Kupokololwa Mu Tukose Twa Wa Busonso

‘[Yehoba] mwine ukakupokolola ku kakose ka wa busonso.’—SALAMO 91:3.

1. “Wa busonso” ye ñanyi, kabiji mambo ka kyo ashinchila?

BENA Kilishitu bakine bonse babena kutalañana na mulwanyi wajimuka kukila maana abo kabiji wa bujimbijimbi. Pa Salamo 91:3 bamutela amba “wa busonso.” Nanchi uno mulwanyi ye ñanyi? Kufumatu kimye kyanembelwe Kyamba kya Usopa kya June 1, 1883 uno magazini wamutongola amba Satana Diabola. Uno mulwanyi wa bulume mu bujimuku ongola bantu ba Yehoba ne kwibalula mu kakose kanji byonkatu wa busonso byo alula kañonyi mu kakose.

2. Mambo ka Satana kyo bamupashañenya ku wa busonso?

² Kala kene, tuñonyi betukwatanga na mambo a kwimba bulongo, mayona awamisha, kubelela, kabiji ne kwitulambula. Nangwa byonkabyo, tuñonyi ke tubilengwa twajimukila jimo, kabiji twakatazha bingi kukwata. Onkao mambo, mu kimye kya kala kene muntu wa busonso patanshi wa kifundanga byubilo ne misango ya tuñonyi to akeba kukwata. Panyuma ya bino, wanengezhanga mashinda a bujimuku mwa kwitukwachila. Pa kupashañanya Satana ku wa busonso, Baibolo witukwasha kuyuka mashinda anji. Diabola ufunda byubilo bya muntu umo umo. Umona byubilo byetu kabiji uta ne tukose twafyamika na mulanguluko wa kukeba kwitwalula saka tukiji batuntulu. (2 Timoti 2:26) Kukwachiwa mu kakose ka kwa Satana kilumbulula konauna bulunda bwetu na Lesa kabiji kifumamo ke konaunwa kikupu. Onkao mambo, pa kuba’mba twizhikijile, twafwainwa kuyuka mashinda onse a “wa busonso.”

3, 4. Kimye ka mashinda a bujimuku a kwa Satana kyo epasha na a bokwe, kabiji ne a kipiji?

³ Byo aingijishe bintu bimwekana, nyimbi wa masalamo naye wapashañenye mashinda a bujimuku a kwa Satana ku oa a bokwe ne kipiji. (Salamo 91:13) Byonka byuba bokwe, Satana jimo jimo ufikenatu kulukukañana luntunanwa kupichila mu kuleta lukabisho nangwa kwingijisha kafulumende mu kumanyika bantu ba Yehoba. (Salamo 94:20) Kumanyikañana kwatama kwa uno mutundu kwakonsha kulengela bamo kusatukila Yehoba. Nangwa byonkabyo, javula kifumamo mu kuno kulukukañana kwa luntunanwa kukwatankanyatu bantu ba Lesa. Nga Satana ulukukañana byepi nobe kipiji?

⁴ Diabola wingijisha maana anji akila a bantu mu kwibongola ne kwibatapa byonka bisumañana mulolo uji na bulembe bwashinta uji pafyamika. Mu jino jishinda, Satana ubena kukonsha kongola milanguluko ya bantu bamo ba Lesa, ne kwibajimbaika kuba kyaswa muchima wanji mu kifulo kya kuba amba bobenga kyaswa muchima wa Yehoba, kabiji ne bifumamo byakatazha. Pano tuji bingi na lusekelo, mambo kechi twaluba bya bujimuku bwa kwa Satana ne. (2 Kolinda 2:11) Pano twayai twisambe pa tukose tuna twashinta twingijisha uno “wa busonso.”

