Byo Tufunjilako Kwi Yesu

Pa bya Kwikala na Bantu

Mambo ka o twafwainwa kubilanga bakwetu lusa?

Nanchi mubila bantu lusa nangwa kya kuba abo kechi bemubila lusa nenyi? Umvwe tukeba kulondela byaubanga Yesu na bantu, twafwainwa kubilanga bantu lusa kubikakotu ne boba betushikwa. Yesu waambile’mba: ‘Kana anweba mwatemwa bonka bemutemwa, mukamwenamo lutakaiko lwa byepi? Mambo ne bandengamambo nabo batemwa bebatemwa . . . Kabiji temwai balwanyi benu, . . . , kabiji mukekala ke baana ba Mwine Wakila: mambo aye wibobila lusa babula kusanta ne babi.’—Luka 6:32-36; 10:25-37.

Mambo ka o twafwainwa kulekelako bakwetu mambo?

Umvwe twalenga mambo, tukeba Lesa kwitulekelako mambo. Yesu wafunjishe amba kijitu bulongo kulomba Lesa kwitulekelako mambo. (Mateo 6:12) Pano bino, Yesu waambile ne kuba’mba Lesa uketulekelakotu mambo etu posotu netuwa twalekelako bakwetu mambo abo. Waambile’mba: “Umvwe mwibalekelako bantu mambo abo, ne Shenu wa mwiulu naye ukemulekelako ne mambo enu pamo. Kabiji umvwe kechi mwibalekelako bantu mambo abo ne, ne Shenu wa mwiulu naye kechi ukemulekela mambo enu ne.”—Mateo 6:14, 15.

Nga bisemi byakonsha kwikala byepi bya lusekelo?

Nangwa kya kuba Yesu kechi wasongwele ne, twakonsha kufunjilako byavula kwi aye pa mambo a byo twakonsha kulengela kisemi kyetu kwikala kya lusekelo. Twafwainwa kumwena kwi aye byo aambilenga ne byo aubilenga bintu. Akilangulukai pa bino bishinka bisatu:

1. Mwanamulume wafwainwa kutemwa mukazhanji pamo nobe mubiji wanji aye mwine. Yesu wapaine kya kumwenako banabalume kyo bafwainwa kulondela. Waambijile baana banji ba bwanga amba: “Mukambizho mupya nemupa anweba, namba mwitemwe anwe bene na bene.” Kwitemwa kupela pi? “Byonka byo nemutemwa amiwa, ne anweba mwitemwe anwe bene na bene.” (Yoano 13:34) Pa kwingijisha uno mukambizho ku banabalume, Baibolo waamba’mba: “Anweba banabalume, temwai bakazhi benu, byonka byo atemenwe Kilishitu kipwilo, ne kwipana mwine na mambo a akyo . . . Byonkabyo byo byo kyafwainwa banabalume nabo kutemwa bakazhi babo bene pamo nobe mibiji yabo abo bene. Awa watemwa mukazhanji, witemwa ne aye mwine: mambo kafwako muntu nangwa umo ushikwapo mubiji wanji mwine ne; kana kumujisha ne kumulela bulongo, byonka byo oba Kilishitu na kipwilo.”—Efisesa 5:25, 28, 29.

2. Bamulume ne mukazhi bafwainwa kwikala bakishinka ku mukwabo wa mu masongola. Kwilaala na muntu wabula mwina kobe ke mambo kwi Lesa, kabiji kuba bino kwabanya bisemi. Yesu waambile’mba: “Kechi mwatangilepo’mba . . . kyo kyo akalekela muntu shanji ne inanji, ukalamachila ku mukazhanji; ne abo babiji bakekala ke mubiji umotu, nenyi? Byonkabyo pano kechi baji babiji ne, ke mubiji umotu. Onkao mambo akya kyasambakanya Lesa, muntu kechi ekyabanye ne. . . . Kabiji nemwambila namba, wa kumukana mukazhanji, pa kubula mambo a bukende, ne kusongola mukwabo, wauba bukende: ne aye wamusongola awa ye bakana, aye naye wauba bukende.”—Mateo 19:4-9.

3. Baana bafwainwa kunekenena bansemi yabo. Nangwa kya kuba Yesu wajinga waoloka kabiji bansemi banji bajinga bambulwakoloka, wibakokelanga bingi. Baibolo waamba pe Yesu byo akijinga na myaka ya kusemwa 12 amba: “Ponkapo wayilenga nabo [bansemi banji] ne kufika wafikile ku Nazala; kasa ebanekenena.”—Luka 2:51; Efisesa. 6:1-3.

Mambo ka o twafwainwa kwingijisha ano mafunde?

Pa mambo a lufunjisho lo afunjishe baana banji ba bwanga, Yesu wibambijile’mba: “Inge anweba mwibiyuka bino, mwatokwa inge mwibyuba.” (Yoano 13:17) Pa kuba’mba tumweshe amba twibena Kilishitu bakine, twafwainwa kwingijishanga mafunde Yesu o etupele pa mambo a bya kwikala na bantu. Waambile’mba: ‘Pa kyo kino po po bakayukila bonse amba anweba mwi baana bami ba bwanga, inge mwitemwe anwe bene na bene.’—Yoano 13:35.

Umvwe mukeba kuyukilapo byavula, monai Kitango 14 kya buku wa Nanchi Baibolo Kine Ufunjisha’mba Ka?a

[Tubyambo twa mushi]

[Kipikichala pa peja 16]

Kishimpi kya kwa Yesu pa mambo a mwana waonawine bipe kitufunjisha buneme bwa kwikala na lusa ne kulekelako bakwetu mambo. —Luka 15:11-32.

[Kipikichala pa peja 17]

Bamulume ne mukazhi bafwainwa kwikala bakishinka ku mukwabo wa mu masongola