Tubenga Kyaswa Muchima Wa Lesa Lelo Jino

“[Kilishitu] wibafwijile bonse, amba, bekala na bumi kechi bakikale na kwiitokesha michima yabo abo bene ne.”—2 KOLINDA 5:15.

1. Lumbululai byaingijile mishonale umo mu mwingilo wanji.

“MISHONALE umo wa jizhina ja Alona uvuluka amba motoka wetu ye wajinga mutanshi wabujile wa nkondo kutwela mwine munkonkoso mu mizhi ya mu Africa kimyetu kyapwile nkondo.a Kitushupile bingi pa kuba’mba tuyuke byaingijilenga kipwilo kicheche mu yewa muzhi, kabiji twajinga na mwingilo wa kukebela balongo bintu bya ku mubiji. Kununga pa kwibakebela kajo, bivwalo, ne mabuku alumbulula Baibolo, twaletele vidyo wa Jehovah’s Witnesses—The Organization Behind the Name.b Bantu bavula bakebelenga kufunda bukine bashonkenejile ku nzubo ko twanengezhezhe kutambila vidyo, kabiji twiitambishe bimye bibiji. Bantu bavula batendekele kufunda Baibolo panyumatu ya kutamba ino vidyo bimye bibiji. Kyamwekeshetu patoka kuba’mba kwibikako kwetu kwalengejile mwafuma byawama.”

2. (a) Mambo ka bena Kilishitu kyo basajilapo kwingijila Lesa mu bwikalo bwabo bonse? (b) Mepuzho ka o twaya twisambepo?

² Mambo ka Alona ne bakwabo kyo bepaine kutatula uno mwingilo wakosa? Na mambo a lusanchilo lwa kitapisho kya bukuzhi bwa kwa Yesu Kilishitu, bepana kwingijila Lesa mu bumi bwabo bonse kabiji bakeba ne kwibwingijisha kwesakana na mwayila nkebelo ya Lesa. Byonka byaubile Alona ne bakwabo, bena Kilishitu bonse bepana kechi bafuukulapo “kwiitokesha michima yabo abo bene ne,” bino bafuukulapo kwingila papelela ngovu yabo “na mambo a mambo awama.” (2 Kolinda 5:15; 1 Kolinda 9:23) Bayuka kuba’mba umvwe ino ntanda yapwa, mali onse ne kutumbalala mu ino ntanda bikekalatu ke byatu. Onkao mambo, byo baji na bumi ne butuntulu bwa mubiji, babena kukeba kwibingijisha mwayila nkebelo ya Lesa. (Musapwishi 12:1) Twakonsha kuba byepi bino? Kwepi ko twakonsha kutana bukose ne ngovu ikebewa pa kuba’mba tube bino? Kabiji ñanyi mashuko a mu mwingilo ashinkulwa kwi atweba?

Bintu Byakonsha Kwitukwasha Kuyilangako Palutwe

3. Ñanyi bintu bitanshi byanema byavwangiwamo mu kuba kyaswa muchima wa Lesa?

³ Ku bena Kilishitu ba kine, kuba kyaswa muchima wa Lesa ke mwingilo ye bafwainwa kwingila mu bwikalo bwabo bonse. Uno mwingilo utatula na bintu bitanshi byanema nabiji kunembesha mu Sukulu wa Mwingilo wa Lesa, kutanga Baibolo pa juba pa juba, kuyanga mu mwingilo wa busapwishi, ne kuyilako palutwe kufikatu ne ku lubatizhilo. Byo tubena kuyilako palutwe, tuvuluka byambo byaambile mutumwa Paulo amba: “Kasa ubisha bino bintu; wikale monka mwi abyo; amba, kuya palutwe kobe kumweke ku bonse.” (1 Timoti 4:15) Kuyilako palutwe kwa uno mutundu kechi kwa kwilundumika muntu mwine ne, pano bino kimweshatu kuba’mba twafwainwa kuba kyaswa muchima wa Lesa mu kwitemenwa. Kutatula kwingila uno mwingilo kumwesha amba twaswisha Lesa kwitutangijila mu bintu byonse bya mu bwikalo bwetu, kabiji aye witutangijila bulongo kukila byo twafwainwa kuba atweba bene.—Salamo 32:8.

