Nakebeshenga Bwikalo Bwa Peulu
Byashimikizha ba Zoya Dimitrova
Byo nafikizhe myaka ya kusemwa 15, natendekele kwikala bwikalo bo nakebelenga, bwikalo bwa kwendela pa makalaki ne kukaya makayo a kutombauka. Pano pa 4 September, 1970, kwamwekele kya malwa. Byo nakayilenga bulongo makayo a kufutuzhuka mu mwela, nabazhimukiletu nevumba panshi.
NASEMEKELWE pa 16 December, 1952, kabiji naikalanga na bansemi ne nkasami wa mukazhi mu mpunzha ya Sofia, mu kyalo kya Bulgaria. Pa kyokya kimye, kyalo kya Bulgaria kyalamwanga na kafulumende wa Komyunisiti mo baswishishe bya bupopweshi, pano bino kechi batundaikanga bantu kwikala mu bupopweshi ne. Bantu bavula kechi baitabijile mwi Lesa ne, kabiji aba baitabijile, bavula bapopwelangatu kya kufyamuzhuka. Nangwa kya kuba ba mu kisemi kyami bajinga mu kipwilo kya Orthodox, kafwako kyo nayukilepo pa bupopweshi ne, kabiji kechi nalangulukilengapo pe Lesa ne.
Kufumatu ku bwanyike bwami, natemenwe bingi makayo avula, kikatakata makayo a kufutuzhuka. Byo nafikizhe myaka ya kusemwa 13, mwanamulume umo waishile pa sukulu wetu na kukeba nsongwakazhi wa kufunjisha ano onka makayo. Mufunjishi wami wafunjishanga ano makayo a kufutuzhuka wantongwele. Natemenwe bingi pa kwenda mu motoka wa kina America wa bakulumpe ba nkito, ne kuntwala na kuntebawizha ne kungeseka ku bayuka ano makayo. Natemenwe bingi pa kunsala. Ino yo yajinga ntendekelo ya kufunda ne kupituluka mu ano makayo o nafunjiletu kukila pa myaka ibiji. Byo nafikizhe myaka 15, napwishishe kufunda, kabiji natendekele kwikala bwikalo bwa peulu, buno bwajinga bwikalo bwa kwendela pa makalaki. Patanshi napitañene mu kyalo kyonse kya Bulgaria ne kuya mu byalo byo batelanga amba Soviet Union, kepo nayile ne ku Algeria, Hungary, ne ku kyalo kyatelwanga kala amba Yugoslavia.
Pa myaka isatu ya lusekelo, naikelenga bwikalo bo nakebelenga. Pano juba jimo byo nakailenga mu Titov Veles, mu Macedonia, mapuso aambiwapo kala po po amwekele. Nakailenga makayo a kufutuzhuka ne kubakama peulu kusha bantu munshi. Mukwetu ye nakailenga nanji wantayile mwiulu kabiji ne kumbaka. Napushile maboko anji, kabiji lutambo ye nafwainwe kukwatako naye wachibikile, po po nevumbile panshi kufuma peulu palepele mamita 6. Banyemesheshe ku kipatela, ko bataine kuba’mba namokoka kuboko, mbavu yavula ne longololo. Kyamvulañenye bingi maana pa moba amo kabiji kechi nayukile kyaubiwe ne. Byo naumvwineko bulongo, nayukile amba mubiji wami walekele kwingila kufuma mu musana kuya kya ku maulu. Pano bino, na mambo a kuba nakijinga mwanyike, nayukile amba umvwe bampa muchi nangwa kuntumbula ku kipatela, nkendanga jikwabo kabiji kampe nkabwela jibiji ku makayo ami.
Pa myaka ibiji ne kichika yalondejilepo, naendaukile mu bipatela byapusana pusana, kabiji nakijinga na luketekelo lwa kuba’mba nkakosa. Kyapeleleko naishile kuswa amba kyapwa bunga bwapwila pa mpuki. Nakebanga bingi kwikala “bwikalo bwa peulu,” pano luno ke kwendatu pa kakinga ka balemana.
Natendekele Kwikala Bwikalo Bukwabo
Panyuma ya kwikala buno bwikalo bwa peulu, nalangulukile kuba’mba kisakunkatazha kutendeka bwikalo bukwabo. Byo namwene amba kechi nkakosa ne, naikele bingi na binyenge. Mu 1977, nsongwalume wa jizhina ja Stoyan waishile pa nzubo yami. Byo nayukile kuba’mba wajinga kolojanji mukwetu mo twakailanga, ponkapotu namutwezhezhe mu nzubo. Byo twisambilenga, wangipwizhe inge kya kuba naketekela amba nkakosa. Na mambo a kulefulwa, namukumbwile amba kechi nkakosa ne. Byo añambijile amba Lesa ye wakonsha kunkwasha, namukumbwile na bukaji amba: “Inge Lesa ko aji, nga mambo ka o mbena kuyanjila bibye?”
