Mwaiyaipo ku Jishinda Jakilamo Kuwama ja Bwikalo!
“Nangwa twaikala na bumi, nangwa twafwa, twi ba kwa Nkambo.”—LOMA 14:8.
1. Yesu wafunjishe ka pa mambo a jishinda jakilamo kuwama ja bwikalo?
YEHOBA ukeba atweba kwikala bwikalo bwawama. Bantu bakonsha kwikela mu mashinda avula, pano bino kujitu jishinda jimo jakilamo kuwama. Bwikalo bwetu bwakonshatu kuwama inge twalondela Mambo a Lesa ne kufunda ku Mwananji, Yesu Kilishitu. Yesu wafunjishe baana banji ba bwanga kupopwela Lesa na mupashi ne na bukine, kabiji wibakambizhe kulenga baana ba bwanga. (Mat. 28:19, 20; Yoa. 4:24) Umvwe ke tulondele mikambizho ya kwa Yesu mu bwikalo bwetu, tutokesha Yehoba ku muchima kabiji witupesha.
2. Bavula baubilepo byepi pa mambo a Bufumu mu myaka kitota kitanshi, kabiji kwikala mu “Jishinda” kwalumbulwilenga ka?
2 Aba ‘bakeba bumi bwa myaka’ inge baitabila ne kubatizwa, twafwainwa kwibambila amba: “Mwaiyaipo ku jishinda jakilamo kuwama ja bwikalo!” (Byu. 13:48) Mu myaka kitota kitanshi, bantu bavula ba mu mikoka yapusana pusana batambwijile bukine ne kumwesha patoka kwipana kwabo kwi Lesa kupichila mu kubatizwa. (Byu. 2:41) Aba baana ba bwanga batanshi bajinga mu “Jishinda.” (Byu. 9:2; 19:23) Kino kyambo kyafwainwe bingi mambo a kuba aba baishile kwikala baana ba bwanga ba kwa Kilishitu balondejilenga jishinda ja bwikalo bwaimenejile pa lwitabilo mwi Yesu Kilishitu ne kulondela byo aubilenga.—1 Pe. 2:21.
3. Mambo ka bantu ba kwa Yehoba o babatizhilwa, kabiji banga babatizwa pa myaka jikumi yapitapo?
3 Mwingilo wa kulenga baana ba bwanga wayilako palutwe mu ano moba apelako kabiji ubena kwingijiwa mu byalo kukila pa 230. Pa myaka jikumi yapitapo, bantu kukila pa 2,700,000 basalapo kwingijila Yehoba ne kubatizwa mu kumwesha kwipana kwabo kwi aye. Ko kuba’mba bantu kukila pa 5,000 bo babatizwa pa mulungu pa mulungu. Kufuukulapo kubatizwa kwaimena pa butemwe bwa kutemwa Lesa, kuyuka Binembelo ne kwikala na lwitabilo mu bintu byo bafunjisha. Lubatizhilo ke kintu kyanema bingi mu bwikalo bwetu, mambo kimwesha ntendekelo ya bulunda bwetu bwa pa muchima ne Yehoba. Kabiji lumwesha luketekelo lwetu lwa kuba’mba uketukwasha kumwingijilanga mu bukishinka, byonkatu byo akwashishe bakalume banji ba kala kwenda mu jishinda janji.—Isa. 30:21.
Mambo ka o Mwafwainwa Kubatizhilwa?
4, 5. Ambaipo mapesho amo ne mfweto iji mu kubatizwa?
4 Kampe mwamuyuka kala Lesa byo aji, kabiji mwapimpula ne bwikalo bwenu ne kwikala basapwishi babula kubatizwa. Twimusanchila bingi pa kino kintu kyo mwauba. Pano nanchi mwipana kwi Lesa mu lulombelo kabiji mubena kukeba kubatizwa nyi? Na mambo a bintu byo mwafunda mu Baibolo, kampe luno mwayuka amba bwikalo bwenu bwaimena pa kutota Yehoba, kechi kwitokeshatu anweba bene ne kukeba bintu bya ku mubiji ne. (Tangai Salamo 148:11-13; Luka 12:15.) Pano mapesho ka amo ne mfweto iji mu kubatizwa?