4. Twakonsha kuchinuzhuka byepi moyo wabula kufwainwa?

⁴ Pano bino, kukankazhama nangwa kuchina kufuukulapo kwakonsha kwitulengela kubula kuyilako palutwe mu kwingijila Lesa. (Musapwishi 11:4) Onkao mambo, saka tukyangye kutana lusekelo lwa kine mu kwingijila Lesa ne bantu, patanshi twafwainwa kupwisha moyo wetu. Kya kumwenako, Erik walangulukilengapo kuya na kwingijila ku kipwilo kwaambiwanga mulaka ungi. Pano bino waakaminwe ne kutatula kwiipuzha amba: ‘Kana bakantambulwila nyi? Kana nkebatemwa balongo nyi? Balongo nabo kana bakantemwa nyi?’ Watwajijila kushimikizha amba: “Kyapeleleko navulukile kuba’mba nafwainwa kulangulukanga javula pa balongo kukila pe amiwa mwine. Nalekele kulanguluka pa bino bintu, ne kutatu muchima pa byo nakonsha kwingila na bakwetu. Nalombele bukwasho kwi Yehoba ne kutwajijila na mutanchi wami. Lelo jino mbena kwiyowa bingi mu mwingilo wami.” (Loma 4:20) Ee, umvwe ke twingijile Lesa na ngovu yetu yonse ne kukwasha bantu mu kwitemenwa, po po tukekala na lusekelo.

5. Mambo ka kunengezha bulongo kyo kukebewa pa kuba’mba twingijile Lesa? Ambaipo kya kumwenako.

⁵ Pa kuba’mba tube bikeba Lesa kikebewa kwinengezha bulongo mu mbaji yonse. Tuchina kwikala na nkongole yavula mambo yakonsha kwitunonka buzha ne kwitulengela kubula kwingila bulongo mwingilo wa Lesa. Baibolo wituvululamo amba: “Ukongola ye muzha wa yewa umukongwesha.” (Byambo bya Mana 22:7) Kuketekela mwi Yehoba ne kutangizhako bintu bya ku mupashi kwitukwasha kuba bintu mu jishinda jafwainwa. Kya kumwenako, Guoming ne banyenga yanji babiji bekala ne bainabo mu mpunzha muji mazubo auba mutengo kusonkela kabiji ne nkito yalumbuluka yakatazha bingi kutana. Kupichila mu kwingijisha bulongo mali, kabiji ne kutanchika bintu byafwainwa kupota muntu umo umo kwibalengela kwikala na bintu byonse bikebewa mu bwikalo nangwa kya kuba amba kechi bonse bengila ne. Guoming waambile amba: “Kimye kimo, atweba bonse kechi twikala na mali ne. Nangwa byonkabyo, twatwajijila mu kwingila mwingilo wa bupainiya kabiji twibalama bingi bulongo bamama. Tubena kusanchila bingi bamama pa kubula kwitukanya kwingilako mwingilo wa bupainiya ne mingilotu ikwabo ya pa kipwilo pa kuba’mba twi bakebelenga bintu bya ku mubiji.”—2 Kolinda 12:14; Bahebelu 13:5.

