Mambo a Yehoba o Omi Bishinka Bikatampe Kufuma mu Buku wa Bubiji wa Lumwekesho

KULUTWE na lwendo bi ka bikebamwekela bantu ba panopantanda ne bapopweshi ba Yehoba? Nga Satana ne bandemona banji ki ka kikebamwekela? Mapesho ka akekala na bantu balukokelo mu Bukalama bwa Myaka Kiumbi Kimo bwa kwa Kilishitu? Mikumbu ya ano mepuzho ne akwabotu anema akumbulwa mu Lumwekesho 13:1–22:21.a Mu bibye bitango muji bimwesho byapelako 9 pa byobya 16 byamwene mutumwa Yoano ku mpelo ya myaka kitota kitanshi C.E.

Mutumwa Yoano wanembele’mba: “Watokwa awa utanga, ne abo bomvwa byambo bya mu buku wa bungauzhi buno, ne kwibilama abya byanembwamo.” (Lum. 1:3; 22:7) Kwingijisha byambo byo tutanga mu buku wa Lumwekesho mu bwikalo kwakonsha kwitulengela kupopwela Lesa na muchima yense ne kukosesha lwitabilo mwi aye ne mwananji, kabiji kwakonsha kwitulengela kwikala na luketekelo lwakosa lwa kimye kya kulutwe.b—Hebe. 4:12.

KWITULULWA KWA MICHIBA ITANU NA IBIJI YA BUKAJI BWA LESA

(Lum. 13:1–16:21)

Mu Lumwekesho 11:18 muji byambo bya kuba’mba ‘Mikoka yonse ya bantu yazhingijile, ne bukaji bwa [Lesa] bwamweka, ne kimye . . . kya kwibonauna abo bonauna ntanda.’ Kimwesho kya butanu na busatu kyalumbulula byubilo bya ‘lukinyama . . . wa nsengo jikumi ne mitwe itanu na ibiji’ walengejile Lesa kuzhingila.—Lum. 13:1.

Mu kimwesho kya butanu na buna , mutumwa Yoano wamwene “Mwana mukoko kasa aimana pa mutumba wa Ziona, ne baimana nanji bantu biumbi makumi jikumi ne ana ne biumbi bina.” Kabiji “bano bakujilwe mu bantu.” (Lum. 14:1, 4) Kepo aumvwine jiwi ja kwa malaika. Mu kimwesho kyalondejilepo, Yoano wamwene “bamalaika batanu na babiji kasa baji na myalo itanu na ibiji.” Yehoba wibakambizhe bamalaika kwitulwila ‘michiba itanu na ibiji ya bukaji bwanji’ pa ntanda iji mu maboko akwa Satana. Aye michiba itanu na ibiji imenako byambo bya kusopesha bantu pa mambo a juba ja bukaji bwa Yehoba (Lum. 15:1; 16:1). Abye bimwesho bibiji bitubula buchibamambo bwa Bufumu bwa Lesa bwa malwa a busatu ne kwimba kwa ntolompita ya butanu na bubiji.—Lum. 11:14, 15.

Mepuzho a mu Binembelo Akumbulwa:

13:8—Nanchi “buku wa bumi wa aye Mwana mukoko”ke buku wa mutundu ka? Auno ke buku wa kifwanyikizho mwanembwa mazhina a bakalamanga pamo ne Yesu Kilishitu mu Bufumu bwa mwiulu. Mwavwangwa ne mazhina abena Kilishitu bashingwa bakiji panopantanda, abo baji na luketekelo lwa kwikala mwiulu.

13:11-13—Lukinyama wa nsengo wingila byepi nobe nsuñunyi ne kulenga mujilo kufuma mwiulu ne kuponena pano panshi ku meso a bantu? Awe lukinyama wa nsengo ibiji ke bukalama bwa Anglo-American buji na bulume panopantanda ponse. Bwamba nobe nsuñunyi mambo bukanjikizha bantu kukokela ne kwibazakamisha na byambo bya kwiboba kyatama. Kabiji buponesha mujilo pano panshi kufuma mwiulu mambo bwingila nobe ngauzhi wa Lesa waleta mutende pa kupwisha makondo abiji a ntanda yonse ajingako mu myaka kitota kya bu 20 ne kufumyapo bukalama bwabujilenga kulama bulongo bantu.

16:17—“Mwela” wa mutundu ka ye baitulwijilepo muchiba wa butanu na bubiji? Awe “mwela” ke milanguluko ya kwa Satana, “ye mupashi wingila ne pano mu bantu ba milengulwila.” Bantu balabama na bya ino ntanda babena kupema uno mwela wa kifwanyikizho uji mu ino ntanda ibi ibena kulamwa na Satana.—Efi. 2:2.

