Londelainga Yesu Kupichila Mu Kufunjisha Na Butemwe
“Nangwa kala kene kafwako muntu waambile byo amba uno muntu ne.”—YOA. 7:46.
1. Nga bantu baubilepo byepi pa byafunjishenga Yesu?
AKIFWANYIKIZHAI lusekelo lwajinga na boba beumvwijilenga bene byafunjishenga Yesu! Baibolo witubula byaubilenga bantu bo aambilengako. Kya kumwenako, nembi wa Mambo awama, aye Luka washimikizha kuba’mba bantu mu muzhi mwaikalanga Yesu “bakuminyenga byambo bya bupe byafuminenga mu kanwa kanji.” Mateo washimuna’mba aba batelekelenga ku Jashi ja pa Mutumba jafunjishenga Yesu ‘bakuminye mo afunjishengabyo.’ Kabiji Yoano waamba’mba bakalama bo batumine kuya na kukwata Yesu babwelelekotu maboko saka bamba’mba: “Nangwa kala kene kafwako muntu waambile byo amba uno muntu ne.”—Luka 4:22; Mat. 7:28; Yoa. 7:46.
2. Ñanyi mashinda a kufunjishishamo Yesu o aingijishenga?
2 Aba bakalama baambile kine. Kwa kubula nangwa kuzhinaukatu ne, Yesu wajinga Mufunjishi wayukisha. Wafunjishenga mu jishinda japela kumvwa ne kulumbulula bulongo byambo kya kuba kafwako nangwa umo wapachikilenga byo aambilenga ne. Waingijishanga bulongo bya kumwenako ne mepuzho. Wafunjishanga kwesakana na bantu bo aambangako, kikale bajinga pa bifulo bikatampe nangwa bantutu. Bukine bo afunjishenga bwapelele kwibumvwa, bino saka bwanema. Pano bino, bino bintu kechi byo byonka byalengejile Yesu kwikala Mufunjishi wayukisha ne.
Kyubilo Kikatampe ke Butemwe
3. Byo ajinga mufunjishi, Yesu wapuseneko byepi na bantangi ba bupopweshi ba mu oa moba anji?
3 Banembeshi ne Bafaliseo bamo bakonsheshe kwikala na maana a kufunjisha bantu bukine. Pano ki ka kyalengejile bintu byafunjishanga Yesu kupusanako na byo bafunjishenga? Bantangi ba bupopweshi mu oa moba kechi batemenwe bakwabo bantu ne. Bebalengulwilenga ne kwibamona nobe ‘bantu bafingwa.’ (Yoa. 7:49) Pano bino, Yesu aye wibobile lusa, mambo ‘basubakene ne kupelelwa, pamo no mikooko ya kubula kafunga.’ (Mat. 9:36) Wibakasulukilanga, kwibobila lusa ne kifyele. Kunungapotu, bantangi ba bupopweshi kechi batemenwe Lesa kya kine ne. (Yoa. 5:42) Pa kuba Yesu watemenwe Shanji ne kuba kyaswa muchima wanji. Bantangi ba bupopweshi bakobankanyanga mambo a Lesa pa kuba amba bamwenemo bene kajiilo, bino Yesu aye watemenwe “mambo a Lesa” ne kwiafunjisha, kwialumbulula, kwialwilako, ne kulondela mafunde ajingamo. (Luka 11:28) Kya kine, Kilishitu wavwajile butemwe ne kwibumwesha kufuma panshi ya muchima mu byo afunjishenga, pa kwingila na bantu ne pa kupana mikambizho.
4, 5. (a) Mambo ka o kyanemena kufunjisha na butemwe? (b) Pa kufunjisha, mambo ka kwikala na maana ne busendwe nako kyo kwanemena?
4 Pano nga atweba kiji byepi? Byo tulondela Kilishitu, tukebesha kulondela kya kumwenako kyanji mu mwingilo ne mu bwikalo bwetu. (1 Pe. 2:21) Onkao mambo, nkebelo yetu kechi ya kufunjishatu bantu kuyuka biji mu Baibolo kwapwa ne, bino ne kwibamwesha byubilo bya Yehoba, kikatakata butemwe bwanji. Kikale twayuka byavula nangwa twayukakotu bicheche, twayukisha bya kufunjisha nangwa kechi twayukisha ne, butemwe bo tumwesha bo buketukwasha kufika bantu bo tusapwilako pa muchima. Pa kuba’mba tubenga bulongo mu mwingilo wetu wa kulenga baana ba bwanga, twafwainwa kulondela kya kumwenako kya kwa Yesu kya kufunjisha na butemwe.
