Kwikala Bantu ba kwa Yehoba ke Lusa Lukatampe

“Twi ba kwa Yehoba.”—LOMA 14:8, NW.

1, 2. (a) Jishuko ka jo tuji najo? (b) Mepuzho ka o tusakwisambapo?

MUKOKA wa bena Isalela bamupele jishuko janema bingi kwi Yehoba byo ebambijile amba: “Mukekala ke kya bunonshi bwami ami mwine kyapatulwa mu mikoka yonse.” (Lupu. 19:5) Lelo jino ba mu kipwilo kya bena Kilishitu nabo baji na jishuko ja kwikala bantu ba kwa Yehoba. (1 Pe. 2:9; Lum. 7:9, 14, 15) Ke jishuko jo twakonsha kumwenamo myaka ne myaka.

² Kununga pa jino jishuko, kwikala bantu ba kwa Yehoba nako ke mutembo. Bamo bakonsha kwipuzha amba: ‘Nanchi ngubanga bintu byo akeba Yehoba amba ngube nyi? Umvwe nalenga mambo, abya ukankana nyi? Nanchi kwikala muntu wa kwa Yehoba kukandengelanga kubula kukasuluka nyi?’ Kijitu bulongo kulanguluka pa bino bintu. Nangwa byonkabyo, kyawama patanshi kulangulukishapo pa bwipuzho bukwabo bwa kuba amba: Mfweto ka iji mu kwikala bantu ba kwa Yehoba?

Kwikala Bantu ba kwa Yehoba Kuleta Lusekelo

3. Kufuukulapo kwa kwa Lehaba kwa kwingijila Yehoba kwamulengejile byepi kumwenamo?

³ Nanchi bantu ba kwa Yehoba bamwenamo mu kwikala ku lubaji lwanji nyi? Akimonai byo kyajinga kwi Lehaba, pite waikalanga mu Yeliko kala. Kwa kubula nangwa kuzhinauka ne, bwikalo bo akomejilemo bwajinga bwa mpopwelo yatama ya kupopwela balesa babena Kenana. Pano bino byo aumvwine pa mambo a Yehoba byo alengejile bena Isalela kushinda makondo, wayukile kuba amba Yehoba ye Lesa wa kine. Onkao mambo, wabikile bumi bwanji mu kizumba kukeba kupulusha bakalume ba Lesa pa kuba’mba naye bakamubile lusa kulutwe na lwendo. Baibolo waamba amba: “Ne aye Lehaba, awa pite, kechi wabingishiwe mu mingilo, byo ebatambwile baluwe, ne kwibalupwila mu jishinda jingi, nenyi?” (Yako. 2:25) Akilangulukai pa mfweto yo atambwijile byo aikele lubaji lwa bantu ba Lesa bakishinka, bantu bobafunjishe na Mizhilo ya Lesa ya byubilo bya butemwe ne bololoke. Wajinga bingi wa lusekelo byo asankijilepo bwikalo bwanji bwakala. Bamusongwele ku mwina Isalela kabiji wakomeshe mwananji wa mulume wa jizhina ja Boaza awo waikele muntu wa Lesa wawama.—Yosh. 6:25; Luta 2:4-12; Mat. 1:5, 6.

4. Luta wamwenejilemo byepi mu kufuukulapo kwingijila Yehoba?

⁴ Luta wa ku Moabu naye wafuukwilepo kwingijila Yehoba. Byoajinga kamwale, naye wapopwelanga Kemoshi ne balesatu bakwabo ba ku Moabu, pakuba waishile kuyuka Lesa wa kine aye Yehoba kabiji wasongwelwe ku mwina Isalela waikelenga mu kyalo kyanji. (Tangai Luta 1:1-6.) Palutwe kacheche, Luta ne mufi nanji Olipa byo bayilenga ne inabovyala aye Naomi ku Betelema, Naomi wibasashijile bano banabakazhi bakyanyike babiji amba babwele ku balongo babo. Kechi kyakonsheshe kwibapelela kwikala mu Isalela ne. Olipa ‘wabwelele ku balongo banji ne ku balesa banji,’ bino Luta aye kechi wabwelele ne. Wamwesheshe lwitabilo kabiji wayukile muntu ye akebelenga kwikala nanji. Waambijile Naomi amba: “Kechi munkanjikizhe kwimuleka ne, nangwa kunkanya kuya nenu ne, mambo ko mukaya anweba, ne amiwa ko ko nkaya; kabiji akwa ko mukekala, ko konka ko nkekala ne amiwa; balongo benu bakekala ke balongo bami ne Lesa wenu ukekala ke Lesa wami.” (Luta 1:15, 16) Na mambo a kusalapo kwingijila Yehoba, Luta wamwenejilemo mu Mizhilo ya Lesa, ayo yaambile pa banabakazhi bafwilwa, bayanji, ne boba babujile mpunzha yabo pa kwikala. Na bukwasho bwa Yehoba, waikele wa lusekelo, wazhikijilwe ne kwikala mu mutende.