Byo naambile bino byambo, Stoyan awo waikele Kamonyi wa kwa Yehoba kimye kyo ajinga mu United States mo akayilenga makayo a kufutuzhuka, wandondolwejile na kifyele milaye ya mu Baibolo ya kulutwe. Natemenwe bingi pa kufunda amba katatakatu ino ntanda ikekale ke paladisa. Mulaye wa kuba’mba, “lufu kechi lukekalako jibiji ne; nangwa mabingo, nangwa kujila, nangwa misongo, kechi bikekalako jibiji ne” wamfikile bingi pa muchima. (Lumwekesho 21:4) Natongelenga bingi kimye kyo nkakosa jikwabo. Ponkapotu naswile kufunda Baibolo kimye kyonse. Ino yo yajinga ntendekelo ya bwikalo bukwabo. Pano luno nji na luketekelo lwa kine.
Nakebeshanga bingi kufunda Baibolo pa mulungu pa mulungu. Pa kutendeka bamfunjishanga kwi Stoyan kabiji mu kuya kwa kimye Kamonyi mukwabo wajinga bingi na kifyele wa jizhina ja Totka ye watendekele kumfunjisha. Wankwashishe bingi, kabiji nayukile bingi bukiji bukine bwa mu Baibolo, kepo nepaine kwi Yehoba Lesa. Pa kyokya kimye mu Sofia kechi mwajingapo muntu wafikijilemo kubatizha bantu ne, onkao mambo, napembejile mulongo waishile na kufwakasha kufuma ku Macedonia. Pa 11 September, 1978, byo papichile nobe mwaka umo kufuma po natendekejile kufunda Baibolo, bambatizhe mu mvukuto ikatampe yakowelamo yajinga mu nzubo yami. Byo nabatizhiwe ne kwikala Kamonyi wa kwa Yehoba, najinga bingi na lusekelo, kabiji bwikalo bwami bwawamine.
Bukine bwa mu Baibolo bo nafunjile bwatemenenga nobe mujilo mu mubiji wami. Nesambanga na bantu bonse baiyanga pa nzubo yami pa mambo a luketekelo lwami lwa katataka. Kyataminekotu ke kya kuba’mba, kafwako nangwa umo wantelenga muchima ne, kampe balangulukilenga amba navulañana na mambo a mapuso.
Kilubo Kikatampe
Pa kyokya kimye, Bakamonyi ba kwa Yehoba bebalekeshe mwingilo wabo mu Bulgaria, kabiji mwajingatu Bakamonyi ba kubala mu kyalo kyonse. Kechi kwaikalanga kupwila kwa pa kipwilo ko nafwainwe kutanwa ne, kabiji twapwanañanangatu na balongo bacheche ba mu lwitabilo. Kubula kuba bino bintu, ne kubula kuyuka kizumba kiji mu kupwanañana na bantu babula kulondela mizhilo iji mu Baibolo, kwandengejile kuba kilubo kikatampe.
Jiwi jami ja mu muchima jankatezhenga bingi, kabiji kyankolele bingi pa kwipatula kwi Yehoba Lesa. Najinga na bulanda ne kumvwa bumvu, kabiji nalombele kwi Yehoba na muchima wami yense ne kumusashijila amba andekeleko mambo. Bakulumpe mu kipwilo ba bwina Kilishitu kabiji baji na butemwe bankwashishe kubwezha bulunda bwami ne Yehoba, kabiji natendekele jibiji kumwingijila na lusekelo. Nsanta bingi pa kwikala na jishuko ja kwingijila Yehoba na jiwi ja mu muchima jatoka ne kupwanañena pamo na jibumba janji jatoka.
Nji Bingi na Lusekelo Nangwa kya Kuba Nalemana
Ano mapuso ammwekejile myaka 40 yapitapo aonawine bwikalo bwami bwa kukaya ne kupitañana, kabiji andengejile kutendeka kwendela pa kakinga ka balemana. Pano bino inge navuluka bwikalo bwami bwa kunyuma kechi ñumvwa bulanda ne kwilangulusha uba nobe bwikalo bwami bwatama ne. Bukine bwa mu Baibolo bwankwasha bingi kuyuka amba kukeba kwikala bwikalo bwa peulu ne lusekelo lufuma mu makayo ke bya kakimyetu kacheche. Nemwena bantu bo nakayanga nabo batwajijile na ano makayo a kufutuzhuka byo babena kuyanda mu bwikalo bwabo. Pakuba amiwa natana kintu kya buneme kyabaya bingi, ko kuba’mba bulunda bwami na Mulenga wami, aye Yehoba Lesa. Kino kyandengela kwikala na lusekelo lwabaya bingi lo nafwainwe kubula kwikala nalo inge naji natwajijile na kukaya makayo a kufutuzhuka.
