Kupayankana ne Kusekela mu Mwingilo wa Lesa
YEHOBA ukeba anweba kwikala balusekelo. (Sala. 100: 2) Byo muji bakalume banji, ne anweba kampe mwapayankana. Kimye kimo kechi mwapayankene bino kimye kyo mwipainetu kwi Lesa ne, pano luno mingilo ya ku mubiji ne ya ku mupashi yakonsha kumweka nobe imuvujila. Mwakonsha ne kwizhachisha umvwe mwakankalwa kuba byonse byo mwasakilenga kuba. Pano mwakonsha kwesakanya byepi bintu ne kwikala na ‘lusekelo mwi Yehoba’? —Ne. 8: 10.
Mubena kwikala mu bimye byakatazha kabiji mubena kupita mu makatazho avula, onkao mambo mwafwainwa kwinengezha bulongo. Mu jino jishinda, byambo bya lujimuno bimo byakonsha kwitukwasha ke byobya byanembele mutumwa Paulo na mupashi byaamba’mba: ‘Tajijishai bulongo byo mwenda, kechi pamo na babula maana ne, kana pamo na ba maana; kasa mupulusha bimye, mambo ano moba atama.’ —Efi. 5: 15, 16.
Kwesakana na luno lujimuno lwawama, mwakonsha kwibikila byepi bikonkwanyi bya kine kabiji ne kwesakanya kimye kya lufunjisho lwa pa bunke, kulama kisemi, mwingilo wa mu bujimi ne bintutu bikwabo byanema?
Nanchi muvuluka lusekelo lo mwajinga nalo kimyetu kyo mwipaine kwi Lesa ne kubatizwa nyi? Mwaikele na lusekelo na mambo a kuyuka Yehoba ne nkebelo yanji. Mwafwainwa mwafunjile pa bañondo bavula pa kuba amba mumuyuke ne kwikala na lusekelo. Na mambo a kwibikako kwenu mwafumine bintu byawama. Luno lufunjisho lwalengejile bwikalo bwenu kuwaminako.
Pa kuba’mba mutwajijile kwikala balusekelo, mwafwainwa kutwajijila kuja kajo ka ku mupashi. Umvwe kekimukatazhe kwikala na kimye kya kutanga ne kufunda Baibolo, pitulukai mu mutanchi wenu ne kumona byo aji. Nangwatu pa juba pa juba mubena kufundakotu kimye kicheche ne kulanguluka langulukapo, kuba bino kwakonsha kwimulengela kufwenya kwipi ne Yehoba, kabiji kino kikabaishako lusekelo lwenu.
Bakalume ba Lesa bavula bakonsha kukepeshako kimye kyo bataya ku bintu byabula kunema ne kwikingijisha ku bintu byanema. Iipuzhai anweba bene amba, ‘Ntaya kimye kyabaya byepi kutanga magazini nangwa mapepala a byambo, kutamba malangalanga, kuteleka ku nyimbo nangwa byakisangajimbwe?’ Bino bintu byakonshatu kuwama umvwe twibyuba mu kwesakanya. (1 Timo. 4: 8) Umvwe mwamona kuba amba kechi mubena kwingijisha bulongo kimye kyenu ne, esekai kupimpula mutanchi wenu.
Adama, nsemi wa mulume uji na baana basatu, kabiji mukulumpe mu kipwilo, walondolola kimukwasha amba: “Nebikako kwikala bwikalo bwapela. Nchinuzhuka makayo akonsha kuntayila kimye kyabaya ne bintu bikebewa kuteshako muchima. Kino kechi kimwesha amba ngikala bwikalo bwa kwitolwela ne, natemwatu kwikala na makayo abula kuntayila kimye kyabaya.”
