Bantu Batanga Magazini Etu Bepuzha’mba
Nanchi Bya Malwa Biponakotu Bine Bilumbulula Lukabisho Kufuma Kwi Lesa Nyi?
Lesa kechi wingijisha bya malwa biponakotu bine kukambwilamo bantu ne. Ukyangye kubapo bino ne, kabiji kechi ukekyubapo ne. Mambo ka? Mambo Baibolo mu 1 Yoano 4:8 waamba’mba, “Lesa ye butemwe.”
Butemwe bo bumulengela Yehoba kuba bintu byonse. Butemwe kechi buleta lukabisho pa bantu babula mambo ne, mambo Baibolo waamba’mba, “butemwe kechi buba kibi ku mukwabo ne.” (Loma 13:10) Mu Yoba 34:12, Baibolo waamba’mba: “Ee kine, Lesa kechi uba byatama ne.”
Kya kine, Baibolo waambijile jimo amba kukekalanga bya malwa mu moba etu nabiji “bitentanshi bikatampe.” (Luka 21:11) Byonkatu shayuka ubulañana pa mambo a kwiya kwa mvula wakinkunkwila byo abula konauna bintu byonaunwa na uno mvula ye abulañene ne, ne Yehoba naye kechi ye uleta lono lubiwa na bya malwa biponakotu bine ne. Pano inge Lesa kechi ye ubena kulengela buyanji bubena kubiwa na bya malwa biponakotu bine ne, ki ka kibena kuleta buno buyanji?
Baibolo waamba’mba, “byonse bya panopantanda biji mu bulume bwa kwa aye mubi,” Satana Diabola. (1 Yoano 5:19) Aye ye mbanzhi kufumatu kimye kyo asatukile ku ntendekelo ya bantu kufika ne buji lelo. (Yoano 8:44) Satana umona’mba bumi bwa bantu kechi bwanema ne. Bintu byo oba byaimena pa kwitemwa aye mwine. O ene mambo o abena kutundaikila bwikalo bwa kichima mu bantu panopantanda ponse. Mu bwikalo bwa ano moba, bantu ba kichima balengela bakwabo kuya na kukekala mu mapunzha mo bakonsha kwikala mu bizumba bya bya malwa biponakotu bine nangwa byalengwa na bantu. (Efisesa 2:2; 1 Yoano 2:16) Mu jino jishinda, bantu ba kichima bo babena kulengela bya malwa bimo bibena kufikila bantu babula mambo. (Musapwishi 8:9) Mu ñanyi jishinda?
Bya malwa byavula biponako bibena kubiwa javula na mambo a bantu bene. Kya kumwenako akilangulukai pa bya malwa byajingako mu muzhi wa New Orleans, U.S.A. kimye kyo ayujilwemo na mambo a mvula wa kinkunkwila, nangwa mazubo aonawinwe na mateshi akwemukilenga kufuma ku mitumba iji ku musezho wa kalunga mu kyalo kya Venezuela. Mu ano malwa ne akwabotu, bintu nabiji lubesha ne mvula byaletele malwa akatampe na mambo a bantu bene kubula kuyuka oo mapunzha byo aji, kubula kutunga mazubo akosa, kubula kunengezha bintu bulongo, kubula kulondela lujimuno kabiji ne na mambo a bilubo bya boba baji pa buntangi.
Akilangulukai pa kya malwa kimo kyaubiwe ku kala. Mu moba a kwa Yesu, kyamba kyaponene kya kubazhimukilatu kyaipayile bantu 18. (Luka 13:4) Ano malwa kampe aponeneko na mambo a bilubo bya bantu, ‘bintu bisolomokatu,’ nangwa kampe na mambo a bino bintu byonse bibiji—pano bino kechi lwajinga lukabisho kufuma kwi Lesa ne.—Musapwishi 9:11.
Nanchi kujipo bya malwa bimo byo aubapo Lesa nyi? Ee ko biji, pano bino kechi byajinga nabiji byobya biponakotu bine nangwa bikolomwena bene bantu ne, mambo abyo byafikijilengatu bantu Yehoba bo asalulwile kufwa kwesakana na nkebelo yanji kabiji kechi byaubiwenga ubiwengatu ne. Bya kumwenako bibiji ke Muyulo wajingako ntanda yonse mu moba a mushakulu Nowa kabiji ne konaunwa kwa mizhi ya Sodoma ne Gomola mu moba a Lota. (Ntendekelo 6:7-9, 13; 18:20-32; 19:24) Luno lukabisho lwafumine kwi Lesa lwaonawine bantu babi ne kushako bantu bajinga baoloka ku meso a Lesa.
Yehoba Lesa uji na bulume kabiji ukebesha bingi kufumyapo buyanji ne kwibamunako bantu ku bya malwa biponakotu bine. Pa mambo a Mfumu watongolwa na Lesa, aye Yesu kilishitu, Salamo 72:12 waamba’mba: “Aye ukamupokolola wakajilwa pa kujila, ne aye mulanda wabulwa ne wa kumukwasha.”