Fwenyai Kwipi ne Lesa

Yehoba Witupa Lūsa lwa Kwifuukwila

Mpitulukilo ya mu mizhilo 30:11-20

“JAVULA ngakamwa bingi amba kampe nakonsha kukankalwa kwikala wa kishinka kwi Yehoba.” Bino byo byaambile mwina Kilishitu wamukazhi umo walangulukilenga’mba byo apichilemo saka aji mwanyike byakonsha kumulengela kukankalwa kwikala wa kishinka. Nanchi nenuwa byo byo mulanguluka nyi? Abya kafwako wa kwitukwasha nyi? Ine. Yehoba witupa lūsa lwa kwifuukwila. Onkao mambo, twakonsha kwifuukwila bintu byo twakonsha kuba mu bwikalo bwetu. Yehoba ukeba atweba kufuukulapo bintu byawama, kabiji Baibolo Mambo anji etubula byo twakonsha kuba kino. Monai byambo bya kwa Mosesa biji mu Mpitulukilo ya mu mizhilo kitango 30.

Nanchi kyashupa kuyuka Lesa byo akeba kwi atweba ne kwibyuba nyi?a Mosesa waambile’mba: “Uno mukambizho ye mbenakwimukambizha ja lelo kechi wakosa kukila pa bulume bwenu ne, kabiji kechi uji kwalepa ne.” (Kyepelo 11) Yehoba kechi witukebela bintu byo tukankalwa kuba ne. Bintu byo akeba byawama kabiji twakonsha kwibyuba. Bino bintu byayukanyikwa. Kechi tuya “mwiulu” nangwa ‘kwabuka kalunga’ pa kuba’mba tufunde bintu bitukebela Lesa ne. (Byepelo 12, 13) Baibolo waambatu patoka byo twafwainwa kwikala.—Mika 6:8.

Bino Yehoba kechi witukanjikizha kumukokela ne. Mosesa waambile’mba: “Namwesha ku meso enu ja lelo jino mweo ne byawama, ne lufu ne byatama.” (Kyepelo 15) Tuji na lūsa lwa kusalapo pa mweo ne lufu, pa kyawama ne kyatama. Twakonsha kusalapo kupopwela ne kukokela Lesa pa kuba’mba twikale na mapesho, nangwa kusalapo kubula kumukokela ne kufikilwa na bya malwa. Kiji ko tuji kusalululapo.—Byepelo 16-18; Ngalatiya 6:7, 8.

Nanchi Yehoba utako muchima ku bwikalo bo tusalapo nyi? Ee! Lesa waambile kupichila mwi Mosesa amba: “Salululai mweo.” (Kyepelo 19) Nangwa byonkabyo twakonsha kusalulula byepi mweo? Mosesa waambile’mba: “Kasa mutemwa Yehoba Lesa wenu ne kukokela jiwi janji ne kumukakachila.” (Kyepelo 20) Umvwe twamutemwa Yehoba, twafwainwa kumukokela ne kumukakachila mu bukishinka kechi na mambo a byonse byakonsha kwitufikila ne. Kupichila mu buno bwikalo tusala mweo, buno bo bwikalo bwawama ano moba buketulengela kwikala na bumi bwa myaka ne myaka mu ntanda ipya ya Lesa.—2 Petelo 3:11-13; 1 Yoano 5:3.

Byambo bya kwa Mosesa bitufunjisha bukine bwitutekenesha bingi. Nangwa kya kuba mu bwikalo bwenu mwapita mu bintu bya mutundu ka mu ino ntanda ibi, kechi mwabula wa kwimukwasha ne; kabiji kechi mwakonsha kukankalwa ne. Yehoba wimunemeka byo emupa lūsa lwa kwifuukwila. Kya kine, mwakonsha kusalapo kumutemwa Yehoba, kumukokela, ne kutwajijila kwikala bakishinka kwi aye. Umvwe mwasalapo kuba bino Yehoba ukemupesha.

Buno bukine bwa kuba’mba twakonsha kwifuukwilapo kumutemwa Yehoba ne kumwingijila bwatekeneshe mwanamukazhi watongolwa kuntatwilo ya kino kibaba. Waambile’mba: “Namutemwa bingi Yehoba nangwa kya kuba kimye kimo ndubamo kuba’mba kino kyo kintu kyanema kwi amiwa. Onkao mambo nafwainwa kwikala wakishinka.” Nanchi na bukwasho bwa Yehoba nenuwa mwakonsha kwikala bakishinka nyi?

[Tubyambo twa mushi]