Kulanguluka languluka pa bintu byawama bifuma mu byo mufuukulapo kuba kwakonsha kwimuletela lusekelo ne kwimukwasha kwikala na milanguluko yawama. Kya kumwenako, Mariusz, mukulumpe mu kipwilo uji na baana basatu waambile amba: “Byo natendekele kufunda Baibolo, naikele na luketekelo lwa kulutwe. Mpita mu makatazho pa kimye ne pa kimye, kabiji avula Yehoba ye wiayuka. Bino na mambo a bukwasho bwanji, mbena kupembelela kimye kya kulutwe na lusekelo.”
Byonka byo kyajinga kwi Mariusz, byubilo byawama kechi byakonsha kupwisha bijikila byonse ne. Pano bino byakonsha kwimukwasha kumvwa bulongo ne kuyuka mwakubila na makatazho a mu bwikalo. Tutanga amba: ‘Moba onse a muyanji atama; pakuba awa uji na muchima wa lusekelo wauba nobe ubena kuja kijiilo moba onse.’ (Mana. 15:15) Kabiji langulukai ne pa butemwe Lesa bo emumwesha kala. Kulanguluka pa bino kwakonsha kwimulengela kumutemwa ne kusekela mwi aye. —Mat. 22: 37.
Kutangizhako Yehoba ne byo akeba mu bwikalo bwetu kunungako lusekelo lwa kisemi. Kwikala na byubilo bya bwina Kilishitu kukepeshako mitotololo kabiji kulengela kisemi kukwatankana ne kwikala na misambo yanengela. Mu jino jishinda, mu nzubo yenu mukekala mutende kabiji kisemi kyonse kikekala kyakwatankana. —Sala. 133: 1.
Kwingilako mingilo ya ku mupashi na kisemi kyonse kulengela kwikala na lusekelo lwa kine. Mariusz walondolola amba: “Nanemeka bingi kimye kyo twikala pamo na kisemi. Mukazhami untundaika bingi. Umvwe kyakonsheka, uya ne amiwa kikale mu mwingilo wa mu bujimi nangwa kuwamisha mpunzha ya kushonkena kwa nkambi kupwila saka ku kyangye kutendeka, kabiji tuya bonse kimye kyongya na kwamba majashi a mvula bantu ku bipwilo bikwabo. Kino kintundaika bingi.”
Binembelo bikambizha bena Kilishitu kumwena ba mu nzubo yabo bibafwainwa ku mubiji. (1 Timo. 5: 8) Bino umvwe nkito ya ku mubiji keimutayile kimye kyabaya ne kwimupwishisha bulume, kyakonsha kwimupwishisha lusekelo mu mwingilo wa Lesa. Mubulai Yehoba lukatazho lwenu kupichila mu lulombelo. (Sala. 55:22) Bamo bekimona kuba amba pa kuba amba batangizheko Bufumu bwa Lesa bafwainwa kukeba nkito ikwabo ya ku mubiji. Kafwako mwina Kilishitu wafwainwa kuswa kwingila nkito imutayila kimye kyabaya pa mambo a kukebatu amba afolenga mali avula akonsha kumulengela kubula kuta muchima ku bintu byanema bya ku mupashi ne. —Mana. 22: 3.
Kyakonsha kwimukwasha bingi inge mwanemba buwame ne bubi bonse bwa yoyo nkito. Kya kine kuba amba kutwela nkito yawama ne kufola mali avula kechi kwatama ne. Pano nanchi nkito yenu imukwasha kulama bulongo kisemi kyenu ku mupashi nyi? Monai bintu byo biji ne kufuukula mu bukishinka bintu bibena kumwesha amba bulunda bwenu ne Yehoba kyo kintu kyakilamo kunema.
Umvwe nkito yenu yo mubena kwingila kechi ibena kwimulengela kukoma ku mupashi ne, mwafwainwa kupimpulako bwikalo bwenu. Bena Kilishitu bavula bauba lupimpu lukatampe mu bwikalo bwabo pa kuba amba bekalengako na kimye kya kuba bintu bya ku mupashi. Mulongo mu Poland washimikizha amba: “Kimye kimo nafuukwilepo kwikileka nkito ku kampanyi ko naingilanga na mambo a kuba kimye kyabaya nayanga na kuba busulu. Kechi naikalanga na kimye kyabaya kya kuba bintu bya ku mupashi nangwa kulama kisemi kyami ne.” Lelo jino wingila nkito ibula kumutaila kimye kyabaya ne kumupwishisha bulume.