5. Mwafunjilako ka ku bantu bengijila Yehoba mu bukishinka?

⁵ Ne anweba kampe mwakonsha kuyukapo bantu bamo abo panyuma ya kwipana kwi Yehoba bamwingijila mu bukishinka pa myaka yavula. Bepuzhai byo bamwenamo mu kumwingijila. Nangwa kya kuba kafwako ubula kupita mu makatazho, kino kimwesha kishinka kya byambo byaambile nyimbi wa masalamo amba: “Bo bene ba lusekelo awa mutundu wa bantu baji ne Lesa wabo, Yehoba.”—Sala. 144:15.

Yehoba Wayuka byo Twafwainwa Kuba

6. Mambo ka o twafwainwa kubujila kwikala na moyo wa kuba bintu bikeba Yehoba amba tube?

⁶ Kampe mwazhinaukapo kala kuba amba kechi mwakonsha kuba bintu byo akeba Yehoba amba mube ne. Kyapela bingi muntu kwizhinauka kwikala kalume wa Lesa, kulondela mizhilo yanji ne kwamba mu jizhina janji. Kya kumwenako, Mosesa byo bamutumine na kwamba ku bena Isalela ne kwi mfumu wa bena Ijipita wamwene kuba’mba kechi wakonsheshe kwingila uno mwingilo ne. Pano bino Lesa wayukile byo akebelenga amba Mosesa obe. Yehoba ‘wamufunjishe bya kuba.’ (Tangai Kulupuka 3:11; 4:1, 10, 13-15.) Pano Mosesa byo atambwijile buno bukwasho, waikele wa lusekelo byo aubile kyaswa muchima wa Lesa. Po pamotu, Yehoba wayuka papelela bulume bwetu. Wayuka kuba’mba twibambulwa kulumbuluka kabiji ukeba kwitukwasha. (Sala. 103:14) Byo tulondela Yesu mu kwingijila Lesa, kwituletela bingi lusekelo, mambo kuba bino kulengela bantu kumwenamo ne kusangajika muchima wa Yehoba. Yesu waambile amba: “Iyai ko nji, ... ne amiwa nkemukokolosha. Tambulai kikonkoji kyami ne kufunda kwi amiwa; mambo amiwa ne kimote ne kukoka pa muchima.”—Mat. 11:28, 29.

7. Mambo ka o mwafwainwa kuketekela amba Yehoba ukemukwasha kuba byo akeba amba mube?

⁷ Yehoba uketutundaikanga kimye kyonse, umvwe twamuketekela kwitupa bulume. Kya kumwenako, Yelemiya kisemwa kyanji kechi kyajinga kya kwamba na jiwi jakosa ne. Na mambo a kino, Yehoba byo amutongwele kwikala ngauzhi wanji, Yelemiya waambile amba: “Mama, anweba Nkambo Yehoba! Talai, amiwa kechi nayuka kwamba ne, mambo nkijitu mwanyike.” Palutwe kacheche, waambile ne kuba’mba: ‘Kechi nkamba jibiji mu jizhina janji ne.’ (Yele. 1:6; 20:9) Pano bino, na lutundaiko lwa Yehoba, Yelemiya wasapwijile mambo awama abujilenga kukeba kumvwa bantu pa myaka 40. Yehoba watwajijile kumulaya amba: “Amiwa nji nobe mu kukupulusha ne mu kukupokolola.”—Yele. 1:8, 19; 15:20.

