Kisemi kibena kutajisha mwaya mpunzha yaonaikile na kinkunkwila

Baibolo Wambapo’mba ka pa bya Malwa Biponakotu Bine

Mukumbu wa mu Baibolo

Lesa kechi ye uleta bya malwa bibena kumweka ano moba ne, bino umvwina lusa bantu bapita mu bino bya malwa. Bya malwa byo bintu bimo bibena kuleta buyanji kabiji Bufumu bwa Lesa bukeya na kwibifumyapo. Pa kino kimye, Lesa ubena kutekenesha boba babena kumanama na mambo a bya malwa bibena kuponako.—2 Kolinda 1:3.

Mambo ka o twakonsha kushiinwa’mba Lesa kechi ye witukambula na bya malwa biponakotu ne?

Mu Baibolo tufunda kuba’mba Lesa waingijishe bintu bimo pa kuleta luzhachisho pa bantu. Pano bino, jishinda jo aingijishe japusana bingi na byo kikala inge kwamweka bya malwa biponakotu.

Bya malwa biponakotu bipaya ne kulemeka bantu bonse. Pakuba lonaiko lwaletele Lesa lwanembwa mu Baibolo kechi waipayile bantu bonse ne. Kimye Lesa kyo aonawine mizhi ya Sodoma ne Gomola, wapulwishe muntu wawama aye Lota ne baana banji babakazhi babiji. (Ntendekelo 19:29, 30) Lesa wayukile byajinga mu michima ya bantu pa kyokya kimye kabiji waonawine boba bo amwene’mba bajinga babi.—Ntendekelo 18:23-32; 1 Samwela 16:7.
Javula bya malwa biyatu kwa kubula ne kuyuka ne. Pakuba Lesa patanshi ujimuna bantu saka akyangye kuleta luzhachisho. Bantu baumvwijile lujimuno bapulukile.—Ntendekelo 7:1-5; Mateo 24:38, 39.
Bimye bimo bantu balengela bya malwa kumweka. Mu ñanyi jishinda? Kupichila mu konauna mapunzha ne kushimika bishimikwa pa mapunzha papita bitentanshi, mapunzha kwikala miyulo nangwa kwakilamo kyuya nangwa mashika. (Lumwekesho 11:18) Kechi twafwainwa kupamo Lesa mambo pa bifuukulapo bantu bene ne.—Byambo bya Maana 19:3.

Nanchi bya malwa biponakotu bine bimwesha’mba tubena kwikala moba a kupelako nyi?

Ee, bungauzhi bwa mu Baibolo bumwesha kuba’mba bya malwa bikamwekanga mu kimye “kya mpelo ya buno bwikalo,” nangwa’mba “mu moba a kupelako.” (Mateo 24:3; 2 Timoti 3:1) Yesu waambile pa ano moba o tujimo amba: “Kukekala bipowe bya nzala ne bitentanshi kuku ne kuku.” (Mateo 24:7) Katatakatu Lesa akafumyepo bintu byonse bibena kuletela bantu misongo ne buyanji, kubikapotu ne bya malwa biponakotu.—Lumwekesho 21:3, 4.

Lesa ukwasha byepi boba baponenwa na bya malwa?

Lesa wingijisha Mambo anji, Baibolo, pa kutekenesha baponenwa na bya malwa. Baibolo witukwasha kuyuka’mba Lesa wituta muchima kabiji amba kimukola ku muchima inge ketumaname. (Isaya 63:9; 1 Petelo 5:6, 7) Kabiji witulaya ne kuba’mba bya malwa kechi bikekalako jibiji ne.—Monai kamutwe ka kuba’mba “Byepelo bya mu Baibolo bitekenesha baponenwa na bya malwa.”
Lesa wingijisha bapopweshi banji kukwasha baponenwa na bya malwa. Lesa wingijisha bapopweshi banji baji pano pa ntanda kulondela byaubanga Yesu. Bungauzhi bwaambile kuba’mba Yesu ukatekenesha “balajika michima” ne “bonse babena kujila.” (Isaya 61:1, 2) Bapopweshi ba Lesa bebikako kulondela byo aubanga.—Yoano 13:15.

