Mukwekele Wa Mu Bulgaria Ubena Kwenda Bingi Bulongo

“Bujimi bwa kunowa bwabayisha kine, pakuba ba kunowabo bakepa. Byonkabyo lombai ku Mwina bujimi atume bantu ba kunowa mu bujimi bwanji.”—MAT. 9:37, 38.

BINO byambo byaambile Yesu byayilamo bingi na mwingilo ubena kwingijiwa mu Bulgaria, kyalo kyawama kyaikela ku Mitumba ku kabeta ka ku bulenge musela bwa Europe! Ku ino mpunzha kubena kukebewa bingi ba mwingilo bavula bakutwala mambo awama ku bangikazhi bakila pa mamilyonyi atanu na abiji. Pa kino kimye mu Bulgaria muji basapwishi 1,700, pano bino bakankalwa kusapwila nyaunda yonse. Na mambo a luno lukatazho, Jibumba Jitangijila jalangulukilepo ne kutuma Bakamonyi bamba mulaka wa ki Bulgaria kufuma mu byalo byavula bya ku Europe kuya na kwingilako mu uno mukwekele mu mwaka wa 2009. Uno mukwekele bamunengezhezhe kwikalako pa milungu itanu na ibiji mu kimye kya kisalo kufikatu ne kimye kyo kwajinga Kushonkena kwa Nkambi kwa “Labainga Mukenkentenga!” kwaikejile mu muzhi wa Sofia, pa August 14-16, 2009.

Bantu Bavula Batambwila Mambo Awama

Balongo pa ofweshi wa musampi mu muzhi wa Sofia kechi bayukile kibelengelo kya basapwishi bakonsheshe kufuma mu France, Germany, Greece, Italy, Poland ne Spain kwiya na kwingila uno mwingilo ne. Kino kyalumbulwilenga kwinengezhezha ñendelo abo bene kabiji ne kwingijisha moba abo a kukokoloka kusapwilamo. Byo kyaletelepo lusekelo kumona kibelengelo kya bantu bakebelenga kwingilako uno mwingilo byo kyabaijilengako mulungu ne mulungu kufikatu ne byo kyafikile 292! Kubaya kwa kino kibelengelo, kwalengejile bamwingilo wa kwipana kwibatuma kuya na kusapwila mu mizhi isatu ya kyalo kya Bulgaria: Ko kuba amba Kazanlak, Sandanski, ne Silistra. Kabiji bakalama ba mwanzo mu Bulgaria baambijile bapainiya ne basapwishi ba mu kyokya kyalo kuya na kwivwanga mu uno mukwekele. Palutwe kacheche ba mwingilo wa kwipana 382 basapwijilenga na kizaku mu manyaunda mwabulanga kusapwilwa mambo awama javula.

Balongo ba mu bipwilo bya kipikipi bebatumijile jimo kuya na kunengezha mazubo mwakufikila benyi. Basonkejile bibamba ne mazubo mufikila benyi akepeleko mutengo. Bano balongo baingijile bingi na ngovu kukwasha ba mwingilo wa kwipana baishile ne kwibakwasha mu byo bakajilwe. Mu ino mizhi yonse isatu, basonkejilenga mapunzha mo basambakenanga. Banengezhezhe kuba amba kupwila kwa kipwilo kutangijilwenga na balongo bayishile. Kyaletele bingi lusekelo pa kumona kuba’mba mu mapunzha mwabujilepotu nangwa Kamonyi umo ne, mwajinga basapwishi 50 bapwilanga na kutota Yehoba.

Aba baishile kufuma mu byalo bingi na kukwashako mu uno mukwekele baingijilenga bingi na kizaku. Mu kimye kya kisalo, mu Bulgaria mwakonsha kutwa kyuya kukila pa 40°C. Nangwa byonkabyo, kafwako kyakonsheshe kulengela bano balongo ne banyenga babambakana kuleka kusapwila ne. Mu milungu itanshi isatu ya uno mukwekele, basapwishi basapwijile bingi mu muzhi wa Silistra uji ku Mukola wa Danube muji bangikazhi 50,000. Kunungapo, balongo basapwijile bingi na ngovu mu mizhi yajinga kipikipi kukafikatu ne ku Tutrakan kwalepa makilomita 55 ku muzhika wa Silistra. Batendekanga kusapwila lukelo na kimye kya 9:30hrs. Panyuma ya kuja kajo ka pachaile, batwajijilanga kusapwila kufikatu ne mabanga na kimye kya 19:00hrs nangwa kukilapo. Kabiji na mambo a kizaku kikatampe kya ba mwingilo wa kwipana, mukwekele mu Kazanlak ne Sandanski waingijilwe kufika ne ku mizhi ya kipikipi ne mapunzhatu akwabo.

Ki ka Kyafuminemo?

