Nemekainga Lubaji Lwenu mu Kipwilo

“Lesa wabika byonse bya mubiji mu mubiji, aki pakyo, aki pakyo, monka mwaswila muchima wanji.” —1 KO. 12: 18.

1, 2. (a) Ki ka kimwesha kuba’mba yense mu kipwilo wakonsha kwikala na lubaji lo akonsha kunemeka? (b) Mepuzho ka o tusakwisambapo mu uno mutwe?

KUFUMATU kimye kya bena Isalela bakala, kipwilo kyaikala lunengezho lwa Yehoba lwa kukwashishamo bantu banji ku mupashi ne kwibatangijila. Kya kumwenako, panyuma ya kuba bena Isalela bashinda muzhi wa Ai, Yoshua “watangile byambo byonse bya mizhilo, bya mapesho ne bya mafingo, monka mo byanembelwa mu buku wa mizhilo ... ku meso a kipwilo kyonse kya bena Isalela.” —Yosh. 8: 34, 35.

² Mu myaka kitota kitanshi C.E., mutumwa Paulo waambijile mukulumpe mu kipwilo mwina Kilishitu aye Timoti amba, kipwilo kya bwina Kilishitu yo yajinga “nzubo ya Lesa” kabiji jo “jipanda ne jikinko ja bukine.” (1 Timo. 3:15) Lelo jino, “nzubo” ya Lesa ke bwana bwankazhi bwa ntanda yonse bwa bena Kilishitu ba kine. Mu kitango 12 kya nkalata yanji itanshi ku bena Kilishitu ba mu Kolinda, Paulo waesakenye kipwilo ku mubiji wa muntu. Waambile’mba nangwa kya kuba kinungwa kyonse kingila mingilo yapusana pusana, byonse byanema. Paulo wanembele’mba “Lesa wabika byonse bya mubiji mu mubiji, aki pakyo, aki pakyo, monka mwaswila muchima wanji.” Kabiji waambile ne kuba’mba “abya bya mubiji byo twalanguluka namba, byabula kushiñama, byo byo tuvwika na buneme bwakila.” (1 Ko. 12: 18, 23) Onkao mambo, mwingilo wa muntu wakishinka mu nzubo ya Lesa kechi wanema nangwa kutama kukila wa mwina Kilishitu mukwabo wakishinka ne. Mingilo yapusanatu. Pano twakonsha kwikala byepi na lubaji mu lunengezho lwa Lesa kabiji ne kwilunemeka? Bintu ka byakonsha kulamata lubaji lwetu mu kipwilo? Kabiji twakonsha kulengela byepi ‘kuya palutwe kwetu kumwekanyika ku bonse’? —1 Timo. 4: 15.

Twakonsha Kunemeka Byepi Lubaji Lwetu?

3. Jishinda ka jimo jo twafwainwa kwikelamo na lubaji mu kipwilo kabiji ne kumwesha kuba’mba twilunemeka?

³ Jishinda jimo jo twakonsha kwikelamo na lubaji mu kipwilo ne kumwesha kuba’mba twilunemeka ke kukwatankena pamo na ‘kalume wakishinka kabiji wa maana’ ne Jibumba Jitangijila jimwimenako. (Tangai Mateo 24: 45-47.) Twafwainwa kwipesapesa ne kumona kana tukokela mikambizho yo tutambwila ku jibumba ja kalume. Kya kumwenako, pa myaka yapitapo, twatambwila mikambizho yaamba pa mvwajilo ne mwekanyikilo, bya kisangajimbwe, ne ya pa mambo a kubula kwingijisha bulongo Intaneti. Nanchi tumvwina luno lujimuno lwawama pa kuba’mba tutwajijile kwikala bazhikijilwa ku mupashi nyi? Ibyepi pa mambo a lujimuno lwa kwikala na mutanchi wa kupopwela kwa kisemi kimye kyonse? Nanchi twaumvwina luno lujimuno ne kwikalako na juba ja kupopwela kwa kisemi nyi? Umvwe tukyangye kutwela mu masongola, nanchi twikalako na kimye kya lufunjisho lwa pa bunke lwa mu Binembelo nyi? Yehoba uketupesha pa muntu pa muntu ne bisemi bilondela lutangijilo lwa jibumba ja kalume.