Moyo wa Kuchina Bantu

5. Mambo ka kakose ka “moyo wa kuchina bantu” kyo kengijila bulongo?

⁵ “Wa busonso” wayuka amba bantu baji na kisemwa kya kumvwina ne kuswisha byuba bakwabo. Bena Kilishitu kechi bakosa michima mu kulengulula milanguluko ne biumvwa bantu bo bekala nabo kinkalankulo ne. Diabola byo ayuka bino, ukeba konauna muchima wabo wawama wa kukwasha bantu. Kya kumwenako, aye ongola bantu ba Lesa bamo kupichila mu kwingijisha kakose ka “moyo wa kuchina bantu.” (Byambo bya Mana 29:25) Na mambo a moyo wa kuchina bantu, umvwe bakalume ba Lesa bevwanga pamo na bakwabo mukuba bintu byabula kuswisha Yehoba nangwa baleka kuba byakambizha Mambo a Lesa, ko kuba’mba bakwachiwa mu kakose ka “wa busonso.”—Ezikyo 33:8; Yakoba 4:17.

6. Kya kumwenako ka kimwesha wa kyanyike byo akonsha kukwachiwa ku “wa busonso”?

⁶ Kya kumwenako, nsongwalume bakonsha kumongola ku bakwabo mo bafunjila ne kupepa wa pepako fwanka. Kampe kupepa fwanka kyo kintu kyo abujile nangwa kulangulukapo kimye kyo ayile ku sukulu pa jojo juba. Nangwa byonkabyo, utatula kuba kintu kyakonsha kutamisha butuntulu bwa mubiji wanji ne kufichisha Lesa ku muchima. (2 Kolinda 7:1) Wajimbaikilwe byepi? Kampe wakailenga na bakwabo babula kufwainwa ne kuchina amba bakamuseka. Anweba bakyanyike, kange muswishe “wa busonso” kwimujimbaika ne kufwa mu kakose kanji ne! Pa kuba amba muchinuzhuke kukwatwa, kechi mwafwainwa kuswa kuba tubintu nangwatu tucheche ne! Umvwinai lujimuno lwa mu Baibolo lwa kubula kwendañana na babi.—1 Kolinda 15:33.

7. Satana wakonsha kulengela byepi bansemi bamo kuleka kwingila bulongo ku mupashi?

⁷ Bansemi ba bwina Kilishitu batako bingi muchima ku mwingilo wabo wa mu Binembelo wa kumwena kisemi bintu bya ku mubiji. (1 Timoti 5:8) Nangwa byonkabyo, Satana ukeba amba bena Kilishitu batengatu muchima na kukebela bisemi byabo bintu bya ku mubiji. Bena Kilishitu bamo baji na kisela kya kushala ku kupwila mambo a kumvwina bakulumpe babo ba mingilo amba bengilenga maawala avujilako. Kampe bakonsha kukankalwa kutambulako moba a kukokoloka pa kuba amba bakakonshe kutanwako ku bipungu byonse bya kupwila kwa nkambi ne kupopwela Yehoba pamo na balongo babo. Pa kuba amba tuzhikijilwe ku kano kakose, twafwainwa ‘kuketekela mwi Yehoba.’ (Byambo bya Mana 3:5, 6) Kunungapo, twafwainwa kuvulukanga amba bonse twi ba mu kisemi kya kwa Yehoba kabiji mwine wipana kwitulama kabiji uketukwasha kutwajijila kwingila bulongo. Anweba bansemi, abya muji na luketekelo lwa kuba amba Yehoba ukemulama mu jishinda jiji jonse ne bisemi byenu umvwe ke mube kyaswa muchima wanji nyi? Inyi Diabola ukemukwata ne kwimulengela kuba kyaswa muchima wanji na mambo a moyo wa kuchina bantu? Twimutundaika namba lombai ne kulangulukishapo pa ano mepuzho.

