Nanchi Muleka Yehoba Kuba’mba Emwipuzhe Nyi?

MU Baibolo muji mepuzho avula bingi afika bantu pa muchima. Kya kine, Yehoba Lesa wipuzha mepuzho pa kuba’mba afunjishe bukine bwanema. Kyakumwenako, Yehoba waipwizhe mepuzho avula byo ajimwinenga Kaina kuleka jishinda janji jatama. (Nte. 4:6, 7) Pa kimye kikwabo, bwipuzho bo aipwizhe Yehoba bwakonsheshe kulengela muntu kupimpula bwikalo bwanji. Aku umvwatu Yehoba byo aipwizhe amba: “Ñanyi ye nsakutuma, kabiji ñanyi usakwitwendela?” Ngauzhi Isaya wakumbwile’mba: “Amiwa bano! Ntumai amiwa.”—Isa. 6:8.

Yesu Mufunjishi Wayukisha naye waipuzhanga bulongo mepuzho. Mu mabuku a Mambo awama mwanembwa mepuzho kukila pa 280. Nangwa kya kuba kimo kimye waipuzhanga mepuzho a kuzhindamikilamo bakajimbuluzhi, wakebelenga kufika pa michima ya bantu bamutelekelenga, ne kwibalengela kumona bulunda bwabo byo buji ne Lesa. (Mat. 22:41-46; Yoa. 14:9, 10) Po pamotu, ne mutumwa Paulo, awo wanembele mabuku 14 a Binembelo bya bwina Kilishitu bya Kingiliki, wayukile bya kwipuzha mepuzho a kwitabishishamo bantu. (Loma 10:13-15) Kyakumwenako, mu nkalata yanji yo anembejile bena Loma muji mepuzho avula. Mepuzho aipwizhe Paulo akwashishe bantu batangilenga mabuku o anembele kumvwisha ‘byazhika bunonshi, ne maana, ne kuyukisha kwa Lesa!’ —Loma 11:33.

Nangwa kya kuba mepuzho amo akonsha kulengela muntu kufikenatu kukumbula, akwabo alengela muntu kulangulukishapo. Mu mabuku a Mambo awama mwanembwa mepuzho alengela muntu kulangulukishapo. Pa kimye kimo, Yesu wajimwineko baana banji ba bwanga amba: “Mujimuke ku mbizho ya Bafaliseo ne mbizho ya Heloda,” kibena kulumbulula kujimuka ku bujimbijimbi bwabo ne mafunjisho abo a bubela. (Mako 8:15; Mat. 16:12) Baana ba bwanga ba kwa Yesu kechi baumvwine byambo byo aambile ne, kabiji batendekele kwipachika pa mambo a kulubako kusenda kajo. Akimonai Yesu byo aipwizhe mepuzho mu mwisambo wabo mwipi. ‘Wibambile’mba, Mambo ka o mwambañena na mambo a kubula kajo? Mukyangye kuyukanyi, nangwa kumvwisha nenyi? Michima yenu yakosa nyi? Muji na meso ne kumona nenyi? Kabiji muji na matwi ne kumvwa nenyi? ... Mukyangye kumvwanyi?’ Mepuzho aipwizhe Yesu alengejile baana banji ba bwanga kulanguluka ne kwibalengela kumvwisha mwatajile byambo byanji.—Mako 8:16-21.

“Amiwa Nsakukwipuzha”

Yehoba Lesa waipuzhanga mepuzho pa kuba’mba akwashe kalume wanji Yoba kupimpula ndangulukilo yanji. Kupichila mukwipuzha mepuzho avula, Yehoba wafunjishe Yoba kuyuka amba ke muchechetu kwi Mulenga wanji. (Yoba, kita. 38-41) Nanchi Yehoba waketekejile kumukumbula pa ano onse mepuzho nyi? Kyamweka nobe kechi wakebelenga mikumbu yonse ne. Mepuzho nabiji a kuba’mba “Obewa wajinga pi byo naajile kitendekesho kya pano pa ntanda?” ajinga a kukebatu kulengela Yoba kulangulukapo. Nangwatu panyuma ya kumwipuzha ano mepuzho akatazha, Yoba washi akakankalwe ne kya kwamba. Kyo aambiletu ke kya kuba amba: “Nemukumbule ka? nazhika kuboko kwami pa kanwa kami.” (Yoba 38:4; 40:4) Yoba waumvwine kishinka ne kwipelula wipelwile. Pano bino Yehoba kechi wafunjishengatu Yoba kwikala wipelula ne. Bamukwashishe ne kupimpula milanguluko yanji. Mu ñanyi jishinda?