5 Pa kuba’mba twikale bafunjishi bayuka kufunjisha bulongo, twafwainwa kuyuka bulongo mutwe ye tukeba kufunjisha ne kwikala na busendwe bwa kufunjisha. Yesu wakwashishe baana banji ba bwanga kwikala na bino bintu bibiji, kabiji Yehoba naye lelo jino witukwasha kwikala nabyo kupichila mu jibumba janji. (Tangai Isaya 54:13; Luka 12:42.) Nangwa byonkabyo, kechi twafwainwa kwikalatu na maana a kufunjisha ne, bino ne muchima naye wafwainwa kuvwangwamo. Umvwe maana, busendwe ne butemwe kebyendele pamo, bantu bakomvwanga bukine. Pano mu ñanyi mashinda mo twakonsha kumweshesha butemwe pa kufunjisha? Nga Yesu ne baana banji ba bwanga baubilenga byepi bino? Twayai tumone.
Twafwainwa Kutemwa Yehoba
6. Twamba byepi pa muntu ye twatemwa?
6 Tumvwa bingi bulongo kwamba pa bintu byo twatemwa. Umvwe tubena kwamba pa bintu byo twatemwa, bantu bakonsha kwitumwena ku lusekelo ne ku kizaku kyetu pa kwibyamba. Kikatakata umvwe tubena kwamba pa muntu ye twatemwa. Javula, tukeba kubulako bakwetu byo twayuka pa mambo a yeo muntu. Tumutakaika ku bakwetu, kumwesha amba twamunemeka ne kumwimenako. Tuba bino mambo tukeba bakwetu nabo kumukasulukila ne kulondela byubilo byanji byonka byo twauba atweba.
7. Nga Butemwe bwajinga ne Yesu bwamulengejile kuba ka?
7 Saka tukyangye kukwasha bantu kumutemwa Yehoba, patanshi atweba bene twafwainwa kumuyuka ne kumutemwa. Mambo mpopwelo ya kine yaimena pa kutemwa Lesa. (Mat. 22:36-38) Yesu wajinga wa kumwenako wawama bingi. Watemenwe Yehoba na muchima, maana, mweo ne bulume bwanji bonse. Byo aikele myaka yavula ne Shanji mwiulu, Yesu wamuyukile bingi bulongo. Ki ka kyafuminemo? Yesu waambile’mba: “Nebatemwa Batata.” (Yoa. 14:31) Buno butemwe bwamwekejile mu bintu byonse byo aambile ne kuba. Bwamukwashishenga kimye kyonse kuba bintu byatokeshenga Lesa pa muchima. (Yoa. 8:29) Bwamulengejile kushinawina bantangi ba bupopweshi bebepekezhanga kwimenako Lesa, bino saka baubilenga bintu mu bukamfutumfutu. Kabiji buno bonka butemwe bwamulengejilenga ne kwamba pe Yehoba kabiji ne kukwasha bantu kuyuka Lesa ne kumutemwa.
8. Kutemwa Lesa kwalengejile baana ba bwanga ba kwa Yesu kuba ka?
8 Byonka byajinga Yesu, baana banji ba bwanga ba mu myaka kitota kitanshi nabo batemenwe Yehoba, kabiji buno butemwe bwibalengejile kusapwila mambo awama na kuchinchika ne na kizaku. Bayuzhizhe Yelusalema na mafunjisho abo nangwa kya kuba bantangi ba bupopweshi bamo bebakainyenga kusapwila. Baana ba bwanga kechi bakonsheshe kuleka kwamba pa bintu byo bamwene ne kumvwa ne. (Byu. 4:20; 5:28) Bayukile amba bajinga ne Yehoba kabiji ukebapesha, kabiji ne kya kine Yehoba wibapesheshe! Byo papichile myaka pepi na 30 panyuma ya lufu lwa kwa Yesu, mutumwa Paulo wanembele kuba’mba mambo awama asapwijilwe “mu bilengwa byonse bya muno munshi.”—Kolo. 1:23.
