Bya Malwa Biponakotu Bine—Nanchi Bimwesha Kuba’mba Lesa Wakanama Nyi?

BYAMBA BANTU: “Lesa ye ulama ntanda, kabiji ye ulengela bya malwa biponakotu bine kubiwa. Kino kibena kulumbulula kuba’mba wakanama”

BYAMBAPO BAIBOLO: “Pakuba pano pa ntanda ponse paji mu bulume bwa kwa aye mubi.” (1 Yoano 5:19) Nga “aye mubi” ye ñanyi? Baibolo imutela’mba Satana. (Mateo 13:19; Mako 4:15) Nanchi bubela nyi? Akilangulukai pa kino: Umvwe Satana wajinga na bulume pano pa ntanda, ko kuba’mba utundaika bantu kwikala ba kichima byonka byo aji aye mwine. Nanchi kino kechi kikwasha kumvwisha ene mambo bantu kyo bakankelwa kulama bulongo ino ntanda ne nyi? Bashayuka baamba kuba’mba kukankalwa kulama bulongo ntanda ko kulengela bya malwa biponakotu bine kubiwa kampe kupichila mu byo balenga bilengela bino kubiwa, kukilamo, nangwa kulengela bantu kuyanda mambo a bintu byo boba.

Pano ki ka kilengela bino bya malwa kubiwa? Pa kuba’mba tukumbule buno bwipuzho, twayai tubwele ku bansemi betu batanshi kimye kyo basatukijile Lesa awo wajinga Kalama wabo. Kufumatu kyokya kimye bantu bavula basatuka. Na mambo a kukana Lesa kwibalama, kwalengela bantu kulamwanga na mulwanyi wa Lesa, aye Satana. Kyo kyalengejile Yesu kutela Satana kuba’mba “mfumu wa pano pa ntanda.” (Yoano 14:30) Nanchi mwafwainwa kuketekela kuba’mba uno kalama wakanama wakonsha kwituzhikijila ku bya malwa biponakotu bine, nangwa kya kuba wajinga na bulume bwa kuba byobyo nyi? Ine, mambo wayukanyikwa kuba’mba wakanama. Bino kechi ukatwajijila kulama ne.

Bino, Yehobaa wituta muchima inge tubena kupita mu makatazho aleta Satana. Kyakumwenako, kimye bena Isalela kyo bapichilenga mu makatazho, Baibolo waamba pe Lesa kuba’mba: ‘Mu moba onse a lumanamo lwabo wamanamine bingi.’ (Isaya 63:9) Na mambo a kuba’mba Lesa kechi wakanama ne, katatakatu akafumyepo bukalama bwa kwa Satana. Aye watongola Mwananji Yesu Kilishitu kwikala ke Mfumu wa myaka ne myaka kabiji uchiba mambo monka mo aolokela.

BYO EMULAMATA ANO MAMBO: Nangwa kya kuba bukalama bwa Satana bwakankalwa kuzhikijila bantu ku bya malwa biponakotu bine, bukalama bwa kwa Yesu bukoba bino. Kimye kyo kwajinga kipuupu, Yesu wazhikijile baana banji ba bwanga. Jishimikila ja mu Baibolo jaamba’mba: ‘Ponkapo . . . wakainye luvula ne kalunga ka mema amba: “Zhindama!”’ Luvula wikilekele, pabwela pauba ne nzoo.” Baana banji ba bwanga baambile kuba’mba: “Nanchi uno muntu ye ñanyi? Mambo luvula ne kalunga ka mema byamukokela.” (Mako 4:37-41) Kino kyaubiwe kitulengela kuketekela kuba’mba kimye Yesu kyo akalamanga nobe Mfumu ukazhikijila bantu bonse balukokelo.—Danyela 7:13, 14.

[Tubyambo twa mushi]