Byo Tufunjilako kwi Yesu

Pa bya Kwikala mu Kisemi

Mulanguluko ka wa Masongola Ulengela Kisemi Kwikala kya Lusekelo?

Masongola azhila. Yesu byo bamwipwizhe umvwe kyakonsheka kwikana, waambile’mba: “Kechi mwatangilepo’mba, Aye wibalengele ku ntendekelo, wibalengele mwanamulume ne mwanamukazhi ne kwamba’mba, Kyo kyo akalekela muntu shanji ne inanji, ukalamachila ku mukazhanji; ne abo babiji bakekala ke mubiji umotu, nenyi? Byonkabyo pano kechi baji babiji ne, ke mubiji umotu. Onkao mambo akya kyasambakanya Lesa, muntu kechi ekyabanye ne ... Wa kumukana mukazhanji, pa kubula mambo a bukende, ne kusongola mukwabo, wauba bukende: ne aye wamusongola awa ye bakana, aye naye wauba bukende.” (Mateo 19:4-6, 9) Umvwe bamulume ne mukazhi bakokela lujimuno lwa kwa Yesu ne kwikala bakishinka, bonse mu kisemi bakekala na lusekelo ne mutende.

Mambo ka Kutemwa Lesa kyo kuletela Lusekelo mu Kisemi?

Yesu waambile’mba: ‘Ukamutemwa Nkambo Lesa wobe na muchima wobe yense, ne na mweo wobe yense, ne na maana obe onse. Awo ye mukatampe, ye mukambizho mutanshi.’ Nga mukambizho mukatampe wa bubiji ye wepi? Yesu waambile’mba, “Ukatemwa mukwenu [ne ba mu kisemi] pamo byonka byo witemwa obe mwine.” (Mateo 22:37-39) Onkao mambo, kintu kileta lusekelo mu kisemi ke kwikala na bulunda bwakosa na Lesa mambo kumutemwa kwitulengela kutemwa bakwetu.

Bamulume ne mukazhi bakonsha kwiletela byepi lusekelo bene na bene?

Wamukazhi wikala na lusekelo umvwe mwatawanji ulondela byaubanga Yesu. Aye wipaine na muchima yense na mambo a kutemwa kipwilo, mukazhanji wa kifwanyikizho. (Efisesa 5:25) Yesu waambile’mba, ‘Mwana muntu kechi waishile’mba, bamwingijile ne poso amba ebengijile.’ (Mateo 20:28) Yesu kechi washintaukilanga nangwa kubukila bukaji bantu bo atangijilanga ne, baumvwanga bulongo kwikala nanji. (Mateo 11:28) Onkao mambo, banabalume bafwainwa kwingijisha lūsa lwabo mu jishinda jawamina kisemi.

Banabakazhi nabo bakonsha kufunjilako kwi Yesu. Baibolo wamba’mba: “Mutwe wa banabalume bonse ye Kilishitu” kabiji wanungapo ne kuba’mba: “Mutwe wa mwanamukazhi ye mulume wanji.” (1 Kolinda 11:3) Yesu kechi wamonanga kukokela Lesa kubula kumufwainwa ne. Wanemekele bingi shanji. Yesu waambile’mba: “Mbenakuba bya kumutokesha pa muchima moba onse.” (Yoano 8:29) Mwanamukazhi ukokela bumutwe bwa mwatawanji na mambo kutemwa ne kunemeka Lesa ulengela kisemi kwikala kya lusekelo.

Bansemi bakonsha kufunjilako ka ku muchima wajinga ne Yesu na banyike?

Yesu waikalanga pamo na banyike kabiji wibatele bingi muchima. Baibolo wamba’mba: “Yesu wibechile ko aji” ne kwamba’mba “Tulekai twana tucheche twiye kwi amiwa.” (Luka 18:15, 16) Pa kimye kimo bantu bakajipijilenga banyike babijikilenga pa lwitabilo lwabo mwi Yesu. Bino Yesu wibatakaikile bano banyike, ne kwambila bebakajipijilenga’mba: “Nanchi mukyangye kutanganyi, amba, Mu tunwa twa twanyike ne twana twa lukeke mo mwanengezhezhe kutota?”—Mateo 21:15, 16.

Banyike bakonsha kufunjilako ka kwi Yesu?

Yesu wibashijile banyike kyakumwenako kyawama kya kuta muchima ku bintu bya ku mupashi. Saka akijitu na myaka 12, “bamutaine mu nzubo ya Lesa kasa aikala mukachi ka bafunjishi, na kwibomvwa ne kwibepanguzha.” Ki ka kyamwekele? ‘Ne bonse bamumvwinenga bakuminyenga maana anji ne byo ebalondolwejilenga.’ (Luka 2:42, 46, 47) Bino maana ajinga ne Yesu kechi amulengejile kwilundumika ne. ‘Amulengejile kunemeka bingi bansemi. Baibolo witubula amba: ‘Wibanekenenanga.’—Luka 2:51.

Umvwe mukeba kuyukilako byavula monai kitango 14 mu buku wa Nanchi Baibolo Kine Ufunjisha’mba Ka?a

[Tubyambo twa mushi]