4. Bintu ka byo twafwainwa kulangulukapo kimye kyo tubena kufuukulapo kuba bintu?

⁴ Bamo bakonsha kulanguluka’mba bintu nabiji bya kisangajimbwe, mvwajilo ne mwekelo ke bya kwifukwila muntu mwine. Nangwa byonkabyo, ku mwina Kilishitu wipana unemeka lubaji lwanji mu kipwilo, pa kufuukula bintu kechi wafwainwa kwimenatu pa kuba’mba kana kyo afuukula kyubiwe ne. Kikatakata twafwainwa kumona Yehoba byo abena kwikimona byonka byaamba Mambo anji Baibolo. Byambo bijimo byafwainwa kwikala ‘lampi wa maulu etu, ne kyeya kya mu jishinda jetu.’ (Sala. 119:105) Kabiji kyawama ne kulanguluka pa bintu byo tufuukulapo bunke bwetu byo byakonsha kulamata mwingilo wetu ne bantu bakwetu, mukachi ne pangye ya kipwilo. —Tangai 2 Kolinda 6: 3, 4.

5. Mambo ka o twafwainwa kuchinuzhukila muchima wa kwitolwela?

⁵ “Mupashi wingila ne pano mu bantu ba milengulwila” wakumbana kya kuba uji nobe mwela yetupema. (Efi. 2: 2) Uno mupashi wakonsha kwitulengela kulanguluka kuba’mba kechi tukebewa bukwasho kufuma mu jibumba ja kwa Yehoba ne. Kya kine kechi tukeba kwikala nobe Diotelefesa, awo wabujile kukonsha ‘kutambula kiji kyonse kwi mutumwa Yoano ne.’ (3 Yoa. 9, 10) Twafwainwa kujimuka kuchina twakekala na muchima wa kwitolwela. Mu byambo ne mu byubilo, kechi twafwainwa kulengululanga mashinda a kumvwañenamo o abena kwingijisha Yehoba lelo jino ne. (Bala. 16: 1-3) Mu kifulo kya kuba byobyo, twafwainwa kunemeka jishuko jo tuji najo ja kukwatankena pamo na jibumba ja kalume. Nanchi kechi twafwainwa kwesekesha na ngovu kukokela ne kunekenena boba betutangijila mu kipwilo kyetu nenyi? —Tangai Bahebelu 13: 7, 17.

6. Mambo ka o twafwainwa kwipesapesa mu bwikalo bwetu?

⁶ Jishinda jikwabo jo tumwesheshamo amba twanemeka lubaji lwetu mu kipwilo ke kupichila mu kupesapesa bwikalo bwetu kabiji ne kwingila papelela bulume bwetu ‘kutumbijika mwingilo wetu’ kabiji ne kunemeka Yehoba. (Loma 11:13) Bamo bekala bapainiya ba kimye kyonse. Bakwabo bengila mwingilo wa kimye kyonse nabiji bumishonale, bakalama benda, kabiji ne kwingijila pa Betele mwaya ntanda. Balongo ne banyenga bavula bakwasha mwingilo wa buntungi bwa Mazubo a Bufumu. Bantu ba kwa Yehoba bavula babena kwingila papelela ngovu yabo kutundaika bisemi byabo kwingijila Yehoba kabiji ne kwingilako mwingilo wa kusapwila pa mulungu pa mulungu. (Tangai Kolose 3: 23, 24.) Twakonsha kusumininwa kuba’mba umvwe twipana kwingila mwingilo wa Lesa ne kwingila na muchima yense, twikalako na lubaji mu lunengezho lwa Lesa kimye kyonse.