8. Tumwesha byepi amba twaketekela mwi Yehoba?

⁸ Byonkatu Yehoba byo akoseshe Mosesa ne Yelemiya, ne atweba wakonsha kwitukwasha kuba bintu byo akeba bena Kilishitu amba bobenga lelo jino. Kintu kyanema ke kuketekela mwi Lesa. Baibolo waamba amba: “Ketekela mwi Yehoba na muchima wobe yense, ne kuta muchima ku milangwe yobe obe mwine ne. Umuvulukenga konse konse ko uya ne aye ukakolwela mashinda obe.” (Mana. 3:5, 6) Tumwesha amba twaketekela mwi Yehoba umvwe twatambwila bukwasho bo apana mu Mambo anji ne kupichila mu kipwilo. Umvwe twaleka Yehoba kwitutangijila mu bwikalo bwetu, kafwako nangwa kimo kyakonsha kwitulengela kubula kwikala bakishinka kwi aye ne.

Yehoba Ukwasha Bantu Banji pa Muntu pa Muntu

9, 10. Luzhikijilo ka lwalayiwa luji mu Salamo 91?

⁹ Byo balanguluka pa kufuukulapo abo bene kwipana kwi Yehoba, bamo kampe balanguluka pa bizumba biji mu kulenga mambo, kulengululwa ne kwibakana kwi Yehoba. Kya lusekelo ke kya kuba’mba, Yehoba wituzhikijila bulongo pa kuba’mba tutwajijile kulamawizha bulunda bwetu bwawama ne aye. Twayai tumone kino byo kyalumbululwa mu Salamo 91.

¹⁰ Nyimbi wa masalamo watendeka amba: ‘Aye waikala mwafyamika mwa kwa Mwine Wakila, Ukekalanga mu kimfute kya kwa aye wa Bulume Bonse. Amiwa nkamutela Yehoba, namba, kyo kyami kya kufyamamo, yo nsakwa yami; Ye Lesa wami, mwi aye mo naketekela. Mambo aye ukakupokolola ku kakose ka wa busonso.’ (Sala. 91:1-3) Twamona kuba’mba Lesa walaya kuzhikijila boba bamutemwa ne kumuketekela. (Tangai Salamo 91:9, 14.) Luzhikijilo lwa mutundu ka lo aambilengapo? Yehoba wazhikijilanga bakalume banji bamo ku mubiji—kimye kimo na mambo a kukeba kulama ndonda ya kisemi mwaishile kusemekelwa Mesiasa walayilwe. Nangwa byonkabyo, banabalume bakwabo bakishinka bavula bebakashile, kwibamanyika ne kwibepaya na mambotu a kukeba amba babule kwikala bakishinka kwi Lesa. (Hebe. 11:34-39) Bachinchikile na mambo a kuba Yehoba wibazhikijilenga ku mupashi ku bintu byakonsheshe konauna bukishinka bwabo. Onkao mambo twakonsha kwamba amba mu Salamo 91 muji mulaye wa luzhikijilo lwa ku mupashi.

11. Kimfute kya kwa aye wa Bulume Bonse’ kyo ki ka, kabiji Lesa wikingijisha kuzhikijilamo bañanyi?

¹¹ ‘Kimfute kya kwa aye wa Bulume Bonse’ kyo atongola nyimbi wa masalamo ke mpunzha ya kifwanyikizho ya luzhikijilo lwa ku mupashi. Aba bo atambwila Lesa kwikala mu ino mpunzha yanji bazhikijilwa ku bintu biji byonse ne ku uji yense wakonsha kweseka konauna lwitabilo ne butemwe bwabo pe Lesa. (Sala. 15:1, 2; 121:5) Ino ke mpunzha ya bufyamfya, mambo bantu babula kwitabila kechi beiyuka ne. Kibena kulumbulula kuba’mba Yehoba uzhikijila bantu bamba’mba: ‘Yenu Lesa wami, mwi anweba mo naketekela.’ Umvwe twaikala mu ino mpunzha ya kufyamamo, kechi twafwainwa kwakamwa amba tukatalwa bibi kwi Lesa na mambo a kufwa mukakose ka “wa busonso” aye Satana ne.

