Lesa Ukapulusha Bantu Kupichila mwi Mesiasa!

“Mambo mo bafwila bonse mwi Adama, mo monka mo bakamwena bumi bonse mwi Kilishitu.” —1 KO. 15: 22.

1, 2. (a) Andeleo ne Filipa baubilepo byepi byo bataine Yesu? (b) Mambo ka o twafwainwa kwambila amba tuji na bishinka byavula bimwesha amba Yesu wajinga Mesiasa kukila byajinga bena Kilishitu ba mu myaka kitota kitanshi?

ANDELEO byo ashiinwe kuba amba Yesu mwina Nazala ye wajinga Mushingwa wa Lesa, wabujile mulongo wanji Petelo amba: “Twatana Mesiasa.” Filipa wasumininwe kabiji wakataine mulunda nanji Natanela ne kumwambila amba: “Twamutana, ye banembele kwi Mosesa mu buku wa Mizhilo, ne ku bangauzhi ba Lesa, Yesu mwina Nazala, mwana Yosefwa.” —Yoa. 1: 40, 41, 45.

² Nanchi ne anweba mwasumininwa amba Yesu ye Mesiasa walayiwe, ‘Ntangi wa Yehoba wa lupulukilo’ nyi? (Hebe. 2:10) Lelo jino, tuji na bishinka byavula bitulengela kusumininwa amba wajinga Mesiasa kukila bishinka byajinga na baana banji ba bwanga ba mu myaka kitota kitanshi. Kufumatu ku lufu lwa kwa Yesu kufika ne ku lusanguko lwanji, Mambo a Lesa amwesha kuba amba wajinga Kilishitu. (Tangai Yoano 20: 30, 31.) Kabiji Baibolo wamwesha ne kuba amba Yesu ukatwajijila kwingila mwingilo wanji wa Bumesiasa mwiulu. (Yoa. 6:40; tangai 1 Kolinda 15:22.) Kwesakana na byo mwafunda mu Baibolo, ne anweba lelo jino mwakonsha kwamba amba ‘mwatana Mesiasa.’ Pano bino akilangulukai baana ba bwanga batanshi byo babujile kuzhinauka kuba amba batana Mesiasa.

“Kyafyamika Kyazhila” kya kwa Mesiasa Kyatendekele Kusololwa

3, 4. (a) Baana ba bwanga ba mu myaka kitota kitanshi ‘bamutaine byepi Mesiasa’? (b) Mambo ka o mwakonsha kwambila amba Yesu ye yenka wakonsha kufikizha bungauzhi bonse bwa Bumesiasa?

³ Baana ba bwanga ba kwa Yesu ba mu myaka kitota kitanshi bakonsheshe kusumininwa byepi amba Yesu wajinga Mesiasa? Kupichila mu bangauzhi, Yehoba watwajijile kusolola biyukilo bya kwiya kwa kwa Mesiasa. Shayuka wa Baibolo umo waesakenye jino jishinda ku kibumbwaloba kyo balenga kwingijisha bipimvwa byapusana pusana. Fwanyikizhai kuba amba banabalume bavula kwa kubula kumvwañana baleta bipimvwa bya kibumbwaloba mu kibamba. Umvwe bino bipimvwa bebisokankanya kuba amba bilenge kibumbwaloba, mwakonsha kwamba amba kwajinga muntu umo wanengezhezhe bino bipimvwa ne kupa bano banabalume. Byonkatu biji bino bipimvwa bya kibumbwaloba, ne bungauzhi bonse bwa Bumesiasa nabo bupana bishinka byanema pa mambo a kwa Mesiasa.

⁴ Nanchi kyakonsheka kuba’mba muntu umo afikizhe bungauzhi bonse bwa Bumesiasa nyi? Shayuka umo upesapesa waambile amba “kechi kyakonsheka muntutu kufikizha bungauzhi bonse bwa Bumesiasa ne. Mu bwikalo bwa bantu bonse, Yesu ye yenkatu wafikizhe buno bungauzhi bonse.”

5, 6. (a) Luzhachisho lwa kwa Satana lukobiwa byepi? (b) Lesa watwajijile kusolola byepi kisemi mwasemekejilwe “lukunwa” walayiwe?

