Twafwainwa Kubanga Byepi Ku Bantu?
“Byonka byo musaka’mba bantu betubile, ne anweba mwibobile pamo.”—LUKA 6:31.
1, 2. (a) Jashi ja pa Mutumba jo ji ka? (b) Bintu ka byo twaya twisambepo mu uno mutwe ne byo tukesambapo mu mutwe walondelapo?
YESU KILISHITU kine wajinga Mufunjishi Wayukisha. Bantangi ba bupopweshi byo batumine ba kuya na kumukwata, bano bakalama babwelelemo mabokotu ne kwamba’mba: “Nangwa kala kene kafwako muntu waambile byo amba uno muntu ne.” (Yoa. 7:32, 45, 46) Jashi ja pa Mutumba ke jashi jimo jawama bingi jaambile Yesu. Janembwa mu kitango 5 kufika ku kitango 7 mu buku wa Mambo awama a kwa Mateo, kabiji jipashako na jiji mu Luka 6:20-49.a
2 Kampe byambo byayukanyikwa bulongo mu jino jashi ke byobya bitelwa amba Muzhilo Wawama. Uno muzhilo waamba pa byo twafwainwa kubilanga bakwetu. Yesu waambile’mba: “Byonka byo musaka’mba bantu betubile, ne anweba mwibobile pamo.” (Luka 6:31) Waubijile bantu bintu byawama bingi. Yesu wabukile bakolelwe ne kusangula bafu. Bantu bapeshiwe bingi kikatakata aba baitabijile mambo awama o ebasapwijile. (Tangai Luka 7:20-22.) Atweba Bakamonyi ba kwa Yehoba tusekela bingi byo twingilako uno mwingilo untutu umo wa kusapwila mambo a Bufumu. (Mat. 24:14; 28:19, 20) Mu uno mutwe ne mu walondelapo, tusakwisamba pa byambo bya kwa Yesu byaamba pa uno mwingilo ne pa bishinka bikwabo bya mu Jashi ja pa Mutumba byaamba pa byo twafwainwa kubilanga bantu.
Ikalai Bakimote
3. Mwafwainwa kulondolola byepi bukimote?
3 Yesu waambile’mba: “Ba kimote bo batokwa: mambo bakaswana ntanda.” (Mat. 5:5) Mu Binembo, bukimote kechi bulumbulula bukoke ne. Butekanye bo bo tumwesha kupichila mu kulondela bikeba Lesa. Bino byubilo bimweshiwa mu byo tubila bakwetu. Kya kumwenako, ‘kechi tushinkanya kibi na kibi kikwabo nangwa na muntu umo ne.’—Loma 12:17-19.
4. Mambo ka bakimote kyo baikela batokwa?
4 Bakimote bo batokwa mambo “bakaswana ntanda.” Yesu byo aikala “kimote ne kukoka pa muchima” ye “ye atongwele’mba, ekale nswanyi wa byonse” kabiji ye Nswanyi wa byonse panopantanda. (Mat. 11:29; Hebe. 1:2; Sala. 2:8) Kyaambijilwe jino amba Mesiasa “mwana muntu” ukekala na bantu bakalamanga pamo nanji mu Bufumu bwa mwiulu. (Da. 7:13, 14, 21, 22, 27) Ba 144,000 byo baikala bakimote bashingwa, ‘bakaswana pamo ne Kilishitu’ panopantanda. (Loma 8:16, 17; Lum. 14:1) Bakimote bakwabo bakatambwila bumi bwa myaka ne myaka panopantanda kupichila mu Bufumu.—Sala. 37:11.
5. Kwikala na muchima wa bukimote byonka biji Kilishitu kwitulengela kwikala byepi?
5 Umvwe twaikala batama muchima tukalengela bakwetu kubula kwitutemwa kabiji baketuchinanga. Bino umvwe ketumweshe muchima wa bukimote ujipo na Kilishitu tukekala bamutende kabiji ba kutundaikañana mu kipwilo. Bukimote ke lubaji lwa kipangwa kya mupashi wa Lesa kyo twikala nakyo umvwe twaikala na ‘bumi ne kwendenga mu mupashi.’ (Tangai Ngalatiya 5:22-25.) Kya kine tukeba kwikala bakimote batangijilwa na mupashi wazhila wa Yehoba.
Byo Batokwapo aba Boba Lusa!
6. Ñanyi kyubilo kijipo na bantu “boba lusa”?
6 Mu Jashi janji ja pa Mutumba, Yesu waambile ne kuba’mba: “Boba lusa bo batokwa: mambo bakobilwa lusa.” (Mat. 5:7) “Boba lusa” bata muchima bantu bapelelwa. Yesu wakabulwile bantu bamanaminenga mambo a kuba “wibobile lusa.” (Mat. 14:14; 20:34) Onkao mambo kuta bantu muchima kwitulengela kwikala ba lusa.—Yako. 2:13.
