Izhikijilainga Ku Mipashi Yatama

JAMES wakomejile mu nkonkoso ya jikuji ja Malaita jiji mu makuji a Solomon Islands. Bamufunjishe kunemeka bapashi kufumatu ku bwanyike bwanji. Ushimikizha’mba: “Kechi naambilangapo bapashi kuba byatama ku bakwetu ne, bino nalangulukanga’mba muntu kechi wakonsha kwikala bulongo kwa kubula kwizhikijila ku byatama na rarafono [ko kuba’mba binselansela mwishila bukwasho kufuma ku bapashi] ne.”

Byonkatu byaitabila bavula mwaya ntanda, ne bangikazhi mu Solomon Islands nabo bamona kuba’mba bapashi bakonsha kukwasha muntu nangwa kumumanyika. Kikatakata bantu bavula ba jikuji ja Melanesia batemwa bingi bapashi bo bamona bene’mba bakwashañana.

Kwitabila mu bapashi kumwekela mu mbaji yavula bingi mu bwikalo. Kya kumwenako, kimye James kyo ajinga mwanyike, bainetu ba pa muzhi wabo banyemesheshanga baana mu mazubo umvwe kañonyi katelwa’mba korokoro kaimba. Mambo ka? Baitabile’mba umvwe kano kañonyi kaimba ko kuba’mba umo bafwainwa kumuba kyatama.

Bangikazhi ba ku muzhi bamo basomeka jibwe jitoka pa kibelo kya nzubo. James naye wijisomekelepo’mba jimuzhikijilenga ku bapashi batama? James ku nkito pa kupwisha kuja pachaile, watolaulanga tubukuku tonse kwitubika mu kyola ne kwitutaya pa kimye kikwabo. Wachinanga’mba kwendapo papichila mulozhi witutola wakatokanyatokanya ne kundowa.

Nangwa kya kuba’mba bintu byatongolwa kechi byavula ku mpunzha ko mwikela ne, kampepo nenuwa mwakonsha kemube byonka byaubanga James kukeba kuzhikijilwa ku bapashi batama kupichila mu bya kishakulu. Mwakonsha kuba kemulanguluke’mba kulondela bino bisho kwawama mambo kwimuvimbila.

Umvwe munemeka Baibolo, kwa kubula nangwa kuzhinaukatu ne, musakukeba kuyuka byo akumbula mepuzho alondelapo: (1) Bapashi batama bakonsha kwimukatazha byepi? (2) Nanchi kulondela bisho bimo kwakonsha kwimulengela kutendeka kutangijilwa na bapashi batama nyi? (3) Mwakonsha kwizhikijila byepi kya kine ku bapashi batama ne kwikala na lusekelo?

Bapashi Batama byo Bakatazhañana

Baibolo umweshatu patoka kuba’mba bapashi batama kechi mipashi ya bantu bafwa ne. Mambo a Lesa aamba’mba: “Mambo bomi bayuka’mba tukafwa, bino bafu kafwako kyo bayuka ne.” (Musapwishi 9:5) Bapashi batama ke bamalaika basatukile bengijila pamo ne Satana mu kutwala bantu mungi.—Lumwekesho 12:9

Binembelo byaamba’mba twafwainwa kuzhikijilwa ku bapashi batama. Mutumwa Paulo wanembejile bena Kilishitu ba mu Efisesa amba: “Mambo kulwa kwetu kechi kwa kulwa na ba mibiji ya mashi ne, poso na . . . bapashi babipa ba mwiulu.” Mutumwa Petelo wapashañenye mfumu wa bapashi batama, aye Satana Diabola ku “bokwe wimba, upitañana na kusaka ye ayuka kuja.”—Efisesa 6:12; 1 Petelo 5:8.