9. Twakonsha kubaisha byepi butemwe bwetu pe Lesa?
9 Umvwe tukeba kwikala bafunjishi bayuka kufunjisha bulongo, ne atweba twafwainwa kutwajijila kukosesha butemwe bwetu pe Lesa. Twakonsha kuba byepi bino? Kupichila mu kwisamba ne Lesa mu lulombelo. Kabiji tukosesha butemwe bwetu pe Lesa kupichila mu kufunda Mambo anji, kutanga mabuku alumbulula Baibolo ne kutanwa ku kupwila kwa bwina Kilishitu. Byo tuyilako palutwe mu kumuyuka Lesa, ne butemwe bwetu pe aye bubailako. Kabiji umvwe ke tumweshe butemwe bwetu pe Lesa mu byo twamba ne mu byubilo byetu, bakwetu bakamona amba twamutemwa kabiji bakonsha ne kufwenya kwipi ne Yehoba.—Tangai Salamo 104:33, 34.
Twafwainwa Kutemwa byo Tufunjisha
10. Mufunjishi wayuka kufunjisha bulongo bamuyukila ku ka?
10 Muntu wayuka kufunjisha bulongo bantu bamuyukila ku byo atemwa bintu byo afunjisha. Wafwainwa kwitabila amba byo abena kufunjisha ke bintu bya kine kabiji ne kuba’mba byanema. Umvwe muntu kine wanemeka bintu byo afunjisha, kino kikamwekela mu kizaku kyanji, kabiji kyakonsha ne kukwasha bantu bo abena kufunjisha. Ku lubaji lukwabo, umvwe mufunjishi kechi wanemeka bintu byo afunjisha ne, pano bantu bo afunjisha Baibolo bakonsha kunemeka byepi bintu byo abena kwibafunjisha? Byo muji bafunjishi, kya kumwenako kyenu kyanema bingi, mambo bo mufunjisha kyo kyo balondela. Yesu waambile’mba: “Yense ye bafunjisha bulongo ukekala nobe mufunjishi wanji.”—Luka 6:40, The New Berkeley Version in Modern English.
11. Mambo ka Yesu o atemwejile bintu byo afunjishanga?
11 Yesu watemenwe bintu byo afunjishanga. Wayukile’mba wajinga na bintu byanema bya kubulako bantu, ko kuba’mba bukine bwaambilenga pe Shanji wa mwiulu, mambo byajinga “byambo bya Lesa” ne “byambo bya bumi bwa myaka.” (Yoa. 3:34; 6:68) Byonkatu kyeya byo kilengela bintu kumweka, ne bukine bwafunjishenga Yesu bwamwesheshetu patoka kyatama ne kyawama. Buno bukine bwaletejilenga luketekelo ne lutekenesho boba bepelwile bo babepaikanga ku bantangi ba bupopweshi ba bubela kabiji bo bamanyikanga kwi Diabola. (Byu. 10:38) Butemwe bwa kwa Yesu bo atemenwe bukine kechi twibumwenatu mu mafunjisho o afunjishanga ne, bino ne mu bintu byonse byo aubanga.
12. Nga mutumwa Paulo wiumvwinenga byepi pa mambo a kusapwila mambo awama?
12 Byonkatu byajinga Yesu, ne baana banji ba bwanga batemenwe bukine pa mambo a Yehoba ne Kilishitu kabiji ne kwibunemeka kya kuba bantu bebakainyenga kusapwila buno bukine kechi bakonsheshe kwibalefula ne. Paulo wanembejile bena Kilishitu bakwabo mu Loma amba: “Ami mwine nasakishatu kusapwila mambo awama . . . Mambo amiwa kechi neobila bumvu mambo awama ne, mambo bo bulume bwa Lesa buleta lupulukilo ku bonse baitabila.” (Loma 1:15, 16) Paulo wanemekele bingi kushimuna bukine ku bantu. Wanembele’mba: ‘Kwi amiwa, . . . ko bwapewa buno bupe bwa kusapwila ku Bangetila mambo a bya bunonshi bwa Kilishitu bwabulwa kukonsheka kwibuyuka.’ (Efi. 3:8) Kechi kyakonsha kwitukatazha kufwanyikizha kizaku kyajinga ne Paulo byo afunjishenga bantu pa mambo a Yehoba ne nkebelo yanji ne.