Pa milungu itanu na ibiji yaingijilwe uno mwingilo, bukamonyi bwashimwinwe bingi ku bantu. Byonka byo kyaambilwe mu kimye kya batumwa, bangikazhi ba mu ino mizhi nabo bakonsheshe kwamba’mba, ‘Anweba mwakumbanya muzhi wetu na mafunjisho enu.’ (Byu. 5:28) Bano Bakamonyi bashijile bantu magazini 50,000 kabiji batendekele mafunjisho a Baibolo 482. Kya lusekelo ke kya kuba’mba, pa 1 September, 2009, kwalengelwe kipwilo mu muzhi wa Silistra kabiji mu Kazanlak ne mu Sandanski namo muji mabumba alengwa. Kisangajika bingi kumona bantu baumvwine mambo awama kimye kitanshi mu uno mukwekele byo babena kunungulukilako ku mupashi.

Mu mulungu mutanshi wa uno mukwekele, nyenga umo painiya wiikajila wafumine ku Spain kabiji wamba mulaka wa ki Bulgaria, wasapwijile Karina, mwanamukazhi wa mu muzhi wa Silistra wapoteshenga mapepala a byambo mu mukwakwa. Karina wamwesheshe lusekelo kabiji waishile mu kupwila. Waswile kufunda Baibolo. Na mambo a kuba mwatawanji ke muntu ukana amba Lesa kafwako, Karina walombele ku uno nyenga amba bafunjilenga Baibolo mu paka. Wafunjijilenga pamo Baibolo na baana banji babiji babakazhi. Mwananji wa mukulumpe, aye Daniela wamwesheshe bingi lusanchilo pa mambo a bukine bwa mu Baibolo. Watangile buku wa Baibolo Ufunjisha yense pa mulungu umo kabiji ne kwingijisha byaamba Baibolo pa mambo a kubula kwingijisha bipashañano mu mpopwelo. Panyuma ya bino, watendekele kubulako bakwabo bukine. Byo papichile milungu isatu kufuma juba jitanshi jo atainwe ku kupwila, waambijile nyenga wamufunjishanga Baibolo amba: “Mbena kukeba kwinunga ku munongo wenu. Nafwainwa kuba ka pa kuba’mba ne amiwa ntendeke kusapwila?” Daniela watwajijila kunungulukilako ku mupashi pamo na bainanji ne nkasanji wa mukazhi.

Juba jimo mu Kazanlak, mulongo mwina Bulgaria wa jizhina ja Orlin, awo waishile kufuma ku Italy na kwingilako mu uno mukwekele, wafuminenga mu mwingilo wa mu bujimi kuya ku bibamba ko bafikijile. Byo ayilenga mu jishinda, Orlin wasapwijile bansongwalume babiji baikele pa jitebe ja mu paka. Wibashijile buku wa Baibolo Ufunjisha kabiji ne kulayañana nabo kubwelako juba jalondejilepo na kwibamona. Byo abweleleko, Orlin watendekele lufunjisho lwa Baibolo na Svetomir kabiji juba jalondejilepo luno lufunjisho lwatwajijile. Pa moba atanu na ana, Orlin wafunjishe Baibolo Svetomir bimye bitanu na bisatu. Svetomir waambile amba: “Moba abiji apichilepo saka nkyangye kwimusambakana, nalombele kwi Lesa kuba amba ankwashe kumuyuka. Kabiji namulayile namba inge wankwasha, nkepana kwi aye.” Orlin byo abwelele ku Italy, balongo bakonkakwa batwajijile kufunjisha Svetomir Baibolo, kabiji ne luno ubena kuyukilako bukine.

Aba Bepana Bamona Bingi Mapesho

Nga aba bepaine kwingijisha moba abo a kukokoloka ne mali abo kuya ku kyokya kyalo na kusapwila mambo awama beumvwine byepi? Mukulumpe mu kipwilo kya mu Spain wanembele amba: “Mukwekele wajingako mu nyaunda ya Bulgaria wakwatankenye bingi pamo balongo ba mu Spain. Uno mwingilo wakwashishe bingi balongo baingijileko.” Bamulume ne mukazhi bafumine ku Italy banembele amba: “Pa bañondo bonse, uno ye ñondo wakijilemo kuwama mu bwikalo bwetu!” Kabiji banungilepo amba: “Mukwekele wapimpwile bingi bwikalo bwetu! Pano luno twapimpulwa.” Bano bamulume ne mukazhi batendekele kulangulukapo bingi kuya na kwikala ku Bulgaria na kwingijila kuji kukajilwa kukatampe. Carina ke nyenga muzhike painiya wa kimye kyonse wafumine ku Spain kuya na kukwashako mu uno mukwekele wajingako mu Silistra. Kino kyamulengejile uno nyenga kuleka nkito ya ku mubiji mu Spain ne kuya ku Bulgaria na kukwasha kipwilo kyalengelwetu mu yewa muzhi. Wasungile mali avula a kwingijisha pa mwaka yense mu Bulgaria. Pa mambo a byo afuukwilepo, Carina waambile amba: “Ne walusekelo bingi kuba amba Yehoba wanswisha kwingijila kuno ku Bulgaria, kabiji naketekela amba nkatwajijila kwingijila kuno pa kimye kyabaya. Nji na mafunjisho a Baibolo atanu, kabiji pa bano, basatu babena kutanwa ku kupwila.”