12. Bintu ka byakonsha konauna bulunda bwetu ne Lesa?

¹² Bintu ka byakonsha konauna bulunda bwetu bwawama ne Lesa? Nyimbi wa masalamo watongwelepo bizumba bimo nabiji “mwalo wenda mu mfishi, ... [ne] lonaiko lonauna, juba sa jiji mwiulu.” (Sala. 91:5, 6) “Wa busonso” walengela bantu bavula kufwa mu kakose ka kusaka kwitolwela. (2 Ko. 11:3) Waongola bantu bavula kupichila mu kwikala na lwiso, bwitote ne kutemwisha bintu bya ku mubiji. Kabiji bavula wibongola kupichila mu kutemwa kyalo kyabo, ne kwibalengela kulanguluka’mba bilengwa bilengeletu abyo bine kabiji ne kwibongwela mu bupopweshi bwa bubela. (Kolo. 2:8) Kabiji bantu bavula bebongwela mu kakose ka kwilaala kwabula kufwainwa. Bino byubilo biji nobe mwalo wa ku mupashi byalengela bantu bavula kubula kutemwa Lesa.—Tangai Salamo 91:7-10; Mat. 24:12.

Byo Mwafwainwa Kulamawizha Butemwe Bwenu pe Lesa

13. Yehoba witukwasha byepi kushinda bizumba byakonsha konauna bumupashi bwetu?

¹³ Yehoba uzhikijila byepi bantu banji ku bino bizumba bya ku mupashi? Nyimbi wa masalamo waambile amba: “Aye ukakulayila bamalaika banji, amba Bakakulame mu mashinda obe onse.” (Sala. 91:11) Bamalaika ba mwiulu betutangijila ne kwituzhikijila pa kuba’mba tusapwile mambo awama. (Lum. 14:6) Kununga pa bamalaika, bakulumpe mu kipwilo betuzhikijila kupichila mu kwingijisha Binembelo pa kufunjisha kuchina amba twakajimbaikwa na ndangulukilo ya bubela. Bakonsha kukwasha muntu yense ubena kwibikako kushinda byubilo bya ino ntanda. (Titu. 1:9; 1 Pe. 5:2) ‘Kalume wakishinka kabiji wa maana’ naye upana kajo ka ku mupashi pa kuba’mba etuzhikijile ku mafunjisho a kuba’mba bilengwa bilengeletu abyo bine, milanguluko ya kusaka kuba bintu byatama, kusakisha bya bunonshi ne kutumbalala kabiji ne kwituzhikijilatu ku bintutu bikwabo byatama byakonsha kwitongola. (Mat. 24:45) Ki ka kimukwasha kuchinuzhuka bino bintu bimo byatama?

14. Twakonsha kumwenamo byepi mu luzhikijilo lupana Lesa?

¹⁴ Twafwainwa kuba ka pa kuba’mba twikale “mwafyamika” mwa kwa Lesa mwa luzhikijilo? Byonkatu byo tukelwa kwizhikijila ku bintu byatama bya ku mubiji nabiji mapuso, bambanzhi nangwa ku bikola bisambukilañana, byo byo twafwainwa ne kutwajijila kwizhikijila ku bintu byatama bya ku mupashi. Onkao mambo, kimye kyonse twafwainwa kumwenangamo mu lutangijilo Yehoba lo etunengezhezha kupichila mu mabuku alumbulula Baibolo, kupwila kwa kipwilo ne kupwila kukatampe. Tusaka kutangijilwa na bakulumpe mu kipwilo. Kabiji nanchi kechi tumwenamo mu byubilo bimwesha balongo ne banyenga yetu bena Kilishitu nenyi? Kwambatu kine, kupwanañana na kipwilo kwitulengela kwikala na maana.—Mana. 13:20; Tangai 1 Petelo 4:10.

15. Mambo ka o mwakonshesha kusumininwa kuba’mba Yehoba wakonsha kwimuzhikijila ku kiji kyonse kyakonsha konauna bulunda bwenu ne aye?

¹⁵ Kwa kubula nangwa kuzhinaukatu ne, Yehoba uketuzhikijila ku kiji kyonse kyakonsha konauna bulunda bwetu ne aye. (Loma 8:38, 39) Uzhikijila kipwilo ku bapopweshi ne bandamabyalo bakanama abo bakonsha kubula kwitwipaya, bino basakisha kwitufumya kwi Lesa wetu wazhila. Mulaye wa Yehoba wamwesha kya kine amba: “Kafwako kyela nangwa kimo kyo bakabunda kya kukulwishako obewa kikengila bulongo ne.”—Isa. 54:17.