5 Inge mwaikala bena Kilishitu bepana, bwikalo bwenu bukalumbuluka bingi. Mukekala balusekelo mambo mukobanga nkebelo ya Lesa. (Loma 12:1, 2) Mupashi wazhila wa Yehoba ukemukwasha kwikala na byubilo bya Lesa nabiji mutende ne lwitabilo. (Nga. 5:22, 23) Lesa ukakumbula milombelo yenu ne kwimupesha pa byo mukebikangako kwikela mwayila Mambo anji. Mukekalanga balusekelo mu mwingilo wenu, kabiji kwikela mwayila bikeba Lesa kukemukwasha kwikala na luketekelo lwakosa lwa bumi bwa myaka ne myaka. Kunungapo, kwipana ne kubatizwa kukamwesha amba kine mukeba kwikala Bakamonyi ba kwa Yehoba.—Isa. 43:10-12.
6. Lubatizhilo lwetu lumwesha ka?
6 Inge twipana kwi Lesa ne kubatizwa, tumwesha amba twi bantu ba kwa Yehoba. Mutumwa Paulo wanembele amba: “Mambo atweba bonse ka paji wiikajila mwine ne, nangwa wifwila mwine ne. Kabiji nangwa twaikala na bumi, twamwikajila Nkambo; kabiji nangwa twafwa, twafwila Nkambo: byonkabyo nangwa twaikala na bumi, nangwa twafwa, twi ba kwa Nkambo.” (Loma 14:7, 8) Lesa witunemeka bingi pa kwitupa lūsa lwa kwifuukwila bintu. Umvwe twakebesha kulondela jino jishinda ja bumi mambo a kuba twatemwa Lesa, tusangajika muchima wanji. (Mana. 27:11) Lubatizhilo lwetu lumwesha patoka amba twipana kwi Lesa kabiji ne kuba’mba Yehoba ye Kalama wetu. Lumwesha amba tuji ku lubaji lwanji mu ano mambo akolomwenwe a bumfumu. (Byu. 5:29, 32) Yehoba naye po po ekala ku lubaji lwetu. (Tangai Salamo 118:6.) Kabiji lubatizhilo lwitushinkwila mashinda a kutambwilamo mapesho akwabo avula a ku mupashi pa kino kimye ne kimye kya kulutwe.
Aba Babatizwa Bashukwa Bingi pa Kwikala na Balongo Babo Mwaya Ntanda
7-9. (a) Yesu walayile ka ku boba bashile bintu byonse ne kumulondela? (b) Mulaye wa kwa Yesu wanembwa pa Mako 10:29, 30 ubena kufikizhiwa byepi?
7 Mutumwa Petelo waambile kwi Yesu amba: “Talai, atweba twaleka byonse, ne kwimulondela; atweba tukamona ka?” (Mat. 19:27) Petelo wakebelenga kuyuka byo akekala kulutwe na lwendo kubikakotu ne baana ba bwanga bakwabo ba kwa Yesu. Pa kuba’mba bepane pakatampe ku mwingilo wa kusapwila Bufumu, bashile bintu byabo bibakwashanga ku mubiji. (Mat. 4:18-22) Nga Yesu wibalayile ka?
8 Kwesakana na jishimikila ja kwa Mako, Yesu waambile’mba baana banji ba bwanga bakekala lubaji lwa balongo ba ku mupashi mwaya ntanda. Waambile’mba: ‘Kafwako muntu waleka nzubo, nangwa balongo, nangwa banyenga, nangwa bainanji, nangwa bashanji, nangwa baana, nangwa majimi, na mambo a amiwa ne na mambo a mambo awama, ukabulwa kutambula mu yonka yino myaka kitota kya mu kintu kimo kya mazubo, nangwa balongo, nangwa banyenga, nangwa bainabo, nangwa baana, nangwa majimi, na bya lupato pamo; kabiji ne mu myaka ikeya namo bumi bwa myaka’ ne. (Mako 10:29, 30) Bena Kilishitu ba mu myaka kitota kitanshi, nabiji Lidiya, Akwila, Pilisila ne Ngayusa bajinga pa boba bapaine “mazubo” ne kwikala “balongo, nangwa banyenga, nangwa bainabo” ku bakwabo ba mu lwitabilo, byonka byalayile Yesu.—Byu. 16:14, 15; 18:2-4; 3 Yoa. 1, 5-8.