⁵ Bishinka byaamba pa bungauzhi bwa Bumesiasa pamo ne mbaji ikwabo yavula ya mambo akolomwenwe byajinga ‘kyafyamika kyazhila.’ (Kolo. 1: 26, 27; Nte. 3:15) Mu kino kyafyamika mwavwangile ne luzhachisho lwa kwa Satana Diabola, ‘muloolo wa kala,’ awo waletele bundengamambo ne lufu ku bantu. (Lum. 12: 9) Nga luno luzhachisho lukobiwa byepi? Yehoba waambijile jimo kuba amba “lukunwa” wa “mwanamukazhi” ukafumpa Satana ku mutwe. “Lukunwa” waambijilwe jimo ukafumpa mutwe wa muloolo, ne kufumyapo bunsatuki, bikola ne lufu. Nangwa byonkabyo, Lesa waswishishe Satana kufumpa kashiko ka kifwanyikizho ka “lukunwa” wa mwanamukazhi.

⁶ Yehoba watwajijile kusolola “lukunwa” wa mwanamukazhi. Lesa walayile Abalahama amba: “Monka mu ba mu kisemi kyobe [lukunwa] mo mo bakashukilwa ba mu mikoka yonse ya pano pa ntanda.” (Nte. 22:18) Mosesa waambijile jimo kuba’mba uno Lukunwa ukekala “ngauzhi” mukatampe pe aye. (Mpitu. 18: 18, 19) Davida bamulayile bino, kabiji palutwe kacheche bangauzhi baitabizhe kuba amba Mesiasa ukekala wa mu kisemi kyanji kabiji ukaswana bufumu bwa Davida myaka ne myaka. —2 Sam. 7: 12, 16; Yele. 23: 5, 6.

Biyukilo Byamwesheshenga Amba Yesu Wajinga Mesiasa

7. Mu ñanyi jishinda Yesu mo aishijile kufuma ku “mwanamukazhi” wa kwa Lesa?

⁷ Lesa watumine Mwananji, wajinga mutanshi kulengwa kufuma mu jibumba janji ja mwiulu ja mukazhanji wa kifwanyikizho kwikala “lukunwa” walayiwe. Kino kya kebewenga kuba’mba Mwana Lesa yenkawa umo ‘ealule mwine’ ku bwikalo bwa mwiulu ne kusemwa walumbuluka. (Fili. 2: 5-7; Yoa. 1:14) Maliya byo ‘bamunyeñamijile’ ku mupashi wazhila kyamwesheshenga kuba amba awa ukasemwa “ukatelwa’mba wazhila, Mwana Lesa.” —Luka 1: 35.

8. Yesu wafikizhe byepi bungauzhi bwa Bumesiasa kimye kyo epaine kubatizwa mu mema?

⁸ Bungauzhi bwa Bumesiasa bwamwesheshe mpunzha ne kimye kikamweka Yesu. Yesu wasemekejilwe mu Betelema byonka byo kyaambijilwe jimo. (Mika 5: 2) Mu myaka kitota kitanshi, Bayudea bajinga na luketekelo lwabaya bingi. Byo batengejilenga kwiya kwa kwa Mesiasa, bamo baipwizhe pa mambo a kwa Yoano Mubatishi amba: ‘Kana ye Kilishitu nyi?’ Bino Yoano wibakumbwile amba: ‘Wankila amiwa bulume ubena kwiya.’ (Luka 3: 15, 16) Byo aishile kwi Yoano ku mpelo ya mwaka wa 29 C.E. na kubatizwa byo afikizhe myaka ya kusemwa 30, Yesu wimwesheshe kuba’mba wajinga Mesiasa pa kimye kyafwainwa. (Da. 9:25) Kabiji watendekele busapwishi bwanji ne kwamba amba: “Mwaka wafika kala, ne bufumu bwa Lesa bwafwenya ke pepi.” —Mako 1: 14, 15.

9. Nangwa kya kuba kechi bayukile bishinka byonse ne, baana ba bwanga ba kwa Yesu basumininwe amba ka?

⁹ Nangwa byonkabyo, bantu bafwainwe kupimpula milanguluko yabo pa mambo a kwa Yesu. Nangwa kya kuba bantu basakile kuba amba Yesu ekale Mfumu, bino pa kyokya kimye kechi bayukile kuba’mba bukalama bwanji bukekala bwa kulutwe na lwendo kabiji ukalaminanga mwiulu ne. (Yoa. 12: 12-16; 16: 12, 13; Byu. 2: 32-36) Nangwa kikale byonkabyo, Yesu byo aipwizhe amba: “Anweba muntela’mba, ñanyi?” Petelo wakumbwile kwa kubula kukankazhama amba: “Anweba mwi Kilishitu, Mwana Lesa mumi.” (Mat. 16: 13-16) Kabiji bino Petelo byo byo akumbwile ne kimye bavula kyo betuntwile na mambo a byafunjishenga Yesu. —Tangai Yoano 6: 68, 69.

