Chinuzhukainga Byambo bya Bubela bya kwa Satana

‘KANGE mujimbaikwe ne, mambo aye Lesa wenu kechi ukakonsha kwimupokolola ne. Mupwane ne amiwa nangwa kupita mu bya malwa!’ Bino byo byambo byaambile Labashake muluwe ye batumine kwi Mfumu Senakelibu wa bena Asilya, ku bangikazhi ba mu Yelusalema. Nzhita ya mfumu yalukukile ntanda ya Bayudea. Byambo byaambile uno muluwe byajinga bya kupwishishamo ngovu ya bantu ba mu Yelusalema ne kwibazakamisha pa kuba’mba bakoke.—2 Mfu. 18:28-35.

Bena Asilya bayukanyikilwe kwikala bantu bakanamine ne kushinta. Bazakamishe balwanyi babo kupichila mu kwibabula byo bamwesheshe bazha babo malwa akabotoka. Kwesakana na byaambile shayuka wa bya mpito aye Philip Taylor, baingijishe “muzhilo wakulengesha moyo mwajinga byambo bya bubela, byo banembele kuzakamishishamo bantu bo bashindanga ne kuchinyishamo balwanyi babo.” Bubela ke kingijisho kyashinta bingi. Taylor waambile amba bubela “bonauna bingi milanguluko ya bantu.”

Bena Kilishitu bakine ‘kulwa kwabo kechi kwa kulwa na ba mibiji ya mashi ne, poso na ...bapashi babipa,’ ko kuba’mba na bilengwa bya ku mupashi byasatukijile Lesa. (Efi. 6:12) Satana Diabola ye mukulumpe wa bino bilengwa. Ne aye uzakamisha bantu kwingijisha bubela.

Satana witota amba wakonsha konauna bukishinka bwetu bonse pa muntu pa muntu. Mu moba a mushakulu Yoba, waambijile Yehoba Lesa amba: “Byonse byo aji nabyo muntu ukebipana mu kupulusha mweo wanji.” Mu ñambilo ikwabo, walumbulwilenga amba umvwe muntu bamweseka pakatampe, ponkapotu nangwa pa kupitapo kimye wakonsha kuleka kwikala wakishinka kwi Lesa. (Yoba 2:4) Nanchi Satana waambile kine nyi? Nanchi atweba bonse tufika pa kipimo kya kuba twaleka kukokela mafunde pa kuba’mba tutwajijile na bumi nyi? Satana usaka atweba kulangulukanga bino. Ne mu jino jishinda wingijisha bubela bwine bufita pa kuba’mba etulengele kwikala na ino ndangulukilo. Twayai tumone mashinda amo o engijisha ne byo twakonsha kumushinda.

“Bafumine ku Lukungu”

Satana waingijishe Elifwaza mulunda nanji Yoba umo pa boba basatu, kwamba amba bantu kechi bakonsha kutwajijila kwikala bakishinka kwi Lesa ne. Byo aambilenga pa bantu amba “bekala mu mazubo a maloba,” Elifwaza wabujile Yoba amba: “Bafumine ku lukungu, bo bavingakenya panshi pamo nobe kilongolo. Bonaunwa mu juba jimotu; baonaikatu kikupu kabiji kafwako nangwa umo utako muchima ne.”—Yoba 4:19, 20.

Pakwabo napo mu Binembelo betwesakanya ku ‘bijiilo bya buchimba,’ ko kuba’mba mapuki o babumba na buchimba. (2 Ko. 4:7) Twanekena mambo twaswana bubi ne bumbulwa kulumbuluka. (Loma 5:12) Umvwe ketwitangijile atweba bene, Satana wakonsha kwitulukuka. Pano bino byo tuji bena Kilishitu, tuji na bukwasho bwa Yehoba. Kechi na mambo a kunekena kwetu ne, twanema ku meso a Lesa. (Isa. 43:4) Kabiji Yehoba upana mupashi wazhila ku boba bamulomba. (Luka 11:13) Mupashi wanji wakonsha kwitupa “bukata bwine bwa bulume” bwa kwitukwasha kuyuka mwakubila na makatazho etuletela Satana. (2 Ko. 4:7; Fili. 4:13) Umvwe twamukana Diabola, ‘kasa twakosa mu lwitabilo,’ Lesa uketukosesha. (1 Pe. 5:8-10) Onkao mambo kechi twafwainwa kumuchina Satana Diabola ne.