Satana javula ulengela bantu kwikapilamo kupichila mu kwibatwala mungi, kwibongola nangwa’mba kwibalengela kuba bintu bifichisha Lesa ku muchima. Baibolo waamba pe Satana amba “wialula nobe malaika wa kyeya.” (2 Kolinda 11:14) Wibepekezha kwikala kilengwa kya mupashi kizhikijila bantu, bino saka aji na milanguluko yatama. Satana wiipofula michima ya bantu amba babule kumuyukisha aye byo aji nangwa kuyukisha Lesa. (2 Kolinda 4:4) Ki ka kyamulengela kukosako na kutwala bantu mungi?

Satana ukeba bantu kumupopwela, kikale saka bamuyuka nangwa mu bulubi. Kimye Mwana Lesa, aye Yesu kyo ajinga panopantanda, Satana wakebele kuba’mba naye “amulambile ne kumupopwela.” Yesu wamwambijile’mba, “Fumako, Satana: mambo kyanembwa’mba, Ukamupopwela Nkambo Lesa wobe ne kumwingijila aye yenka.” (Mateo 4:9, 10) Yesu wakainetu nsalansala kupopwela Satana.

Yehoba ye wakila bulume bilengwa byonse bya mupashi kabiji kechi ukaleka boba bamukokela konaunwa myaka ne myaka ne. (Salamo 83:18; Loma 16:20) Bino, pa kuba’mba tutokeshenga Yehoba pa muchima byonka byaubile Yesu, twafwainwa kukana kukokela Satana ne bandemona banji. Pa kuba’mba tubule kwibakokelanga twafwainwa kuyuka bisho bya kupopwelamo bapashi batama. Twakonsha kwibiyuka byepi?

Yukai Bisho Bifichisha Lesa ku Muchima

Yehoba wajimwineko bantu banji bena Isalela amba kechi bafwainwe kulondela bisho bya bantu ba mu mikoka ibazhokolokele ne. Waambile’mba: “Kechi mukatanwe mukachi kenu nangwa umo . . . ubuka ne, nangwa ñanga wa kilola ne, nangwa ñanga wa kisoko ne, nangwa upanda bwanga ne, nangwa ñanga wa bima ne.” Baibolo waamba pa boba balondelanga bino bisho amba: “Mambo bonse boba bino bintu bo ba bunya kwi Yehoba.”—Mpitulukilo ya mu mizhilo 18:10-12.

Onkao mambo, kimye kyo mubena kulanguluka pa bisho biji koko kwenu, langulukai ne pa ano mepuzho alondelapo: Nanchi akye kisho kitundaika kwitabila mu bañanga ba bisoko nyi? Nanchi bakinka manungo mu luzhikijilo lwa bintu bibula kupema nyi? Nanchi mwavwangwa kulowañana ne kwishiika ku manga nyi? Nanchi mwavwangwa kukokela bapashi mu kifulo kya kukokela Yehoba nangwa Yesu umwimenako nyi?—Loma 14:11; Filipai 2:9, 10.

Kyanema bingi kubula kubako bisho bya uno mutundu muji binselansela. Mambo ka? Mutumwa Paulo watangijilwe na mupashi kunemba’mba: ‘Kechi mwakonsha kuja ku tebulu wa Nkambo ne ku tebulu wa bandemona pamo ne.’ Wibajimwineko’mba, aba ba bukakongolo mutoma kubiji bakeba kutokesha Lesa ku muchima ne bapashi pa kimye kimo, babena ‘kumubisha kichima aye Nkambo.’ (1 Kolinda 10:20-22) Yehoba ukeba kabiji ye wafwainwatu kupopwelwa kwapwa.—Kulupuka 20:4, 5.

Akilangulukai ne pa buno bwipuzho: Nanchi akyo kisho kitundaika muteeto wa kumona’mba muntu kechi ukazhatwa na mambo a byubilo byanji nenyi? Kya kumwenako, bukende ne kwilaala kwa babula mu masongola kechi bebiswisha mu bimasamasa nangwa mu Baibolo ne. (1 Kolinda 6:9, 10) Bino, mu bisho bimo bya bantu bekala ku kalunga ka Pacific bakonsha kumuleka nsongwakazhi umvwe waamba’mba baji “kumuteya muchi,”a wa kumulengela kuba bulalelale.