Kumvwina Mesiasa

10. Mambo ka Yehoba o akoseshe kishinka kya kumvwina Mwananji?

¹⁰ Byo ajinga mwiulu, Mwana Lesa yenkawa umo wajinga kilengwa kya mupashi kya bulume. Byo aishile panopantanda, Yesu wamwesheshe amba ‘wafumine kwi Shanji.’ (Yoa. 16: 27, 28) Waambile’mba: “Kufunjisha kwami kechi kwamitu ne, nanchi kwa aye wantuma.” (Yoa. 7:16) Pa kuba’mba akoseshe kishinka kya kuba’mba Yesu wajinga Mesiasa kimye kyo kwajinga kimwesho kya kwaluka, Yehoba waambile’mba: “Mumvwai aye.” (Luka 9:35) Ee, bafwainwe kumvwina nangwa’mba kukokela Uno Watongolwa. Pa kuba’mba bobe bino, bakebewenga kwikala na lwitabilo ne kwingila mingilo yawama yafwainwe kutokesha Lesa ku muchima pa kuba’mba bakatambule bumi bwa myaka. —Yoa. 3: 16, 35, 36.

11, 12. (a) Bintu ka byalengejile Bayudea ba mu myaka kitota kitanshi kukana Yesu amba kechi Mesiasa ne? (b) Bañanyi baitabijile Yesu?

¹¹ Nangwa kya kuba kwajinga biyukilo byamwesheshenga amba Yesu wajinga Mesiasa, Bayudea bavula ba mu myaka kitota kitanshi bamukaine. Mambo ka? Mambo bajinga na milanguluko yabo bene pe Mesiasa, kuvwangakotu ne ya kuba’mba ukekala mesiasa ukatangijilanga bya bumulwila ntanda wafwainwe kwibapokolola ku bibamanyikilenga bena Loma. (Tangai Yoano 12:34.) Onkao mambo, bakaine Mesiasa wafikizhe bungauzhi bwaambile amba bakamusula ku bantu ne kumulengulula, ukekala wa bulanda ne kumvwa kinyenge kabiji palutwe abo bamwipayile. (Isa. 53: 3, 5) Nangwatu baana ba bwanga ba kwa Yesu bamo balefwilwe byo abujile kupokolola bantu ku makatazho a bya bumulwila ntanda. Pano bino batwajijile kwikala bakishinka, kabiji mu kuya kwa kimye, bayukile mwatajile kino. —Luka 24: 21.

¹² Kintu kikwabo kyalengejile bantu kukana amba Yesu kechi wajinga Mesiasa walayiwe ne, kyajinga mafunjisho anji o bakankelwe kumvwisha. Muntu pa kutwela mu Bufumu wafwainwa ‘kwikana mwine,’ “kuja” mubiji wa Yesu ne mashi anji, “kusemwa jibiji” ne ‘kubula kwikala wa panopantanda ne.’ (Mako 8:34; Yoa. 3:3; 6:53; 17: 14, 16) Bino byatongolwa byamwekele kwikala byakatazha kuba ku meso a bantu betotele, banonshi ne bakamfutumfutu. Nangwa byonkabyo, Bayudea bepelwile baitabijile amba Yesu wajinga Mesiasa byonka byaswile bena Samaliya bamo baambile amba: ‘Uno [muntu] kine ye mupulushi wa ba panopantanda.’ —Yoa. 4: 25, 26, 41, 42; 7: 31.

13. Yesu bamufumpile byepi ku kashiko ka kifwanyikizho?

¹³ Yesu waambijile jimo amba bakamulengulula ku bañanga bakatampe ne kumupopa ku Bangetila, kabiji ne kuba amba pa juba ja busatu ukasangulwa. (Mat. 20: 17- 19) Byo aambile ku kije kya Saniedilini amba wajinga “Kilishitu Mwana Lesa” bamulengulwile amba wajinga kamfutumfutu. (Mat. 26: 63-66) Pilato waambile amba ‘ka paji byo aubile byamufwainwe lufu ne,’ pano na mambo a kuba Bayudea bamubepejile amba wasatukile, Pilato ‘wamupaine Yesu amba bobe monka mwasakila michima yabo.’ (Luka 23: 13-15, 25) Onkao mambo ‘bakaine’ ne kwipaya “Mwina bumi,” nangwa kya kuba kwajinga bishinka byavula byamwesheshe amba bamutumine kwi Lesa. (Byu. 3: 13-15) Mesiasa ‘bamwipaile’ ne kumupopela pa kichi pa Juba ja Lupitailo mu 33 C.E. (Da. 9: 26, 27; Byu. 2: 22, 23) Kupichila mu luno lufu lwatamine, bamufumpile ku “kashiko” byonka byo kyaambijilwe jimo pa Ntendekelo 3: 15.