Kabiji Lesa wingijisha bapopweshi banji kukwasha baponenwa na bya malwa mu bintu bikebewa mu bwikalo.—Byubilo 11:28-30; Ngalatiya 6:10.

Bakamonyi ba kwa Yehoba babena kuwamisha nzubo yaonaikile na kinkunkwila mu Puerto Rico — Bakamonyi ba kwa Yehoba babena kukwasha bantu bajinga ku mpunzha kwapichile kinkunkwila mu kyalo kya Puerto Rico

Nanchi Baibolo wakonsha kwitukwasha kwinengezha ku bya malwa biponakotu nyi?

Ee. Nangwa kya kuba Baibolo kechi bamunembejile kuba’mba aketukwashenga kwinengezha ku bya malwa ne, bino muji mafunde akonsha kwitukwasha. Nabiji ano:

Nengezhezhai jimo bya kuba inge kwamweka bya malwa. Baibolo waamba’mba: “Muntu wajimuka umona bileta malwa kabiji ufyama.” (Byambo bya Maana 22:3) Kyawama bingi kunengezhezha jimo bya kuba inge kwamweka bya malwa. Kino kyavwangamo kunengezhezha jimo ka kyola mo twabika bintu byanema ka kunyema nako ne kwisambila jimo na kisemi kwa kunyemena inge kwamweka bya malwa.
Nemekai bumi kukila bipe. Baibolo waamba’mba: “Kafwako kintu nangwa kimo kyo twaletelepo pano pa ntanda ne, kabiji kafwako kyo twakonsha kusendapo ne.” (1 Timoti 6:7, 8) Twafwainwa kwipana kusha muzhi wetu ne bipe pa kuba’mba tupuluke bya malwa. Twafwainwa kuvulukanga’mba bumi bwanema bingi kukila bipe.—Mateo 6:25.

Byepelo bya mu Baibolo bitekenesha baponenwa na bya malwa

Ntendekelo 18:25: “Anweba [Lesa] kechi mwakonsha kuba kino, kya konawina waoloka pamo na mubi ne . . . Nanchi Mutonyi wa ba pano pa ntanda ponse kechi ukoba kintu kyaoloka nenyi?”

Byo kilumbulula: Lesa byaoloka kimye kyonse uba; kechi twafwainwa kumupamo mambo inge bantu bawama bafwa na mambo a bya malwa biponakotu ne.

Salamo 46:1, 2: “Lesa ye kya kufyamamo kyetu kabiji bo bulume bwetu, Witukwasha kimye kyonse kyo tupita mu bya malwa. O ene mambo o tukabujila kuchina, nangwa kya kuba ntanda yaaluka.”

Byo kilumbulula: Nangwa tupite mu bintu bya mutundu ka, twafwainwa kuketekela mwi Lesa kwitukwasha kwikala bakosa.

Isaya 63:9: “Kimye kyonse kyo bapichilenga mu makatazho, kyamukolelenga bingi ku muchima.”

Byo kilumbulula: Lesa uji na lusa, witumvwina lusa inge ketumaname.

Yoano 5:28, 29: “Kimye kibena kwiya aba bonse baji mu bilende kyo bakomvwa jiwi [ja kwa Yesu] ne kufumamo.”

Byo kilumbulula: Tuji na luketekelo lwa kumona batemwe betu bafwa mambo Lesa ukapa Yesu bulume bwa kwibasangula.

1 Petelo 5:6, 7: “Ipelulainga munshi ya kuboko kwa Lesa kwa bulume . . . saka mutaya bijikila byenu pe aye, mambo wimuta muchima.”

Byo kilumbulula: Lesa wituta bingi muchima kabiji ukeba’mba tumubuulenga bijikila byetu mu milombelo.

Lumwekesho 21:4: “[Lesa] ukashimuna mipolo yonse ku meso abo, ne lufu, mabingo, kujila ne misongo kechi bikekalako jibiji ne. Bintu bya kala byapichijila.”

Byo kilumbulula: Lesa ukafumyapo byonse bileta lumanamo, kubikapotu ne bya malwa biponakotu bine.