9 Byambo byaambile Yesu bibena kufikizhiwa bingi lelo jino. “Majimi” o basha baana banji ba bwanga ke bintu bya ku mubiji, abyo bantu bavula nabiji bamishonale, ba mu kisemi kya Betele, bamwingilo ba ntanda yonse, ne bakwabotu byo basha pa kuba’mba banungululenga Bufumu mu mapunzha apusana pusana. Balongo ne banyenga bavula basha mazubo abo pa kuba’mba bapeezheko bwikalo bwabo, kabiji kino kituletela bingi lusekelo inge ke betubule byo bapitamo kumwesha Yehoba byo ebata muchima kabiji ne uno mwingilo ye bamwingijila byo ebaletela lusekelo. (Byu. 20:35) Kunungapo, bakalume ba Yehoba bonse babatizwa bakonsha kwikala na mapesho a “kusambila kukebesha bufumu [bwa Lesa], ne bololoke bwanji” byo baji lubaji lwa balongo babo ba bwina Kilishitu mwaya ntanda.—Mateo 6:33.
“Mwafyamika” mo Muji Bukikizhi
10, 11. “Mwafyamika mwa kwa Mwine Wakila” mo mu ka, kabiji twakonsha kutwelamo byepi?
10 Mu kwipana ne kubatizwa mufuma ne jishuko jikwabo ja kwikala “mwafyamika mwa kwa Mwine Wakila.” (Tangai Salamo 91:1.) Ino ke mpunzha ya kifwanyikizho ya kufyamamo kuchina bulemo bwa ku mupashi. Ke “mwafyamika” mambo bantu babula kumona ku mupashi ne kubula kuketekela mwi Lesa kechi bayukamo ne. Umvwe ke twikele mwayila kwipana kwetu ne kwikala na luketekelo lukatampe mwi Yehoba, po pamotu ne kwamba kwi aye amba: “Kyo kyami kya kufyamamo, yo nsakwa yami; Ye Lesa wami, mwi aye mo naketekela.” (Sala. 91:2) Yehoba Lesa wikala kyetu kya kwikalamo ne kufyamamo. (Sala. 91:9) Abya kujipo mpunzha ikwabo yakila ino nyi?
11 Kutwela “mwafyamika” mwa Yehoba kulumbulula amba tuji na jishuko ja kwikala na bulunda bwa pa muchima ne aye. Buno bulunda butendeka kupichila mu kwipana ne kubatizwa. Panyuma ya kwipana, tutwajijila kukosesha bulunda bwetu ne Lesa kupichila mu kufwenya kwipi ne aye mu lufunjisho lwa Baibolo, lulombelo lwa kufuma panshi ya muchima ne lukokelo lwa kine. (Yako. 4:8) Kafwako muntu wakifwenyapo kala kwipi ne Yehoba wakila Yesu ne, mambo kechi waleka kuketekela mwi Mulenga ne. (Yoa. 8:29) Onkao mambo, kange tumuzhinaukenga Yehoba, nkebelo yanji ne bulume bwanji bwa kwitukwasha kuba’mba tufikizhe luchipo lwa kwipana kwetu ne. (Sapwi. 5:4) Kajo ka ku mupashi Lesa ko anengezhezha bantu banji ke kishiino kikatampe kimwesha patoka kuba’mba kine witutemwa bingi kabiji ukeba atweba kutwajijila kumwingijila.
Nemekainga Paladisa Wetu wa ku Mupashi
12, 13. (a) Paladisa wa ku mupashi ye mu ka? (b) Twakonsha kukwasha byepi bakatataka?
12 Kwipana ne lubatizhilo nabyo bitushinkwila jishinda ja kwikelamo mu paladisa wa ku mupashi. Ke mpunzha yawama bingi ya ku mupashi yo tujimo na bakwetu ba mu lwitabilo, baji na mutende ne Yehoba Lesa ne kwi abo bene na bene. (Sala. 29:11; Isa. 54:13) Mu ino ntanda kafwamo nangwa kimo kyo twakonsha kwesakanya ku paladisa wetu wa ku mupashi ne. Kino twikimwena ku kukonkana kwa byalo kwikalako, balongo ne banyenga yetu kufuma mu byalo byavula kabiji bamba milaka yapusana pusana ne kufuma ku bisho byapusana pusana ko beya kukonkana mu mutende saka bakwatankana ne kwimwesha butemwe na balongo babo.