6. Kya kumwenako ka kimwesha byo twafwainwa kwalula bwikalo bwetu pa kuba’mba bwesakane na mwayila nkebelo ya Lesa?

⁶ Umvwe mwatwezhamo ne mutwe mu bya kukebakeba mali nangwa mu kuba bintu bikwabo, pa kuba amba mutangizheko nkebelo ya Lesa pakebewa lupimpu lwabaya bingi. Lupimpu lwa uno mutundu kechi lwakonsha kubiwatu ponkapo ne, kabiji inge kimushupa kupimpula, kange mupwishe mu muchima amba mwakankalwa ne. Akimonai byajinga Koichi, watayanga kimye kyabaya mu bya kisangajimbwe. Koichi wafundanga Baibolo byo akijinga mwanyike, pano bino pa myaka yavula, wanonkelwe buzha na makayo a pa vidyo. Juba jimo, Koichi watendekele kwiipuzha mwine amba: Ki ka kyo naubapo? Pano kanji mu ma 30 kafwapo nangwa kimo kyawama kyo naubapo mu bwikalo bwami ne! Koichi watendekele kufunda Baibolo jibiji ne kuswa waswile bukwasho kufuma ku kipwilo. Nangwa kya kuba wapimpwilenga byubilo byanji pachepache, kechi wikilekele ne. Na mambo a kulombesha ne ku mutundaika ku bakwabo, kijikila kyanji kyapwile. (Luka 11:9) Lelo jino Koichi ke nkwasho mu kipwilo.

Yukai bya Kwingila Papelela Ngovu Yenu

7. Mambo ka o twafwainwa kwingijishanga bulongo ngovu yetu pa kwingila mwingilo wa Lesa?

⁷ Pa kuba amba tube bikeba Lesa twafwainwa kwibikako na ngovu yetu yonse. Kechi twafwainwa kukankazhama nangwa kwingila uno mwingilo na jizelele ne. (Bahebelu 6:11, 12) Nangwa byonkabyo, Yehoba kechi ukeba amba twingilenga uno mwingilo kya kuba twafumyako ne kalulu kuvimba meso ne. Kuyuka amba kechi twakonsha kupwisha mwingilo wa Lesa na ngovu yetu yonka ne, kumupa lukumo kabiji kimwesha amba twingila kwesakana na papelela ngovu yetu. (1 Petelo 4:11) Yehoba witulaya kwitupa ngovu yafwainwa pa kuba’mba tube kyaswa muchima wanji, pano bino kechi twafwainwa kukilayila pa kipimo ne, nangwa kweseka kuba bintu byo amona amba kuba twauba ne. (2 Kolinda 4:7) Pa kuba’mba tutwajijile kwingijila Lesa kwa kubula kukoka, twafwainwa kwingijisha ngovu yetu bulongo.

8. Ki ka kyamwekejile mwina Kilishitu wa kyanyike umo byo aesekele kwingila na ngovu pa nkito ne kwingijila Yehoba, kabiji lupimpu ka lo aubile?

⁸ Kya kumwenako, Ji Hye wikala ku East Asia waingilanga nkito yamusendelanga kimye kyabaya bingi akwe saka engila ne mwingilo wa bupainiya. Mwine walondolwele amba; “Nebikileko bingi aku na kwingijila Yehoba bulongo, aku nako na kwingila nkito ya ku mubiji, pano bino nalaalangatu bufuku maawala atanu. Mu kuya kwa moba, lusekelo lwa bintu bya ku mupashi lwapwile.” Pa kuba amba engijile Yehoba ‘na muchima, mweo, maana, ne na bulume bwanji bonse,’ Ji Hye wasajile nkito yabulanga kumusendela kimye kyanji kyonse. (Mako 12:30) Uno nyenga watwajijila kwamba amba: “Nangwa kya kuba kisemi kyami kyakebelenga amba ngikale na mali avula, nafuukwilepo kutangizhako kyaswa muchima wa Lesa. Pano bino ne luno nkifola mali afwainwatu kupotamo bintu bikebewa pa nzubo, nabiji bivwalo byalumbuluka. Byo kyawamapo kuba’mba ndala kimye kyabaya na kukokoloka! Mbena kutana bingi lusekelo mu mwingilo wa busapwishi, kabiji luno nakoselako bingi ku mupashi. Kyalengela bino ke na mambo a kuba’mba kechi nata maana ku bya kutabataba bya ino ntanda ne.”—Musapwishi 4:6; Mateo 6:24, 28-30.