Bintu Byalamata Lubaji Lwetu mu Kipwilo

7. Londololai bwikalo bwetu byo bwakonsha kulamata lubaji lwetu mu kipwilo.

⁷ Kyanema bingi kupesapesa bwikalo bwetu mambo kimye kimo kwikala na lubaji mu kipwilo kwaimena pa bintu byo twakonsha kuba nangwa byo tuba mu kipwilo. Kya kumwenako, mwingilo wingila mulongo mu kipwilo wapusanako na mwingilo wingila nyenga. Bukote, kukolwa kolwa ne bintutu bikwabo bitulengela kukankalwa kuba byo twakonsha kuba mu mwingilo wa kwa Yehoba. Byambo bya Mana 20: 29, byaamba’mba: “Bulume bwa bansongwalume lo lukumo lwabo, kabiji mushingi wa banabalume bakote yo mvwi yabo.” Bakyanyike bakonsha kwingila mingilo yavula mu kipwilo mambo baji na bulume, bakikulumpe nabo balengela kipwilo kumwenamo mambo a maana abo ne byo bapitamo. Twafwainwa kuyuka ne kuba’mba byonse byo tuba mu jibumba ja kwa Yehoba byaimena pa lusa lwa Lesa. —Byu. 14:26; Loma 12: 6-8.

8. Byo tusaka kuba bilamata byepi mwingilo ye twingila mu kipwilo?

⁸ Kya kumwenako kya bansongwakazhi babiji bankasa ne kolo kimwesha bintu bikwabo byakonsha kwitulengela kuyuka lubaji lwetu mu kipwilo. Bonse babiji bapwishishe masukulu abo. Bajinga na bwikalo bumotu. Bansemi babo bebatundaikile bonse babiji kwikala bapainiya ba kimye kyonse panyuma ya kupwisha masukulu. Panyuma ya kupwisha masukulu, umo waikele painiya, mukwabo watwelele nkito ya ku mubiji. Ki ka kibalengejile kufuukula bintu byapusana? Muchima. Kyapeleleko, yense waubile kyo asakilenga kuba. Nanchi kechi byo byo kiji ne kwi atweba bavula nenyi? Twafwainwa kulangulukishapo bingi pa bintu byo tusaka kuba mu mwingilo wa kwa Lesa. Nanchi twakonsha kwingilako pakatampe mu mwingilo nangwa kya kuba’mba kino kilumbulula kupimpula bwikalo bwetu nyi? —2 Ko. 9: 7.

9, 10. Ki ka kyo twafwainwa kuba umvwe kechi tuji na bakwitutundaika pa kuba’mba twingilengako pakatampe mu mwingilo wa kwa Yehoba ne?

⁹ Pano kyakonsha kwikala byepi umvwe twingilakotu pacheche mu kipwilo kabiji kafwako ne wa kwitutundaika pa kuba’mba twingilengako pakatampe mu mwingilo wa kwa Yehoba? Mu nkalata yanji ku bena Filipai, Paulo wanembele’mba: “Lesa wingila mwi anweba mu kwimusakisha kuba ne kwimwingijisha bintu byamutokela ku muchima wanji.” Yehoba wakonsha kwingila mwi atweba ne kwitutangijila mu byo tukeba kuba. —Fili. 2:13; 4: 13.

¹⁰ Nanchi ne atweba kechi twafwainwa kulomba Yehoba kwitukwasha kusakisha kwingila mwingilo wanji nenyi? Mfumu Davida wa bena Isalela ba kala byo byo aubile. Walombele’mba: “Mbulai ñendelo yenu, anweba Yehoba; Mfunjishai mashinda enu. Ntangijilai mu bukine bwenu, ne kumfunjisha; Mambo anweba mwi Lesa wa lupulukilo lwami; Nemupembelela juba jonse.” (Sala. 25: 4, 5) Ne atweba twakonsha kulomba byonkabyo kuba’mba Yehoba etukwashe kuba bimutokesha ku muchima. Umvwe twalanguluka Yehoba Lesa ne Mwananji byo bomvwa pa mambo a kwingila mwingilo wabo, twibasanchila bingi. (Mat. 26: 6-10; Luka 21: 1-4) Kukeba kusanta kwakonsha kwitutundaika kulomba Yehoba kuba’mba etukwashe kukomenako ku mupashi. Ngauzhi Isaya wapaine kya kumwenako kya byubilo byo twafwainwa kwikala nabyo. Byo aumvwine Yehoba saka epuzha’mba: “Ñanyi ye nsakutuma, kabiji ñanyi usakwitwendela?” uno ngauzhi wakumbwile’mba: “Amiwa bano! Ntumai amiwa.” —Isa. 6: 8.

