Kokelainga Buntangi Bwa Yehoba

“Kutemwa Lesa ko ko kuno, amba, tulame mikambizho yanji: kabiji mikambizho yanji kechi yakatazha ne.”—1 YOA. 5:3.

1, 2. (a) Mambo ka bantu bavula lelo jino kyo bakaina kwibatangijila? (b) Nanchi bantu bakana kwibatangijila kine betangijila bene bunke bwabo nyi? Londololai.

BANTU bavula lelo jino kechi bakeba kwibabula bya kuba ku bakwabo ne. Bantu babula kukeba kwibabula ku bakwabo bya kuba baji na muteeto wa kuba’mba, “kechi nafwainwa kuleka muntu ambule bya kuba ne.” Nanchi kine bano bantu beubilatu bintu bunke bwabo nyi? Ine kwalepeshatu! Bano bantu bavula balondela mizhilo ya bantu bakwabo bavula ‘bepashañanya na ba panopantanda.’ (Loma 12:2) Mu kifulo kya kwiubilanga bintu bunke bwabo, bekala “bakalume ba bubole,” monka mwaambila byambo bya mutumwa wa bwina Kilishitu Petelo. (2 Pe. 2:19) Benda “monka mwayila musango wa panopantanda, monka musakila mfumu wa ba lūsa lwa mu mwela,” Satana Diabola.—Efi. 2:2.

² Nembi umo witotele’mba: “Amiwa kechi nkokela bansemi bami, musapwishi, mufunjishi wa Bahindu, nangwa Baibolo kuba’mba imbulenga byo nafwainwa kulangulukanga ne.” Kya kine kuba’mba bamo bakonsha kubula kwingijisha bulongo buntangi bwabo kya kuba twaleka ne kwibakokela. Pano nanchi kukana lutangijilo jo jishinda jawama nyi? Umvwe twatangako pacheche pa mitwe imo ya mu pepala wa byambo, tutana kuba’mba bantu balengulula bingi buntangi. Ke kya bulanda bingi pa kutana kuba’mba kino kimye kyafwainwa bantu kutangijilwanga, bavula po po babena kukana lutangijilo.

Byo Tumona Buntangi

3. Bena Kilishitu ba mu myaka kitota kitanshi bamwesheshe byepi amba kechi balondelangatu mu bwilube bibambilanga bantangi ba mu kafulumende ne?

³ Atweba bena Kilishitu kechi tuji byonka biji bantu ba ino ntanda ne. Kechi tulondelatu bintu byo betwambila kuba kwa kubula kuyuka bishinka ne. Kimye kimo tukana kulondela bantu byo betubula nangwatu kya kuba baji mu buntangi. Byo byaubile ne bena Kilishitu bajingako mu myaka kitota kitanshi. Kya kumwenako, batumwa byo bebakambizhizhe kuleka kusapwila, kechi balondejile bibakambizhizhe ñanga mukatampe ne bantu bakwabo ba mu kafulumende bajinga lubaji lwa kije kya Saniedilini ne. Kechi basankijilepo byubilo byawama pa kuba’mba balondele buntangi bwa bantu ne.—Tangai Byubilo bya Batumwa 5:27-29.

4. Bya kumwenako ka biji mu Binembelo bya Kihebelu bimwesha’mba bantu ba Lesa bavula kechi balondejile mashinda a bantu bavula ne?

⁴ Bakalume bavula ba Lesa bajingako kimye kya kwa Yesu saka kikyangye kufika nabo byo byo baubile byonkabye. Kya kumwenako, Mosesa ‘wakaine kutelwa bumwana ku mwana Felo: wasalulwileko kumanama pamo ne bantu ba Lesa,’ nangwa kya kuba kino kyaletele “bukaji bwa mfumu.” (Hebe. 11:24, 25, 27) Yosefwa wakaine kulenga mambo na muka Potifwalo wakebele kulaala nanji, awo wajinga na bulume bwa kushinkanya ne kumuletela Yosefwa makatazho. (Nte. 39:7-9) Danyela ‘wapwishishe mu muchima wanji amba kechi ukezhilulula na mutundu wa kajo kawama kajapo mfumu ne,’ nangwa kya kuba kechi kyapelele mukulumpe wa bantungu ba mu Babilona kwitaba ne. (Da. 1:8-14) Bino bya kumwenako bimwesha’mba kufumatu ku kala, bantu ba Lesa baimenatu pa kuba byawama, nangwatu pafwe nzovu byepi. Kechi bakokejile bantu bamo byo bebambijile kuba na mambotu a kukeba kwibatokesha ku muchima ne. Ne atweba kechi tukokela ne.