9. Kwibikako kwetu kwakonsha kukwasha byepi bantu mu bujimi?

⁹ Kechi muntu yense wakonsha kwikala musapwishi wa Lesa wa kimye kyonse ne. Umvwe mu bena kukatazhiwa na mambo a bukote, kubelabela, nangwa makatazhotu akwabo, yukai kuba’mba Yehoba wimusanchila bingi pa bukishinka bwenu ne mingilo iji yonse yo mwingila kufuma panshi ya muchima wenu. (Luka 21:2, 3) Onkao mambo, atweba bonse kechi twafwainwa kulengulula byakonsha kufumamo mu kwibikako kwetu pa kwingijila Yehoba ne, nangwa kya kuba twingila pacheche, bantu bakonsha kumwenamo. Kya kumwenako, twakonsha kuya pa mazubo amo ne kutana kuba’mba kafwako nangwa umo wamwesheshe lusekelo mu mambo awama ne. Umvwe twafumapo, bene ba nzubo bakonsha ke bambe pa byo twibafwakesha pa bimye nangwa moba avula, nangwa kya kuba kafwako witutambulwijile ne. Kechi tuketekela amba muntu uji yense wakonsha kutambwila mambo awama ne, bino bamo bakonsha kwiatambwila. (Mateo 13:19-23) Bamo bakonsha kwiatambwila mambo awama kulutwe na lwendo inge bintu mu ntanda nangwa mu bwikalo bwabo byapimpulwa. Monse mo kyakonsha kwikela, inge ke twingile kwesakana na papelela ngovu yetu, ko kuba’mba tubena kwingila mwingilo wa Lesa. “Atweba twi ba mu mwingilo umo ne Lesa.”—1 Kolinda 3:9.

10. Mashuko ka ashinkulwa ku bonse mu kipwilo?

¹⁰ Kabiji kunungapotu, atweba bonse twakonsha kukwasha bisemi byetu, balongo ne banyenga yetu ba mu kipwilo kya bwina Kilishitu. (Ngalatiya 6:10) Byubilo byetu byawama byakonsha kukwasha bakwetu kimye kyonse. (Musapwishi 11:1, 6) Umvwe bakulumpe ne bankwasho ke bengile bulongo, bakonsha kukwasha kipwilo kukosa ku mupashi, kabiji mingilo ya bwina Kilishitu yakonsha kuyilako palutwe. Tuji na luketekelo lwa kuba’mba umvwe ‘kasa tukelwa kwingijisha mwingilo wa Nkambo,’ twayuka’mba, ‘mwingilo wetu kechi ye watu ne.’—1 Kolinda 15:58.

Ibikilai Kikonkwanyi kya Kuba Kyaswa Muchima wa Lesa

11. Kununga pa kwingijila pa kipwilo kyetu, twakonsha kwikala na ñanyi mashuko akwabo?

¹¹ Atweba bena Kilishitu, twatemwa bingi bumi, kabiji tukeba kunemeka Lesa mu byonse byo tuba. (1 Kolinda 10:31) Umvwe ke tusapwile mambo awama a Bufumu mu bukishinka ne kufunjisha bantu kulondela bintu byonse byakambizhe Yesu, tukatana mashinda awama kwingijilamo Lesa akonsha kwituletela lusekelo. (Mateo 24:14; 28:19, 20) Kununga pa kwingijila pa kipwilo kyetu, twakonsha kwikala na mashuko a kuya na kwingijila ku mapunzha kuji kukajilwa kukatampe kwa basapwishi, kikale mu nyaunda ikwabo, ko bamba mulaka ungi, nangwa ku kyalo kingi. Bakulumpe ne bankwasho mu kipwilo bafikapo bakyangye kutwela mu masongola bakonsha kwibeta na kutanwako ku Sukulu ya Lufunjisho lwa Mwingilo, panyuma ya bino bakonsha kwibatuma na kwingijila ku bipwilo kuji kukajilwa kwa bena Kilishitu bafikapo, kikale mu kyalo kyabo nangwa ku kyalo kingi. Bamulume ne mukazhi baji mu mwingilo wa kimye kyonse bafikapo bakonsha kwibeta ku sukulu wa Gileada wa bamishonale ne kwibatuma na kwingijila mu byalo bingi. Kabiji bamwingilo ba kwitemenwa bakwingila mingilo yapusana pusana bakikebewa pa Betele ne mu mwingilo wa kushimika ne kuwamisha mapunzha a kupwilapo ne maofweshi a misampi.