13 Paladisa wa ku mupashi ye twiyowa wapusana bingi na bwikalo bwatama bwa ino ntanda lelo jino. (Tangai Isaya 65:13, 14.) Kusapwila mambo a Bufumu kwitulengela kwikala na jishuko ja kwita bantu kwiya na kutwela mu uno paladisa wa ku mupashi. Kabiji ke jishuko bingi kukwasha boba batendekatu katataka kupwanañana na kipwilo kabiji bakonsha kumwenamo mu kwibafunjisha bya kwingila mwingilo. Umvwe bakulumpe mu kipwilo betutangijila, twakonsha kwikala na jishuko ja kukwasha bano bakatataka, byonka byaubile ba Akwila ne Pilisila ‘bamubujishe bulongotu mwayila jishinda ja Lesa’ aye Apolosa.—Byu. 18:24-26.
Twajijilai Kufunda kwi Yesu
14, 15. Bishinka ka byawama byafwainwa kwitulengela kutwajijila kufunda kwi Yesu?
14 Tuji na bishinka byawama bingi byafwainwa kwitulengela kufunjila kwi Yesu. Saka akyangye kwiya panopantanda, Yesu waikele myaka yavula bingi saka engijila pamo ne Shanji. (Mana. 8:22, 30) Wayukile kuba’mba bwikalo bwawamisha bwaimena pa kwingijila Lesa ne kushimuna bukine. (Yoa. 18:37) Yesu wayukishetu kuba’mba mashinda akwabo a bwikalo ajinga a lwiso kabiji a pa kakimyetu kacheche. Wayukile kuba’mba bakamweseka kyatama bingi ne kumwipaya. (Mat. 20:18, 19; Hebe. 4:15) Byo aji Wakumwenako wetu, witufunjishe byo twafwainwa kulama bukishinka bwetu.
15 Panyumatu ya lubatizhilo lwa kwa Yesu, Satana wamwesekele kuba’mba ashe jishinda jakilamo kuwama ja bwikalo, pano bino wapulwijilemotu mabula. (Mat. 4:1-11) Kino kitufunjisha kuba’mba twakonsha kutwajijila kulama bukishinka bwetu kechi na mambo a meseko Satana o akonsha kuleta pe atweba ne. Ukeba kutola kyangwa boba bakeba kubatizwa ne boba babatizwatu katataka. (1 Pe. 5:8) Meseko akonsha kufuma ku ba mu kisemi kyetu bo twaketekela babula kuyuka bishinka pa mambo a Bakamonyi ba kwa Yehoba byo baji. Pano bino, ano meseko etulengela kumwesha byubilo byawama bya bwina Kilishitu nabiji mushingi ne kuyuka mwakwambila pa kukumbula mepuzho o betwipuzha ne kushimuna bukamonyi. (1 Pe. 3:15) Kuba bino kwakonsha kukwasha bingi boba bateleka ku byo twamba.—1 Timo. 4:16.
Lamachilai ku Jishinda Jakilamo Kuwama ja Bwikalo
16, 17. (a) Bintu ka bisatu bikebewa mu bwikalo biji mu Mpitulukilo ya mu mizhilo 30:19, 20? (b) Nga Yesu, Yoano ne Paulo batundaikile byepi byanembele Mosesa?
16 Myaka nobe 1,500 yapichilepo Yesu saka akyangye kwiya panopantanda, Mosesa watundaikile bena Isalela kulondela jishinda jakijilemo kuwama ja bwikalo. Waambile’mba: ‘Naita jiulu ne ntanda bikale ke bakamonyi ba kwimushinawina ja lelo byo namwesha ku meso enu mweo ne lufu, ne mapesho ne mafingo, onkao mambo salululai mweo, namba anweba ne baana benu mukekalenga na bumi. Kasa mutemwa Yehoba Lesa wenu ne kukokela jiwi janji ne kumukakachila.’ (Mpitu. 30:19, 20) Bena Isalela balekele kwikala bakishinka kwi Lesa, pano bino bikebewa bisatu byo bebapele kwi Mosesa kechi byapimpulwa ne. Yesu ne bakwabo nabo bebyambilepo.
