Wakosele Nangwa Kya Kuba Wajinga Na Makatazho
MAKATAZHO o mupitamo akonsha kwimulefula. Akonsha kwimupampata nobe misundu. Mwakonsha kulanguluka’mba kechi mukeapwisha ne, nangwa amba kafwako ne byo muji ne, inge mwiesakanya ku bakwenu ne kutana’mba bakwenu bemukila bulume. Kabiji kimo kimye mwakonsha kwikala na kikola kibula kupwa kyakonsha ne kulengela bulume ne lusekelo lo mwajinga nalo byonse ke mpalampala. Monse mo kyakonsha kwikela, mwakonsha kulanguluka’mba kyapwa makatazho o muji nao kechi akapwa ne. Mwakonsha kwiumvwa byonka biumvwine Yoba, waambile kwi Lesa amba: “Mama! inge mwaji mwaswa kumfya mu kalunga ka bafu, ne kundama monka poso bukaji bwenu bwapwa, ne kuntongwela kimye kya kumvulukilamo!”—Yoba 14:13.
Ki ka kyakonsha kwimukwasha kubula kwikala na bino bijikila? Nangwa kya kuba kyashupa, kimo kimye kyawama kubula kulangulukanga pa makatazho enu. Kya kumwenako, mwakonsha kulanguluka pa byambo bya Yehoba byanembeshiwa na mupashi byaamba pe kalume wanji wa kishinka Yoba amba: ‘Obewa wajinga pi byo naajile kitendekesho kya panopantanda? Mbule umvwe uji na maana. Ñanyi watongwejile jimo mo ikapela, kana wamuyuka nyi? Nangwa ñanyi watanyikilepo muzhinge wa kwiipima?’ (Yoba 38:4, 5) Umvwe twalanguluka mwatala ano mepuzho, tuyuka biji maana ne bulume bwa Yehoba. Waswisha buno bwikalo bujipo kutwajijila mambo kujipo bishinka byawama byalengela.
“Mwiba mu Mubiji”
Kalume mukwabo wa kishinka waambijile Yehoba amba afumye “mwiba mu mubiji,” ko kuba’mba apwishe lukatazho lwanji lwamupampachile. Mutumwa Paulo wamusashijile Lesa jisatu amba lukatazho lumwamuke. Luno lukatazho lo ajinga nalo lwajinga nobe mwiba, lwakonsheshe kumupwishisha Paulo lusekelo lwanji mu mwingilo wa Yehoba. Paulo waambile’mba kuchinchika uno mwiba mu mubiji kwajingatu pamo nobe kumupumapuma. Bino Yehoba wakumbwile’mba: “Bupe bwami bwakuwaina: mambo mu kunekena mo bulumbulukila bulume bwami.” Yehoba kechi wamufumishe yewa mwiba mu mubiji ne. Paulo watwajijiletu na kuchinchika, bino wanungilepo amba: “Byo nji wanekena, byo byo nji ke wakosa.” (2 Ko. 12:7-10) Watazhizhe mwepi?
Lukatazho lwa kwa Paulo kechi lwapwile mu jishinda ja kukumya ne. Nangwa byonkabyo, kechi lwamulengejile kubula kwingijila Yehoba mingilo ikatampe ne. Paulo waketekejile mwi Yehoba kumukosesha, ne kutwajijila na kulomba kwi aye kuba’mba amukwashe. (Fili. 4:6, 7) Kwipi na mpelo ya bwikalo bwanji panopantanda, Paulo waambile’mba: “Nabalwenga bulwi bwawama, napwisha kala kikonkwanyi kyami, nabalamenga lwitabilo.”—2 Timo. 4:7.
Yehoba wingijisha bantu bambulwakoloka kuba kyaswa muchima wanji nangwa kya kuba boba bilubo ne kupita mu makatazho. Kabiji lukumo luya kwi aye. Wibatangijila ne kwibapa maana a kuchinchikilamo makatazho ne kutwajijila kwikala balusekelo mu mwingilo wanji. Ee, wakonsha kwingijisha bantu bambulwakoloka kwingila mingilo ikatampe nangwa kya kuba bapita mu makatazho.
Paulo waambile ene mambo Lesa o abujijile kufumya mwiba mu mubiji wanji amba: “Kuchina’mba naketumbijikisha.” (2 Ko. 12:7) “Mwiba” wajinga mwi Paulo wamuvulwilengamo amba wapelelela kabiji wamulengejile kwikala wipelula. Kino kipasha bingi na byafunjishe Yesu amba: “Awa wa kwitumbijika mwine ukapelulwa; ne awa wa kwipelula mwine ukatumbijikwa.” (Mat. 23:12) Makatazho akonsha kufunjisha bakalume ba Lesa kwikala bepelula ne kwibakwasha kuyuka’mba pa kuba’mba bachinchike mu bukishinka bafwainwa kuketekela mwi Yehoba. Onkao mambo, byonka byajinga mutumwa, ne abo bakonsha ‘kwitotela mwi Nkambo.’—1 Ko. 1:31.
