Funjishainga Baana Benu

Samwela Watwajijile Kuba Byaoloka

NANCHI mwakimonapo kala bantu saka boba byatama nyi?—a Samwela wibamwene. Waikalanga ku mpunzha ko mwakonsha kubula kulanguluka’mba kechi kwafwainwe kutanwa bantu baubilenga bintu byatama ne. Pajinga pa nzubo ya Lesa nangwa’mba mpunzha ya kupopwelapo mu muzhi wa Shilo. Pano twayai tumone, byo papichila myaka kukila pa 3,000, Samwela byo atendekele kwingijila mu uno tente kimye kyonse.

Samwela saka akyangye kusemwa ne, inanji aye Hana wakebeshe bingi kwikala na mwana. Byo ayanga ku nzubo ya Lesa, Hana walombelengapo pa kino kwi Lesa. Walombelenga na mukoyo, kya kuba bya tunwa byanji kasa bivwevwetatu. Kino kyalengejile ñanga aye Eli kulanguluka’mba wapendwa. Pa kuba byo aishile kuyuka’mba wajinga na bulanda bukatampe, Eli wamupesheshe ne kumwambila’mba: “Lesa wa Isalela akubile monka mwayila kyokya kyo wajikumulomba.”—1 Samwela 1:17.

Palutwe kacheche Samwela byo asemenwe, Hana watemenwe bingi kabiji ne kubula mwatawanji aye Elekana kuba’mba: ‘Samwela byo akasumukatu, nkamutwala ku nzubo ya Lesa namba akengijilenga Lesa konkakwa kikupu.’ Hana waubile monka mo aambijile! Pa kikye kimye Samwela saka ajitu na myaka nobe ina nangwa itanu.

Eli byo akotele, baana banji ba Hofini ne Finease kechi bapopwelejilenga Yehoba mu jishinda jawama ne. Batendekele ne kuba bulalelale na banabakazhi baingijilenga mwingilo wa kukibelo kya tente walusambakeno! Nga Eli wafwainwe kubapo ka pa kino?— Wafwainwe kwibakajipila ne kwibakanya kubula kubanga byobya bintu byatama.

Samwela wakomenenga saka abena kumonako byo baubilenga kabiji kyamweka wayukile ne byubilo byatama bya baana ba kwa Eli. Abya Samwela walondejile bino byubilo byabo byatama nyi?— Ine kwalepashatu, aye watwajijiletu na kuba byaoloka ne kulondela byonka byo bamufunjishe bansemi banji. O ene mambo, Yehoba kyo azhingijile Eli. Kabiji watumine ne ngauzhi kuya na kubula Eli pa mambo a Yehoba byo asakukakabisha kisemi kyanji, kikatakata baana banji bancha.—1 Samwela 2:22-36.

Samwela watwajijile kwingijila Lesa pamo ne Eli ku nzubo ya Lesa. Juba jimo, Samwela saka alaala, waumvwine muntu wamwita pa jizhina. Ponkapo, Samwela wayile lubilo kwi Eli, bino Eli wamwambijile’mba kechi nakwita ne. Kabiji byo bamwichile ja busatu, Eli wamwambijile Samwela kwamba’mba: “Bambenga mwane, anweba Yehoba; mambo kalume wenu ubena kuteleka.” Samwela byo aambile bino, kepo Yehoba aambile nanji. Nanchi mwayuka bintu Yehoba byo amubujile Samwela nyi?—

Lesa wamubujile Samwela nkebelo yanji ya kukabisha kisemi kya kwa Eli. Kabiji byo bwakile lukelo, Samwela wachiine kumubula Eli bya mubujile Yehoba. Eli wamwambijile Samwela amba: “Nakusashijila kwikimfya ne.” Kepo Samwela amubujile Eli byonsetu Yehoba byo ambile amba byo Akoba—byonkatu ngauzhi Yehoba byo abujile Eli. Kabiji Eli wakumbwile’mba: “Kino kintu kyafuma kwi Yehoba; mwine obe monka mo asakila.” Kyafuminemo, Hofini ne Finease baipaiwe, kabiji ne Eli naye wafwile.—1 Samwela 3:1-18.

Kabiji “Samwela wakomenenga, ne Yehoba wajinga nanji.” Pa kikye kimye, kyamweka Samwela wakijingatu mwanyike, kimye kyanema bingi mu bwikalo bwa bakyanyike. Mwalanguluka’mba kyapelele kwi Samwela kutwajijila kuba byaoloka nangwa kya kuba bakwabo kechi byo byo baubilenga nenyi?— Nangwa kya kuba kechi kyapelele kwi aye ne, Samwela waingijile Yehoba mu bukishinka mu bwikalo bwanji bonsetu.—1 Samwela 3:19-21.

Nga anweba mubena kubapo ka? Abya mukekala byonka byajinga Samwela, kufikatu ne byo mukakoma nyi? Nanchi mukatwajijila kuba byaoloka nyi? Abya mukatwajijila kukokela mafunjisho a mu Baibolo ne kumvwina bansemi yenu byo bemufunjisha nyi? Umvwe mwauba bino, mukalengela Yehoba ne bansemi benu kusangalala.

[Tubyambo twa mushi]

Mepuzho:

○ Bi ka byalengejile Samwela kutendeka kwingijila ku tente wa lusambakeno wa Yehoba?

○ Makatazho ka Samwela o apichilemo kokwa?

○ Bakyanyike bafwainwa kufunjilako kwi Samwela?