Bino, Baibolo witufunjisha kuba’mba tuketotolwela pa bintu byo tuba. (Loma 14:12; Ngalatiya 6:7) Kya kumwenako, mwanamukazhi mutanshi, Evwa wikangaizhe’mba Satana ye wamulengejile kusatukila Lesa ne kwaamba’mba ‘Aye muloolo wajikunjimbaika ne kuja naja.’ Nangwa byonkabyo Evwa witotolwejile kwi Yehoba pa byo aubile. (Ntendekelo 3:13, 16, 19) Netuwa tuketotolwela kwi aye pa byubilo byetu.—Bahebelu 4:13.

Mwafwainwa Kuba Ka?

Umvwe mukeba kutokesha Lesa pa muchima ne kwikela monka mwayila mafunde a mu Baibolo, mwafwainwa kwibikishako kwizhikijila kwi Satana ne ku bandemona banji. Bantu bakishinka baikalanga mu Efisesa mu myaka kitota kitanshi, bamwesheshe kya kumwenako kyawama bingi pa mambo a kino. Pa kuba’mba bakasuluke ku byubilo bya bapashi batama, babungulwile mabuku onse alamachile ku byubilo bya bapashi ne “kwiasoka mu mujilo ku meso a bonse.”—Byubilo 19:19.

Saka bakyangye kusoka mabuku “bayanga na kusolola mambo abo, ne kutelaula byabo byo baubilenga.” (Byubilo 19:18) Byafunjishenga Paulo pe Kilishitu bibafikile pa muchima kabiji bibalengejile kusoka mabuku a bya mipashi. Kabiji bapimpwile ne ndangulukilo yabo ya bya kishakulu byo baubanga kala.

Kwambatu kine, kusankilapo bya kishakulu kechi kwapela ne. James ye twaambapo ku ntendekelo wajinga na luno lukatazho. Watendekele kufunda Baibolo na Bakamonyi ba kwa Yehoba kabiji watemenwe bingi byo afunjilenga. Nangwa byonkabyo, watwajijile kwingijisha binselansela bya rarafono. Byo alangulukanga pa bino binselansela, wapwishanga mu muchima’mba waketekejile mu milaye ya Yehoba, bino walangulukanga jikwabo amba pa kwizhikijila, wafwainwe ne kuketekela mu bya kishakulu.

Ki ka kyakwashishe James kuleka binselansela? Waamba’mba: “Nalombanga kunzhikijila kwi Yehoba ne kunkwasha kumuketekela kya kine. Kabiji nasankijilepo bya kishakulu.” Nanchi luno bya malwa byamuzembama nyi? “Ine” James ukana. Kabiji wamba’mba: Kyankwasha kuba bino byonse ke kufunda kuketekela mwi Yehoba. Nemwena ami mwine Yehoba byo akonsha kwikala mulunda wa kine.” James waingila myaka itanu na ibiji mu mwingilo wa kimye kyonse, kukwasha bakwabo kuyuka bifunjisha Baibolo.

Nga mambo ka a kubujila kuba byonka byaubile James? Pesapesai pa bisho biji mu kimasamasa kyenu, ne kwingijisha ‘bulume bwa kulanguluka’ mumone kana byaswañana na “kyaswa muchima wa Lesa.” (Loma 12:1, 2) Kanai kwingijisha byubilo bya bingelekezha. Inge mwauba bino, mwafwainwa kusumininwa’mba Yehoba ‘ukemutambula’ ne kwimuzhikijila. (2 Kolinda 6:16-18) Byonka byo kyajinga kwi James, nenuwa mukemwena bukine bwa mulaye wa mu Baibolo wa kuba’mba: “Jizhina ja Yehoba kyo kyamba kyakosa; waoloka unyemena monka ne kupuluka upuluka.”—Byambo bya Mana 18:10.

[Tubyambo twa mushi]

[Kipikichala pa peja 13]

“Korokoro”