17 Kitanshi, ‘twafwainwa kumutemwa Nkambo Lesa wetu.’ Tumwesha amba twatemwa Lesa kupichila mu kuba bintu mwayila mashinda anji aoloka. (Mat. 22:37) Kya bubiji, ‘twafwainwa kukokela jiwi ja Yehoba’ kupichila mu kufunda Mambo a Lesa ne kukokela mikambizho yanji. (1 Yoa. 5:3) Pakuba amba tube bino, twafwainwa kutanwanga ku kupwila kwa bwina Kilishitu kimye kyonse ko tufunda Baibolo. (Hebe. 10:23-25) Kya busatu, ‘twafwainwa kukakachila kwi Yehoba.’ Kechi na mambo a bintu byo twafwainwa kupitamo ne, twayai kimye kyonse tumweshenga lwitabilo mwi Lesa ne kulondela Mwananji.—2 Ko. 4:16-18.
18. (a) Kyamba kya Usopa kyalondolwele byepi bukine mu 1914? (b) Twafwainwa kumvwa byepi pa mambo a kyeya kya bukine lelo jino?
18 Ke mapesho bingi kwikela mwayila bukine bwa mu Baibolo! Mu 1914, bino byambo byanema byanembelwe mu Kyamba kya Usopa kuba’mba: “Nanchi kechi twi bantu balusekelo bo bapesha nenyi? Nanchi Lesa wetu kechi wakishinka nenyi? Inge kujipo muntu wayuka bintu byawama, ebyubenga. Inge pe anweba pajipo umo watana bintu byawama twaketekela amba uketubula. Kafwako bintu bikwabo byo twatana byawama ne, kanatu byonka biji mu Mambo a Lesa... . Kafwako nangwa umo wakonsha kulondolola biji mutende, lusekelo ne mapesho o tuji nao pa kuyuka Lesa wakine byo kwitukwasha mu bwikalo bwetu ne. Jishimikila jaamba pa Maana, Bololoke, Bulume ne Butemwe bwa Lesa jitufika bingi pa muchima. Kechi tukeba bintu bikwabo byakila pa bino ne. Kafwako kintu kikwabo kyo twakonsha kukeba kyakila pa Jishimikila jawama jaamba pa kuyuka Lesa ne.” (Kyamba kya Usopa kya Kizungu kya December 15, 1914, mapeja 377-378) Twatwajijilatu na kusanta pa kyeya ne bukine bwa ku mupashi. Kya kine, twakilamo ne kusekela pa kuyuka’mba tubena ‘kwenda mu kyeya kya Yehoba.’—Isa. 2:5; Sala. 43:3; Mana. 4:18.
19. Mambo ka aba bafikilamo kubatizwa kyo bafwainwa kubila bino kwakubula kukankazhama?
19 Umvwe musaka ‘kwenda mu kyeya kya Yehoba’ pano bino mukyangye kwipana ne kwikala mwina Kilishitu wabatizwa, kange mukankazhame ne. Esekai papelela bulume bwenu kufikizha bikebewa bya mu Baibolo pa kuba’mba mubatizwe, mambo jino jo jishinda jo mwafwainwa kumwesheshamo amba mubena kusanchila Lesa ne Kilishitu pa byo betubila. Mupai Yehoba kintu kyenu kyanemesha kya ku mubiji, ko kuba’mba bumi bwenu. Mweshainga amba mukeba kuba kyaswa muchima wa Lesa kupichila mu kulondela Mwananji. (2 Ko. 5:14, 15) Kwakubula nangwa kuzhinaukatu ne, jino jo jishinda jakilamo kuwama ja bwikalo!
Musakukumbula’mba Ka?
•Lubatizhilo lwetu lumwesha ka?
•Mapesho ka afuma mu kwipana kwi Lesa ne kubatizwa?
•Mambo ka kufunda kwi Yesu kyo kwanemena?
•Ki ka kiketukwasha kukakachila ku jishinda jakilamo kuwama ja bwikalo?
[Kipikichala pa peja 25]
Lubatizhilo lwenu lumwesha amba mwasala jishinda jakilamo kuwama ja bwikalo
[Bipikichala pa peja 26]
Nanchi mwazhikijilwa “mwafyamika” nyi?