5. Atweba tumona byepi buntangi kupusanako na bimona bantu ba ino ntanda?

⁵ Kuchinchika kwetu kechi kumwesha amba tuji na bitala ne. Kabiji kechi tuji pamo nobe boba bantu basatuka ne kumwesha’mba bashikwa kafulumende ujipo ne. Atweba tukebesha bingi kukokela buntangi bwa Yehoba kukila bwa bantu. Umvwe muzhilo wa bantu wapusana na muzhilo wa Lesa, atweba kechi kitukatazha kumona muzhilo ye twafwainwa kulondela ne. Byonka byajinga batumwa ba mu myaka kitota kitanshi, ne atweba tukokela Lesa kukila bantu.

6. Mambo ka o kyawamina kimye kyonse kukokela mikambizho ya Yehoba?

⁶ Ki ka kitulengela kukokela buntangi bwa Lesa? Tulondela byambo byanembwa pa Byambo bya Mana 3:5, 6 amba: “Ketekela mwi Yehoba na muchima wobe yense, ne kuta muchima ku milangwe yobe obe mwine ne. Umuvulukenga konse konse ko uya ne aye ukakolwela mashinda obe.” Twayukishatu kuba’mba kyonse Lesa kyo akeba’mba tube, kitulengela kumwenamo byawama. (Tangai Mpitulukilo ya mu mizhilo 10:12, 13.) Kya kine, Yehoba wilumbulwile mwine ku bena Isalela amba: “Yenka wimufunjisha’mba mukamwenemo byawama, kabiji wimutangijila mu jishinda jo mwafwainwa kuyamo.” Kepo anungilepo’mba: “Mama! inge mwakokejile mikambizho yami, inge mutende wenu waikajile nobe mukola, kabiji inge bololoke bwenu bwaikajile nobe manyaki a pa kalunga ka mema.” (Isa. 48:17, 18) Twaketekela bino byambo. Twasumininwa amba tumwenamo bingi inge twakokela mikambizho ya Lesa.

7. Twafwainwa kuba byepi umvwe twabula kumvwisha mwatala mukambizho uji mu Mambo a Lesa?

⁷ Tulondela buntangi bwa Yehoba ne kumukokela nangwatu kya kuba kechi twaumvwisha mwatala mizhilo imo yanembwa mu Mambo anji ne. Kechi tulondelatu mu bwilube ne, bukishinka bo bulengela. Kimwesha’mba twaketekela kya kine amba Yehoba wayuka bintu bituwamina. Kabiji lukokelo lwetu lumwesha butemwe bwetu, mambo mutumwa Yoano wanembele’mba: “Kutemwa Lesa ko ko kuno, amba, tulame mikambizho yanji.” (1 Yoa. 5:3) Bino kuji ne lubaji lukwabo lo tumwesheshamo lukokelo lo twafwainwa kubula kulubamo ne.

Kwikala na Maana Alumbuluka a Kupima ne Kuyuka Bintu

8. Kwikala na ‘maana alumbuluka a kupima’ kwa kwatankana byepi na kukokela buntangi bwa Yehoba?

⁸ Baibolo witubula’mba twafwainwa kwikala na ‘maana alumbuluka a kupima ne kuyuka byawama ne byatama.’ (Hebe. 5:14) Onkao mambo, kikonkwanyi kyetu kechi kya kukokelatu mizhilo ya Lesa kwakubula kuyuka mo yatala ne. Mu kifulo kya byobyo, twafwainwa kwingijisha mizhilo ya Yehoba kuba’mba ‘tuyuke byawama ne byatama.’ Twafwainwa kuyuka mashinda a Yehoba kyo awamina, pa kuba’mba twambe byonka byaambile nyimbi wa masalamo amba: “Mizhilo yenu yanembwa mukachi kami.”—Sala. 40:8.