Makatazho Abula Kuyukanyikwa
Bamo bakonsha kwikala na makatazho o babula kuyuka abo bene, nangwa o babula kutako muchima amba beayuke. Kya kumwenako, muntu wakonsha kukilamo kwiketekela mwine, ne kuketekela mu bintu byo aji nabyo. (1 Ko. 10:12) Lukatazho lukwabo lwikala na bantu bambulwakoloka ke kukeba kutumbalala.
Yoaba waishile kwikala mukulumpe wa nzhita ya Mfumu Davida wajinga muntu wachinchika, wabambakana, kabiji wayukile mwa kupwishisha makatazho. Pano bino, Yoaba walengele mambo a bulala amwesheshe amba wijantwile mwine. Waipayile bakulumpe babiji ba nzhita. Patanshi washinkenye pa kwipaya Abina. Palutwe kacheche, byo ebepekezhe nobe ubena kwimuna kolojanji Amasa, Yoaba wamukwachile Amasa ku bwevu na kuboko kwanji kwa kilujo nobe ubena kumufyompa, kepo amwashile pa jivumo na mpoko yo alamijile ku kuboko kwanji kwa kipiko ne kumwipaya. (2 Sam. 17:25; 20:8-10) Yoaba bamufumishe pa kifulo kya bukulumpe bwa nzhita ne kubikapo mukwabo ye elwishishenga nanji aye Amasa. Kino kyo kyamujile ku muchima Yoaba amba ashinkanye kwendapo bamubwezha pa kifulo kyanji. Mwamona kuba’mba Yoaba wakankelwe kwalulula muchima wanji ne kuleka milanguluko yanji incha. Wakanamine bingi kwa kubula kumweshapotu nangwa lusa ne. Mfumu Davida byo ajinga kwipi na lufu lwanji, wakambizhizhe mwananji Solomone amba Yoaba akakambulwe pa bubi bwanji.—1 Mfu. 2:5, 6, 29-35.
Ne atweba kechi twafwainwa kuleka milanguluko yetu yatama kwitulengela kuba byatama ne. Twakonsha kushinda kunekena kwetu. Patanshi twafwainwa kuyuka makatazho o tuji nao. Apa bino twaingila na ngovu kwiapwisha. Twafwainwa kulombanga kwi Yehoba kimye kyonse kuba’mba etukwashe kushinda makatazho etu, ne kwikala na mukovyokovyo wa kutanganga Mambo anji, ne kumonapo mashinda mwa kushinjila milanguluko ibi. (Hebe. 4:12) Twakonsha kutwajijila na kushinda makatazho etu, kabiji kechi twafwainwa kulefulwa ne. Twakonsha kutwajijila na kushinda ano makatazho etu mambo twi bambulwakoloka. Paulo wayukile kino mambo wapichilemo, ne kunemba’mba: “Akya kyo nsaka, kechi mbenakwikyuba ne; kabiji akya kyo nashikwa, kyo kyo nguba.” Pano bino, byonka byo mwayukila jimo, Paulo kechi walefwilwe na makatazho uba nobe kechi wajinga na bulume bwa kuchinchika ne. Watwajijiletu na kushinda makatazho anji, ne kuketekela mu bukwasho bwa Lesa kupichila mwi Yesu Kilishitu. (Loma 7:15-25) Paulo wanembele ne jikwabo amba: “Nepumapuma pa mubiji wami, namuleta ne mu buzha: kuchina’mba, nangwa mu kya byepi, pa kusapwila ku bakwabo, ami mwine nakalengululwa.”—1 Ko. 9:27.
Bantu baji na muteeto wa kwimona bene nobe bawama. Twakonsha kwibikako kubula kwikala na uno muteeto kupichila mu kwikala na milanguluko ya Yehoba, ne kuba byonka Paulo byo akambizhizhe bena Kilishitu amba: “Shikwaitu kyatama; kakachilai kyawama.” (Loma 12:9) Mu bulwi bwetu bwa kushinda kunekena kwetu, twafwainwa kwikala bakishinka, ba mukoyo, ne kwilama atwe bene. Davida walombele kwi Yehoba amba: “Beseke bya munda mwami ne muchima wami.” (Sala. 26:2) Wayukile’mba Lesa wakonsha kuyuka biji milanguluko yetu ne kwitukwasha umvwe twakebewa bukwasho. Inge twalondela lutangijilo lupana Yehoba kupichila mu Mambo anji ne mupashi wanji wazhila, twakonsha kushinda makatazho o tupitamo.
Bamo bakonsha kukatazhiwa na makatazho o bamona amba kechi bakonsha kwiapwisha bunke ne. Bakulumpe mu kipwilo bakonsha kwibakwasha ne kwibatundaika. (Isa. 32:1, 2) Pano bino kyawama kubula muntu bishinka. Makatazho amo kechi akapwa mu buno bwikalo ne. Nangwa byonkabyo, bavula bafunda kuchinchika makatazho, kabiji kino kibaletela lusekelo.