7. Lusa lwalengejile Yesu kuba ka?
7 Jibumba jikatampe Yesu jo asambakene kimye kyo akebelenga kukokolokapo, ‘wibobile lusa, mambo baji pamo no mikooko yabula kafunga.’ Ponkapo “watatwile kwibafunjisha byavula.” (Mako 6:34) Netuwa twikala bingi na lusekelo byo tusapwila mambo a Bufumu ku bakwetu ne kwibabula mambo a lusa lukatampe lwa Lesa byonka byaubile Yesu!
8. Mambo ka bantu baji na lusa kyo bekela batokwa?
8 Bantu baji na lusa batokwa mambo “bakobilwa lusa.” Umvwe twaubila bantu lusa, nabo betubila kintutu kimo. (Luka 6:38) Kunungapo, Yesu waambile’mba: “Umvwe mwibalekelako bantu mambo abo, ne Shenu wa mwiulu naye ukemulekelako ne mambo enu pamo.” (Mat. 6:14) Bantu baji na lusa bo bonkatu bayuka lusekelo lwikala na muntu umvwe bamulekelako mambo ne kwitabilwa na Lesa.
“Bapwanya Bantu” kyo Batokelwa
9. Umvwe twaikala ba mutende tukoba byepi?
9 Yesu waambile pa kintu kikwabo kileta lusekelo amba: ‘Bapwanya bantu bo batokwa: mambo bakatelwa’mba, Baana ba Lesa.’ (Mat. 5:9) Kyambo kya Kingiliki kyatuntululwa pano kya ‘kupwanya’ kilumbulula “kwikala ba mutende.” Umvwe twaikala ba mutende kechi tukekala ba luntepentepe alo lwakonsha ‘kwabanya ba mulunda na muntu ne.’ (Mana. 16:28) Mu ñambilo ne mu byubilo twikalenga ba mutende ku bonse kikale ba mu kipwilo nangwa babula ba mu kipwilo kya bwina Kilishitu. (Hebe. 12:14) Kikatakata twesekenga na ngovu kwikala ba mutende na Yehoba Lesa.—Tangai 1 Petelo 3:10-12.
10. Mambo ka “bapwanya bantu” kyo baikela batokwa?
10 Yesu waambile’mba “bapwanya bantu” bo batokwa mambo ‘bakatelwa’mba, baana ba Lesa.’ Na mambo a kwitabila kuba’mba Yesu ye Mesiasa, bena Kilishitu bashingwa batambwile ‘lūsa lwa kwikala ke baana ba Lesa.’ (Yoa. 1:12; 1 Pe. 2:24) Pano kikekala byepi ku ‘mikooko ikwabo’ ya kwa Yesu ipwanya bantu? “Shabantu wa myaka” ye ukebalamanga mu Bukalama bwa Myaka Kiumbi Kimo pamo na banswanyi banji mwiulu. (Yoa. 10:14, 16; Isa. 9:6; Lum. 20:6) Myaka Kiumbi Kimo ya Bukalama byo ikapwa, bano bantu bapwanya bantu nabo bakekala ke baana ba Lesa panopantanda.—1 Ko. 15:27, 28.
11. Tukobanga byepi na bantu umvwe ‘maana afuma mwiulu’ ke etutangijile?
11 Pa kuba’mba twikale balunda na Yehoba “Lesa wa mutende,” twafwainwa kulondanga byubilo byanji kuvwangakotu ne kwikala mutende na bantu. (Fili. 4:9) Umvwe twaleka amba ‘maana afuma mwiulu’ etutangijilenga, tukekala ba mutende ku bantu. (Yako. 3:17) Ee, tukekala bapwanya bantu.
“[Lekai] Kyeya Kyenu Kimweke”
12. (a) Nanchi Yesu waambilepo amba ka pa kyeya kya ku mupashi? (b) Twakonsha kumwesha byepi kyeya?
12 Tuba bingi bulongo ku bantu kimye kyo twibakwasha kutambwila kyeya kya Lesa kya ku mupashi. (Sala. 43:3) Yesu waambijile baana banji ba bwanga amba “anweba mwi kyeya kya panopantanda” ne kwibatundaika’mba baleke kyeya kyabo kimweke pa kuba’mba bantu bamone ‘mingilo yabo yawama’ nangwa’mba byubilo byabo byawama byo bamwesha ku bakwabo. Kino kikalengela kyeya kusamina “bantu” nangwa’mba bantu bakamwenamo. (Tangai Mateo 5:14-16.) Lelo jino, tumwesha kyeya kyetu kupichila mu kuba byawama ku bakwetu ne mu kusapwila mambo awama ku “mikoka yonse ya bantu.” (Mat. 26:13; Mako 13:10) Uno ke mwingilo wanema bingi ye twakonsha kubanga!