Nyenga umo mwina Italy, naye wakebelenga kwingilako uno mwingilo, pano na mambo a kuba po po atweleletu nkito, kechi wajinga na moba a kukokoloka ne. Byo akebeshe kuya, waipwizhe mukulumpe wa nkito kumupa moba a kukokoloka ne kubula kumufweta pa ñondo umo kabiji winengezhezhe kuleka nkito inge kya kuba kechi bamuswishishe kuya ne. Kintu kyamukumishe ke kya kuba’mba, mukulumpe wanji wa nkito wamwambijile amba: “Kyawama nsakukuswisha, pano kuji kintu kimo kyo wafwainwa kuba: Ukantumine kakikachi kufuma ku Bulgaria.” Pa kumvwa bino, nyenga wayukile amba Yehoba wakumbwile milombelo yanji.

Nyenga wa kyanyike wa jizhina ja Stanislava wikala mu Varna, muzhi wa mu Bulgaria, awo waingilanga nkito ya kufola muzema wa mali, waingijishe moba anji a kukokoloka kuya na kwingilako mu uno mukwekele wajingako mu Silistra. Byo amwene lusekelo lwajinga na bapainiya bavula baishile kufuma kwalepa na kusapwila mambo awama mu kyalo kyabo, mipolo yanji yalakachile. Watendekele kulanguluka pa byo aubilenga mu bwikalo bwanji, ko kuba’mba byo atangizheko nkito yanji ya ku mubiji. Byo abwelele ku nzubo panyuma ya kupitapo milungu ibiji, walekele nkito yo aingilanga ne kutendeka mwingilo wa bupainiya. Luno wiumvwa kwikala walusekelo bingi, byo avuluka Mulenga wanji mu bwanyike bwanji.—Sapwi. 12:1.

Byo jaikalapo jishuko kubambakana mu mwingilo wa Lesa! Kafwako kintu kyanema kyo mwafwainwa kuba kyakila pa kwipana kwingijisha kimye ne bulume bwenu ku mwingilo wanema wa kufunjisha ne kusapwila mambo awama ne. Nanchi kujipo mashinda amo ne anweba o mwakonsha kwingijilamo pakatampe mu uno mwingilo wa kupulusha bantu nyi? Kwakonsha kwikala mapunzha amo mu kyalo kyenu kubena kukebewa basapwishi ba kwingila. Nanchi mwakonsha kuya ku ano mapunzha na kukwashako nyi? Nangwa kampe mwakonsha kulangulukapo kufunda mulaka mukwabo pa kuba’mba mukwashe bantu mu kyalo kyenu baji na kilaka kya kufunda bukine bwa mu Baibolo. Lupimpu lonse lo mwakonsha kuba pa kuba’mba mwingilengako pakatampe mu mwingilo, mwakonsha kuketekela amba Yehoba ukemupesha.—Mana 10:22.

[Caption on page 32]

Juba jo Tukabula Kulubamo Ne

[Caption on page 32]

Bavula bafumine ku Europe kwiya na kukwashako mu uno mukwekele mu Bulgaria benengezhejile jimo kutanwa ku Kushonkena kwa Nkambi kwa “Labainga Mukenkentenga!” kwaikejile mu muzhi wa Sofia. Balongo ne banyenga ba mu kino kyalo batundaikilwe bingi byo basambakene kimye kitanshi na boba bavula bafumine mu byalo byapusana pusana. Bonse bapwijile kufika ku kibelengelo kya 2,039 basangalele bingi Mulongo Geoffrey Jackson wa mu Jibumba Jitangijila byo alupwile Baibolo yense wa New World Translation of the Holy Scriptures wa mu mulaka wa ki Bulgaria! Bonse mu luonde pa joja juba ja pa Kitanu bamwesheshe amba basanchile bingi kabiji bapopwejile pa kimye kyabaya. Bavula balakashishe ne mipolo ya lusekelo. Uno Baibolo watuntululwa bulongo mu mulaka wapela kumvwa ukakwasha bena Bulgaria baji na michima ya kishinka kuyuka Yehoba.

[Mapu pa paja 30, 31]

(Umvwe mukeba bine byambo, monai mu buku)

BULGARIA

SOFIA

Sandanski

Silistra

Kazanlak

[Bipikichala pa peja 31]

Pa milungu itanu na ibiji yaingijilwe uno mwingilo, bukamonyi bwashimwinwe bingi ku bantu