Muntu “Utoma Bubi”

Elifwaza waipwizhe amba: “Nanchi muntu ye wa byepi, kya kuba’mba akonshe kwikala ke watoka? Nangwa awa wasemwa ku mwanamukazhi, kya kuba’mba akonshe kwikala ke waoloka?” Kabiji wanungilepo kupichila mu kukumbula amba: “Talai, Lesa kechi uketekela nangwa mu bazhila banji ne, ne mwiulu namo kechi mwatoka ku meso anji ne; nanchi nga muntu uba bya bunya ne byabipisha, utoma bubi nobe mema, ukatoka byepi?” (Yoba 15:14-16) Elifwaza waambijilenga Yoba amba kwi Yehoba kafwako muntu nangwa umo waoloka ne. Diabola naye ulengela bantu kwikala na ndangulukilo yatama. Ukeba atweba kwikala na bijikila pa bilubo byetu bya kunyuma, kwizhachisha, ne kwimona nobe kechi twakonsha kulekelwa mambo ne. Kabiji ukeba atweba kulangulukanga amba Yehoba witukebela kuba byavula kabiji ne kuba’mba lusa lwanji, byo etulekela mambo ne bukwasho bwanji kechi byakonsha kuvweta pa bilubo byetu ne.

Ibyo ee kuba’mba atweba bonse ‘twalenga mambo, kabiji twapelelelatu ne kufika ku lukumo lwa Lesa ne.’ Kafwako muntu nangwa umo mbulwa kulumbuluka wakonsha kulondela mizhilo yonse yaoloka ya Yehoba ne. (Loma 3:23; 7:21-23) Pano bino, kino kechi kilumbulula amba twabula kunema kwi aye ne. Yehoba wayuka kuba’mba ‘muloolo wa kala, ye batela’mba, Diabola ne Satana,’ ye ubena kwitutwelelela na mambo a bundengamambo bwetu. (Lum. 12:9, 10) Lesa byo ayuka amba ‘twi lukungu,’ witulekelako mambo kabiji kechi ‘utwajijila kwitunena’ ne.—Sala. 103:8, 9, 14.

Umvwe twaleka kuba bintu byatama ne kusolomoka Yehoba mu lulombelo na muchima wa bulanda ne kulapila, ‘aye uketulekela mambo etu onsetu.’ (Isa. 55:7; Sala. 51:17) Baibolo waamba amba nangwa kya kuba mambo etu “achilatu nge, akekala ke atokatu to nobe sino.” (Isa. 1:18) Onkao mambo, twayai tutwajijile kwibikako kuba kyaswa muchima wa Lesa.

Byo tuji bandengamambo, kechi twakonsha kwikala baoloka ku meso a Lesa ne. Adama ne Evwa kechi batwajijile kwikala balumbuluka ne, kabiji baelele luketekelo lwabo lwa bumi bwa myaka pamo ne lwetu bonse. (Loma 6:23) Nangwa byonkabyo, na mambo a butemwe bwanji bukatampe bwa kutemwa bantu, Yehoba wabikileko lunengezho lwa kwitulekela mambo umvwe twaikala na luketekelo mu kitapisho kya bukuzhi bwa Mwananji Yesu Kilishitu. (Mat. 20:28; Yoa. 3:16) Buno byo bwajingapo “bupe” bwa Lesa bwawama! (Titu. 2:11) Mambo etu alekelwa. Pano mambo ka a kulekela Satana kwitulengela kulanguluka amba kechi twakosha kulekelwa mambo ne?

‘Kwatai ku Bikupa Byanji ne pa Mubiji Wanji’

Satana waambile amba Yoba ukaleka kwikala na lwitabilo umvwe butuntulu bwanji bwa mubiji bwabula kulumbuluka. Pa kulengulula byaambile Yehoba, Diabola waambile amba: ‘Kwatai ku bikupa byanji ne pa mubiji wanji aye ukemunena mwenga konka ku meso enu.’ (Yoba 2:5) Kwakubula nangwa kuzhinaukatu ne, Mulwanyi wa Lesa wakonsha kwitulengela kwilengulula na mambo a kubelabela.