9. Twakonsha kulengela byepi jiwi ja mu muchima wetu kuyila monka mwayila mizhilo ya Yehoba, kabiji mambo ka o kyanemena kuba bino?

⁹ Pa kuba’mba tuyuke buneme bwa mizhilo ya Lesa byonka byaubile nyimbi wa masalamo, twafwainwa kulanguluka langulukanga pa byo tutanga mu Baibolo. Kya kumwenako, umvwe twafundapo bikebewa bimo bya Yehoba, twakonsha kwipuzha’mba: ‘Mambo ka uno mukambizho nangwa jifunde kyo jawamina? Mambo ka o nafwainwa kukokela? Bintu ka byatama byamwekela boba balengulula lujimuno lwa Lesa mu bino bintu?’ Umvwe jiwi ja mu muchima wetu jayila monka mwayila mashinda a Yehoba, kiketulengela kufuukula bintu monka mukebela muchima wanji. Kitulengela ‘kuyuka mwayila kyaswa muchima wa Nkambo,’ kepo ne kukokela. (Efi. 5:17) Kino kechi kyapela ne.

Satana Ukeba Konauna Buntangi bwa Lesa

10. Ñanyi jishinda jimo Satana jo akeba konawinamo buntangi bwa Lesa?

¹⁰ Satana waeseka myaka yavula bingi kukeba konauna buntangi bwa Lesa. Muchima wanji wa bukitolwele umwekela mu mashinda avula. Kya kumwenako, kubula kunemeka mizhilo ya Lesa yaamba pa masongola. Bamo basalapo kwikala pamo kwa kubula kwisongola, kabiji bakwabo nabo bakeba kumonapo mashinda amo a kupwishishamo masongola na bena kwabo. Bano bantu bakonsha kwitaba byaambile nkaizhi wamukazhi umo wa mu mafilimu amba: “Kechi kyapela wa mulume nangwa wa mukazhi kwikala na mukwabo wa mu masongola umotu ne.” Kabiji wanungilepo’mba: “Nkyangye kumonapo wa mulume nangwa wa mukazhi wa kishinka nangwa ukeba kwikala wa kishinka ku mukwabo wa mu masongola ne.” Kabiji mwanamulume nkaizhi wa mu mafilimu waya bingi nkuwa byo amwene kuba’mba masongola anji apwa waambile’mba: “Nazhinauka bingi kuba’mba muntu wakonsha kwikala na mukwabo wa mu masongola mu myaka ya bumi bwanji bonse.” Twafwainwa kwiipuzha atweba bene amba: ‘Nanchi ndondela buntangi bwa Yehoba mu bya masongola nyi, inyi ndanguluka byonka bilanguluka bantu ba ino ntanda amba masongola kechi afwainwa kubanda ne?’

11, 12. (a) Mambo ka o kyakonsha kushupila bakyanyike kukokela buntangi bwa Yehoba? (b) Ambaipo kya kumwenako kimwesha makatazho aji mu kubula kulondela mizhilo ne mafunde a Yehoba.

¹¹ Nanchi wi wakyanyike uji mu jibumba ja Yehoba nyi? Umvwe ibyo, Satana ukeba obewa kulanguluka amba buntangi bwa Yehoba bwatama. “Bya lwiso lwa bwanyike” ne bikukanjikizha kuba bakwenu byakonsha kukulengela kumona’mba mizhilo ya Lesa yashupa kulondela. (2 Timo. 2:22) Kange wikale na ino milanguluko ne. Esekanga na ngovu kumona buwame bwa mizhilo ya Lesa. Kya kumwenako, Baibolo wakubula’mba ‘china bulalelale.’ (1 Ko. 6:18) Pa mambo a kino nakyo, iipuzhe obe mwine amba: ‘Mambo ka uno mukambizho kyo awamina? Buwame ka bo nafwainwa kumwenamo inge namukokela?’ Wakonsha kuyukapo bamo balengulwile luno lujimuno lwa Lesa kabiji ne byo bafumyamo kalulu kuvimba meso. Abya luno baikala ba lusekelo nyi? Nanchi baikala bwikalo bwawama kukila byo baikele byo bajinga mu jibumba ja Yehoba nyi? Nanchi baikala kya kine balusekelo kukila bakalume ba Lesa nyi?—Tangai Isaya 65:14.

