW].” (Yakoba 1:2, 3) Popamotu, ne Loma 5:3-5 witubula kuba’mba: “Tusekele ne mu bya malwa byetu: kasa twayuka namba, malwa aleta [kuchinchika; kuchinchika, NW] nako kuleta bulumbuluke; bulumbuluke nabo buleta luketekelo: ne luketekelo kechi luleta bumvu ne.” Umvwe twibikishako kuchinchika meseko o tubena kupitamo na mambo a mwingilo wetu wa bwina Kilishitu, popo tukekala bakosa ne kuchinchika meseko akeya kulutwe na lwendo mu buno bwikalo bubi.

Yehoba Ukafwetañana

16. Yehoba ukafweta byepi bamfumu ne bañanga bakalamanga kulutwe na lwendo pa buyanji bo bapichilemo?

16 Nangwa kya kuba’mba tubena kukajilwa bintu bya ku mubiji na mambo a meseko o tubena kupitamo pa kwenda mu jishinda ja bwina Kilishitu, tuji na luketekelo pa kuyuka kuba’mba Yehoba uketupa kilambu kitufwainwa. Kya kumwenako, ku bamo bajinga na luketekelo lwa kuya mwiulu, mutumwa Paulo wanembele’mba: “Anweba . . . mwasangalele pa kwimupukula bintu byenu, byo mwayukile’mba, atwe bene tuji na bunonshi bwakila mu kuwama ne bwa myaka” bwa kulama mu Bufumu bwa Lesa. (Bahebelu 10:34) Akifwanyikizhai lusekelo lo bakekala nalo kimye kyo bakebatangijilanga kwi Yehoba ne Kilishitu mu kwingijila pamo mwingilo wa kupesha bangikazhi bakekala mu ntanda ipya. Byambo byanembele mutumwa Paulo ku bena Kilishitu bakishinka byo bya kine, mambo byaamba’mba: “Nalanguluka namba, bya kumanama bya kino kimye kya pano, kechi kyafwainwa kwibyesakanya na lukumo lukamweshiwa mwi atweba ne.”—Loma 8:18.

17. Nanchi Yehoba ukobila ka boba baji na luketekelo lwa kwikala panopantanda babena ku mwingijila mu bukishinka lelo jino?

17 Popamotu, ne boba baji na luketekelo lwa kwikala panopantanda kikale bakonsha kwela bintu byabo byonse nangwa kwibisankilapotu na mambo a kukeba kwingijila Yehoba, aye ukebapa bilambu byavujisha kulutwe na lwendo. Ukebapa bumi bwalumbuluka, bwa myaka ne myaka mu paladisa panopantanda. Mu yoya ntanda ipya, Yehoba “ukashimuna mipolo yonse ku meso abo; ne lufu kechi lukekalako jibiji ne; nangwa mabingo, nangwa kujila, nangwa misongo, kechi bikekalako jibiji ne.” (Lumwekesho 21:4) Uno mulaye byo awamapo! Kafwako kintu kiji kyonse kyo twakonsha kwela mu kwikebela nangwa mu kubula kwikebela mu ino ntanda na mambo a jizhina ja Yehoba kyakonsha kwesakena pamo na bumi bwawama buji kulutwe, bo akapana ku bakalume banji bakishinka babena kuchinchika mu bimye bya buyanji ne.

18. Ñanyi mulaye walutekenesho witulaya Yehoba utanwa mu Byambo byanji?

18 Buyanji buji bonse bo twakonsha kuchinchika kechi bukalengela twabula kwiyowa bumi bwa myaka ne myaka mu ntanda ipya ya Lesa ne. Buno bonse buyanji bukapingizhiwapo na bwikalo bwawamisha mu ntanda ipya. Isaya 65:17, 18 witubula kuba’mba: “Bintu bya kala kechi bakebivuluka ne, kechi bikeya mu michima yabo jibiji ne. Pakuba pano sekelai ne kusangalala kikupu na mambo a byobya bintu byo nsaka kulenga.” Onkao mambo, kyamufwanyijilwe nkasanji Yesu aye Yakoba kwamba bino amba: ‘Twibatela namba batokwa abo batekenyenga nangwa’mba bachinchikilenga.’ (Yakoba 5:11) Ee, umvwe twachinchika mu bukishinka buyanji bo tubena kupitamo luno, twakonsha kumwenamo lelo jino ne mu kimye kya kulutwe.

Musakukumbula’mba Ka?

• Nanchi bantu batendekele byepi kuyanda?

• Buyanji bwakonsha kuleta ñanyi mfweto ku boba bakalamanga panopantanda kulutwe na lwendo ne bangikazhi babo?

• Mambo ka o twakonsha kwikela balusekelo lelo jino nangwa kya kuba tubena kuyanda?

[Kipikichala pa peja 18]

Bansemi betu batanshi bajinga na bwikalo bwawama bo bafwainwe kwiyowa kulutwe na lwendo

[Kipikichala pa peja 20]

Yesu byo amwenenga makatazho apichilengamo bantu kyamukwashishe kwikala Mfumu ne Ñanga Mukatampe wawama

[Kipikichala pa peja 22]

Batumwa ‘basekejile mambo a kutongolwa’mba, bo bafwainwa kwijimwena bumvu aja jizhina na mambo a lwitabilo lwabo’

    Mabuku a mu Kikaonde (1992-2025)
    Shinkai
    Shinkulai
    • Kikaonde
    • Tuminaiko Bakwenu
    • Byo Mukeba
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Settings
    • JW.ORG
    • Shinkulai
    Tuminaiko Bakwenu