12, 13. (a) Mwakonsha kusala byepi mbaji ya mwingilo yo mubena kukeba kwingilako? (b) Lumbululai busendwe bwafunjiwa ku mwingilo umo byo bwakonsha kwingila ku mingilo ikwabo.

¹² Mbaji ka ya mwingilo yo mwakonsha kukeba kwingilako? Byo muji bakalume bepana kwi Yehoba, kimye kyonse muketekelai aye pamo ne jibumba janji kwimutangijila. ‘Mupashi wanji wawama’ ukemukwasha kufuukula bulongo. (Nehemiya 9:20) Mwingilo umo wakonsha kwitufunjisha bya kwingila mwingilo mukwabo, kabiji inge twapilwa ne kuyuka bya kwingila mwingilo umo, kino kyakonsha kwitukwasha umvwe twapewa mwingilo mukwabo kulutwe na lwendo.

¹³ Kya kumwenako, Dennis ne mwina kwanji Jenny baingilangako kimye kyonse mwingilo wa kushimika Mazubo a Bufumu. Kinkunkwila byo kyatujile ne konauna bintu ku kabeta ka ku bulenge bwa United States, bepaine kuya na kukwasha boba baponejile mu lukatazho. Dennis washimuna amba: “Kwingijisha busendwe bo twafunjile mu mwingilo wa kushimika Mazubo a Bufumu mu kukwasha balongo betu kwituletela bingi lusekelo. Lusanchilo lumwesha boba bo twakwashapo kala lwitufika bingi pa muchima. Mabumba akwabo ashala ashimukulwilekotu mazubo acheche. Bakamonyi ba kwa Yehoba bawamishisheko nangwa kushimukulula mazubo kukilaila pa 5,300 ne Mazubo a Bufumu avula bingi. Bantu bamweneko ku ino mingilo, luno batendeka kumwesha lusekelo lwa kufunda mambo awama.”

14. Mwakonsha kuba byepi umvwe mu bena kukeba kutendeka mwingilo wa kimye kyonse?

¹⁴ Nanchi mwakonsha kuba bikeba Lesa kupichila mu kusala mwingilo wa kimye kyonse kwikala kikonkwanyi kyenu nyi? Umvwe ibyo, ketekelai kutambulwila mapesho avula. Inge bwikalo bwenu kechi bwimuswisha kuba bino ne, kampe mwakonsha kupimpulako mu mbaji imo. Lombai byonka byalombele Nehemiya kimye kyo akebelenga kutatula kwingila mwingilo wanema, amba: “Anweba Nkambo nemusashijila namba: . . . mungubile byawama amiwa kalume wenu.” (Nehemiya 1:11) Apa bino, muketekele mwi aye “umvwa milombelo” ne kubila monka mo mwalombela. (Salamo 65:2) Pa kuba’mba Yehoba emupeshe pa kwibikako kwenu kwa kukeba ku mwingijila na muchima wenu yense, mwafwainwa patanshi kubila monka mwayila bintu byo mubena kulombapo. Umvwe mwafuukulapo kutendeka mwingilo wa kimye kyonse, ubai byonka byo mwafuukulapo. Mu kuya kwa moba, mukayukilako byavula, kabiji ne lusekelo lwenu lukavujilako.

Bwikalo Bwalumbuluka

15. (a) Tumwenamo byepi kupichila mu kwisamba ne mu kutanga mashimikila aamba pa bakalume ba Yehoba baingila pa myaka yavula? (b) Ambaipo jishimikila jimo ja mu bwikalo jo mwamona kuba amba jimutundaika.