Pano bino, Yehoba kechi witukana na mambo a kukankalwa kuba bintu byonse byo twaubanga mu mwingilo wanji ne. Ibyepi umvwe mulunda netu bamulukuka ne kumukozha? Nanchi twakonsha kumulengulula na mambo a kukankalwa kwitubila byonse byo etubilanga kala nyi? Ine! Twakonsha kutwajijila kumutemwa ne kumuta muchima kikatakata inge bamukozhezhe na mambo a kusaka kwitukwasha. Nanchi Yehoba wakonsha kwitulubako nyi? Baibolo waamba amba: ‘Lesa kechi wabula koloka’mba, avulame mwingilo wenu ne butemwe bo mwijimwesha jizhina janji’ ne.—Hebe. 6:10.

Binembelo byamba pa ‘mulanda mwanamukazhi wafwijilwe’ watundaikilenga mpopwelo ya Lesa pa myaka yavula. Yesu byo amwene uno mwanamukazhi na kutayamo “tundalama tubiji tucheche” mu kilambwilo kya mali mu nzubo ya Lesa, nanchi wamulengulwile pamo ne bupe bwanji nyi? Mu kifulo kya kuba bino, wamutakaikile bingi byo atundaikile mpopwelo ya kine kwesakana na papelejile bulume bwanji.—Luka 21:1-4.

Umvwe twatwajijila kwikala bakishinka, twakonsha kusumininwa kuba amba bulunda bwetu na Yehoba bukakosa, kechi na mambo a bukote nangwa kukolwa kolwa kubiwa na mambo a bumbulwa kulumbuluka ne. Lesa kechi ukalekelela bantu banji bakishinka na mambotu a kuba’mba makatazho o bapitamo ebalengela kukankalwa kumwingijila na bulume bwabo bonse ne.—Sala. 71:9, 17, 18.

“Mutambule kya Kulama Mutwe kya Lupulukilo”

Twakonsha kwizhikijila byepi ku bubela bwa kwa Satana? Mutumwa Paulo wanembele amba: “Ikoseshainga mwi Nkambo, ne mu bulume bwa ngovu yanji. Vwalai byonse bya nkondo bya Lesa, namba mukonshe kwimana saka mwakosa ku bya bujimuku bya Diabola.” Lubaji lumo lwa kino kivwalo kya nkondo kya ku mupashi ke “kya kulama mutwe kya lupulukilo.” (Efi. 6:10, 11, 17) Na mambo a bubela bwa kwa Satana, twafwainwa kumona amba tuji na kino kya kuvwala ne kutwajijila kwikivwala. Kya kulama mutwe kya mushilikale kizhikijila mutwe wanji. “Luketekelo lwa lupulukilo” lwetu, ko kuba’mba luketekelo lo tuji nalo mu kufika kwa milaye ya Lesa ya ntanda ya lukumo lwanji lukazhikijila milanguluko yetu ku bubela bwa kwa Satana. (1 Tesa. 5:8) Twafwainwa kutwajijila kukosesha luno luketekelo kupichila mu kwikala na mukoyo wa lufunjisho lwa pa bunke lwa mu Binembelo.

Yoba wachinchikile lupato lwatamine kufuma kwi Satana. Wajinga na lwitabilo lwakosa mu lusanguko kya kuba kechi wajinga na moyo wa kuchina lufu ne. Mu kifulo kya byobyo, waambijile Yehoba amba: “Mukangita ne amiwa nkemwitaba; ne anweba mukasaka kwikala ne amiwa ye mwalenga.” (Yoba 14:15) Nangwa kya kuba Yoba wayukile amba ubena kufwa na mambo a kutwajijila kwikala wakishinka, waketekejile amba butemwe bwa Lesa bo atemwa bakalume banji bakishinka bukamulengela kusangula bafwa.

Twayai ne atweba twikale na luno lonka luketekelo mwi Lesa wakine. Yehoba wakonsha kufumyapo byonse byaleta Satana ne bantu banji pe atweba. Kabiji vulukai ne kuba’mba Paulo witulayile amba: “Lesa ye wa kishinka, kechi akemuleke’mba, mumone lweseko lwakila pa bulume bwenu ne: bino mu lweseko ukemumwena ne jishinda ja kupulukilamo, amba mumone mwa kwilukonshesha.”—1 Ko. 10:13.

[Kipikichala pa peja 20]

Yehoba wanemeka bingi mwingilo wenu ye mwingila mu bukishinka

[Kipikichala pa peja 21]

Ikalai na kya kulama mutwe kya lupulukilo ne kutwajijila kwikivwala