13. Bishinka ka byo tuji nabyo bya kutemenwa mambo awama?
13 Mambo awama atanwa mu Mambo a Lesa etukwasha kuyuka bulongo Mulenga wetu kabiji ne kwitulengela kwikala na bulunda bwawama ne aye. Ano onka mambo awama etupa mikumbu yo tukeba ku mepuzho anema a mu bwikalo, kabiji aji ne na bulume bwa kupimpula bwikalo bwetu ne kwitupa luketekelo kabiji ne kwitukosesha mu bimye bya makatazho. Kunungapo, etukwasha kuyuka jishinda ja ku bumi bwawama bwa myaka. Kafwako maana akwabo awama nangwa kunema kukila oa aji mu mambo awama ne. Ke kya bupe kya mutengo kyo betupa kabiji kituletela lusekelo lukatampe. Kabiji tukizhamo kwikala na luno lusekelo umvwe ketubuleko bakwetu pa mambo a kino kya bupe.—Byu. 20:35.
14. Twakonsha kukosesha byepi butemwe bwetu bwa bintu byo tufunjisha?
14 Mwakonsha kuba byepi pa kuba’mba mutwajijile kukosesha butemwe bwenu bwa mambo awama? Pa kutanga Mambo a Lesa, tulumanaingako ne kulanguluka languluka pa byo mubena kutanga. Kya kumwenako, mwakonsha kufwanyikizha mubena kwingijila pamo ne Yesu mu mwingilo ye aingijilenga panopantanda nangwa mubena kwendela pamo ne mutumwa Paulo. Fwanyikizhainga muji mu ntanda ipya kabiji ne kumona bwikalo byo bukapusanako na buno. Vulukainga bintu byawama byo mwamwenamo mu kukokela mambo awama. Umvwe mwatwajijila kukosesha butemwe bwenu bwa mambo awama, aba bo mufunjisha bakamona buno butemwe. Onkao mambo, nanchi twafwainwa kulanguluka langulukanga pa bintu byo tufunda kabiji ne kumona byo tufunjisha.—Tangai 1 Timoti 4:15, 16.
Twafwainwa Kutemwa Bantu
15. Mambo ka mufunjishi o afwainwa kutemenwa bo afunjisha?
15 Mufunjishi wayuka kufunjisha bulongo ukasulukila bo afunjisha pa kuba’mba kibapelele kwivwanga mu bintu byo babena kufunda kabiji ne kwikala na kizaku kya kukeba kufunda. Mufunjishi wa butemwe ufunjisha bulongo mambo watemwa kya kine bantu bo afunjisha. Wibafunjisha kwesakana na byo baji ne papelela bulume bwabo bwa kumvwa bintu. Uyuka biji bwikalo bwabo. Umvwe bafunjishi baikala na butemwe bwa uno mutundu, aba bo bafunjisha bakayuka, kabiji kikalengela bafunjishi ne boba bo bafunjisha kwikala na lusekelo.
16. Mashinda ka Yesu mo amwesheshenga butemwe bwanji ku bantu?
16 Buno bo butemwe bwamwesheshepo ne Yesu. Butemwe bwanji bukatampe bo amwesheshe ke bobwa bwa kupana bumi bwanji bwalumbuluka kuba’mba apulushe bantu. (Yoa. 15:13) Kimye kyo aingijilenga mwingilo wanji, Yesu kechi wakokanga kukwasha bantu ku mubiji ne, wibakwashanga bingi, kikatakata ku mupashi. Mu kifulo kya kupembelela amba bantu beye ko aji, aye waendanga miseke na miseke lwa panshitu kuya na kwibabula mambo awama. (Mat. 4:23-25; Luka 8:1) Wibatekenyanga ne kwibateleka. Kimye baana banji ba bwanga kyo bakebewanga kwibololako, waubanga bino na butemwe. (Mako 9:33-37) Wibatundaikanga kupichila mu kumwesha’mba wibaketekela kuba’mba bakekala bafunjishi bayuka kufunjisha bulongo mambo awama. Kafwako mufunjishi wa bumuntu wakimweshapo butemwe bwajingapo ne Yesu ne. Butemwe bo amwesheshenga ku baana banji ba bwanga bwibalengejile nabo kumutemwa ne kulondela mikambizho yanji.—Tangai Yoano 14:15.