13. Ki ka kitulengela kumweka ku bantu?
13 Yesu waambile’mba: “Muzhi ye bashimikila pa mutumba kechi bakonsha kumufya ne.” Muzhi yense uji pa mutumba wakonsha kupelawizhatu kumwekana. Po pamotu ne atweba betumona pa mingilo yetu yawama yo twingila ya kutaya mbila ya Bufumu ne byubilo nabiji kwilama bulongo ne kubula bubi.—Titu. 2:1-14.
14. (a) Mwakonsha kulumbulula byepi byaingilanga malampi a mu myaka kitota kitanshi? (b) Kilumbulula ka kubula kufya bumupashi bwetu ‘munshi ya mutasa’?
14 Yesu waambile pa kwambula lampi, amba kechi bamwambula ne kumubika munshi ya mutasa ne, poso ponka pekala lampi kuba’mba atokesheshe bantu bonse baji mu nzubo. Lampi ye baingijishanga bavula mu myaka kitota kitanshi ke katolitoli ka kulenga na buchimba ne muzhinge wakokanga manyi (javula aengulwanga ku maolivi) pa kuba’mba katemenga. Uno lampi bamutulanga pa kya kutulapo lampi kya kichi nangwa kya kyela pa kuba’mba ‘atokesheshe bantu bonse ba mu nzubo.’ Bantu kechi baambulanga lampi ne kumutula ‘munshi ya mutasa,’ ko kuba’mba kinjanja kyabaya malita atanu na ana ne. Yesu kechi wakebelenga baana banji ba bwanga kufya bumupashi bwabo munshi ya mutasa wa kifwanyikizho ne. Onkao mambo twafwainwa kuleka kyeya kyetu na kusama, kechi kuleka myendeleko nangwa kuyanjishañana kwa bantu kwitulengela kufya bukine bwa mu Binembelo nangwa kwibuyukatu atweba bene bunke ne.
15. “Mingilo [yetu] yawama” ilengela bantu bamo kuba ka?
15 Panyuma ya kutongola kyeya kya lampi, Yesu po po abujile baana banji ba bwanga amba: “Byonkabyo kyeya kyenu kimweke ku meso a bantu; bamone mingilo yenu yawama, ne kumutumbijika Shenu uji mwiulu.” Na mambo a “mingilo [yetu] yawama,” bamo ‘batumbijika’ Lesa kupichila mu kwikala bakalume banji. Kino kyo kitulengela amba ‘tusamenga pamo nobe byeya panopantanda.’—Fili. 2:15.
16. Byo twaikala “kyeya kya panopantanda” twafwainwa kuba ka?
16 Kwikala “kyeya kya panopantanda” kwavwangamo mwingilo wa kusapwila mambo a Bufumu ne kulenga baana ba bwanga. Kabiji kuji ne kintu kikwabo kyo twafwainwa kubanga. Mutumwa Paulo wanembele’mba: ‘Endainga mwafwainwa baana ba kyeya (mambo bipangwa bya kyeya biji mu buwame bonse ne bololoke ne bukine).’ (Efi. 5:8, 9) Twafwainwa kwikala ba kumwenako bawama bamwesha byubilo bya Lesa. Twafwainwa kumvwina lujimuno lwa mutumwa Petelo lwaamba’mba: ‘Bwikalo bwenu bwikale bwafwainwatu mu Bangetila; amba, nangwa bemunena bibi nobe mwi babi, bakamone mingilo yenu yawama ne kumutumbijika Lesa mu juba jo akebapempula.’ (1 Pe. 2:12) Pano twafwainwa kuba byepi umvwe twizhingijisha na mukwetu wa mu lwitabilo?
‘Pwana na Mulongo Wobe’
17-19. (a) Ñanyi “mulambo” watongolwa pa Mateo 5:23, 24? (b) Kyanema byepi kupwana na mulongo wetu, kabiji Yesu wamwesheshe byepi kino?
17 Mu Jashi janji ja pa Mutumba, Yesu wajimwineko baana banji ba bwanga kubula kubukila mulongo wabo bukaji ne kumulengulula. Mu kifulo kya kuba byobyo, bafwainwe kubangijila kupwana na mulongo wabo ye balenga mambo. (Tangai Mateo 5:21-25.) Tai muchima ku lujimuno lwa kwa Yesu. Umvwe mwaleta mulambo ku kya kusokelapo ne kuvuluka’mba mulongo wenu muji nanji na mambo, mwafwainwa kuba byepi? Mwafwainwa kusha konka mulambo wenu ne kukapwana na mulongo wenu. Mino po pa kwiya na kulambula mulambo wenu.