Lufunjisho Kotuji:

____

13:1-4, 18. “Lukinyama” wimenako makafulumende a bantu abena kufuma “mu kalunga,” ko kuba’mba mu bisaka bya bantu. (Isa. 17:12,13; Da. 7:2-8, 17) Awe lukinyama wa kwa Satana kabiji kwi Satana ko ko afumya bulume. Uji na nambala 666, ilumbulula kubula kulumbuluka. Kumuyukisha bulongo byo alumbulula uno lukinyama kwitulengela kubula kongolwa nangwa kumupopwela byonka byuba bantu ba panopantanda.—Yoa. 12:31; 15:19.

13:16, 17. Bwikalo ano moba bwakatazha bingi, bino kechi twafwainwa kuswisha lukinyama kwitutangijila ne, kikale tubena “kupota nangwa kupotolola.” ‘Kutambula kayukilo ka lukinyama pa kuboko kwenu kwa kilujo, nangwa pa kilungi kyenu’ ko kuleta kisonso kya kumuswisha lukinyama kwitutangijila mu byo tuba pa juba pa juba nangwa pa kufuukula bya mu bwikalo.

14:6, 7. Byambo bya kwa malaika bituvululako kuba’mba twafwainwa kupayankana na kusapwila mambo awama a Bufumu bwa Lesa. Kabiji ne kukwasha bo tufunjisha Baibolo kwikala na moyo wa kwakamwa Lesa ne kumupa lukumo.

14:14-20. Kimye kya “kunowa bya panopantanda,” ko kuba’mba kya kukonkanya bakapuluka byo kikapwa, malaika po po akataya “muñanzañanza wa panopantanda,” monka “mu kya kufiinamo binyu, kyonkakya kikatampe kya bukaji bwa Lesa.” Muñanzañanza, ko kuba’mba bukalama bwa makafulumende a bantu boba pofula michima kwi Satana apanga “bizanze” bya bipangwa bya bubi, akonaunwatu shata. Twafwainwa kumona kuba’mba kechi twaongolwa ku muñanzañanza wa panopantanda ne.

16:13-16. ‘Byambo bya ngauzhi wa bubela’ bimenako mafunjisho aba ndemona abena kulengela bamfumu bapanopantanda kubula kulapila pa kumona kwitululwa kwa michiba ya bukaji bwa Lesa, pa kuba abo bakosesha michima kabiji batwajijila na kusatukila Yehoba.—Mat. 24:42, 44.

16:21. Mpelo ya ino ntanda byo yafwenya kala pepi, kutaya mbila kuba’mba Yehoba ukonauna buno bwikalo bwa kwa Satana bekufwanyikizha ku mvula wa mabwe, ko kuba’mba mu kutaya ino mbila mwavwangwa byambo byanema bya lonaiko. Bino bantu bakitwajijila na kuba mwenga Lesa.

MFUMU WASHINDA UBENA KULAMA.

(Lum. 17:1–22:21)

“Babilona Mukatampe,” bufumu bwa ntanda yonse bwa bupopweshi bwa bubela ye inanja bya bunya bya ino ntanda yatama ya kwa Satana. Mu kimwesho kya bujikumi na bumo bamufwanyikizhe ku “pite mukatampe” ‘waikala pa lukinyama wachijisha.’ Lukinyama wa musenda ukamwalukamo ne kumonauna kwingijisha “nsengo jikumi.” (Lum. 17:1, 3, 5, 16) Uno pite ba mufwanyikizha ku “muzhi mukatampe.” Mu kimwesho kyalondejilepo malaika wabijikile kupona kwanji ne kukambizha bantu ba Lesa amba “lupukaimo mwi aye.” Konaunwa kwa uno muzhi mukatampe kukalengela bavula kumujila. Pano bino mwiulu mukekala kusangalala mambo mukekala ‘masongola a Mwana mukoko.’ (Lum. 18:4, 9, 10, 15-19; 19:7) Mu kimwesho kya bujikumi na busatu awa waikala pa “mbili utoka” ubena kuya na kulwa nkondo na ba mu mikoka yonse ya bantu. Ye ukapwisha bubi panopantanda paangela Satana.—Lum. 19:11-16.