Nangwa kya kuba Yoba wajinga ‘muntu walumbuluka ne koloka,’ kimo kimye wapusanga mu byambo byo aambanga. Elihu naye wikimwene kino byo a mubukijile bukaji Yoba pa byo ‘ebingishishe mwine, kechi wamubingishishe Lesa ne.’ (Yoba 1:8; 32:2; 33:8-12) Onkao mambo mepuzho o bamwipwizhe Yoba kwi Yehoba amulengejile kuyuka bishinka. Byo amwambijile Yoba monka mu kinkunkwila, Lesa waambile amba: ‘Uno ye ñanyi uvulañanya maana na byambo byatu bya bulubi? Inyingishe bwanabulume; amiwa nsakukwipuzha, ne obewa usakunkumbula.’ (Yoba 38:1-3) Kupichila mu kwipuzha mepuzho, Yehoba wamwesheshe maana anji abula kupela ne bulume bwanji bumwekela mu bintu bya kukumya byo alenga. Yoba byo ayukile bino, kyamukwashishe kuketekela mu buchibamambo bwa Yehoba ne jishinda mo obila bintu jo abujile kuyukapo ne. Kino kintu kyo bamwipwizhe Yoba kwi Lesa wa Bulume bonse, kyajinga kya kukumya bingi!

Byo Twakonsha Kuleka Yehoba Kwitwipuzha

Nga atweba kiji byepi? Nanchi ne atweba twakonsha kumwenamo mu mepuzho anembwa mu Baibolo nyi? Ee, twakonsha kumwenamo! Umvwe ketulanguluke pa ano mepuzho akonsha kwitulengela kumwenamo ku mupashi. Mepuzho afika pa muchima aji mu Mambo a Lesa o etulengela kumwenamo ku mupashi. Kya kine, “mambo a Lesa ... engila ... ne kupima milanguluko ya michima ne mo yayila. (Hebe. 4:12) Pano bino, pa kuba amba tumwenemo pakatampe twafwainwa kwiipuzha ano mepuzho nobe Yehoba ye ubena kwitwipuzha pa muntu pa muntu. (Loma 15:4) Twayai tumone byakumwenako.

“Aye Mutonyi uchiba mambo a ba pano pa ntanda ponse kechi obe kyaoloka nenyi?” (Nte. 18:25) Abalahama waipwizhe Yehoba buno bwipuzho bwa kukumbwila mu muchima pa kimye Yehoba kyo aletele buchibamambo pa bena Sodoma ne Gomola. Abalahama wayukile ku ba’mba Yehoba kechi wakonsha kuba kintu kyanshiji kya kwipayila pamo baoloka na babi ne. Bwipuzho bwa kwa Abalahama bumwesha lwitabilo lwakosa lo ajinga nalo mu bololoke bwa Yehoba.

Lelo jino bamo bakonsha kebalanguluke pa bikekala buchibamambo bwa Yehoba kulutwe, nabiji pa mambo a boba bakapuluka Amagedonyi nangwa boba bakasangulwa. Mu kifulo kya kuleka ino milanguluko kwituvulañanya, twakonsha kuvulukanga bwipuzho bwa kwa Abalahama. Kuyuka amba Yehoba ye Shetu wa mwiulu wituta muchima ne kwikala na luketekelo mu buchibamambo ne lusa lwanji, byonka byaubile Abalahama, kwitulengela kubula kutaya kimye ne bulume bwetu ku bijikila, luzhinauko, ne kwichocheka kwabula kufwainwa.

“Ñanyi mukwenu pa kubambisha muchima ukonsha kwinungako nangwa kacheche ku kimino kyanji?” (Mat. 6:27) Byo aambilenga ku jibumba jikatampe saka paji ne baana banji ba bwanga, Yesu waipwizhe buno bwipuzho kumwesha ene mambo o kyanemejile kwi abo kwikala mu butemwe bwa Yehoba. Mu ano moba apelako a bwikalo bubi muji bingi bintu bileta bijikila, pano bino inge ketulangulukishe pa bino bijikila kechi twakonsha kwikala bulongo ne.

Umvwe twaikala na bijikila byetu nangwa bya batemwe betu, kuvuluka bwipuzho bwa kwa Yesu kwakonsha kwitukwasha kuyuka mwakubila na bintu bituletela bijikila. Kwakonsha kwitukwasha kubula kwikala na bijikila ne milanguluko yatama ilengela kulefulwa mu milanguluko ne kukoka mubiji. Byonka bitulaile Yesu, Shetu wa mwiulu, ujisha bañonyi ba mwiulu ne kuvwika maluba a mungye, wayukishatu byo twakajilwa.—Mat. 6:26-34.