Kitewa kya Bintu bya ku Mubiji

8. Mu ñanyi jishinda Satana mo ongwela bantu na bintu bya ku mubiji?

⁸ Kabiji Satana witongola kupichila mu kwingijisha bintu bya ku mubiji. Busulu bwa ano moba javula bubena kutundaika mashinda mwa kunonkela bukiji bukiji ao akonsha ne kongola bantu ba Lesa bamo. Kimye kimo, muntu bakonsha kumutundaika amba: “Wingilenga na ngovu. Inge waikala na mali avula, po po ukengilangatu pacheche ne kwiyowa bumi. Kyo kimye kyo ukengilako mwingilo wa bupainiya.” Byambo bya uno mutundu byo byakonsha kuba ke bilanguluke bamo mu kipwilo batemwa kutundaika balongo ne banyenga ba mu kipwilo kya bwina Kilishitu kuta muchima ku mali. Akilangulukaipotu bulongo pa luno lutundaiko. Nanchi ino kechi yo ndangulukilo imwesha byalangulukilenga yewa “kilubi” wa mu kishimpi kya kwa Yesu nenyi?—Luka 12:16-21.

9. Mambo ka bena Kilishitu bamo o bakonsha kusendulwa na mambo a kukumbwa bintu?

⁹ Satana ubena kwingijisha ino ntanda yanji ibi mu kulengela bantu kwikala na lunkumbwa lwa bintu. Lunkumbwa pa kutwela lutendeka kulenga misabilo mu bwikalo bwa mwina Kilishitu, ne kwipaya mambo, kya kuba aaluka ke a “kubula kupanga.” (Mako 4:19) Baibolo witutundaika kusekela mu kajo ne bivwalo byonka byo tuji nabyo. (1 Timoti 6:8) Nangwa byonkabyo, bavula bakwachiwa ku “wa busonso” mambo kechi bengijisha luno lujimuno ne. Inyi kana bwitote bo bwibalengela kwiumvwa amba bakonshatu kulondelapo bwikalo bumo? Nga atweba pa muntu pa muntu tulangulukapo amba ka? Nanchi muchima wa kukeba kwikala na bintu witulengela kumona mpopwelo yetu ya kine nobe kintu kyabula kunema nyi? (Hagai 1:2-8) Kya bulandatu ke kya kuba’mba, na mambo a makatazho mu bwikalo, bamo basankilapo bumupashi bwabo pa kuba amba batwajijile kwikala byonka byo baikalanga kala. Kutemwa bintu bya ku mubiji mu jino jishinda kutokesha “wa busonso” ku muchima!

Kitewa kya Bintu bya Kisangajimbwe Byatama

10. Ñanyi kwipesapesa mwina Kilishitu uji yense ko afwainwa kuba?

¹⁰ Jishinda jikwabo ja bujimuku jingijisha “wa busonso” ke kukokesha maana a kisemwa a bantu a kuyuka byawama ne byatama. Byubilo bipashako na byobya byajinga mu muzhi wa Sodoma ne Gomola byo bibakumbanemo mu tumpanyi tunengezha bintu bya kisangajimbwe. Nangwatu masawakya a byambo bya pa TV ne mu magazini ambapo pa bya bukapondo ne kwilaala kwatama. Bintu byavula bimwekanyika nobe bya kisangajimbwe pa mwela byonauna maana a bantu “a kupima ne kuyuka byawama ne byatama.” (Bahebelu 5:14) Nangwa byonkabyo, akivulukai byambo byaambile Yehoba kupichila mwi ngauzhi Isaya amba: “Mambo abo, aba batela kyatama amba kyawama, ne kyawama amba kyatama!” (Isaya 5:20) Abya “wa busonso” waalulula milanguluko yenu na bino bintu bya kisangajimbwe byabula kufwainwa nyi? Kyanema bingi kwipesapesa anweba bene.—2 Kolinda 13:5.

