Tekeneshainga Bafwisha Balongo Babo Byonka Byaubanga Yesu
LAZALASA waikalanga mu muzhi wa Betani, wakolelwe kya kuba pabokwelengatu. Banyenga yanji ba Mata ne Maliya batumine bantu ba kuya na kwita mulunda nabo Yesu. Kyapeleleko Lazalasa wafwile. Byo bamubikile mu kilende, bakinkalankulo ne balunda nabo baishile kwi Mata ne Maliya na ‘kwibatekenesha.’ (Yoano 11:19) Yesu byo afikile mu muzhi wa Betani wayile na kumona balunda nanji. Ku byaambile Yesu ne byo aubile tusa kufunjilako bya kutekesha bafwisha balongo babo.
Inge Mwatanwako Kimwesha’mba Mwibata Muchima
Yesu waendele museke wa moba a biji pa kuba’mba afike ku Betani, waabukile mukola wa Yodano ne kupita mu jishinda mwavujile mikolo jafumine ku Yeliko. Mata wayile na kutambwila Yesu kwapela muzhi. Maliya byo aumvwine amba Yesu waiya, naye wayile bukiji bukiji na kumumona. (Yoano 10:40-42; 11:6, 17-20, 28, 29) Kwiya kwa kwa Yesu kwatekeneshe bingi bano banabakazhi bajinga na bulanda.
Ne lelo jino umvwe twashinkwa ku majila kibatekenesha bingi baji na bulanda. Ba Scott ne Lydia bafwishishe mwana wamulume wa myaka itanu na umo mu mapuso bakivuluka’mba: “Kyo kimye kyakebewenga balongo ne balunda bakwitukwasha. Byo bafikile pakachi ka bufuku, bapitaijiletu ku kipatela.” Pano nga bano balunda nabo baambilepo’mba ka ? Abo bene Scott ne Lydia baambile’mba: “Pa kyo kya kimye kechi twakebelenga amba bambe biji byonse ne. Bino kwiya kwabo kwamwesheshe amba betuta bingi muchima.”
Baibolo waamba’mba Yesu byo amwene bantu babena kujila Lazalasa, naye “kyamukolele bingi ku muchima” kabiji “wajijile ne mipolo.” (Yoano 11:33-35, 38) Yesu kechi waumvwine bumvu kujila pa bantu ne. Naye kyamukolele bingi ku muchima. Ki ka kyo twafunjilako? Umvwe twaya ku kijilo kechi twafwainwa kumvwanga bumvu kujila na bena kujila ne. (Loma 12:15) Pano bino kechi twafwainwa kwibalengela kukizhamo kujila ne. Bamo basalapo kujijila ku mbaji.
Telekainga byo Babena Kwamba
Yesu wafwainwa wajinga na byambo bya kwibatekenesha ba Mata ne Maliya, bino kechi ke wajile kabakubaku ne, wibalekele baamba patanshi. (Yoano 11:20, 21, 32) Byo esambilenga ne Mata, wamwipwizhe bwipuzho, wabwela kateleke.—Yoano 11:25-27.
Kuteleka kumwesha’mba mwibata muchima. Pa kuba’mba tutekeneshe baji na bulanda, twafwainwa kuteleka byo babena kwamba. Pa kuba’mba tumweshe’mba tubena kuteleka, twafwainwa kwibepuzha mepuzho akonsha kwibalengela kwamba biji ku muchima. Bino mwafwainwa kujimuka, kechi kyawama kwibakanjikizha kwamba ne. Kimo kimye bakoka babena kukeba kukokoloka.
Bantu baji na kijilo kibashinka bingi bulaka kabiji bimye bimo bakeba bingi kwambapo. Bamo bamba biji ku muchima. Maliya ne Mata babujile Yesu amba: “Nkambo, inge mwajinga kuno, kolojetu inge kechi wafwile ne.” (Yoano 11:21, 32) Pano nga Yesu waubile byepi? Wibobile lusa kabiji watelekele kasa atekanya. Kechi wibabujilenga bya kuba ne. Bino wayukile byo kibakolele ku muchima.
Umvwe kechi mwayuka bya kwamba pa kutekenesha bafwisha ne, mwakonsha kwibabulatu amba: “Inge paji byo mubena kukeba kwamba, mwakonsha kwamba.” Apa bino mwateleka byo basa kwimukumbula. Teshaiko muchima ku byo babena kwamba. Batalainga ne kuyuka byo babena kwiumvwa.
Kuyuka bibena kumvwa muntu wafwisha kechi kwapela ne. Ba Lydia baambile’mba: “Kitupezhezhe bingi maana. Kimye kimo twajijilenga kya kine kine pa meso a bantu baiya. Bakwetu betumvwijilengatu lusa. Baubile bingi bulongo pa kwituta muchima.”