¹² Akimonai byambo byaambile mwina Kilishitu umo kala wa jizhina ja Sharon amba: “Na mambo a kubula kulondela mizhilo ya Yehoba, natambwilamotu kikola kya Janga Tuyenga. Mvuluka javula myaka yavula yo naikele wa lusekelo byo naingijilanga Yehoba.” Wayukile’mba kyatamine kulala mizhilo ya Yehoba kabiji ne kuba’mba wafwainwe kwiinemeka bingi. Mizhilo ya Yehoba itulamawizha. Sharon wafwile panyumatu ya kupitapo milungu itanu na ibiji kufuma po anembejile bino byambo byaambiwapo. Byonka byamwesha ano malwa o apichilemo, kafwako nangwa kimo kyawama Satana kyo akonsha kupana ku boba bekala lubaji lwa ino ntanda ibi ne. Byo aji “shanja bubela,” ulayañana bingi bintu byavula, pano kechi ufikizha milaye yanji ne, byonka byo abujile kufikizha mulaye ye alaile Evwa. (Yoa. 8:44) Kya kine, kyawama kimye kyonse kukokela buntangi bwa Yehoba.

Chinuzhukai Kwikala na Muchima wa Kwitolwela

13. Jishinda ka jimo jo twafwainwa kuchinuzhukilamo kwikala na muchima wa kwitolwela?

¹³ Pa kuba’mba tulondele buntangi bwa Yehoba, twafwainwa kuchinuzhuka kwikala na muchima wa kwitolwela. Kwitota kwakonsha kwitulengela kwimona’mba kechi twafwainwa kutangijilwa ku muntu uji yense ne. Kya kumwenako, twakonsha kukana lujimuno lupana boba batangijila bantu ba Lesa. Lesa wabikako lunengezho lwa jibumba ja kalume wa kishinka ne wa maana upana kajo ka ku mupashi pa kimye kyafwainwa. (Mat. 24:45-47) Twafwainwa kwipelula ne kuyuka’mba jino jo jishinda Yehoba jo abena kulaminamo bantu banji lelo jino. Ikalai byonka byajinga batumwa bakishinka. Baana ba bwanga bamo byo balefwilwe ne kuleka kulondela Yesu, Yesu waipwizhe batumwa amba: ‘Ne anweba nenuwa musaka kufumako nyi?’ Petelo wakumbwile’mba: “Nkambo, tukaya kwi ñanyi? Byambo bya bumi bwa myaka muji nabyo anweba.”—Yoa. 6:66-68.

14, 15. Mambo ka o twafwainwa kwipelula ne kulondela lujimuno lwa mu Baibolo?

¹⁴ Kulondela buntangi bwa Yehoba kwavwangamo kubila monka mwaambila lujimuno luji mu Mambo anji. Kya kumwenako, jibumba ja kalume wa kishinka ne wa maana jitujimuna amba “tulabenga ne kukenkenta kasa tutekanya.” (1 Tesa. 5:6) Luno lujimuno lwanema bingi mu ano moba apelako muji bantu bavula ‘betemwa abo bene, ne kutemwa mali.’ (2 Timo. 3:1, 2) Nanchi uno muteeto wakumbanamo ne atweba wakonsha kwitusambukila nyi? Ee. Kwibikila bikonkwanyi bya ino ntanda kwakonsha kwitulengela kulaala tulo twa ku mupashi, nangwa kimo kimye twakonsha kwikala na muchima wa kukeba bintu bya ku mubiji. (Luka 12:16-21) Onkao mambo, kyawama kulondela byaamba lujimuno lwa mu Baibolo ne kuchinuzhuka bwikalo bwatama bwasampukila ne pakatele mu ino ntanda ya kwa Satana!—1 Yoa. 2:16.