“Nanchi muntu wakonsha kubika mujilo pa kyaji, ne bivwalo byanji kupya nenyi?” (Mana 6:27) Bitango 9 bitanshi bya mu buku wa Byambo bya Mana, mwanembwa ne majashi aamba pa nsemi wa mulume ubena kufunda mwananji wa mulume. Buno bwipuzho bwaipuzhiwa kala bwaamba pa byatama bifuma mu kuba bukende. (Mana 6:29) Umvwe twatana kuba’mba tubejongaulenga mu jishinda jabula kufwainwa, nangwa kulanguluka pa kwilaala kwabula kufwainwa, buno bwipuzho bwafwainwa kwituvululamo bya kuchinuzhuka bino bizumba. Buno bwipuzho kechi bwakonshatu kwingila mu luno lubaji ne, bino muntu wakonsha ne kwiipuzha umvwe usaka kuba bintu byatama. Bwamwesha ne mwatala jifunde ja mu Baibolo jaamba amba: “Kyo abyala muntu kyo kyonka kyo akanowa.”—Nga. 6:7.

“Obewa yobe ñanyi byo uzhachisha wa mwingilo wa ungi?” (Loma 14:4) Mu nkalata yanji ku bena Loma, Paulo wanembelemo makatazho ajinga mu kipwilo kya mu myaka kitota kitanshi. Bena Kilishitu bamo, mambo a kuba bafumine mu bisho byapusana pusana, batemenwe bingi kuzhachisha bakwabo ba mu lwitabilo pa byo bafuukulanga ne kuba. Bwipuzho bwaipwizhe Paulo bwibavulwilemo amba bafwainwe kwitambwilanga abo bene na bene ne kuleka Yehoba kuba’mba ye wafwainwa kuzhachisha.

Ne lelo jino, bantu ba Yehoba bafuma mu bwikalo bwapusana pusana. Pano bino Yehoba witukwatankanya pamo. Nanchi ne atweba tumwesha uno muchima wa kukwatankana nyi? Umvwe tupelawizha kulengulula byuba balongo betu, kyawama kwiipuzha atweba bene bwipuzho bwaipwizhe Paulo.

Mepuzho Etulengela Kufwenya Kwipi ne Yehoba

Bino byakumwenako bichechetu bimwesha bulume bwa ano mepuzho aji mu Mambo a Lesa. Kuyuka mwatala mepuzho kwitukwasha kuyuka mwakubila na bintu mu bwikalo bwetu. Kabiji byotutanga Baibolo, tuyuka ne mepuzho akwabo akonsha kwitukwasha.—Monai kakitenguluzha kaji pa jipa 14.

Umvwe twaleka ano mepuzho aji mu Mambo a Lesa kwitufika pa muchima, kitulengela kwendanga mu mashinda aoloka a Yehoba. Yehoba byo amwipwizhe, Yoba wakumbwile amba: “Kala naumvwinetu nkuwa yenu, pakuba lelo meso ami emumona.” (Yoba 42:5) Ee, Yehoba bamuyukile bulongo kwi Yoba nobe wamumwenenga. Mwana wa bwanga Yakoba waambile amba: “Fwenyai kwipi ne Lesa, kabiji ne aye ukafwenya kwipi ne anweba.” (Yako. 4:8) Twayai tuleke mbaji yonse ya Mambo a Lesa, kubikakotu ne mepuzho ajimo kwitukwasha kukoma ku mupashi ne ‘kumonanga’ Yehoba bulongo.

[Kitenguluzha pa peja 14]

Kwiipuzha ano mepuzho kwakonsha kwimukwasha byepi kumonanga bintu byonka Yehoba byo ebimona?

▪ ‘Nanchi aye Yehoba usekela mu milambo ya kusoka ne mu bitapisho pamo byonka byo asekela na bantu pa kukokela jiwi janji nyi?’—1 Sam. 15:22.

▪ “Aye walengele jiso, kechi amone nenyi?”—Sala. 94:9.

▪ ‘Wayukapo muntu wilanguluka’mba: Ne wa maana nyi?’—Mana 26:12.

▪ ‘Obewa byo wazhingila wauba kyawama nyi?’—Yona 4:4.

▪ “Ukajilamo ka muntu nangwa ukanonka ntanda yonse umvwe wataya mweo wanji?”—Mat. 16:26.

▪ “Ñanyi uketwabanya na butemwe bwa Kilishitu?”—Loma 8:35.

▪ “I ki ka kyo uji nakyo kyo wabujile kutambula?”—1 Ko. 4:7.

▪ “Kyeya ne mfishi byumvwañane pamo byepi?”—2 Ko. 6:14.

[Kipikichala pa peja 15]

Yoba wafunjijileko ka ku mepuzho a kwa Yehoba?