11. Ino magazini yapaine ñanyi lujimuno kutazha ku kutamba mafilimu a pa TV?

¹¹ Pepi nobe myaka 25 yapitapo, Kyamba kya Usopa kyapaine lujimuno mu jishinda jawama ku bapopweshi ba Lesa kutazha ku mafilimu a pa TV.a Bino byambo byaambiwe kutazha ku bintu bifumamo mu kutamba mafilimu amo a pa TV amba: “Butemwe bumweshiwa pa TV bulengela kubula kuta maana ku byubilo bine bibena kubiwa. Kya kumwenako, filimu umo wamwesheshenga nsongwakazhi umo wajinga na jimi ja mu bukende waambijile mukwabo wa mukazhi amba: ‘Bino namufwalama bingi Victor. Kechi nakonsha kwakamwa ne . . . inge naikala na mwananji!’ Nyimbo yawama ya pa muchima ibena kujijila munshi yakonsha kulengela babena kutamba kukankalwa kuyuka amba byubilo bya uno nsongwakazhi byatama. Ne anweba mu bena kutamba musa kukatatula kukomoka Victor. Mukatendeka kubila lusa nsongwakazhi. Ne kuswisha byubilo byanji byatama. Umo watambilengako ino filimu maana byo aishilemo, waishile kwamba’mba: Wakonsha kukumya bingi pa kutana kuba’mba ubena kwitabizha bintu bibena kubiwa. Twayuka kuba’mba bino byubilo byatama. . . . Pano bino naishile kuvuluka’mba ne amiwa naumvwijile lusa boba bantu baubilenga byubilo byatama.”

12. Bishinka ka bibena kumwesha amba lujimuno lubena kupanwa ano moba kutazha ku kutamba TV lujitu bulongo?

¹² Kufumatu kimye kyanembelwe byobya bibaba, awe mutundu wa mafilimu ongola michima aubatu sabwalala. Mu mapunzha avula, mafilimu a uno mutundu beatambishatu kimye kyonse. Banabalume, banabakazhi, ne bakyanyike monka batambila bino bintu bya kisangajimbwe. Bino atweba kechi twafwainwa kwijimbaikanga na ndangulukilo yabula kufwainwa ne. Kyakonsha kutama bingi kutatula kulanguluka amba mafilimu abula kufwainwa ajitu bulongo kukila bubi bwine bubena kubiwa mu ntanda. Abya mwina Kilishitu wakonsha kwamba amba kijitu bulongo kumusangajika ku bantu bo abula nangwa kulangulukapo kwita amba bamufwakashishe ku nzubo yanji nyi?

13, 14. Bamo baambilepo amba ka pa byo bamwenejilemo mu lujimuno lwaambilenga pa bya kutamba TV?

¹³ Bavula bamwenejilemo bingi byo baumvwijile lujimuno lwapaine ‘kalume wa kishinka ne wa maana.’ (Mateo 24:45-47) Panyuma ya kutanga lujimuno lwa mu Baibolo lwaumvwanyikile, bamo banembejile ku banembi ba Kyamba kya Usopa pa byo beumvwine.b Mwanamukazhi umo wisolwele amba: “Natemenwe bingi kutamba mafilimu a pa TV pa myaka 13. Nalangulukile namba bumupashi bwami bukekalatu bulongo kikulutu mbena kutanwa ku kupwila kwa bwina Kilishitu ne kwingilako mwingilo wa mu bujimi jimo jimo. Pano bino naishile kwikala na byubilo byubiwapo mu mafilimu bya kuba amba umvwe mwata wobe upumañana nangwa kechi wa kutemwa ne, kyawama kuba bukende mambo mwine ye waleta kisonso. Kabiji byo namwene amba kijitu bulongo, naubile bukende ne kulenga mambo kwi Yehoba ne ku mwata wami.” Uno mwanamukazhi bamupangile mu kipwilo kya bwina Kilishitu. Mukuya kwa moba, maana byoaishilemo, walapijile ne kubwezhiwa mu kipwilo. Lujimuno lo atambwijile kufuma mu Kyamba kya Usopa kutazha ku mafilimu a pa TV lwamupele ngovu ya kukana ku musangajika ku bintu Yehoba byo ashikwa.—Amosi 5:14, 15.