Ñanyi Witulengela Kwikala Bakasuluka?

16. Mambo ka ntanda kyo yakonsha kubujila kwitukasulula?

¹⁶ Nanchi kwikala ku lubaji lwa Yehoba kwitulengela kubula kukasuluka nyi? Kupusanako na kino, kwikala lubaji lwa ino ntanda kwitulengela kubula kukasuluka. Ntanda ipatula kwi Yehoba kabiji ilamwa na lesa wakanama wabika bantu mu buzha. (Yoa. 14:30) Kya kumwenako, ntanda ya kwa Satana ingijisha makatazho a bya bunonshi kulengela bantu kubula kukasuluka. (Esakanyaiko Lumwekesho 13:16, 17.) Bundengamambo nabo buji na bulume bwa kuteka bantu mfine. (Yoa. 8:34; Hebe. 3:13) Nangwa kya kuba bantu babula bena Kilishitu bakonsha kulaya kukasulula bantu kimye kyo batundaika byubilo byapusana na mafunjisho a Yehoba, yense wibomvwina kechi ubanda kwibika mu buzha bwa bundengamambo ne bwikalo buncha ne.—Loma 1:24-32.

17. Yehoba witukasulula ku ka?

¹⁷ Mu jishinda jikwabo, umvwe twipana kwi Yehoba, witukasulula ku bintu biji byonse byakonsha kwituletela makatazho. Kimo kimye, bwikalo bwetu buji nobe yewa muntu uketekela dokotala utumbulañana, awo wakonsha kumubuka kikola kikeba kumwipaya. Atweba bonse tuji na kikola kikeba kwitwipaya, ko kuba’mba bundengamambo bo twaswana. Kanatu twipana kwi Yehoba kupichila mu kitapisho kya bukuzhi bwa kwa Kilishitu, po po twakonsha kwikala na luketekelo lwa kuchinuzhuka bintu biya na mambo a bundengamambo ne kwikala myaka ne myaka. (Yoa. 3:36) Byonkatu byo twakonsha kuketekela dokotala utumbulañana na mambo a kumuyuka byo engila bulongo, ne luketekelo lwetu mwi Yehoba byo lukabaya umvwe twatwajijila kufunda pe aye. Onkao mambo, tutwajijila kuteshako muchima kufunda Mambo a Lesa, mambo kuba bino kwitulengela kumutemwa ne kubula kuchina kwikala ku lubaji lwanji.—1 Yoa. 4:18.

18. Ki ka kikobiwa ku boba baji ku lubaji lwa Yehoba?

¹⁸ Yehoba wapa bantu bonse lūsa lwa kwifuukwila bintu. Mambo anji aamba’mba: ‘Salululai mweo, namba anweba ne baana benu mukekalenga na bumi. Kasa mutemwa Yehoba Lesa wenu.’ (Mpitu. 30:19, 20) Usaka atweba kumutemwa kupichila mu kwifuukwila kumwingijila. Mu kifulo kya kwitulengela kubula kukasuluka, kwikala ku lubaji lwa Lesa ye twatemwa kwitulengela kwikala ba lusekelo.

19. Mambo ka kwikala ku lubaji lwa Yehoba kyo kwaikela lusa?

¹⁹ Byo tuji bandengamambo, kechi kitufwainwatu ne kwikala ku lubaji lwa Lesa walumbuluka ne. Kino kyubiwatu na mambo a lusa lwa Lesa. (2 Timo. 1:9) O ene mambo Paulo o anembejile amba: “Nangwa twaikala na bumi, twamwikajila Nkambo; kabiji nangwa twafwa, twafwila Nkambo. Byonkabyo nangwa twaikala na bumi, nangwa twafwa, twi ba kwa Nkambo.” (Loma 14:8) Kya kine kechi tukelangulusha pa kwikala ku lubaji lwa Yehoba ne.

Musakukumbula’mba Ka?

• Mfweto ka iji mu kwikala ku lubaji lwa Yehoba?

• Mambo ka o tukonshesha kuba bintu bikeba Lesa amba tube?

• Yehoba uzhikijila byepi bakalume banji?

[Bipikichala pa peja 8]

Ipuzhai bakwenu byo bamwenamo mu kwikala ku lubaji lwa Yehoba

[Kipikichala pa peja 10]

Mashinda ka amo Yehoba o etuzhikijilamo?