Ikalai na Lusekelo mu Kukwasha Bakwenu
Yesu waambile amba: “Lusekelo lo bamona aba bapana lwakila lo bamona aba batambula.” (Byu. 20:35) Bena Kilishitu baji na mashuko avula a kupainamo. Kimo kimye, kumwemwesela, kwiimuna mu maboko nangwa kusanchila mukwenu pa kwingila na ngovu mwingilo wa Lesa, kyakonsha kwimuletela lusekelo bonse babiji.
Mutumwa Paulo watundaikile bena Kilishitu bakwabo amba: “Koseshai ba michima yapungila, kwashai banekena.” (1 Tesa. 5:14) Ba michima yapungila bakonsha kwiumvwa kuba amba kechi bakonsha kushinda makatazho na bulume bwabo ne. Nanchi mwakonsha kwibakwasha nyi? Umvwe mwamona kuba amba mulongo wenu kechi uji na lusekelo mu mwingilo wa kwa Yehoba ne, mutundaikai. Kuba bino kukemutundaika ne anweba. Makatazho amo kafwako muntu wakonsha kwiapwisha ne. Nangwa byonkabyo, mwakonsha kumwesha kifyele kabiji mwakonsha kutundaika mulongo wenu kuketekela mu bukwasho bwa Yehoba bubula kukankalwa. Aba boba bino kechi bakebalengesha bumvu ne. —Sala. 27:10; Isa. 59: 1.
Jishinda jikwabo jo mwakonsha kukwashishamo muntu ye mwamona amba lusekelo lwakepa ke kumwitako kuba amba mukengile nanji mu mwingilo. Yesu byo atumine baana banji ba bwanga 70, wibatumine “babiji babiji.” (Luka 10: 1) Nanchi kechi mwaswa kuba amba wanengezhezhe lunengezho lwa kwitutundaikilamo nenyi? Nanchi ne lelo jino kechi mwakonsha kwingijisha jino jishinda kukwashishamo bakwenu bamo kwikala na lusekelo jibiji nenyi?
Kuji bintu bitulengela kwikala na bijikila mu bwikalo. Pano bino, Paulo witukambizha amba: “Sekelai mwi Nkambo moba onse: kabiji nkamba jibiji namba, Sekelai.” (Fili. 4: 4) Bumi bwenu buji na nkebelo mambo a kuba mwamutemwa Lesa, kumukokela, kabiji mwingila mwingilo ye emupa na mukoyo. Kino kimuletela bingi lusekelo. Ne kyakilamo, Yehoba wimukwasha kushinda bijikila ne makatazho o mupitamo. —Loma 2: 6, 7.
Tuji na lwitabilo lwa kuba amba twafwenya kwipi na ntanda ipya yalaya Yehoba. Kukekala mapesho avula aketulengela kwikala balusekelo. (Sala. 37:34) Kabiji twafwainwa kwikala balusekelo, kechi kukankalwa kumona bibena kwitupesha Yehoba lelo jino ne. Ne mu jino jishinda twakonsha ‘kwingijila Yehoba na lusekelo.’ —Sala. 100: 2.
[Kipikichala pa peja 8]
Mwafwainwa kuyuka bya kwabanya kimye pa kuba amba mutwajijile kwikala balusekelo
MAKAYO ne BYAKISANGAJIMBWE
PA NZUBO ne KULAMA KISEMI
NKITO
KUPWILA KWA BWINA KILISHITU
LUFUNJISHO LWA PA BUNKE
MWINGILO
[Bipikichala pa peja 10]
Nanchi mwakonsha kukwasha bakwenu kwikala na lusekelo jibiji nyi?