¹⁴ Mukwabo naye byo atangile luno lujimuno lwa mufikile pa muchima waambile amba: “Najijile bingi byo natangile bibaba, mambo nataine kuba’mba kechi natele muchima kwi Yehoba ne. Nalayañene na Lesa amba kechi nkekala muzha jibiji ku mafilimu a pa TV ne.” Panyuma ya kumwesha lusanchilo ku bino bibaba, mwanamukazhi umo mwina Kilishitu wisolwele ne kunemba amba: “Nalangulukilepo bingi . . . namba kana bulunda bwami na Yehoba bwajingatu bulongo nyi, nangwa ne. Nakonsha kwisampa byepi bulunda na bantu ba mu mafilimu kabiji pa kimye kimo ne kwikala mulunda na Yehoba?” Umvwe mafilimu a pa TV ajimbaikile michima ya bantu pa myaka 25 yapitapo, nga luno kyakonsha kwikala byepi? (2 Timoti 3:13) Twafwainwa kujimuka ku bitewa byonse bya kwa Satana bya bintu bya kisangajimbwe byabula kufwainwa, kikale mafilimu a pa TV, mavidyo a bulwi, nangwa nyimbo ya pa vidyo yabula kufwainwa.

Kitewa kya Kwizhingijisha na Bakwetu

15. Bamo bakwachiwa byepi mu kakose ka kwa Diabola saka batalapo ne meso?

¹⁵ Satana wingijisha kitewa kya kwizhingijisha na bakwetu pa kuba amba alete misalululo mu bantu ba Yehoba. Twakonsha kukwachiwa mu jino jishinda nangwa kya kuba tuji na mashuko eikajila mu mwingilo wa Yehoba. Bamo bakwachiwatu saka batalapo ne meso kwi Diabola mambo baswisha kuzhingijilamo bakwabo ne kubwela kufumyako maana ku mutende ne kukwatankana kwa ku mupashi kubena kuyilako palutwe ko abikako Yehoba.—Salamo 133:1-3.

16. Satana ubena kweseka byepi mu bujimuku kuvulañanya mutende wetu?

¹⁶ Kimye kya Nkondo itanshi ya Ntanda yonse, Satana waesekele kulukuka jibumba ja kwa Yehoba ja panopantanda, pano bino wapulwijilemotu mabula. (Lumwekesho 11:7-13) Kufumatu lonkalwa, Satana wakitwajijila na kukebakeba mashinda mwakuvulañenya kukwatankana kwetu. Umvwe twaleka kumvwañana na bakwetu ne kuvulañanya kukwatankana kwetu, ko kuba’mba twashila “wa busonso” mpunzha. Twakonsha ne kulengela mupashi wazhila kubula kwitukwasha mu bwikalo bwetu kuvwangakotu ne mu kipwilo. Umvwe kino kyaubiwa, Satana wakonsha kumvwa bingi bulongo ku muchima mambo umvwe mu kipwilo mwabula mutende ne kubula kukwatankana, kyakonsha kubwezha panyuma mwingilo wa kusapwila.—Efisesa 4:27, 30-32.

17. Aba bezhingijisha na mukwabo bakonsha kuba byepi pa kuba amba bapwishe lukatazho?

¹⁷ Mwakonsha kuba byepi umvwe mwizhingijisha na mukwenu mwina Kilishitu? Kya kine kuba’mba, bintu bimwekana byaenda kupusana. pano nangwa kya kuba kuji bintu byavula bingi byakonsha kulengela makatazho, kechi mwafwainwa kubatu saka mwakizhingijishatu kwa kubula kupwisha lukatazho ne. (Mateo 5:23, 24; 18:15-17) Lujimuno lutanwa mu Mambo a Lesa lwanembeshiwa na mupashi, kabiji lwalumbuluka. Umvwe twaingijisha mafunde a mu Baibolo, akonsha kwitukwasha mambo kimye kyonse engila bulongo!