Twakonsha Kununguluka Byepi?

11. (a) Mambo ka o kyafwainwa balongo kukanamina mingilo mu jibumba ja kwa Yehoba? (b) Mulongo wakonsha kukanamina byepi mingilo mu kipwilo?

¹¹ Na mambo a bantu 289,678 babatizwe mwaya ntanda mu mwaka wa mwingilo wa 2008, kubena kukebewa balongo bakutangijila. Mulongo wakonsha kubapo byepi pa mambo a kino? Wafwainwa kukanamina mwingilo wa bunkwasho ne bukulumpe mu kipwilo wanembwa mu Binembelo. (1 Timo. 3: 1-10, 12, 13; Titu. 1: 5-9) Mulongo wakonsha kufikizha byepi bino bikebewa bya mu Binembelo? Ke kupichilatu mu kwingilako pakatampe mu mwingilo, kufikizha bikonkwanyi byanji mu kipwilo, kuwamishako mikumbu yanji pa kupwila kwa bwina Kilishitu ne kuta muchima bakwabo ba mu lwitabilo. Mu jino jishinda umwesha amba wanemeka lubaji lwanji mu kipwilo.

12. Bakyanyike bakonsha kumwesha byepi amba bata muchima ku bukine?

¹² Balongo bakyanyike, kikatakata boba bakyangye kufikizha myaka ya kusemwa makumi abiji, bakonsha kununguluka byepi mu kipwilo? Bakonsha kwibikishako kukoma mu ‘maana onse ne milangwe ya bumupashi’ kupichila mu kufunda Binembelo. (Kolo. 1: 9) Kwikala na mukoyo wa kufunda Mambo a Lesa ne kupwila kimye kyonse kukebakwasha kuba bino. Bansongwalume nabo bakonsha kutwela pa “kibelo kikatampe ne kya kwingijilamo mingilo ikatampe” mu mbaji yavula ya mwingilo wa kimye kyonse. (1 Ko. 16: 9) Kwingila mwingilo wa kwa Yehoba ke kintu kyawama bingi mu bumi kabiji mufuma mapesho akatampe. —Tangai Musapwishi 12: 1.

13, 14. Mu ñanyi mashinda banyenga mo bakonsha kumweshesha kuba’mba banemeka mwingilo wabo mu kipwilo?

¹³ Banyenga nabo bakonsha kumwesha kuba’mba banemeka mashuko abo pa muntu pa muntu kupichila mu kwikalamo na lubaji mu kufikizha byambo byanembwa mu Salamo 68: 11, byaamba’mba: “Nkambo ukambizha: Banabakazhi baamba mambo jo jibumba jikatampe.” Jishinda jimo jakilamo kunema banyenga jo bakonsha kumwesheshamo lusanchilo pa mambo a lubaji lwabo mu kipwilo ke kupichila mu kwingilako mwingilo wa kulenga baana ba bwanga. (Mat. 28: 19, 20) Onkao mambo, kupichila mu kwingilako pakatampe uno mwingilo ne kwipana kumwingila, banyenga bamwesha kuba’mba banemeka lubaji lwabo mu kipwilo.