Ki ka kikamwekela “awa mulolo wa kala, ye Diabola ne Satana”? Kabiji ñanyi kimye kyo bakamutaya “mu kizhiba kya mujilo”? Ano mepuzho akumbulwa mu kimwesho kya bujikumi na buna. (Lum. 20:2, 10) Bimwesho bibiji byapelako bitulengela kuyuka bikekala bwikalo mu Myaka Kiumbi Kimo. Ku mpelo ya “lumwekesho,” Yoano wamwene ‘mukola wa mema a bumi kasa apita mukachi ka mukwakwa wa mu muzhi’ kabiji yense “waumvwa kilaka” waitwa.—Lum. 1:1; 22:1, 2, 17.

Mepuzho a mu Binembelo Akumbulwa:

17:16; 18:9, 10—Mambo ka “bamfumu ba panopantanda” o bakajijila ne kutonga muzhi ye bakalukilamo ne kumonauna? Bakamujila ne mabingo na mambo a bujimbijimbi bwabo. Panyuma ya kuba Babilona Mukatampe waonaunwa, bamfumu ba panopantanda bakamulaasa. Mambo walengela bantu kumona byubilo byatama nobe bijitu bulongo. Kabiji Babilona Mukatampe wibakwasha kutwezha bakyanyike nkito ya bushilikale. Kunungapo, waingila mwingilo mukatampe kuba’mba bantu bekale balukokelo.

19:12—Mambo ka o kyaikela kuba’mba Yesu yewijiyukatu aja jizhina jabula kutongolwa? Kyamweka nobe jino jizhina ke kifulo nangwa mingilo yanema nabiji yatongolwa mu Isaya 9:6 yo abena kwingila mu juba ja Nkambo. Kafwako mukwabo wijiyuka ne, mambo ino mingilo yanema kabiji aye ye wayuka bya kwiingila. Nangwa byonkabyo, Yesu wasala bakwingila nabo ino mingilo aba baji mu jibumba ja musongwa, ko kuba’mba ‘wibanemba jizhina janji jipya.’—Lum. 3:12.

19:14—Bañanyi bakalondela Yesu ku nkondo ya Amagedonyi? Mu ano “mazhita a mwiulu” muji bamalaika ne bashingwa batambula kala kilambu kya bumi bwa mwiulu bo bakalondela Yesu mu nkondo ya Lesa.—Mat. 25:31, 32; Lum. 2:26, 27.

20:11-15—Mazhina a bañanyi anembwa mu “buku wa bumi”? Mwanembwa mazhina a boba bakatambula bumi bwa myaka ne myaka, ko kuba’mba bena Kilishitu bashingwa, jibumba jikatampe ne bakalume ba Lesa bakishinka bakasangulwa mu “lusanguko lwa baoloka.” (Byu. 24:15; Lum. 2:10; 7:9) Aba bakasangulwa mu ‘lusanguko lwa babula koloka’ mazhina abo akanembwa mu “buku wa bumi” umvwe bakakokele “byonkabya bintu byanembwa mu aa mabuku” akekalako mu Myaka Kiumbi Kimo. Bino aa mazhina anembwa mu ao mabuku bakonsha kwiafuuta. Mazhina a bashingwa ekala kikupu mu buku umvwe bafwatu na bukishinka bwabo. (Lum. 3:5) Mazhina aboba bakatambula bumi bwa myaka panopantanda akanembwa kikupu mu buku wa bumi umvwe bashinda lweseko lwa bubiji ku mpelo ya Myaka Kiumbi Kimo.—Lum 20:7, 8.

Lufunjisho Kotuji:

17:3, 5, 7, 16. ‘Maana afuma mwiulu’ etulengela kuyuka “kyafyamika kya mwanamukazhi, ne kya lukinyama [wachijisha] wa musenda.” (Yako. 3:17) Awe lukinyama wimenako kipamo kya United Nations kyatelwanga’mba League of Nations. Nanchi akwe kusololwa kwa kyafyamika kechi kwafwainwa kwitulengela kupayankana na kusapwila mambo awama a Bufumu bwa Yehoba ne kujimunako bantu pa mambo a juba ja bukaji bwa Yehoba nenyi?

21:1-6. Twasumininwa kuba’mba mapesho o tubena kutengela akaleta Bufumu akafika. Mambo ka? Mambo kyanembwa’mba: “Bintu bitanshi byapichijila.”

22:1, 17. “Mukola wa mema a bumi” wimenako byauba Yehoba pa kupokolola bantu ku bundengamambo ne lufu. Ae mema koaji. Twayai tunemeke jino jishuko, ‘tutambule mema a bumi a bupetu’ na maboko abiji ne kubulako bakwetu!

[Tubyambo twa mushi]

[Kipikichala pa peja 5]

Bwikalo bwa bantu balukokelo byo bukawamapo mu Bufumu bwa Lesa!