Ene Mambo Mesiasa o Afwijile

14, 15. (a) Bintu ka bibiji byalengejile Yehoba kuswisha Yesu kuba’mba afwe? (b) Yesu waubile ka panyuma ya lusanguko lwanji?

¹⁴ Yehoba waswishishe Yesu kufwa na mambo a bintu bibiji byanema. Kitanshi, bukishinka bwa kwa Yesu kufika ne ku lufu bwasolwele lubaji lwanema lwa ‘kyafyamika kyazhila.’ Wamwesheshe patoka kuba’mba muntu walumbuluka wakonsha kutwajijila “kunemeka Lesa” ne kutumbijika bumfumu bwa Lesa nangwa kya kuba apite mu meseko akatampe kufuma kwi Satana. (1 Timo. 3:16) Kya bubiji, byonka byaambile Yesu amba, ‘Mwana muntu, waishile’mba ... apane mweo wanji ke kya kukula bavula.’ (Mat. 20:28) Buno bukuzhi “bwa kwibakula bonse” bwakasulwile bantu ku bundengamambo bwaswaine baana ba kwa Adama kabiji bwalengela bantu bonse kwikala na jishuko ja kukatambwila bumi bwa myaka na mambo a kwitabila Yesu kuba’mba Lesa ye ye akengijisha kupulusha bantu. —1 Timo. 2: 5, 6.

¹⁵ Panyuma ya kupitapo moba asatu kufuma po afwijile, Kilishitu wasangwilwe kabiji wamwekele ku baana banji ba bwanga pa moba 40, kumwesha kuba’mba wajinga mumi kabiji wibapele ne mikambizho ikwabo. (Byu. 1: 3-5) Panyuma ya bino, kepo ayile mwiulu mu kupana kitapisho kyanema ne kupembelela kimye kyanji kyatongolwa kya kutendekelamo kulama ke Mfumu wa Bumesiasa. Byo akipembelejilenga, waingijilenga mingilo yavula.

Kupwisha Kwingila Mwingilo Wanji byo aji Mesiasa

16, 17. Tongolaipo mwingilo waingijile Yesu panyuma ya kuya mwiulu byo aji Mesiasa.

¹⁶ Pa myaka yavula yapitapo kufuma po asangukijile, Yesu byo aji Mfumu, ubena kutangijila kipwilo kya bwina Kilishitu mu bukishinka. (Kolo. 1:13) Pa kimye kyatongolwa, ukatendeka kwingijisha ngovu yanji byo aji Mfumu wa Bufumu bwa Lesa. Bungauzhi bwa mu Baibolo ne bintu bimweka mu ntanda bimwesha kuba amba kwikalapo kwanji pa Bufumu kwatendekele mu 1914, kimye kyatendekele ‘mpelo ya buno bwikalo.’ (Mat. 24:3; Lum. 11:15) Palutwe kacheche, Yesu waingijishe bamalaika bazhila kupanga Satana ne bandemona banji mwiulu. —Lum. 12: 7-10.

¹⁷ Mwingilo wa kusapwila ne kufunjisha Yesu ye atendekele mu mwaka wa 29 C.E. ubena kunangijila pa kankomo. Katatakatu akebachibile mambo bantu bonse. Kabiji ukabula boba ba bumukooko bamwitabila kuba amba Yehoba ukamwingijisha kupulusha bantu ne kwibalengela ‘kuswana bufumu bo ebatujila ne ku ntendekelo ya panopantanda.’ (Mat. 25: 31-34, 41) Aba bakana kuba’mba Yesu kechi Mfumu ne, bakonaunwa kimye kyo akatangijila nzhita ya mwiulu kufumyapo bubi bonse. Kabiji Yesu ukakasa Satana ne kumutaya mu “kalengwa kabula kupela.” —Lum. 19: 11-14; 20: 1-3.