18. Mambo ka kulonda Yehoba kyo kwakonsha kwitukwashisha kupwisha makatazho umvwe twizhingijisha na bakwetu?

¹⁸ Yehoba ‘waswila jimo kulekela mambo’ kabiji upana ne “lulekelo lwa mambo.” (Salamo 86:5; 130:4) Tumwesha amba twi baana boatemwa Yehoba umvwe ke tumulonde. (Efisesa 5:1) Atweba bonse twi bandengamambo kabiji tukeba bingi Yehoba kwitulekelako mambo. Onkao mambo, twafwainwa kujimuka umvwe twamona amba twakankalwa kulekelako mambo mukwetu. Kwendapo twaikala nobe yewa muzha wa mu kishimpi kya kwa Yesu wakaine kulekelako mambo mukwabo muzha wajinga na nkongole yanji ichechetu kukila nkongole yo bamulekejileko aye kwi nkambo yanji. Nkambo yanji byo aumvwine bino, wataile yewa muzha wabujile kulekelako mukwabo mambo pa kazhima. Yesu wapezhezheko kishimpi kyanji na bino byambo amba: “Mo monka mo akemubila ne Tata wa mwiulu kana ne kwibalekela balongo benu mambo abo mu michima yenu ne.” (Mateo 18:21-35) Umvwe ketulanguluke languluke pa kino kishimpi ne pa bimye byavula Yehoba byo etulekelako mambo, biketukwasha kuchiba mambo umvwe twapusenamo na balongo betu!—Salamo 19:14.

Kuzhikijilwa Monka “Mwafyamika mwa kwa Mwine Wakila”

19, 20. Twafwainwa kumonanga byepi “mwafyamika” mwa Yehoba ne mu “kimfute” kyanji kimye kyo tubena kwikala mu ano moba akatazha?

¹⁹ Tubena kwikala mu bimye byakatazha. Satana wakonsheshe kwituvizhatu kala inge ne Yehoba kwituzhikijila mu butemwe ne. Onkao mambo, pa kuba’mba tuchinuzhuke kukwachiwa ku “wa busonso,” twafwainwa kutwajijila kwikalanga mu kya kufyamamo kya bukifwanyikizho, “mwafyamika mwa kwa Mwine Wakila,” ne kukeba ‘kwikalanga mu kimfute kya kwa aye Wa bulume bonse.’—Salamo 91:1.

²⁰ Twayai tumonenga milaye ne lutangijilo lwa Yehoba kwikala ke bya kufyamamo, kechi amba mashinda akatazha kulondela ne. Atweba bonse tubena kutalañana na mulwanyi witukila maana. Kwakubula bukwasho bwa Yehoba, kafwako muntu wakonsha kupuluka mu kakose kanji ne. (Salamo 124:7, 8) Onkao mambo, twayai tulombenga kwi Yehoba pa kuba’mba etupokolole mu tukose twa “wa busonso.”—Mateo 6:13.

[Tubyambo twa mushi]

Mubena Kukivuluka Nyi?

• Nanchi “Moyo wa kuchina bantu” waikela ka kitewa kyakatazha?

• Satana wingijisha byepi kitewa kya bintu bya ku mubiji?

• Satana wajimbaika byepi bantu bamo na kakose ka bintu bya kisangajimbwe byabula kufwainwa?

• Kakose ka Satana ko abena kwingijisha pa kuba amba avulañanye kukwatankana kuji pakachi ketu?

[Kipikichala pa peja 29]

Bamo bajimbaikwa na mambo a “moyo wa kuchina bantu”

[Kipikichala pa peja 30]

Nanchi musangajikwa kupichila mu bintu byashikwa Yehoba nyi?

[Kipikichala pa peja 31]

Mwakonsha kuba byepi umvwe mwizhingijisha na mukwenu mwina Kilishitu?