18 “Mulambo” ye wajinga kitapisho kyo alambulanga muntu ku nzubo ya Yehoba. Milambo ya banyama yanemene bingi mambo Lesa yo yo akambizhizhe mu Mizhilo ya kwa Mosesa kwikala lubaji lwa mpopwelo ya bena Isalela. Bino umvwe mulongo wenu wavuluka’mba wimulenga mambo, kyanemene bingi kukipwana na mulongo wenu saka mukyangye kulambula mulambo ne. Yesu waambile’mba: “Sha konka mulambo wobe ku kyakusokelapo bitapisho, kabangijile jimo kupwana na mulongo wobe, mino pa kwiya ulambule mulambo wobe.” Kyanemene bingi muntu kukipwana na mulongo wanji saka akyangye kulambula mulambo kwesakana na Muzhilo.
19 Yesu kechi waambiletu pa milambo ne pa kulala mizhilo imo ne. Bino waambile’mba mulambo yense kechi wafwainwe kulambulwa ne, umvwe mwina mulambo wavuluka’mba uji na mambo na mulongo wanji. Umvwe mulambo wajinga wa nyama mumi bamushanga “konka ku kyakusokelapo” bitapisho mu kipango kya bañanga kya nzubo ya Lesa. Panyuma ya kupwisha lukatazho, walengele mukwabo mambo po po afwainwe kwiya na kulambula mulambo.
20. Mambo ka kyo twafwainwa kupwana bukiji umvwe twizhingijisha na mulongo wetu?
20 Kwi Lesa bulunda bwetu na balongo betu ke lubaji lwanema bingi mu mpopwelo ya kine. Umvwe bantu babena kulambula milambo ya banyama mino saka balenga mambo ku balongo babo, milambo yabo yaikalangatu yatu kwi Yehoba. (Mika 6:6-8) Onkao mambo Yesu wakambizhizhe baana banji ba bwanga ‘kupwana bukiji.’ (Mat. 5:25) Paulo wanembele byambo bipashako’mba: “Nangwa mwazhingila kechi mulenge mambo ne; kechi muleke juba jizhike kasa mwazhingila ne: nangwa kumushila mpunzha aye Diabola ne.” (Efi. 4:26, 27) Umvwe twazhingila na mambo aubiwa, twafwainwa kupwana bukiji pa kuba’mba tubule kutwajijila saka twazhingila ne kushila kanya Diabola.—Luka 17:3, 4.
Kimye Kyonse Panainga Mushingi ku Bakwenu
21, 22. (a) Twakonsha kwingijisha byepi lujimuno lwa kwa Yesu lo twisambapo? (b) Bi ka byo tukesambapo mu mutwe walondelapo?
21 Kupituluka mu byambo byaambile Yesu mu Jashi janji ja pa Mutumba kwakonsha kwitukwasha kubila bakwetu lusa ne kwibapa mushingi. Nangwa kya kuba bonse twi bambulwakoloka, twakonsha kwingijisha lujimuno lwa kwa Yesu mambo kechi witukebela byakila pa byo twakonsha kuba ne, nangwatu Shetu wa mwiulu naye kechi witukebela byakila pa bulume bwetu ne. Kupichila mu lulombelo, kwibikako kya kine, ne mapesho a Yehoba Lesa, twakonsha kwikala bakimote, ba lusa, ne kupwanya bantu. Twakonsha kumweshanga kyeya kya ku mupashi kitumbijika Yehoba. Kabiji twakonsha kupwanañana na balongo betu umvwe tuji nabo na mambo.
22 Mpopwelo yaitabilwa na Yehoba yavwangamo kutemwa bakwetu. (Mako 12:31) Mu mutwe walondelapo tukesamba pa byambo bikwabo bya mu Jashi ja pa Mutumba abyo biketukwasha kubila bakwetu byawama. Panyuma ya kulanguluka languluka pa jashi jikatampe ja kwa Yesu, twakonsha kwishikisha’mba, ‘Nanchi nguba byawama ku bantu nyi?’
[Tubyambo twa mushi]
a Musakumwenamo bingi umvwe mu lufunjisho lwenu lwa pa bunke mwakitanga bino bitango saka mukyangye kutanga uno mutwe ne walondelapo.
Musakukumbula’mba Ka?
• Bukimote bulumbulula ka?
• Mambo ka “boba lusa” kyo baikela batokwa?
• Twakonsha kumweshanga byepi kyeya kyetu?
• Mambo ka kyo twafwainwa kupelawizha ‘kupwana na mulongo wetu’?
[Kipikichala pa peja 4]
Kusapwila mambo a Bufumu ke jishinda jimo janema jo tumwesheshamo kyeya kyetu
[Kipikichala pa peja 5]
Bena Kilishitu bafwainwa kumweshanga byubilo byawama bya Lesa
[Kipikichala pa peja 6]
Saka mwibikako na ngovu kupwana na balongo benu