Fundainga Mambo A Lesa
Mambo ka Lesa o Aswishisha Bubi ne Buyanji?
Kino kibaba kyaamba pa mepuzho kampe o mwakiipuzhapo kala kabiji kyamwesha ne po mwakonsha kutana mikumbu mu Baibolo wenu. Bakamonyi ba kwa Yehoba bakatemwa bingi kwisamba nenu pa ino mikumbu.
1. Bubi bwatendekele byepi?
Bubi pano pa ntanda bwatendekele kimye Satana kyo abepele bubela butanshi. Satana kechi wajinga mubi kimye kyo bamulengele ne. Wajinga malaika walumbuluka, pano bino ‘kechi watwajijile kwikala mu bukine ne.’ (Yoano 8:44) Watendekele kukumbwa mpopwelo yafwainwetu kuya kwi Lesa kwapwa. Satana wabepele mwanamukazhi mutanshi Evwa, ne kumujimbaika kuba’mba amukokele aye, mu kifulo kya kukokela Lesa. Adama naye walondejile Evwa ne kusatukila Lesa. Kufuukulapo kwa kwa Adama kwaletele buyanji ne lufu.—Tangai Ntendekelo 3:1-6, 17-19.
Satana byo aambijile Evwa kusatukila Lesa, wamutundaikilenga kusatukila bumfumu bwa Lesa. Bantu bavula balondela Satana mu kukana amba Lesa kechi ye Kalama ne. Mu jino jishinda, Satana waikala ke “mfumu wa panopantanda.”—Tangai Yoano 14:30; Lumwekesho 12:9.
2. Nanchi bilengwa bya Lesa byajinga byabula kulumbuluka nyi?
Lesa byo alengele bantu ne bamalaika, wibalengele balumbuluka bafwainwe kukokela mikambizho yanji. (Mpitulukilo ya mu mizhilo 32:5) Lesa witulengele na lūsa lwa kwifuukwila kuba kyawama nangwa kyatama. Abwa bwana bwa bene bwitulengela kumwesha butemwe bwetu pe Lesa.—Tangai Yakoba 1:13-15; 1 Yoano 5:3.
3. Mambo ka Lesa o aswishisha buyanji?
Pa kino kimye, Yehoba waswisha buno bunsatuki bwa kusatukila bumfumu bwanji. Mambo ka? Pa kuba’mba bantu bayuke amba kechi bakonsha kulama bulongo kwakubula aye ne. (Yelemiya 10:23) Pa myaka 6,000 yapitapo ya bukalama bwa bantu, ano mambo ayukanyikwa bulongo. Bukalama bwa bantu bwakankalwa kufumyapo nkondo, bumbanzhi, nshiji ne bikola.—Tangai Musapwishi 7:29; 8:9; Loma 9:17.
Pakuba aba baswa amba Lesa ye Kalama wabo bamwenamo byawama. (Isaya 48:17, 18) Katatakatu Yehoba akonaune makafulumende a bantu onse ajipo. Bantu basalapo kulamwa ne Lesa bo bonkatu bakaswana ntanda.—Isaya 2:3, 4; 11:9; tangai Danyela 2:44.
4. Lesa byo etutekenya witupa kimye kya kuba ka?
Satana waambile’mba bantu kechi bakonsha kukokela Yehoba ne. Lesa byo etutekenya witupa atweba bonse kimye kya kumwesha umvwe tukeba bukalama bwa Lesa nangwa bwa bantu. Bintu byo tuba mu bwikalo bwetu byo bimwesha ye twasala kwikala kalama wetu.—Tangai Yoba 1:8-11; Byambo bya Mana 27:11.
5. Tusala byepi Lesa kwikala Kalama wetu?
Tusala Lesa kwikala Kalama wetu inge ketukebe mpopwelo ya kine ne kuba byanembwa mu Mambo anji, Baibolo. (Yoano 4:23) Kabiji tukana kwivwanga mu bya bumulwila ntanda ne nkondo byonka byakaine Yesu.—Tangai Yoano 17:14.
Satana wingijisha bulume bwanji kutundaika byubilo byatama. Umvwe twakana bino byubilo, balunda netu ne balongo betu bamo bakonsha kwitwendeleka nangwa kwitukanya kuba byawama. (1 Petelo 4:3, 4) Onkao mambo, tukebewa kufuukulapo bya kuba. Nanchi tupwanañananga na bantu batemwa Lesa nyi? Abya tukokelanga mizhilo yanji yawama kabiji ya butemwe nyi? Inge ke tube bino, tumwesha amba Satana wabepele byo aambile amba kafwako muntu wakonsha kuba byaamba Lesa ne.—Tangai 1 Kolinda 6:9, 10; 15:33.
Umvwe mukeba kuyukilako byavula, monai kitango 11 kya uno buku, wanembwa na Bakamonyi ba kwa Yehoba.
[Kipikichala pa peja 16]
Adama wafuukwilepo kutama
[Kipikichala pa peja 17]
Bintu byo tuba mu bwikalo bwetu bimwesha amba twasala Lesa kwikala Kalama wetu nangwa ne