Kwita Bantu

1. Mukwekele wa kwita bantu kwiya na kutanwa ku kushonkena ukatendeka ñanyi kimye?

¹ Inge mubena kunengezhapo kijilo kikatampe ko muketa balongo benu nangwa balunda nenu, mwikala bingi na lusekelo kimye kyo mubena kwibeta. Kyo kimotu ne kushonkena. Babena kunengezha kushonkena kwa kijiiji baingila mingilo yavula bingi. Inge kwashala milungu isatu kufika kimye kya kuno kushonkena, Yehoba witupa mukwekele wa kwita bantu kwiya na kutanwako. Ñanyi bintu biketukwasha kwingila na kizaku mwingilo wa kwita bantu ku kuno kushonkena?

2. Ñanyi bintu biketutundaika kwingilako pakatampe mu mukwekele wa kwita bantu ku kushonkena?

² Tukatundaikwa kwingilako pakatampe mu mwingilo wa kwita bantu inge twalanguluka pa byo tumwenamo mu bitufunjisha Yehoba pa kushonkena kwetu. (Isa. 65:13, 14) Twafwainwa ne kuvuluka kuba’mba, mu mukwekele wetu wa kwita bantu ku kushonkena mufuma byawama bingi. (Monai kakitenguluzha ka kuba’mba “Mufuma Byawama Bingi.”) Bantu bamo botuketa bakeya na kushonkena, bino bakwabo kechi bakatanwako ne. Nangwa kya kuba kechi bonse bakeya ne, inge twaingilako pakatampe mu mukwekele wa kwita bantu, tukaleta lukumo kwi Yehoba ne kumwesha bumpanyi bwanji.—Sala. 145:3, 7; Lum. 22:17.

3. Tukasampanyanga byepi tupepala twa kwichilapo bantu ku kushonkena?

³ Jibumba ja bakulumpe mu kipwilo jikamona byafwainwa kwingila bulongo mu kipwilo kyabo pa kusampanya tupepala twa lwito mu nyaunda ya kipwilo yonse. Kabiji bakamona inge bakonsha kusha tupepala pa mazubo pabula bantu nangwa kupana tuno tupepala mu busapwishi bwa ku mvula bantu. Pa Kibelushi, mwafwainwa kusha magazini pamo na tupepala twa lwito inge kyakonsheka. Uno mukwekele byo akapwa, tukekala bingi na lusekelo lwa kuyuka’mba twaingijileko na mukoyo kwita bantu bavula kwiya na kushonkena pamo ku kijiilo kitunengezhezhe Yehoba.

Mufuma Byawama Bingi

Myaka ya kunyuma kimye nyenga umo kyo asampenyenga tupepala twa lwito, wazhinaukilenga’mba kana mu mwingilo wanji mukafuma byawama nangwa ne. Walangulukilenga’mba ‘Abya bantu bakaswa kwiya na kutanwa ku kushonkena nyi?’ Kimye kya kushonkena pa Kibelushi lukelo, uno nyenga wamwene mwanamulume uya mu bupopweshi bwa bena India waikele pepi ne aye. Uno nyenga wayile paikele uno mwanamulume ne kumubuula jizhina janji. Kyataainwe kuba’mba uno mwanamulume waishile na kushonkena mambo watambwile kapepala ka lwito. Waipwizhe mepuzho avula bingi kabiji nyenga wakumbwile onse. Kabiji waambile byo amwenejilemo mu mutanchi wa kushonkena ne byo atundaikilwe na mambo a mwekelo ne byubilo bya bantu bataainweko. Byo papichile kimye jonkaja juba, uno nyenga watendekele kwisamba na bamulume ne mukazhi baikele pepi ne aye. Ne abo batambwile kapepala ka lwito kabiji baishile na sakya ku kushonkena. Bamwenejilemo bingi mu mutanchi kabiji bafuukwilepo kwiya na kutaanwako ne pa Mulungu. Kepo nyenga ayukile’mba mwingilo wa kwita bantu kwiya na kushonkena wanema bingi.
Pa kushonkena kwajingako katataka, bamulume ne mukazhi bapainiya ba kimye kyonse besambile na bamulume ne mukazhi bakikulumpe. Bano bamulume ne mukazhi baambile’mba kyo kyajinga kimye kyabo kitanshi kutaanwa ku kushonkena. Bano bapainiya bebepwizhe’mba: “Bañanyi bemwichile?” Abo bakumbwile’mba: “Byo twabwelele pa nzubo juba jimo, twataaine kapepala ka lwito pa kibelo.” Bano bamulume ne mukazhi batangile kano kapepala ka lwito kabiji banembele ne kapepala ka kwipwizhapo buku ne muntu wa kwibafunjisha Baibolo kajinga kunyuma ya kapepala ka lwito. Bakamonyi bakwabo bataainwe ku kushonkena bajiile kajo ka pa chaile na bano bamulume ne mukazhi. Bamwenejilemo bingi mu mutanchi kya kuba bafuukwilepo ne kwiya na kutaanwako juba jalondejilepo. Banengezhezhe kuya na kwibafwakesha bano bamulume ne mukazhi panyuma ya kushonkena.