¹⁴ Pa kunembela Titusa, Paulo waambile amba: “Banabakazhi bakulumpe nabo pamo, wibambile bekale bafwainwa bazhijikwa, ... bekale bafunjishi ba kufunjisha byawama: namba, bebafunde banabakazhi ba banyike batemwe bamwata wabo, ne kutemwa baana babo, bekale ba michima yatekanya, ba kubula bubi, ba kwingila ku mazubo abo, ba lusa, kasa bebanekenena bamwata wabo abo bene, kuchina’mba, mambo a Lesa akanenwa bibi.” (Titu. 2: 3-5) Bena Kilishitu bakikulumpe bakonsha kwikala ba kumwenako bawama mu kipwilo! Kupichila mu kunemeka balongo batangijila mu kipwilo kabiji ne kufuukula bulongo bintu mu bwikalo bwabo nabiji pa mambo a mvwajilo, mwekelo ne bya kisangajimbwe, bapana kya kumwenako kyawama ku bakwabo ne kumwesha byo banemeka lubaji lwabo mu kipwilo.

15. Nyenga muzhike wakonsha kushinda byepi mukose?

¹⁵ Kimye kimo, kyakonsha kukatazha nyenga muzhike kwikala na lubaji mu kipwilo. Nyenga umo wapichile mu bino waambile amba: “Buzhike kimye kimo bwakonsha kulenga mukose.” Byo bamwipwizhe kukeba kuyuka byo ashinda luno lukatazho, waambile’mba: “Lulombelo ne lufunjisho binkwasha kwikala jibiji na lubaji mu kipwilo. Mfunda pa mambo a bimmona Yehoba. Kabiji nebikako kukeba kukwasha bakwetu mu kipwilo. Kino kinkwasha kulangulukilako bakwetu kukila kwitatu muchima amiwa mwine.” Kwesakana na Salamo 32: 8, Yehoba waambijile Davida amba: ‘Nkakubulanga maana ne jiso jami saka jikutala.’ Kya kine, Yehoba wata muchima bakalume banji bonse, kubikakotu ne banyenga bazhike, kabiji ukwasha bonse kwikala na lubaji mu kipwilo.

Koselai ku Lubaji Lwenu!

16, 17. (a) Mambo ka kutambwila lwito lwa Yehoba lwa kwikala lubaji lwa jibumba janji o kwaikela kintu kyanema kyo twafwainwa kufuukula? (

¹⁶ Yehoba mu butemwe ukoka bakalume banji pa muntu pa muntu kwikala na bulunda ne aye. Yesu waambile’mba: “Kafwako wakonsha kwiya kwi amiwa ne, poso abo Batata bantuma bamukoka.” (Yoa. 6:44) Pa bantu bonse baji panopantanda, Yehoba witwita pa muntu pa muntu kwikala lubaji lwa kipwilo kyanji lelo jino. Kutambwila luno lwito ke kintu kyanema kyo twauba. Kwitulengela kwikala bwikalo bwawama. Byo twikalapo na lusekelo na mambo a kwikala na lubaji mu kipwilo!

¹⁷ Nyimbi wa masalamo waambile’mba: “Yehoba, natemwa bwikalo bwa mu nzubo yenu.” Kabiji waimbile’mba: “Kulu kwami kwaimana paesakana: Monka mu bipwilo nkamutota Yehoba.” (Sala. 26: 8, 12) Atweba bonse pa muntu pa muntu Lesa wa kine witulamina lubaji mu jibumba janji. Kupichila mu kulondela lutangijilo lwa Lesa ne kupayankana mu mwingilo wa Lesa, twakonsha kulama lubaji lwetu lwanema mu lunengezho lwa Yehoba.

b) Twakonsha kulama byepi lubaji lwetu mu jibumba ja Yehoba?

Mukivuluka Nyi?

• Mambo ka o twafwainwa kwambila’mba bena Kilishitu bonse baji na lubaji mu kipwilo?

• Twakonsha kumwesha byepi amba twanemeka lubaji lwetu mu jibumba ja kwa Lesa?

• Bintu ka byakonsha kulamata lubaji lwetu mu kipwilo?

• Bena Kilishitu bakyanyike ne bakikulumpe bakonsha kumwesha byepi kuba’mba banemeka lubaji lwabo mu lunengezho lwa Lesa?

[Bipikichala pa peja 16]

Balongo bakonsha kukanamina byepi mingilo mu kipwilo?

[Kipikichala pa peja 17]

Banyenga bakonsha kumwesha byepi amba banemeka lubaji lwabo mu kipwilo?