Yesu ye mwine wayukanga byaumvwanga bantu. Wayukanga “kumanama kwa michima yabo.” (2 Byambo bya Moba 6:29) Yesu wisambile na banabakazhi babiji mu jishinda japusana. Mata waambilenga, ne Yesu naye wisambilenga nanji. Pakuba Maliya wajijilenga, ne Yesu kechi wisambile nanji kimye kyabaya ne. (Yoano 11:20-28, 32-35) Twakonsha kufunjilako ka? Kimo kimye kyawama kuleka mwine uji na bulanda kutendeka mwisambo. Kuteleka ku byo babena kwamba kwakonsha kwibatekenesha bingi.
Byambo Bikoseshañana
Ba Maliya ne Mata byo bamwambijile amba “inge mwajinga kuno,” Yesu kechi wazhingijile pa byo baambile ne. Wamwambijile Mata amba: “Kolojobe usakusanguka.” (Yoano 11:23) Na bino byambo bichechetu, Yesu wavulwilemo Mata pa luketekelo lwa kulutwe ne kuba’mba kolojanji wakonsha kusanguka.
Umvwe tubena kwisamba na baji na bulanda, twafwainwa kuvuluka kuba’mba byambo byawama nangwa bichechetu byanema bingi. Mwakonsha kunemba nangwa kwamba byambo bya lutekenesho. Byo kiji kuba’mba mu nkalata muntu wakonsha kutangamo bimye byavula, ko kuba’mba yakonsha kumutekenesha pa moba avula. Byo papichile bañondo batanu na bana kufuma pafwijile ba Bob bamwatawabo, ba Kath batanganga javula makalata o bebatuminanga. Baambile’mba: “Ankwashishe bingi pa kyokya kimye. O antekeneshanga.”
Ñanyi bintu byo mwakonsha kunemba pa kutekenesha baji na bulanda? Mwakonsha kunemba pa wafwa nangwa byamwekele kasa muji nanji ne pa byubilo byanji byawama. Ba Kath baambile’mba: “Byambo byawama byo banembanga pe ba Bob byandengelanga kumwemwesela ne kujila pa kimye kimo. Byambo byo banemba bulongo byandengelanga kuchiima na tuseko ne kuvuluka byo twaikalanga bulongo. Mu makalata amo banembangamo binembelo bya mu Baibolo byo mbula kulubamo.”
Bakwashainga
Pa kutekenesha ba mu kisemi kya kwa Lazalasa, Yesu waubile kintu kyo twakonsha kubula kuba. Wasangwile Lazalasa. (Yoano 11:43, 44) Bino ne atweba twakonsha kubapo bimo byakonsha kwibakwasha, nabiji kwibanengezha kajo, kwibakwashako kutambwila benyi, kwibachapilako bivwalo, kwibalaminako baana, kuya na kwibasendelako bintu nangwa kwibasendako na motoka pa kuya ku mapunzha amo. Bintu bicheche byo twibobila bafwisha byanema bingi.
Bino bafwisha bakeba kwikala bunke pa bimye bimo. Nangwa byonkabyo, kyawama kumonapo tubimye twa kwisamba nabo. Nsemi umo wajinga na bulanda waambile’mba: “Bulanda kechi bupwa bukiji ne.” Bamo bavuluka bafwa pa bimye bimo mu mwaka, nabiji juba jo besongwele nangwa jo afwile. Kuya na kwibafwakesha pa bimye bya uno mutundu kwanema bingi, kabiji ne abo bakonsha kwimuketekela.—Byambo bya Mana 17:17.
Yesu wibatekeneshe ne pa kwibabula byambo byaletele luketekelo ku baana banji ba bwanga bya kuba’mba: “Mukwetu Lazalasa walala tulo; pakuba amiwa ngya, nkamubushe mu tulo.” (Yoano 11:11) Yesu walayile baana banji ba bwanga kuba’mba kukekala lusanguko lwa bafwa. Waipwizhe Mata amba: “Wibitabila bino nyi?” Mata wakumbwile’mba: “Ee, Nkambo.”—Yoano 11:24-27.
Nanchi ne anweba mwasumininwa’mba Yesu ukasangula bafwa nyi? Umvwe ibyo, bulaingako bafwisha wa mu kisemi luno luketekelo. Bakwashainga ne kwibatekenesha. Byambo byenu ne byo mwibobila bibatekenesha bingi.—1 Yoano 3:18.
[Mapu pa paja 18]
(For fully formatted text, see publication)
PELIA
Mukola wa Yodano
Yeliko
Betani
Kalunga ka Mukele
Yelusalema
SAMALIYA