Funjishainga Baana Benu

Yelemiya Kechi Wikilekele Ne

NANCHI mwakilefulwapo kala ne kukeba kuleka nyi? —a Bavula byo bomvwa. Yelemiya naye byobyo eumvwinenga byo akijinga mwanyike. Bino byaambilenga bakwabo nangwa kuba kechi bya mulengejile kuleka ne. Twayai twisambe pe Yelemiya wanemene bingi kwi Lesa nangwa kya kuba naye wakebelenga kuleka.

Yelemiya saka akyangye kusemwa, Lesa wa kine Yehoba wamusajile kwikala ngauzhi wa kujimuna bantu babulanga kutokesha Lesa pa muchima. Nanchi wayuka Yelemiya byo aambile kwi Yehoba byo papichile myaka nyi? — “Talai, amiwa kechi nayuka kwamba ne, mambo nkijitu mwanyike.”

Walanguluka’mba Yehoba wamukumbwile’mba ka Yelemiya? — Mu kifyele bino na jiwi jakosa, Wamwambijile’mba: “Kechi wambe’mba: Nkiji mwanyike ne; mambo ku bonse ko nkakutuma ukayako, ne byonse byo nkakukambizha, ukebyamba. Kechi wibachine bantu ne.” Mambo ka? Mambo Yehoba wamwambijile’mba: “Amiwa nji nobe mu kukupokolola.”—Yelemiya 1:4-8.

Nangwa byonkabyo, byonkatu byo twakwamba, Yelemiya walefwilwe. Mambo bamwendelekenga pa kwingijila Lesa. Waambile’mba: “Amiwa naaluka ke wa kusekwa ku bantu juba jonse; bonse babena kuñendeleka.” Onkao mambo, wafuukwilepo kwikileka. Ne kwamba’mba: “Kechi nkamutela [Yehoba] nangwa kwamba jibiji mu jizhina janji ne.” Nanchi kine walekele nyi?

Yelemiya waambile’mba: “Mu muchima wami muba nobe muji mujilo utema, ye bashinkila mu bikupa byami, kabiji amiwa nakoka na kwikanya.” (Yelemiya 20:7-9) Nangwa kya kuba Yelemiya kimye kimo waumvwine moyo, kutemwa Lesa kwamulengejile kubula kuleka. Twayai tumone Yelemiya byo bamuzhikijile byo abujile kuleka.

Yehoba waambijile Yelemiya kujimuna bantu amba Yelusalema bakamonauna umvwe ne kupimpula byubilo byabo ne. Yelemiya byo aambile luno lujimuno, bantu bazhingijile ne kwamba’mba: “Uno muntu wafwainwa kuzhatwa nao a lufu.” Bino Yelemiya wibasashijile “kukokela jiwi ja Yehoba.” Kabiji waambile’mba: ‘Muyukishe’mba umvwe mwangipaya amiwa, mubena kwipaya muntu wabula mambo, mambo Lesa ye wantumine kwamba bino byambo byonse kwi anweba.’ Nanchi wayuka kyamwekele nyi? —

Baibolo wamba’mba: “Babinemanga ne bantu bonse bebambijile bañanga ne bangauzhi amba: Uno muntu kechi wafwainwa kuzhatwa nao a lufu ne, mambo witwambila mu jizhina ja Yehoba Lesa wetu.” Onkao mambo, Yehoba wamuzhikijile Yelemiya mambo kechi walekele ne. Pano twayai tumone kyamwekejile Uliya, ngauzhi mukwabo wa Yehoba walekele.

Baibolo wamba’mba: ‘Uliya wamwawijile bibi Yelusalema monka mwayijile byambo byonse bya Yelemiya.’ Bino Mfumu Yehoyakimu byo amuzhingijile Uliya, wayuka kyo aubile Uliya nyi? — Waumvwine moyo, walekele kuba kyaswa muchima wa Lesa, ne kunyemena ku Ijipita. Mfumu watumine banabalume kuya na kumukwata ne kumuleta. Byo bamuletele, wayuka kyatama mfumu kyo amubile nyi? — Wamwipayile Uliya na mpoko!—Yelemiya 26:8-24.

Mambo ka o wafwainwa kwambila’mba Yelemiya bamuzhikijile kwi Yehoba bino Uliya aye ne? — Nangwa kya kuba Yelemiya waumvwine moyo byonkatu byaumvwine Uliya, aye kechi walekele kwingijila Yehoba ne kunyema ne. Kechi walekele ne. Ki ka kyo twafunjilako kwi Yelemiya? — Kimye kimo kuba byaamba Lesa kechi kwapela ne, bino twafwainwa kumuketekela ne kumukokelanga.

[Tubyambo twa mushi]

Mepuzho:

○ Mwingilo ka Lesa ye apele Yelemiya?

○ Mambo ka Yelemiya kyo akebejilenga kuleka?

○ Mambo ka Yelemiya kyo bamuzhikijile bino Uliya aye ne?

○ Wafunjilako ka ku byaubile Yelemiya?