¹⁵ Bintu ka byo mwafwainwa kutengela umvwe mu bena kuba bintu bikeba Lesa? Isambai na bakalume ba Yehoba babanda, kikatakata aba baingila mu mwingilo wa kimye kyonse pa myaka yavula. Bwikalo bwabo bwalumbuluka bingi! (Byambo bya Mana 10:22) Bakemubula amba Yehoba kechi wakankalwa kwibakwasha nangwatu mu bimye bya makatazho ne. Wibakwasha kutana bintu byo bakajilwa ne bintutu bikwabo. (Filipai 4:11-13) Kufuma mu 1955 kufika ne mu 1961, mu Kyamba kya Usopa mwanembelwe mitwe yalondankana yaambilenga pa mashimikila a bakalume bakishinka ajinga na mutwe wa kuba’mba: “Kukeba Bintu Byanema mu Bwikalo Bwami.” Kufumatu kyokya kimye, mashimikila akwabo a mu bwikalo avula anembwa. Ano mashimikila a mu bwikalo etutundaika kwikala na kizaku ne lusekelo byonka biji jishimikila jitanwa mu buku wa Byubilo bya Batumwa. Kutanga mashimikila aleta lumwengemwenge byonkabye akemulengela kwamba amba: ‘Bwikalo bwa uno mutundu bo bo nkeba kwikala!’

16. Ki ka kilengela bwikalo bwa mwina Kilishitu kulumbuluka ne kwikala bwa lusekelo?

¹⁶ Alona waji kwambiwapo kuntendekelo uvuluka’mba: “Mu Africa, mo mo nataine bakyanyike basusuchilenga mu kyalo kyabo na kukeba bintu byanema mu bwikalo. Bavula bakankelwe kutana nkebelo ya kine mu bwikalo. Pano bino, atweba twaubilenga kyaswa muchima wa Lesa kupichila mu kutwala mambo awama a Bufumu palutwe, kabiji twiyowele kwingila uno mwingilo wawama nangwa kya kuba twapichilenga mu makatazho. Atweba bene twimwena na meso etu ano amba lusekelo lo bamona aba bapana lwakila lo bamona aba batambula.”—Byubilo 20:35.

17. Mambo ka o twafwainwa kubilanga kyaswa muchima wa Lesa lelo jino?

¹⁷ Nga anweba kiji byepi? Ñanyi bintu byanema byo mukeba kuba mu bwikalo bwenu? Umvwe kechi mwibikila kikonkwanyi kya ku mupashi kyalumbuluka ne, bintu bikwabo bya kukebakeba bikemusendela kimye ne ngovu yenu yonse pamo. Nga mambo ka a kwingijisha bibi bumi bwenu bwanema pa bintu bibena kutundaika ntanda ya kwa Satana? Katatakatu aa “malwa akatampe” umvwe afika, bintu bya bunonshi ne bifulo bya panopantanda bikekala ke byatutu. Kintu kyanematu ke bulunda bwetu na Yehoba. Tukekalapo bingi balusekelo pa byo twaingijila Lesa ne bakwetu bantu ne kuba amba twauba kyaswa muchima wanji kwesakana na papelela ngovu mu bwikalo bwetu bonse.—Mateo 24:21; Lumwekesho 7:14, 15.

[Tubyambo twa mushi]

Mwakonsha Kulumbulula Nyi?

• Yehoba wiumvwa byepi pa mwingilo ye tumwingijila?

• Kwingijisha bintu byo twafunda bulongo kwakonsha kwitukwasha byepi kwingijila Lesa ne bantu?

• Ñanyi mashuko a mwingilo ashinkulwa kwi atweba?

• Twakonsha kwikala byepi bwikalo bwalumbuluka lelo jino?

[Bipikichala pa peja 25]

Kwesakanya kukebewa pa kuba’mba twingijilenga Yehoba na muchima yense

[Bipikichala pa peja 26]

Kuji mashinda avula bingi a kwingijilamo Lesa