¹⁵ Kajo ka ku mupashi kanengezha jibumba ja kalume wa kishinka ne wa maana kapanwa ku bipwilo kupichila mu bakulumpe batongolwa mu kipwilo. Baibolo witukambizha’mba: ‘Kokelai bemutangijila ne kwibanekenena: mambo abo babena kwimukenkentela na mambo a kulama michima yenu, byo baketotolwela na mambo ayo: nasaka namba, bekyube kino na lusekelo, kechi na bulanda ne: mambo akya kechi kikemuletela kyawama ne.’ (Hebe. 13:17) Nanchi kino kilumbulula’mba bakulumpe mu kipwilo kechi balenga bilubo nenyi? Ine! Lesa umona bumbulwakoloka bwabo kukila bibamona muntu uji yense. Nangwa byonkabyo, ukeba atweba kwibanekenena. Umvwe saka tumvwañena pamo na bakulumpe mu kipwilo, nangwa kya kuba nabo bambulwakoloka, kimwesha’mba tukokela buntangi bwa Yehoba.

Kwipelula kyo Kwanemena

16. Twakonsha kumunemeka byepi Yesu amba ye Mutwe wa kipwilo kya bwina Kilishitu?

¹⁶ Kimye kyonse twafwainwa kuvulukanga amba Yesu ye Mutwe wa kine wa kipwilo. (Kolo. 1:18) Kino kyo kishinka kimo kitulengela kwipelula ne kunekenena lutangijilo lwa bakulumpe batongolwa mu kipwilo, ‘kasa twibanemekesha.’ (1 Tesa. 5:12, 13) Bakulumpe mu kipwilo nabo bafwainwa kumwesha’mba banekenena kupichila mu kwamba bulongo mambo a Lesa mu kipwilo, kechi kwamba milanguluko yabo bene ne. ‘Kechi bapitaila pa bintu byanembwa’ ne kwamba milanguluko yabo ne.—1 Ko. 4:6.

17. Mambo ka muchima wa kwitota kyo atamina?

¹⁷ Bonse mu kipwilo bafwainwa kujimuka kuchina kwitota bene. (Mana. 25:27) Kino kyo kitewa kyafwilemo mwana wa bwanga umo ye asambakene mutumwa Yoano. Wanembele’mba: “Diotelefesa, aye watemwa bukulumpe bwa mwi abo, kechi witutambula ne. Onkao mambo, umvwe naiya koko, nkavuluka mingilo yanji yo auba, ya kwitunena na byambo bibi.” (3 Yoa. 9, 10) Ne atweba lelo jino twakonsha kufunjilako ku kino kintu. Twafwainwa kuleka milanguluko yatama ya kwitota umvwe tuji nayo. Baibolo witubula’mba: “Awa witota kulutwe ukonaika, kabiji awa uji na muchima wilundumika kulutwe ukapona.” Aba balondela buntangi bwa Lesa bafwainwa kuchinuzhuka kitewa kya kwitota, mambo aba betota balengeshiwa bumvu.—Mana. 11:2; 16:18.

18. Ki ka kyafwainwa kwitukwasha kukokela buntangi bwa Yehoba?

¹⁸ Ee kine, esekainga na bulume bwenu bonse kuchinuzhuka muchima wa ino ntanda wa kwitolwela, kabiji kokelainga buntangi bwa Yehoba. Kimye kyonse ikalainga na lusanchilo ne kulangulukanga pa mapesho akatampe o muji nao mu kwingijila Yehoba. Byo mwaikala kala bantu ba Lesa kimwesha’mba wimukoka na mupashi wanji wazhila. (Yoa. 6:44) Kange mumonenga bulunda bo muji nabo na Lesa nobe bwakukaisha kaishatu ne, kizhila. Ingilainga papelela bulume bwenu mu mbaji yonse ya bwikalo bwenu mumweshenga amba mwakana kwikala na muchima wa kwitolwela, kabiji ne kuba’mba mulondelanga buntangi bwa Yehoba.

Mubena Kukivuluka Nyi?

• Kukokela buntangi bwa Yehoba kwavwangamo ka?

• Kwikala na maana alumbuluka a kupima bintu kwaesakana byepi na kukokela buntangi bwa Yehoba?

• Mashinda ka Satana mo akebela konawina buntangi bwa Lesa?

• Mambo ka kwipelula kyo kwanemena mu kukokela buntangi bwa Yehoba?

[Kipikichala pa peja 18]

“Atweba twafwainwa kukokela Lesa kukila bantu”

[Kipikichala pa peja 20]

Kyawama kimye kyonse kulondelanga mizhilo ya Lesa