18, 19. Bintu ka Yesu byo auba pa kufikizha mwingilo wanji wa Bumesiasa, kabiji bika bikobiwa ku bantu balukokelo?

¹⁸ Mu Bukalama bwanji bwa Myaka Kiumbi, Yesu ukoba bintu kwesakana na mazhina anji a mushingi a kuba amba ‘Upana Maana wa Kukumya, Lesa wa Bulume, Shabantu wa Myaka, Mfumu wa Mutende.’ (Isa. 9: 6, 7) Mu bukalama bwa Bufumu bwanji, bantu bakekala balumbuluka, kubikakotu ne boba bakasangulwa mu bafwa. (Yoa. 5: 26-29) Mesiasa ukatangijila bantu bepana ku “masulo atupauka a mema a bumi,” ne kulengela bantu bakishinka kwiyowa bulunda bwawama ne Yehoba. (Tangai Lumwekesho 7: 16, 17.) Panyuma ya lweseko lukapelako, bansatuki bonse, kuvwangakotu ne Satana ne bandemona banji, ‘bakebela mu kizhiba kya mujilo,’ alo lukekala lufu lwa myaka lwa kufumpa mutwe wa ‘muloolo.’ —Lum. 20: 10.

¹⁹ Byo kyawamapo kuba’mba Yesu ubena kwingila mwingilo wanji wa Bumesiasa mu jishinda jawama! Ntanda ya paladisa ikakumbana bantu bakakuulwa, abo bakekala balumbuluka myaka ne myaka na lusekelo. Myendeleko yonse ya kwendeleka jizhina jazhila ja Yehoba ikapwa, kabiji bumfumu bwanji bwa pa bilengwa byonse bukatumbijikwa. Buno ke buswanyi bwawama bingi buji kulutwe ya bonse bakokela Mushingwa wa Lesa.

Nanchi Mwamutana Mesiasa Nyi?

20, 21. Bishinka ka byo muji nabyo byafwainwa kwimulengela kubulako bakwenu pa mambo a kwa Mesiasa?

²⁰ Kufumatu mu 1914 tubena kwikala mu kimye kya kwa Kilishitu kya kwikalapo kwanji [pa·rou·siʹa]. Nangwa kya kuba kwikalapo kwanji pa Bufumu bwa Lesa kechi kumwekanyika ne, bino kumwekanyikila mu kufika kwa bungauzhi. (Lum. 6: 2-8) Nangwa kikale byonkabyo, byonkatu byo kyajinga ku Bayudea ba mu myaka kitota kitanshi, bantu bavula lelo jino bakana kiyukilo kya kwikalapo kwa kwa Mesiasa. Ne abo bakeba ntangi wa bumesiasa nangwa ntangi wakonsha kulama kupichila mu bakalama ba bumulwila ntanda. Pano bino, anweba mwayuka kuba’mba Yesu ke Mfumu ubena kulama mu Bufumu bwa Lesa. Nanchi anweba kechi mwasangalele pa kuyuka bino nenyi? Byonka byaubile baana ba bwanga ba mu myaka kitota kitanshi, ne anweba mwaambile amba: “Twatana Mesiasa.”

²¹ Lelo jino, kimye kyo mwamba pa bukine, nanchi mumwesha mwingilo wa kwa Yesu byo aji Mesiasa nyi? Kuba bino kukabayishako lusanchilo lwenu pa byo emubila kala, byo abena kwimubila lelo jino, ne byo akemubila kulutwe na lwendo. Byonka byajinga Andeleo ne Filipa, ne anweba kwa kubula nangwa kuzhinaukatu ne, mwabulako balongo benu ne balunda nenu pa mambo a kwa Mesiasa. Mambo ka a kubujila kwibabula jibiji na kizaku ne kumwesha kuba amba Yesu Kilishitu kya kine ye Mesiasa walayiwe, Lesa mo akapulwisha bantu?

Mwakonsha Kulumbulula Nyi?

•Baana ba bwanga ba mu myaka kitota kitanshi bataine byepi Mesiasa?

•Bintu ka bibiji byanema byalengejile Yesu kufwa?

•Bintu ka Yesu byo akoba pa kupwisha kwingila mwingilo wanji wa Bumesiasa?

[Bipikichala pa peja 21]

Bantu ba mu myaka kitota kitanshi bayukile byepi amba Yesu wajinga Mesiasa walayiwe?

[Kipikichala pa peja 23]

Kimye kyo mwamba ku bakwenu, nanchi mumwesha mwingilo wa kwa Yesu byo aji Mesiasa nyi?