Kikwabo, nji na lusekelo lwa kumona bantu bavula saka babena kuyuka bukine bwa mu Baibolo ne kwipana kwi Lesa wetu wa butemwe aye Yehoba. Byo natendekele kufunda Baibolo mu 1977, mu Bulgaria mwajingatu Bakamonyi ba kwa Yehoba bacheche. Nangwatu ku kupwa kwa 1991, pa kimye kitanshi Bakamonyi ba kwa Yehoba kyo bebanembesheshe mu jifunde panyuma ya kupona kwa kafulumende wa Komyunisiti, Bakamonyi kechi bafikile ne kitota kimo mu kyalo kyonse ne. Nji bingi na lusekelo kumona basapwishi ba Bufumu byo bavujilako luno kufika pa kibelengelo pepi na 1,800.
Kukiji mwingilo wabaya wa kwingila mu Bulgaria. Bantu bavula babena kukeba kuyuka Mambo a Lesa. Kino kyamwekela mu kibelengelo kikatampe kya bantu 3,914 batainwe ku Kivuluko kya lufu lwa kwa Kilishitu kya mu 2010. Kindetela bingi lusekelo pa kumona kino kishiino kya kuba’mba Yehoba ubena kupesha jibumba jajingatu jicheche mu Bulgaria. Nemwena na meso ami “awa mucheche” byo akomenako ne kwikala “ke mukoka wakosa” byonka byaambijile jimo kinembelo kya Isaya 60:22.
Kintu kikwabo kikatampe kindetela lusekelo mu bwikalo bwami ke kulupulwa kwa Baibolo wa New World Translation of the Holy Scriptures mu mulaka wa kina Bulgaria. Uno Baibolo walupwilwe mu August 2009 pa Kushonkena kwa Nkambi kwaikejile mu Sofia kwajinga na kishina kya kuba’mba, “Labainga Mukenkentenga!” Kulupulwa kwa uno Baibolo mu mulaka wami ke kintu kyo nakebeshenga. Kwakubula nangwa kuzhinaukatu ne, uno Baibolo ukakwasha bantu bavula kuyuka maana a bukine bwa mu Baibolo mu Bulgaria.
Nangwa kya kuba kulemana kundengela kubula kwingila kyabaya mu mwingilo wa kusapwila mambo awama a Bufumu bwa Lesa, ngikala na lusekelo lwa kwisamba bukine bwa mu Baibolo na ba kinkalankulo ne bonse beya pa nzubo yami. Juba jimo, naichile wa kinkalankulo wapichilenga saka naikala mu bukonde bwa nzubo. Byo aishile, nesambile nanji byambo bya lutundaiko bya mu Baibolo, ponkapotu waswile kumufunjisha Baibolo. Najinga bingi na lusekelo, mambo byo papichile kimye wabatizhiwe ne kwikala nyenga yami wa ku mupashi. Nakwasha bantu bana kwipana kwi Yehoba.
Lusekelo lwami lukatampe lufuma mu kutanwa kimye kyonse ku kupwila kwa bwina Kilishitu pamo na balongo ne banyenga bakila pa kitota kimo, baikala nobe kisemi kyami. Byo ngikala mu kyalo mo babula kunengezhezha bakikulumpe ne balemana bya ñendelo, kinkatazha bingi kuya ku kipwilo. Bino nsanchila bingi mulongo wakyanyike pa byo ankwasha mu butemwe. Kimye kyonse pa kuya ku kupwila, unsenda kufuma mu nzubo yami ne kunkanjizha mu motoka wanji, kabiji ne kumfumya mu motoka wanji kuntwezha mu Nzubo ya Bufumu ne pa kubwela byonkabyo. Namusanchila bingi Yehoba pa kwikala mu kino kisemi kya ku mupashi kiji na butemwe.
Umvwe nalanguluka pa bya kunyuma, nekitana kuba’mba bintu mu bwikalo bwami byapusana na byo nakebeshenga byo nakijinga mwanyike. Kwingijila Yehoba kundetela lusekelo lwabaya bingi, kabiji ne luketekelo lwawama lwa kulutwe. Nanemeka bingi mulaye wa Lesa wa kuba’mba mu paladisa pano pa ntanda, “walemana kulu ukakilauka nobe lupala.” (Isaya 35:6) Mbena kutengela juba jo nkaleka kwendela mu kakinga ka balemana ne kwikala na butuntulu bwa mubiji bwalumbuluka.
[Mabulañano pa peja 20]
“Lusekelo lwami lukatampe lufuma mu kutanwa kimye kyonse ku kupwila kwa bwina Kilishitu”
[Mabulañano pa peja 21]
“Kintu kikwabo kikatampe kindetela lusekelo mu bwikalo bwami ke kulupulwa kwa Baibolo wa New World Translation of the Holy Scriptures mu mulaka wa kina Bulgaria”
[Kipikichala pa peja 19]
Natendekele bwikalo bwami bwa kukaya byo nafikizhe myaka ya kusemwa 15