17. Baana ba bwanga ba kwa Yesu bamweshanga byepi butemwe bwabo ku bantu?
17 Byonka byaubanga Yesu, ne baana banji ba bwanga bamweshanga butemwe bwa kine ne lusa ku boba bo basapwilangako. Byo bachinchikilenga meseko ne kubika bumi bwabo mu kizumba, bakwashishenga bantu ne kusapwila bulongo mambo awama. Byo bebobilangapo lusa bantu batambwilanga mambo awama! Byambo bifikañana pa muchima ke byobya byanembele mutumwa Paulo amba: ‘Twaikajile ba lusa mukachi kenu nobe inabo ubukata baana banji mwine: byonkabyo byo twimutemwisha, twaswishishe kwimupa kechi mambo awama a Lesa onka ne, ne myeo yetu pamo, mambo mwaalukile ke muji batemwe betu.’—1 Tesa. 2:7, 8.
18, 19. (a) Mambo ka o twipaina kwingila mwingilo wa kusapwila? (b) Ambaipo kya kumwenako kimwesha kuba’mba bantu bamona butemwe bo tumwesha.
18 Po pamotu ne lelo jino, Bakamonyi ba kwa Yehoba basapwila mwaya ntanda yonse na kukeba boba basaka kuyuka Lesa ne kumwingijila. Pa myaka 17 yapitapo twaingijilenga maawala kukila pa bilyonyi umo pa mwaka pa mwaka mu mwingilo wa kusapwila ne kulenga baana ba bwanga, kabiji ne lunotu twakitwajijila kwingila uno mwingilo. Twipana kwingila nangwa kya kuba mwingilo wetu wa kusapwila ukebewa kimye, bulume ne bukwasho bwa bintu bya ku mubiji. Byonka byayukile Yesu, ne atweba twayuka namba Shetu wa mwiulu wa butemwe wakeba bantu kuyuka maana atangijila ku bumi bwa myaka. (Yoa. 17:3; 1 Timo. 2:3, 4) Butemwe bwitulengela kukwasha bantu ba michima yawama kuyuka Yehoba ne kumutemwa kuba’mba bekale byonka byo tuji.
19 Bantu bamona bingi byo tumwesha butemwe. Kya kumwenako, nyenga umo painiya mu kyalo kya United States unembela boba bafwisha balongo babo makalata a kwibatekenesha. Mwanamulume umo wamubwezhejile nkalata yo anembele’mba: “Kimyetu kitanshi, nakuminye bingi pa kumona muntu waingila papelela bulume bwanji kunembela nkalata muntu ye abula nangwa kuyukatu ne, kuba’mba amukwashe kuchinchika makatazho. Nasumininwa namba mwatemwa bingi bakwenu bantu ne aye Lesa wibatangijila mu jishinda ja ku bumi.”
20. Kufunjisha na butemwe kwanema byepi?
20 Kyambiwa kuba’mba umvwe muntu waikala na butemwe ne busendwe wakonsha kwingila mingilo yawama. Pa kufunjisha, tukeba kukwasha bo tufunjisha kumuyuka Yehoba ne kumutemwa. Ee kine, pa kuba’mba twikale bafunjishi bayuka kufunjisha bulongo, twafwainwa kumwesha butemwe mu mashinda asatu, ko kuba’mba, kutemwa Lesa, kutemwa bukine kabiji ne kutemwa bantu. Byo twibikishako kwikala na buno butemwe ne kwibumwesha mu mwingilo, kechi twikalatu na lusekelo lufuma mu kupana ne, bino twikala ne na lusekelo lwa kuyuka’mba tubena kulondela kya kumwenako kya kwa Yesu ne kutokesha Yehoba pa muchima.
Musakukumbula’mba Ka?
• Byo tufunjisha bantu mambo awama, mambo ka o kyanemena . . .
kutemwa Lesa?
kutemwa bintu byo tufunjisha?
kutemwa bantu bo tufunjisha?
[Kipikichala pa peja 15]
Ki ka kyalengejile byafunjishanga Yesu kupusanako na byafunjishanga banembeshi ne Bafaliseo?
[Kipikichala pa peja 18]
Kufunjisha bulongo kukebewa kwikala na maana, busendwe, kabiji ne kyakila pa byonse ke kwikala na butemwe