Yehoba Walaya Kukwashañana
Twasumininwa amba Yehoba witutangijila ne kwitulama ku makatazho onse o tupitamo mu bino bimye byakatazha. Baibolo witukambizha’mba: “Onkao mambo ipelulai munshi ya kuboko kwa bulume bwa Lesa, akemutumbijike mu kimye kyafwainwa; kasa mutaya kijikila kyenu kyonse pe aye, mambo aye wimuta muchima.”—1 Pe. 5:6, 7.
Kimye Kathy awo waingijilanga pa Betele myaka yavula kyo ayukile’mba mwatawanji wajinga na kikola kya ku bongo kilengela muntu kulubalubamo, walangulukile’mba kechi ukakonsha kuchinchika makatazho akeya kulutwe na mambo a kino kikola ne. Watendekele kulomba kwi Yehoba pa juba pa juba kuba’mba amupe maana ne bulume bwa kuchinchika. Bulume bwa bamwata wanji byo bwayilenga na kukepa, balongo bamwesheshe butemwe bwa bwina Kilishitu ne kwingila na ngovu kuyuka mwa kubila na kyokya kikola kabiji banyenga bamutundaikilenga bingi Kathy ne bamwata wanji pamo. Bano bena Kilishitu bo bo aingijishe Yehoba kuba’mba bamukoseshe Kathy, kabiji kino kyamulengejile kusunga bamwata wanji kufikatu ne kimye kyo bafwile panyuma ya kupitapo myaka jikumi na umo. Kathy waamba’mba: “Nangwa kya kuba najijilenga, bino namusanchijile bingi Yehoba na muchima wami yense pa byo ankwashishe, kino kyankoseshe bingi. Kechi nayukile’mba nakonsha kutwajijila na kwingila mingilo kimye kyabaya aku saka nakoka ne!”
Bukwasho bwa Kwitukwasha Kushinda Makatazho Abula Kuyukanyikwa
Inge bantu beumvwa nobe batutu, bakonsha kulanguluka’mba Yehoba kechi ukomvwa milombelo yabo yo balomba kuba’mba ebakwashe mu bimye bya malwa ne. Onkao mambo kyawama kulanguluka pa byaambile Davida byo aumvwine bulanda pa bundengamambo bwanji bukatampe bo aubile na Batesheba amba: “Muchima walajika ne walapila, anweba Lesa, kechi mukamusula ne.” (Sala. 51:17) Davida walapijile kya kine, kabiji wayukile’mba wakonsheshe kulomba kwi Lesa ne aye wakonsheshe kumubila lusa. Yesu umwesha muchima wa Yehoba wa lusa. Nembi wa Mambo awama aye Mateo waingijishe byambo bya kwa Isaya kwi Yesu amba: “Jitete jafyotoka kechi ukejichimuna ne, Nangwa muzhinge ufutumuka kechi ukamuzhima ne.” (Mat. 12:20; Isa. 42:3) Byo akijinga panopantanda, Yesu waubijile lusa bayanji ne boba bamanyikilwenga. Kechi wapwishishe bumi bwa boba bajinga nobe lampi wayilenga nyekenyeke na kuzhima ne. Mu kifulo kya byobyo, wakoseshe boba bamanaminenga kuba’mba bekale jibiji na bumi bwawama. Abino byo byo ajinga kimye kyo ajinga panopantanda. Nanchi kechi mwasumininwa amba Yesu ne lelo jino byo byo aji byonkabye, ne kuba’mba umvwa kunekena kwenu nenyi? Bahebelu 4:15 baamba’mba Yesu ‘umvwa kunekena kwetu.’
Paulo byo anembele pa mambo a “mwiba mu mubiji,” wamwene kuba’mba bulume bwa Kilishitu ‘bwaikele [nobe tente, NW]’ pe aye. (2 Ko. 12:7-9) Wamwene kuba’mba Lesa wamuzhikijila kupichila mwi Kilishitu, byonkatu muntu uji mu tente byo azhikijilwa ku mvula. Byonka byajinga Paulo, ne atweba kechi twafwainwa kwikala banekena ne kulekatu makatazho na kubiwa ne. Pa kuba’mba twikale bakosa ku mupashi, twafwainwa kwingijishanga bintu byonse bitunengezhezha Yehoba kupichila mu kipwilo kyanji kya panopantanda. Twakonsha kwingila papelela bulume bwetu bwa bumuntu ne kuketekela kya kine mwi Yehoba kuba’mba witutangijilanga. Umvwe twamona bulume bwa Lesa byo bwitukwasha mu kunekena kwetu, tukamba byonka byaambile Paulo amba: “Byo nji wanekena, byo byo nji ke wakosa.”—2 Ko. 12:10.
[Kipikichala pa peja 3]
Paulo watwajijile na kulomba kwi Yehoba kuba’mba amutangijile mu mwingilo wanji
[Kipikichala pa peja 5]
Mfumu Davida wabikile Yoaba pa kifulo kya bukulumpe bwa nzhita
[Kipikichala pa peja 5]
Yoaba waipaile mukwabo ye elwishishenga nanji aye Amasa
[Kipikichala pa peja 6]
Bakulumpe mu kipwilo betumwesha mu butemwe Baibolo byo akonsha kwitukwasha kuchinchika makatazho etu